Ujë Thenge Jë La Thith i Iesu
Ujë Thenge Jë La Thith i Iesu
“Kakati fe, . . . atrunejë la Nekö i cilie, mate atrunyi cilieti hnene la Nekön.”—IOANE 17:1.
NEMENE LA MEKUNA I EPUN?
Nemene la aliene la kola hape, troa “ate hmekua” Akötresie?
Nemene la aqane sa Iehova la thith i Iesu, lo hneijine ne lo itre pane Keresiano?
Nemene la aqane tro sa ujë thenge la thith i Iesu enehila?
NGÖNE la hejiheji jidr ne la drai 14 Nisan macatre 33, Iesu petre hi me itre sinatronge i nyidrë a umuthe la pui ne xeni ne la Paseka. Ewekë lai ka amekunë angatr la aqane amelene la angetre Isaraela hnei Akötresie qaa Aigupito. Ngo ka sisitria catre pala kö la aqane troa amelene elany la itretre drei Iesu ka mele nyipici. Ngöne la drai thupen, tro ha humuthi Iesu hnene la itre ithupëjia me nyidrë. Tro la huuje i nyidrë, ene la mele i nyidrë ka pexej, a thapa la nöjei atr qa ngöne la ngazo me mec.—Heb. 9:12-14.
2 Hnei Iesu hna acile la ketre ewekë ka hnyipixe, nyine hnane lo Paseka, matre tha tro kö sa thëthëhmine la ihnim i Akötresieti koi së. Hnei nyidrëti hna xome la areto tha hna levenëne kö, me thupathupa; nyidrëti a isa hamëne ju kowe la ala 11 lao aposetolo ka mele nyipici. Nge öni nyidrëti jë hi: “Dei la ngöneteinge hna hamëne thatraqai nyipunie ; kucajë la nyine mekune koi ni.” Nyidrëti a hamëne ju fe la inege waina me hape: “Dei la inege, isisinyikeu ka hnyipixe ngöne la madrang, hna nenge thatraqai nyipunie.”—Luka 22:19, 20.
3 Easenyi hë matre traqa pi kowe la pune la Isisinyikeu i Akötresie memine la nöje Isaraela. Nge kola troa nyi hnan hnene la isisinyikeu i Iehova me itretre drei Iesu, itre hna iën. Tha aja i Iesu kö tro la itretre drei nyidrëti a tune lo nöje Isaraela ekö. Tha hnene kö lo angetre Isaraela hna atrunyi Akötresie ngöne la cas, ngo hnei angatre pe hna adrone la ëje i Nyidrë. (Ioane 7:45-49; Ite hu. 23:6-9) Ame la aja i Iesu, tre ene la tro la itretre drei nyidrëti a ce huliwa ngöne la cas, matre troa atrune la ëje i Akötresie. Matre nemene hë la hnei Iesu hna kuca? Hnei nyidrëti hna thithi troa sipo ixatua kowe la Tretretro i nyidrë, nge easë petre hi a hane e la ketre thithi ka tune lai. Kola meköle la thithi cili ngöne (Ioane 17:1-26; wange ju la iatr.) Ame la easa ce ithanatane la thithi cili, hetre itre hnyinge nyine tro sa ce wang, kola hape: “Hna kapa kö hnei Akötresieti la thith i Iesu? Eni kö a ujë thenge la thithi cili?”
ITRE EWEKË KA TRU KOI IESU
4 E jidri catre hë, nyimu ewekë ka lolo hnei Iesu hna inine kowe la itretre drei nyidrë. Ame hnei nyidrëti hna gala jë hnengödrai eë, me thith me hape: “Kakati fe, traqa ha la ijin ; atrunejë la Nekö i cilie, mate atrunyi cilieti hnene la Nekön ; ngöne la hnei cilieti hna nunuë angeice troa musinëne la nöjei ate asë, mate tro angeic’ a hamëne la mele ka tha ase palua kö koi angat’ asë hnei cilieti hna nunuë angeic.” Nge nyidrëti a sisedrëne hmaca me hape: “Ase hë ni atrunyi cilieti e celë fen ; ase hë ni umuthe la huliwa hnei cilieti hna nunuë nie troa kuca. Tetetroti fe, enehila atrunyi ni jë ce me cilie, hnene la lolo thei nyisho, nge pate pete kö la fene hnengödrai.”—Ioane 17:1-5.
