Itre Ka Sipu Saene—E Philippines

NGÖNE la treene lao macatre ka ase hë, hnei Gregorio me Marilou, lue trefën, thupëtresiji me föe hmae hna pionie e Manille. Nge ngöne la ijine cili, nyidroti fe a huliwa i maseta, drai ka pexej. Ngacama nango jole pi hë, ngo ketre atreine hi nyidro ce xom. Thupene jë hi, ami Marilou jë hi troa hene ka tru ne la baak hnei angeice hna huliwa ngön. Öni angeic: “Lolo catre la mele i nyiho qa ngöne la lue huliwa i nyiho.” Celë hi matre nyidroti a mekune ju troa xupe la ketre uma hnei nyidroti hna piin, ngöne la ketre götrane ka mama ne la nöje cili 19 lae kilomet qaa Manille. Hnei nyidroti hna ce wange memine la ketre ka xupi uma, matre troa acile la uma i nyidro; nge treene lao macatre ne tro nyidroti a nyithupen.

“ENI HA QENATREKËNÖ IEHOVA”

Öni Marilou: “Tru la traeme me trenge catrenge hna xome hnene la huliwang, nge kola nanazije la ajange kowe la itre huliwa ngöne la götrane la u. Kösë lo eni ha qenatrekënö Iehova. Tha ijijinge hë troa hamëne koi Iehova la itre hawa hna amekötine koi ni.” Hace koi Gregorio me Marilou la ewekë cili; nyidroti pë hë a pane lapa ju ngöne la ketre drai, troa ithanatane la aqane tro nyidroti a xomiujine la mele i nyidro. Öni Gregorio: “Pi tro nyiho a saze la aqane mele i nyiho, ngo tha mama  kö koi nyiho la nyine troa kuca. Hnei nyiho hna ithanatane la aqane tro nyiho a huliwa catre koi Iehova, ke pëkö nekö i nyiho. Ame hnei nyiho hna thithi koi Iehova troa xatua nyiho.”

Ame ngöne la ketre ijin, hnei nyidroti hna drenge la itre cainöje ka thuecatrene la itre atr troa tro kowe la itre götrane gaa aja ixatua göi troa cainöje trootro. Öni Gregorio: “Drenge ju hi nyiho, ka hape Iehova ha sa la itre thith i nyiho jëne la itre cainöje cili.” Hnene la lue trefëne hna thith matre troa acatrene la lapaune i nyidro, nge ketre, matre hetre trenge catre i nyidroti jë troa amekötine hnyawa la nyine troa kuca. Ame la ketre jole ka tru, tre tha fenesi pala kö nyithupene lo uma. Köni macatre ne kolo petre hi a nyithupen. Nemene jë la nyine tro nyidroti a kuca? Öni Marilou: “E tha traqa kö kowe la pune lo itre macatre hna amekötine göi troa nyithupen, tru la manie i nyiho ka luuz. Ngo nyiho e nyipine la lue ewekë: troa tro pane la aja i Iehova, maine itre aja i nyiho?” Mekune jë hi nyidroti lo itre trenge ithanata i Paulo aposetolo, nge “tha nyipi ewekëne” ju pë hë nyidroti lai uma, ame hnei nyidroti hna nu, me tro trije la huliwa i nyidro, me salemëne la itre ewekë i nyidro. Nge nyidroti a mejë jë kowe la ketre hnapet ne Palawan, kösë 480 lae kilomet ngöne la götrane kolojë ne Manille.—Fil. 3:8.

