HNA MELËN

Manathith e Troa Qale Koi Iehova

Kola qeje pengöne hnei Malcolm Allen

Ame ngöne la mel, tre tha ijije kö koi së troa qaja amë la itre ewekë ka troa traqa koi së elanyi, nge ame itre xa ijin, tre, ka jole catr. Ngo Iehova a amanathithine la itre atr ka lapa qale koi Nyidrë, nge tha hnei Nyidrëti pë hë hna kapa la atr ka trongëne la itre sipu mekune i angeice kö. Celë hi hnenge hna melëne memine la ifëneköng ngöne la itre ijine ka lolo ne mele madrine i nyiho. Hane hi la ketre hnepe götranene la mele i nyiho.

HNA iöhnyi hnei kaka me nenë ngöne lo macatre 1919 hmekune lo ijine asabele ka tru ne la itretre Ini Tusi Hmitrötr e Cedar Point, Ohio, Etazini. Faipoipo ju fe kö nyidro lai macatre cili. Hna hnaho ni lo macatre 1922, nge thupene la lue macatre kola hnaho Paulo. Hna hnaho Grace föe i eni lo macatre 1930. Ame keme me thine i angeic, Roy me Ruth Howell, lue ka ini Tusi Hmitrötr, nge ame la lue qaqa i angeic, tre, ka ini Tusi Hmitrötre fe, nge itre sine i Charles Taze Russell fe nyidro.

Hnenge hna iöhnyi me Grace lo macatre 1947, nge ame lo 16 Julai 1949, nyiho hi a ikötresae. Qëmekene tro nyiho a ikötresae, hnei nyiho hna pane ifekeune hnyawa la itre mekuna i nyiho göne la mele i nyiho elany. Hnei nyiho hë hna axecië mekune laka tro nyiho a xome la huliwa ne cainöje ngöne la drai ka pexej, nge tha tro kö nyiho a hane hnaho. Ame hë lo 1 Okotropa 1950, hnei nyiho hna ce nyiqaane xome la huliwa ne pionie. Thupene lai hna könë nyiho troa xome la huliwa ne iwai trootro lo macatre 1952.

HULIWA NE IWAI TROOTRO ME INI NE GILEADA

Tha ka hmaloi kö koi nyiho la hnëqa ka hnyipixe celë, celë hi matre hnei nyiho hna aja ixatua. Hna xatua ni hnene la itre trejine ka macaj, nge eni fe a hane thele troa xatua Grace. Hnenge hna easenyi Marvin Holien, ketre sine hun nge ka majemine hë xome la huliwa ne iwai trootro; hnenge hna hnyinge koi nyidrë ka hape: “Grace a aja ixatua. Ijije kö tro nyipëti a pane wange la ketre trejine matre troa ce huliwa me angeic?” Nyidrëti a kapa la mekun. “Edna Winkle la pionie ka troa xatua Grace.” Hnei Grace hna qeje Edna, me hape: “Hnei eahlo hna kuca matre tha tro kö ni a xou troa cainöje ngöne itre hnalapa trootro, me atreine troa sa la itre mekune ka isazikeu; Nge hna ini ni fe troa drenge hnyawa la itre atr, ene pe tha jole kö tro ni a sa hmekune la itre mekun. Hane hnyawa hi lai ixatua koi ni!”

Hneng me Grace hna xome la huliwa cili ngöne lue sirkoskripsio e Iowa, me ngöne la itre xa götrane ju kö e Minnesota me Dakota. Thupene lai hna upi nyiho kowe la sirkoskripsio 1 e Neweyok, me kowe la itre xa götrane ne Brooklyn me Queens. Tha thëthëhmine kö nyiho la aqane jolene ekö koi nyiho troa xome la hnëqa cili. Eje hnine la sirkoskripsio cili la  Ekalesia ne Brooklyn Heights, nge ame la Uma Ne Baselaia tre eje hnine la Bethela, matre ala nyimu la itre atrene la Bethela ka macaj ka hane sine la Ekalesia cili. Thupene la pane cainöj hnenge hna tro fë ngöne la Ekalesia cili, hnei Nathan Knorr hna tro koi ni me qaja ka hape: “Malcolm, hnei eö hna hamëne koi huni la itre xa eamo ka ijij, matre xatua huni troa catre huliwa. Mekune hnyawa kö eö laka, troa gufa la huliwa i eö kowe la organizasio, e tha hnei eö kö hna xatua huni me hamë eamo ka lolo. Catre pi huliwa!” Thupene la icasikeu hnenge hna qaja lai koi Grace. Ame hë la nyiho e hnine la hnahage i nyiho ngöne la Bethela, pane lapa pi hi nyiho, tha drenge hë nyiho la itrei nyiho, nge nyiho a treij.