5 Hetre itre ewekë ka tru hnei Iesu hna qaja ngöne la qaane la thith i nyidrë. Ame la ewekë ka tru hna qaja hnei nyidrë, tre ene la troa atrune la Tretretro i nyidrë. Kolo ewekë hnei Iesu hna sipone panëne ngöne lo tulu ne thith. (Luka 11:2) Ame la ketre, tre nyidrëti a thithi fë la itre ewekë ka loi thatraqane la itretre drei nyidrë. Nyidrëti a sipone troa “hamëne la mele ka tha ase palua kö koi angat’.” Nge e pune hë, Iesu ha sipo ewekë thatraqai nyidrë. Nyidrëti a sipone troa bëeke hmaca kowe la Tretretro i nyidrë, ngöne la lolo, lo göhne i nyidrëti ekö qëmekene troa xupe la hnengödrai me fen. Hnei Iehova hna kapa la thithi ne la Hupuna i Nyidrë, me nyi xane hmaca ju kö. Hnei Akötresieti hna hamë nyidrë “la atesiwati ka sisitia” hune la nöjei angela asë.—Heb. 1:4.
TROA “ATE HMEKUA” NYIDRË LA NYIPI AKÖTRESIETI KA CAS
6 Ame ngöne la thith i nyidrë, hnei Iesu hna qaja la nyine tro sa kuca, matre tro sa kapa la mele ka tha ase palua kö. (E jë la Ioane 17:3.) Öni nyidrë, loi e tro sa “ate hmekua” Akötresie me Keriso. Kola hapeue lai? Ame la hnapan, tro sa kuca la nöjei hne së hna atrein, göi troa atrepengö i Iehova memine la Hupuna i Nyidrë. Ame la hnaaluen, tro sa trongëne la hne së hna inine ngöne la mele së. Lue ewekë lai hna trongëne hë hnene la ange aposetolo, ke, celë hi lo hnei Iesu hna catre qaja ngöne la thithi nyidrë kola hape: “Hnenge hna hamë angate la nöjei tenge ewekë hnei cilieti hna hamë ni ; nge ase hë angate kapa.” (Ioane 17:8) Ngo maine angatr a ajane troa kapa la mele ka tha ase palua kö, loi e tro pala hi angatr a trongën, me lapa mekune la Wesi Ula i Akötresie ngöne la nöjei drai ne mele angatr. Ngöne la mele i angatr ka pexej, hnene kö la itre aposetolo hna trongëne pala hi la lue ewekë cili? Eje hi. Easa atre lai, pine laka, ame la itre ëje i angatr asë, tre hna sija hutin, hune lo itre trepene ka ala 12 ne la Ierusalema Ka Hnyipixe.—Hna ama. 21:14.
7 Maine aja së troa mele epine palua, loi e tro sa “ate hmekua” Akötresie. Kola hapeue lai? Ame la hnaithanata qene heleni ka mama e celë, ijije troa ujëne ka hape “tro pala hi a thele troa atrepengön.” Celë hi matre ame la aliene la kola hape, troa “ate hmekua” Akötresie, tre ene la tro sa thele catrëne troa atre hnyawa la pengö i Nyidrë. Tha itre thiina me itre mekuana i Nyidrë hmekuje kö. Ngo tro fe sa hni catre koi Nyidrë, me acatrene hnyawa la aqane imelekeu së me Nyidrë. Nge nyipi ewekë catre fe tro sa hnime la itre trejine me easë, itre trahmanyi me föe. Önine la Tusi Hmitrötr: “Ame la ate tha ihnimi kö, te, tha ’te Akötesieti kö hnei angeic.” (1 Ioane 4:8) Ame la troa atre Akötresie, tre ene fe la troa drengethenge Nyidrë. (E jë la 1 Ioane 2:3-5.) Madrine ka tru koi së la troa atre Iehova! Ngo hmekëne kö, ke luzi pi la aqane imelekeu së me Nyidrë, tune lo hna kuca hnei Iuda Isakariota. Acatrene catrëne jë së la aqane imelekeu së me Iehova. Maine tro sa kuca tune lai, tro Iehova a hamë së la ahnahna ka sisitria, ene la mele ka tha ase palua kö.—Mat. 24:13.