“HNA INI” NYIDRO

Qëmekene tro Gregorio me Marilou a mejë kowe lai hnapet, hnei nyidroti hna pane mekune me hnëkëne la aqane tro nyidroti a melëne hi la ka ijij. Thatre pi kö nyidro la pengöne la mele ngöne la götrane hnei nyidroti hna tro kow, uti hë la nyidro a traqa e cili. Öni Marilou: “Tha fene hace kö, ke pëkö tirisite, nge pë fe kö e celë lo itre ewekë hnei nyiho hna majemine hetreny. Tha kolo hmaca kö a atrone la laes ngöne la öle hna saane ngöne tirisite, ngo kolo ha athi eë. Patre hë lo itre setroa ka tru, tha tro hmaca kö koi itre ume xen, me itre ewekë hna majemine melëne ngöne la traon.” Ngo ame pe, nyidroti pala hi a ithuecatrekeu, me iamekunënekeun la kepine matre mejë jë nyidro; nge ame hë e thupen, ketre majemi hë nyidro. Öni Marilou: “Ame hë enehila, hetre madrineng troa goeëne la elolone la itre ewekë hnenge hna goeëne e celë, tune la itre wëtresiji ka mel e jidr. Ame kö la ka thue madrine i nyiho catr, tre ene la nyiho a goeëne la madrine ka eje ngöne la iqëmeke ne la itre atr, ngöne la nyiho a cainöje koi angatr. Hnene la huliwa i nyiho e celë ‘hna ini’ nyiho tro hi a melëne la ka ijij.”—Fil. 4:12.

Kola qaja hnei Gregorio ka hape: “Ame la nyiho a traqa e celë, tre ala foa hi lae Atre Anyipici Iehova. Tru la madrine i angatr la eni a cile fë cainöj e nöjei wiik, me lepe gitarëne la itre nyima ne hmi.” Hnene la lue trefëne hna goeëne la kola kökötre trootro lai gurup, uti hë la ekalesia ha, nge 24 lae ka cainöje trootro. Öni Gregorio: “Kola ketr catrëne la hni nyiho hnene la ihnimi hnei nyiho hna kapa qaathene la ekalesia.” Ame enehila, thupene la sikisi lao macatre ne huliwa ngöne la hnapeti celë, öni nyidro: “Pë hmaca ju kö ketre madrine ka sisitria  hune la nyiho a öhne la itre atr a kökötre ngöne la götrane la u. Nyiho petre hi a drenge ka hape, hetre aliene catre la mele i nyiho.”

“ATRE HË NI LAKA KA IHNIMI IEHOVA!”

Ame e Philippines, traqa koi 3 000 la etrune la itre trejin, föe me trahmany, ka mejë kowe la itre götrane gaa aja ka cainöje trootro. Ala 500 qaathei angatr la itre trejine föe ka pë föen. Karen la ketre e angatr.

Ame enehila, 20 nge sin lao macatre i Karen. Hna hetru angeic e Baggao, e Cagayan. Ame petre kö lo angeic a thöth, angeice ha mekune troa cainöj atruny. Öni angeic: “Atre hë ni laka saqe hë la drai Iehova, nge loi e tro la nöjei atr a hane drenge la maca ne la Baselaia. Qa ngöne lai, tru la ajang troa huliwa i Akötresie ngöne la ketre götrane gaa aja ka cainöje trootro.” Hnene la itre xa atrene la hnepe lapa i angeic hna uku angeic troa tro kowe la itre hna ini ka tru, hune la troa cainöje ngöne la itre götrane gaa aja ixatua. Ame hnei Karen hna thithi koi Iehova troa xatua angeic. Hnei angeice fe hna ithanata memine la itre ka cainöje ngöne la itre götrane gaa aja ixatua. Matre ame hë la kola 18 lao macatre i angeic, hnei angeice hna mejë kowe la ketre götran, 64 lao kilomet qa ngöne la hnalapa i angeic.