Itre treu thupen, nyiho a kapa la ketre tusi a kola hë nyiho troa hane sine la hnaatruedri foa ne Ini Ne Gileada, hna umuthe lo treu Febuare 1955. Hna canga thuemacanyi nyiho qëmekene tro nyiho a tro Gileada, ka hape, tha kolo hmekuje kö a ini me hnëkë göi troa mesinare. Ngo kolo fe a xatua nyiho matre tro nyiho a atreine xome hnyawa la huliwa ne iwai trootro ngöne la itre ekalesia. Ketre, celë hi ketre ini ka nyipi lolo nge ka akökötrene la ipië thei nyiho.

Ame hë la kola fenesi la ini e Gileada, hna upi nyiho troa huliwa ngöne la distrik, e Indiana, Michigan, me Ohio. Sesëkötre ju pena hi nyiho lo Diseba 1955, la nyiho a kapa la tusi Nathan Knorr, nyidrëti a hape: “Kola sipone matre tro epone a pane fe hnyawa la hni epon, me qaja la ka xecie. Tro epone a lapa e celë ngöne la Bethela . . . maine troa huliwa e cailo ngöne la ketre nöj. Eni a pi atre la mekuna i epon, Bethela maine distrik me sirkoskripsio?” Öni nyiho, ame hi la hnei epuni hna amekötin, ke eje hë lai. Haawe, nyiho a canga iupi fë pi la tusi nyiho kowe la Bethela!

ITRE MACATRE NE MADRIN NGÖNE LA BETHELA

Ame la itre macatre ne madrin ngöne lo nyiho ngöne la Bethela, tre, eni fe a athipe la itre cainöj thatraqane la nöjei trejine asë e Etazini. Hnenge hna inine me xatuane la itre thöth trahmany, matre ame hë la angatr a tru, tre, nyimutre la itre ka xome la itre hnëqa ka tru hnine la organizasio i Iehova. Ame hë e thupen, hnenge pë hë hna seketere i Nathan Knorr ngöne la biero ka eköthe la huliwa ne cainöj e cailo fen.

Tru la madrineng ngöne la itre macatre ne eni a cilëne la biero thatraqane la huliwa. Eni a ce huliwa e cili me Toma Sullivan. Ka hekö hë nyidrëti cilën me huliwa ngöne la biero cili. Ngo tru mina fe la itre xa hnenge hna atre qaathene la itre xan. Hna ami Fred Rusk troa ce huliwa me eni. Mekune pala kö ni lo eni a hnyinge koi nyidrë ka hape, “Fred, pine nemene la eö a lapa goeëne hmaca la itre tusing?” Nyidrëti a hnyima me qaja la ketre mekune ka lolo, hna hape, “Malcolm, ame la eö a ithanata, tre, itre hnepe hnëewekë hi hnei eö hna xom, ngo ame la eö a cinyany,  ke, nyipi ewekë troa mama hnyawa ka hape qaa celë la tus, nge troa tha jol e troa e la itre mekun.” Nge nyidrëti fe a nango qaja menyikën, ka hape, “Catre pi pe—lolo la aqane huliwa i eö, nge tro kö elanyi lai a hetre thangane ka loi kowe la huliwa i eö.”