“NGÖNE LA ATESIWA I CILIE”
8 Ame la easa e la thith i Iesu ngöne Ioane 17, mama hnyawa ju hi la ejuine la ihnim i Iesu; tha kowe hmekuje kö la ange aposetolo i nyidrë, ngo koi së fe. (Ioane 17:20) Ngo hetre ketre ewekë ka sisitria catre kö koi Iesu hune la troa amele së. Ame ngöne lo ijine nyidrëti e celë fen, tre ka sisitria catre kö koi nyidrë la troa atrune la ëje ne la Tretretro i nyidrë. Kola mama hnyawa lai lo Iesu a qaja la kepine la traqa nyidrë e celë; hnei nyidrëti hna e la tusi hna ewathe celë i Isaia: “Eje e hunge la Uati [“Iehova,” MN], qa ngöne la hnei nyidëti hna ujë ni troa cainöjëne la maca ka loi koi ite pë ewekë.” Eje hi laka, ame lai ijine Iesu a e la xötre celë, tre hnei nyidrëti hna qaja hnyawa la ëje i Akötresie.—Luka 4:16-21.
9 Qaane hë ekö catr qëmekene tro Iesu a traqa e celë fen, hnene la itre hene ne hmi i angetre Iudra hna hamë ini menu kowe la itre atr, matre tha tro kö angatr a qaja la ëje i Akötresie. Eje hi laka xele catr Iesu ma wange la aqane huliwa cili. Celë hi matre öni nyidrë kowe la itre hene ne hmi: “Traqa ha ni ngöne la atesi Angakaka, nge tha kepe ni kö hnei nyipunie ; maine traqa kete ngöne la ëje i angeice kö, maine kapa kö hnei nyipunie.” (Ioane 5:43) Itre hnepe drai qëmekene tro nyidrëti a mec, hnei Iesu hna amexeje la ewekë ka sisitria catre koi nyidrë jëne la thith me hape: “Angakaka, atrunejë la atesiwa i cilie.” (Ioane 12:28) Nge tune la hne së hna ithanatane ngöne la thithi celë, ka mama hnyawa hi ka hape ame la ka nyipi ewekë catr koi Iesu, tre ene la troa atrune la ëje ne la Tretretro i nyidrë.
10 Hnei Iesu hna thithi me hape: “Ase hë ni amamane la atesiwa i cilie kowe la nöjei ate hnei cilieti hna nunuë nie qa la fen ; ite ewekë i cilieti angat, nge hnei cilieti hna nunuë angate koi ni ; nge hnei, angate hna trongëne la wesi ula i cilie. Nge enehila, tha ini hmaca kö a lapa e celë fen, ngo angate pe hë e celë fen, nge ini a tro koi cilie. Tetetroti ka Hmitöt, thupë angate jë pe kö ngöne la atesiwa i cilie lo hnei cilieti hna hamë ni, mate casi angat, tui nyisho.”—Ioane 17:6, 11.
11 Ame lo Iesu a “amamane” la ëje ne la Tretretro i nyidrë kowe la itretre drei nyidrë, tha hnei nyidrëti hmekuje kö hna qaja la ëje i Iehova. Hnei Iesu fe hna xatua angatre troa trotrohnine la pengö i Iehova. Hnei nyidrëti hna ini angatre la itre thiina ka tru i Akötresie, me aqane hnimi së hnei Nyidrë. (Eso. 34:5-7) Joxu hë Iesu enehila e hnengödrai, nge nyidrëti pala hi a xatuane la itretre drei nyidrë matre tro fe angatr a amamane la ëje i Iehova ngöne la fen asë. Hnauëne laka kola kuca la huliwa cili? Göi troa xatuane la nöjei atr asë troa atrepengö i Iehova qëmekene troa nyipune la fene ka ngazo celë. Nge e traqa ha la ijine cili, tro hë Nyidrëti a amelene la itre ka huliwa nyipici koi Nyidrë, me nöjei atr ka atre la ëje ka sisitria i Iehova!—Ezek. 36:23.