Ame la nekö i ekalesia hnei Karen hna tro kow, tre gaa tru hnei wetr nge ka qëmeke kowe la Pasifik. Karen a qeje pengöne me hape: “Ame qa Baggao kowe lai ekalesia, tro huni a pane tro koi köni drai, nge hne huni hna elëne me utine la itre wetr, nge a 30 lao thupa la itre hneopegejë. Qëmekene troa traqa thene la itre hne huni hna ini Tusi kow, tro lai a pane tro koi sikisi lao hawa, nge meköle ju hë huni thei angatr, nge elanyi hë, sikisi hmaca kö lao hawa ne tro, matre bëeke jë kowe la hnalapa.” Ngo hapeu ka gufa kö la itre ewekë cili? Kola hnyima hnei Karen me sa ka hape: “Ame itre xa ijin, akötre jë hë la lue cang, ngo ame la eloin, 18 lao atr hnenge hna ini Tusi Hmitrötre kow. Eni hi lai a ‘dreme ju, me atre laka atre ihnimi Iehova.’—Sal. 34:8.

“ENI PETRE HI LAI A ININE MEJIUNE KOI IEHOVA”

Nemene la ka upi Sukhi, ketre trejine föe ka pë föene nge ka 40 hë lao macatre, troa mejë qa Amerika a tro Philippines? Ame lo macatre 2011 hnei angeice hna sine la asabele ne sirkoskripsio, nge e cili kola hnyingë pengöne la huliwa ne la lue trefën. Hnei nyidroti hna qeje pengöne la aqane salemëne nyidro la nöjei ewekë i nyidro, matre feke jë nyidro a tro Mexique troa ixatua cainöje trootro e cili. Öni Sukhi: “Qa ngöne la hnei nyidroti hna qaja, traqa pi hi la mekune koi ni.” Ame la itre xötrapane i Sukhi tre, angetre Inde, nge drei mejene jë hi angeice laka, kola aja ixatua troa cainöje kowe la angetre Pendjabi ka lapa e Philippines. Mekune jë hi angeice troa ixatua e cili. Hetre ejolene kö?

Öni Sukhi: “Eni petre hi a öhne la ehacene la troa wange la itre ewekë nyine amë me itre ewekë nyine salemën. Ketre mina, hnenge hna pane mele ka loi ngöne la hnalapange koi 13 lao macatre, nge thupene hë eni a troa fek matre tro ni a lapa thene la ketre hnepe lapa  ka melëne hi la ka ijij. Ngacama tha ewekë ka hmaloi kö, ngo kola hnëkë ni troa melëne hi la ka ijij.” Nemene hë la itre jole hnei angeice hna melëne e Philippines? Öni angeic e sa ka hape: “Xounge catre la itre nekö i öni, memine lo itre öni ka wewë, nge tru la hnenge hna mekune la nöjeng. Ijine eni petre hi lai a inine mejiune koi Iehova!” Nemene hë la thangan? Dredrehnyima pi hi Sukhi me hape: “Öni Iehova, ‘Tupathi ni [jë] maine tha tro kö ni a nenge hui nyipunie la manathith.’ Eni a jele nyipicine la itre trenge ithanata cili, la kola hnyinge koi ni hnene la ketre atr ka hape: ‘Eue hmaca la tro epuni a bëek? Ke tru pala kö la hnei hnyingeng.’ Kola thue madrineng, ke atreine hi ni troa xatuane la itre atr ka mecijine ngöne la götrane la u!” (Mal. 3:10) Öni Sukhi hmaca jë hi: “Eje hi laka ewekë ka hace hi koi së la troa xomi mekun. Ngo thupene hë, eni hmaca pena a haine la aqane hnëkëne Iehova la itre ewekë thatraqai ni.”

“XOUNGE EKÖ TROA NUE LA HULIWANG”

Sime la ketre trejine trahmany ka faipoipo nge ka 30 hë lao macatre enehila. Hnei angeice hna tro qa Philippines troa thele huliwa e Asie, götrane kuë. E cili, hnene la atre thupëne la sirkoskripsio memine la ketre trejine ka sine la lapa ne xomi meköt ka cile fë la ketre cainöj, hna thuecatre koi Sime troa amë panë Iehova ngöne la mele i angeic. Öni Sime jë hi: “Ngo e tro ni a mekune ka hape, tro hë ni a nue la huliwang, tre kösë lo kolo hi lai a troa thupatëne la meleng.” Ngo ame pe, nuetrije pi kö angeice la huliwa i angeic, matre troa bëeke hmaca a tro Philippines. Ame enehila, Sime me Haidee fö i angeic a cainöje trootro e Davao del Sur, ketre götrane gaa tru gaa aja ka cainöj, ngöne la götrane kolojë ne Philippines. Öni Sime: “Mekune hmaca jë hi ni lo, nge elë jë hi la madrineng laka, ngacama xounge ekö troa nue la huliwang, ngo hnenge hna amë panë Iehova ngöne la meleng. Pë hmaca ju kö ketre madrine ka tru hune la troa hamëne koi Iehova la ewekë së ka sisitria!”