Ngöne la itre ijine cili, hna xome hnei Grace la itre xa pengöne hnëqa e hnine la Bethela, tune la troa nyidrawane la itre hnahage ne meköl. Madrine catre angeic la huliwa i angeic. Ame enehila, ame la nyiho a iöhnyi hmaca memine lo itre trejine trahmanyi laka, itre thöthi ekö lo eahuni a ce huliwa ngöne la Bethela, önine ju hi la itre xan e angatre koi Grace, ka hape: “Nyipoti hi lo ka ini huni ekö troa kuca hnyawa la itre göhnë ne meköl, nge madrine catre nenë la hnei eapo hna kuca koi hun.” Ketre, madrine catre fe Grace troa huliwa ngöne la hna feja zonal, hna cinyanyi tus, hna kuci kaset. Kola xatua Grace hnene la itre hnëqa ka isapengön, troa wangatrune la mekun, ene laka, ame asë hi la itre hne së hna kuca me götran hne së hna huliwa ngön hnine la organizasio i Iehova, tre, itre manathithi asë hi. Uti hë enehila, tha saze kö la mekuna i Grace.

ITRE HNEI NYIHO HNA SAZE

Ame hë lo nyipine lo macatre 1970, kolo ha aja nyiho hnei nenë me keme me thine i Grace ke qatre trootro hë angatr. Eje hi lai laka, tha ketre mekune ka co kö la hnei nyiho hna troa axeciën. Tha ajane kö nyiho troa lö pi qa ngöne la Bethela me nue la itre hlue i Iehova hnei nyiho hna hnim me hna ce mele memin. Ngo eni a atrehmekune hnyawa laka, hnëqa i eni troa thupëne la lue keme me thine i nyiho. Celë hi matre nyiho a feke pi qa ngöne la Bethela, cememine la aja, laka, e saze pi elanyi la itre ewekë, haawe, tro hmaca nyiho a bëekë hmaca.

Hnenge hna pane huliwa ngöne la ketre assurance, matre nyine thupene la itre ka nyipi ewekë thatraqane la mele i nyiho. Mekune pala kö ni lo kola qaja koi ni hnene la ketre ka huliwa ngöne lo kola xatua ni ini huliwa: “Ame la huliwa celë, tre, ka lolo catr ej e jidr, ke, e cili hi la kola tru hnei atr. Ijine tro hi lai a huliwa, matre troa hëne la itre atr jëne telefon.” Hnenge hna sa ka hape, “Nyipici nyipëti hi lai, nge eni a metrötrën la mekun. Ngo hetrenyi fe la itre hnëqang ngöne la götrane la u, nge ka tha hane kö ni wangacone itre ej, haawe, tha enehila kö la tro ni a saze. Eni a troa huliwa ngöne la itre xa jidr, ngo e drai angedic me drai ka co hmekuje hi, ke nyipi ewekë koi ni troa sine la itre icasikeu.” Hnei Iehova hna amanathithi ni pine laka tha hnenge kö hna triane la itre icasikeu göi troa huliwa i maseta.

Ce nyiho hi me nenë ngöne lo ijine eahlo a mec ngöne la hnalapa ne ithupë lo Julai macatre 1987. Hna qaja hnene la ka huliwa e cili, koi Grace ka hape: “Allen, lö jë hë kowe la hnalapa i eapo me hane mano. Atre asë hi huni laka, tha hnei eapo kö hna paatre qaathene la tretre i eapo. Ka lolo catre la hnei eapo hna kuca, laka hnei eapo hna pane thupëne la tretre i eapo.”

Ame hë lo Diseba 1987, hnei nyiho hna nyialiene la pepa matre troa huliwa hmaca ngöne la Bethela, lo  göhnë ka loi koi nyiho. Ngo tha qea kö nge kolo ha meci fë xele hnei Grace. Hna xöji angeic, nge loi fe hë la meci angeic, patre hë la meci angeic. Ame ju fe kö ngöne la ijine cili, nyiho a kapa la tusi Bethela, a kola upi nyiho tro kö a sisedrëne la huliwa ne cainöj ngöne la ekalesia. Celë hi hnei nyiho hna catre kuca.

Hnenge hna öhnyi huliwa e Texas. Pine laka, ga keukawa la götrane cili, haawe, loi ju hi koi nyiho troa tro cili. Kola e la 25 lao macatre ne nyiho e cili, nge nyimutre la itre trejine trahmanyi me föe hnei nyiho hna hnim me xatuan.