“MATE LAPAUNE LA FENE HNENGÖDRAI”
12 Hnei Iesu hna up la itretre drei nyidrë troa umuthe la huliwa hnei nyidrëti hë hna nyiqaan. Hnei nyidrëti hna thithi me hape: “Hnei cilieti hna upi ni kowe la fen ; tune mina hi la hnenge hna upi angate kowe la fen.” Ngo atre hi Iesu laka loi e troa pane xatua angatr troa kuca la huliwa cili. Ame lo ijine ce nyidrëti me angatr, hnei Iesu hna huliwa catr troa xatuane la itretre drei nyidrë troa elë hune la itre ngazo i angatr. Nge ngöne la thith i nyidrë, köni ewekë ka tru hnei nyidrëti hna sipone koi Iehova, göi troa xatuane la itretre dreng. Ame la hnapan, hnei nyidrë hna thithi sai angatr, matre tha tro hmaca kö angatr a hane sine la fene i Satana. Ame la hnaaluen, nyidrë a thithi fë la itretre dreng matre tro angatr a drengethenge la Wesi Ula i Akötresie, me ahmitrötrëne ej. Ame la hnaakönin, Iesu a sipone catrëne matre tro la itretre drei nyidrëti a cas, tune la aqane casi nyidrë memine la Tretretro i nyidrë. Loi e tro së isa ala casi a sipu wai pengö së me hape: ‘Hnenge fe kö hna kuca la köni ewekë celë hnei Iesu hna thithi fë?’ Ame koi Iesu, eje hnyawa hi laka, maine tro la itretre dreng a kuca la köni ewekë celë, tro ha tru hnei atr ka troa kapa la maca hnei angatre hna tro fë.—E jë la Ioane 17:15-21.
13 Ame la easa inine la tus i Ite Huliwa, öhne ju hi së la aqane sa Iehova la thith i Iesu. Ame ngöne lo hneijine ne lo itre pane Keresiano, nyimu pengöne atr ngöne la ekalesia: itretre Iudra itre xan, itretre etheni itre xan, me itre trenamo me pë mo, me hlue me maseta. Maine ju, tro lai a isa thë! Ngo ame pe, ka catre la cas i angatr tune la aqane qaja i Paulo, la kola aceitunëne lai memine la hnënge götrane ngönetrei, nge Iesu la he i angatr. (Efe. 4:15, 16) Ame ngöne la fene ka isa thë i Satana, tro hmekuje hi a ej la casi celë, jëne la mene ne la uati hmitrötre i Iehova.—1 Kor. 3:5-7.
14 Ngazo pe, thupene la hna meci hnene la itre aposetolo, traqa pi hi la iamenumenu ka tru. Löthe jë hi la ekalesia hnene la itre ini ka thoi, nge traqa pi hi la isa thë. (Ite hu. 20:29, 30) Ngo ame hë lo macatre 1919, hnei Iesu hna thapa la itre Keresiano hna iën qaathene la itre hmi thoi, me acasi angatr jëne la “otene ka nyipi loi.” (Kol. 3:14) Nemene hë la thangane qa ngöne la casi angatr hnine la huliwa ne cainöj? Ase hë sasaithe la sevene milio lao atr qa ngöne la nöjei “nöj’ asë, me ite tribu, me nöjei ate, me ite qene hlapa” angetre ce atrunyi Iehova enehila memine la itre hna iën. (Hna ama. 7:9; Ioane 10:16) Ketre ewekë nyine haine la aqane sa hnei Iehova lo thith i Iesu, lo kola hape: “Mate atejë la fene laka hnei cilieti hna upi ni, me hnimi angat, tune lo hna hnimi ni hnei cilie.”—Ioane 17:23.
HNA UMUTHE HNYAWA
15 Ame ngöne lo heji ne 14 Nisan, hnei Iesu hna hamëne la “lolo” kowe la ange aposetolo, jëne la isisinyikeu me angatr göi troa ce musi me nyidrë ngöne la Baselaia. (Luka 22:28-30; Ioane 17:22) Celë hi matre thithi jë Iesu thatraqane la nöjei hna iën ka troa xötrethenge nyidrë, me hape: “Tetetroti fe, ini a ajan, ka hape, tro ha ce me ini ngöne la hnenge la nöjei ate hnei cilieti hna hamë ni ; mate tro angat’ a öhne la lolong, lo hnei cilieti hna nunuë nie ; ke hnei cilieti hna hnimi ni, nge tha hna nyi tepene pete kö la fene hnengödrai.” (Ioane 17:24) Tru la madrine ne la itre xa mamoe kowe la itre hna iën, ngo tha piine kö angatr la edrö ne la itre hna iën. Drei la enyipicine la casi ne la itre Keresiano enehila.