“ATRAQATRE PALA KÖ LA MADRIN!”

Ramilo me Juliet la lue trefëne ka 30 lao macatre nge ka pionie. Drenge jë hi nyidro ka hape, hetre ekalesia ka aja ixatua, nyidro pë hë a tro jë, ke 30 lao kilomet la enanyin. Ngacama manie ju hë me jö, ngo hnei Ramilo me Juliet hna ti moto matre troa sine la itre icasikeu me huliwa ne cainöj. Ngacama ihnaihnai ju hë la itre gojeny, nge kola nyenyapëne la itre ponts ka thip, ngo madrine nyidro troa huliwa atrunyi tune lai. Öni Ramilo: “Ala 11 jë kö lae ka ini Tusi me nyiho! Ngacama huliwa ka tru jolene la troa cainöje trootro ngöne la itre götrane gaa aja ixatua, ngo atraqatre pala kö la madrine hnei nyiho hna kapa qa ngön!”—1 Kor. 15:58.

Ajane kö epuni troa atre ka hape ekaa la itre götrane ka aja ka cainöje trootro göi troa ixatua ngöne la nöje i epun, maine ngöne pena la ketre nöje trehnyiwa? Ithanata ju kowe la atre thupëne la sirkoskripsio, maine e pena ju la tane mekune ne lo Huliwa Ne Baselaia ne Ogas 2011, hna hape “Ijije Kö Tro Nyipunieti a ‘Pane Hmaca Makedonia Eë’?”

[Hna cinyihan ne la götran 3]

“Pë hmaca ju kö ketre madrine ka sisitria hune la nyiho a öhne la itre atr a kökötre ngöne la götrane la u. Nyiho petre hi a drenge ka hape, hetre aliene catre la mele i nyiho.”—Gregorio me Marilou

[Iatr ne la götran 3]

[Hna eköhagen götran 4]

AQANE KUCA I ITRE XAN MATRE HETRE MANI

Traqa koi 70 lao trejine trahmanyi me föe ka traqa qa ngöne la itre nöje trehnyiwa troa cainöje trootro e Philippines; qaane ju hi la ka 18 lao macatre, uti hë 50. Robert me Mirjam la lue trefëne qaa Alema ka 40 nge sine lao macatren. Öni nyidro, 14 hë lao macatre ne nyidro a cainöj e Philippines! Ngo tune kaa la aqane kuca i nyidro matre troa hetre mani? Öni Robert: “Pine laka tha ka hmaloi kö troa öhnyi huliwa e celë, hnei nyiho hna bëeke e nöjei macatre a tro Alema, matre troa huliwa koi köni treu. E ijije mina ha la manie i nyiho göi tro hi a melëne la ka ijij, nyiho a tro bëeke hmaca jë Philippines troa cainöje ngöne la munëne la macatre.” Nyipici laka, ka tru ejolene la troa mele ngöne la nöje trehnyiwa, ngo öni Mirjam: “Tingetinge la hninge ke Iehova a tro xomi ni.” Ketre öni Robert: “Catrecatre la lapaune i nyiho, la nyiho a cainöj e celë.”

[Iatr]

[Iatr ne la götran 5]

Karen

[Iatr ne la götran 5]

Sukhi

[Iatr ne la götran 6]

Sime me Haidee

[Iatr ne la götran 6]

Juliet me Ramilo