ITRE HNEI NYIHO HNA KAPA

Ngacama hna tithi angeic hnene lo meci xel, me thyroïde, me meci fë thi, ngo ame pe, tre, tha hnei angeice kö hna eetre pine la itre akötre angeic, maine tha metrötrëne la hnëqa ne la föi angeic, ngo kolo pe a sajuëne la itre mekuna i nyidrë. Hna hnyinge pala hi e itre xa ijine koi angeic, ka hape, “Nemene jë la jëne madrine i epon lue trefën, memine la manathithi ka eje thei epon?” Foa lao kepine hna hamëne hnei angeic: “Lue treme sinene ka lolo catre nyiho. Ka ifekeune hnyawa pala hi nyiho la itre mekune o drai. Hetre aja i nyiho pala hi troa hetre ijine thatraqai nyiho. Maine hna pane nango iwesitrë ngöne la drai, thatreine kö tro nyiho a meköl nge tha hnei nyiho kö hna pane iloi.” Eje hi lai laka, hna traqa koi nyiho troa nango ihmönyinyi, ngo hnei nyiho hna thele troa iqejemenukeu me thëthëhmine la ngazo hna kuca, nge hetre thangane ka lolo.

Ngöne la nöjei itupathi hnei nyiho hna cile kow, tru la itre ini ka lolo hnei nyiho hna kapa:

(1) Tro pala hi a qale koi Iehova me kapa la itre ewekë ka traqa koi së. Ngo tha tro pi kö sa qale kowe la sipu inamacane së.—Ite edomë 3:5, 6; Iere. 17:7.

(2) Tro sa nue la Wesi Ula i Iehova troa eatrongë së, ngacama thatre ju hë së la pun. Jëne iamele la troa drengethenge Iehova me itre wathebo i Nyidrë. Thatreine kö tro sa lue aja, easa ajane troa drengethenge maine tha idrei pena.—Rom. 6:16; Heb. 4:12.

(3) Casi hi la ka nyipi ewekë kowe la mele së, ene la troa hlemu loi la ëje së xajawai Iehova. Troa amë panëne la itre aja i Nyidrë, ngo tha tro kö a thele troa trenamo.—Ite edomë 28:20; Ate cai. 7:1; Mat. 6:33, 34.

(4) Sipo Iehova jë ngöne la thith matre troa hetre wene ne la huliwa së koi Nyidrë. Loi e troa kuca la hne së hna atreine kuca, ngo tha tro pe a thele la hne së hna thatreine kuca.—Mat. 22:37; 2 Tim. 4:2.

(5) Loi e tro sa mekune hnyawa laka, pëkö ketre organizasio e tröne la organizasio hna kapa me amanathithine hnei Iehova.—Ioane 6:68.

Hna e la 75 lao macatre ne ce nyi hlue i Iehova ni me Grace, nge 65 lao macatre ne ce huliwa nyiho lue trefën. Itre macatre lai ka lolo catr hnei nyiho hna melën ngöne la huliwa i Iehova. Nyiho a mejiune me thithi thatraqane la itre trejine matre tro fe angatr a hane melëne la itre manathithi hna kapa qa ngöne la hna qale catre koi Iehova.

[Iatr ne la götran 17]

[Iatr ne la götran 18]

Qaane la götrane mi: Nathan Knorr, Malcolm Allen, Fred Rusk, Lyle Reusch, Andrew Wagner

[Hna cinyihan ne la götran 18]

“Troa gufa la huliwa i eö kowe la organizasio, e tha hnei eö kö hna xatua huni me hamë eamo ka lolo. Catre pi huliwa”

[Iatr ne la götran 19]

E caha: Fern me George Couch me Grace me eni e Gileada lo 1954

[Iatr ne la götran 19]

E cahu: Kola huliwa ngöne la Biero Ne Huliwa lo 1956

[Hna cinyihan ne la götran 20]

“Tro pala hi a qale koi Iehova me kapa la itre ewekë ka traqa koi së”

[Iatr ne la götran 20]