16 Ala nyimu la angetre thatre thoine laka hetre nöje i Iehova hna acasine nge ka atrepengö i Nyidrëti hnyawa. Ame laka traqa pi la ewekë cili, tre qa ngöne la itre trengathoi ne la itre hene ne hmi. Hna traqa fe hi tune lai ngöne lo hneijine i Iesu. Celë hi matre umuthe ju nyidrëti la thith i nyidrë hnene la itre trenge ewekë celë: “Tetetroti ka meköti fe, e tha ’te cilieti kö hnene la fen ; ngo ate cilieti kö ni, nge ate hë angate laka hnei cilieti hna upi ni. Hnenge hna amamane koi angate la atesiwa i cilie, nge tro kö ni a amaman ; mate eje kö e kuhu ite hni angate la ihnim, tune lo hna hnimi ni hnei cilie, nge ini e kuhu ite hni angat.”—Ioane 17:25, 26.
17 Iesu la atre amamane hnyawa la ëje ne la Tretretro i nyidrë. Nge enehila, nyidrëti la He ne la ekalesia, nge nyidrëti a catre xatua së troa amamane la ëje me mekuana ne la Tretretro i nyidrë kowe la itre xa atr. Epi tro sa drengethenge la mus i Iesu me catre cainöj, me inine la itre atr. (Mat. 28:19, 20; Ite hu. 10:42) Epi tro mina fe së a catre huliwa, matre tro pala hi sa casi memine la nöje i Akötresie. Hane hi lai aqane tro sa ujë thenge la thith i Iesu. Aqane tro së lai a atrune la ëje i Iehova, me madrine epine palua.
[Thying]
1, 2. Nemene la hna kuca hnei Iesu me ange aposetolo thupene la hna atrune la Paseka, lo macatre 33?
3. (a) Nemene la ewekë ka hnyipixe ka traqa thupene la mec i Iesu? (b) Nemene la itre hnyinge hne së hna troa ce wang, la easa ithanatane la thith i Iesu?
4, 5. (a) Nemene la hna ini së hnene la pane ewekë hnei Iesu hna thithi fë? (b) Nemene hë la aqane sa Iehova la sipo i Iesu?
6. Nemene la hna kuca hnene la itre aposetolo, matre tro angatr a kapa la mele ka tha ase palua kö? Hne së hna atre tune kaa, ka hape, hna kuca hi tune lai hnene la ange aposetolo?
7. Kola hapeu la kola hape, troa “ate hmekua” Akötresie? Pine nemene matre ka nyipi ewekë catre la troa atre Akötresie?
8, 9. Nemene lo ewekë ka sisitria catre koi Iesu ngöne lo nyidrëti e celë fen? Ini ka ue la hnei Iesu hna xele ma wang?
10, 11. (a) Nemene la aqane amamane Iesu la ëje ne la Tretretro i nyidrë? (b) Pine nemene matre itretre drei Iesu a amamane la ëje i Iehova?
12. Nemene lo köni ewekë ka loi e tro sa kuca matre troa umuthe la huliwa hnei Iesu hna nyiqaan?
13. Tune ka la aqane sa Iehova la thith i Iesu, lo hneijine ne lo itre pane Keresiano?
14. Nemene la aqane sa i Iehova la thith i Iesu ngöne la hneijine së?
15. Nemene la ewekë ka tru hna sipone hnei Iesu thatraqane la itre hna iën, angetre xötrethenge nyidrë?
16, 17. (a) Ame ngöne la thith i Iesu, hetre ketre ewekë hnei nyidrëti hna sisiny tro pala hi a kuca; nemene la ewekë cili? (b) Nemene la nyine tro pala pë hë sa kuca?
[Iatr ne la götran 26]
[Iatr ne la götran 28]
Itre pane Keresiano ekö a huliwa thenge la ua i Akötresie matre casi pala hi angatr (Wange ju la paragarafe 13)
[Iatr ne la götran 30]
Ka casi la itre hlue i Iehova ngöne la fen (Wange ju la paragarafe 14)
