Drengethenge Jë La Itretre Thupë Mamoe i Iehova
Drengethenge Jë La Itretre Thupë Mamoe i Iehova
“Ideiju kowe la ite mekene i nyipunie, me denge thenge ju ; ke angat’ a hmekëne thatraqane la ite u i nyipunie.”—HEB. 13:17.
NEMENE LA AQANE TRO NYIPUNIETI A SA?
Nemene la aqane thupëne la itre mamoe i Akötresie hnene la itre qatre thup?
Pine nemene matre tro la itre mamoe a drenge la itre qatre thupe ne la ekalesia?
Pine nemene matre tha tro pi kö sa goeëne catrëne la itre tria ne la itre qatre thupe enehila nyine nyi kepine troa eetr, me xele ma drenge la itre eamo qaathei angatr?
1, 2. Pine nemene matre Iehova a aceitunë Nyidrëti kö me atre thupë mamoe?
IEHOVA a aceitunë Nyidrëti kö me atre thupë mamoe. (Ezek. 34:11-14) Kolo lai a xatua së troa trotrohnine la pengöi Iehova. Hnëqane la atre thupë mamoe trene ihnim troa thupëne la mele ne la itre mamoe i angeic. Angeice a feja angatre ngöne la itre gaa hetre xeni me tim, me xepe trongëne la itre hna hnyipi malan. (Sal. 23:1, 2; Is. 40:11) Angeice a thupëne la itre mamoe lai me jidr, me hmekë angatre wanga heje pi hnei itre öni ka ses. (1 Sam. 17:34, 35; Luka 2:8) Angeice a thele la nöjei mamoe ka patr, me nyinyine la itre ka eatr.—Ezek. 34:16.
2 Ame la itre hneijine ekö, tre, itre ka thupë mamoe me eëny la itre hlue i Akötresie. Celë hi matre, tha jole kö tro angatre a trotrohnine la kepine matre Iehova a aceitunë Nyidrëti kö me atre thupë mamoe. Atre hnyawa hi angatre laka, ame la mamoe, tre, nyine troa thupëne hnyawane matre tro pala hi a egöcatre me mel. Ketre tune mina fe, ame la itre atr, nyipi ewekë troa thupë angatre me ameköti angatre hnei Iehova. (Mar. 6:34) Ngo e tha thupë angatre kö me ameköti angatre hnei Iehova, tro hë angatre lai a mele e hnine la akötr. Ketre, thatre kö angatre la loi me ngazo, nge pëkö atre thupë angatr. Angatre a “tune la ite mamoe ka pa ate thupën.” (1 Ite jo. 22:17) Ngo ame koi itre ka nue Iehova troa thupë angatr, tre, pëkö hna pë ewekë i angatr.
3. Nemene la nyine tro sa ce wange ngöne la tane mekune celë?
3 Trotrohnine hnyawa fe së la pengöi Iehova, atre thupë mamoe Nyidrë. Tha sihngödri kö koi së la aqane tro xome hnyawa Nyidrë la nöje i Nyidrë enehila. Tro sa ce wange la aqane ameköti së me thupëne la mele së hnei Nyidrë. Thupene lai, tro sa ce ithanatane la nyine tro sa kuca matre tro sa öhnyi manathithi qa ngöne la aqane ameköti së me thupë së hnei Iehova.
ITRE XA KA IXATUA HNA ACILE HNENE LA ATRE THUPËNE ALOINE LA ITRE MAMOE
4. Nemene la aqane thupëne Iesu la itre mamoe i Iehova?
4 Hnei Iehova hna acili Iesu troa He ne la ekalesia i Keresiano. (Efe. 1:22, 23) Ceitui Iesu, “ate thupëne aloine la ite mamoe,” memine la Tretretro i nyidrë. Tru la ihnimi Iesu kowe la itre mamoe, nge nyidrëti a thupë angatr. Goi hamëne fe nyidrëti la mele i nyidrëti thatraqane la itre mamoe. (Ioane 10:11, 15) Drei la ketre ahnahna ka tru thatraqane la nöjei atr, ene la thupene mel! (Mat. 20:28) Ame la aja i Iehova kowe la nöjei atr ka lapaune koi Iesu, tre ‘tha tro kö a mec, ngo tro ha hetenyi la mele ka tha ase palua kö’!—Ioane 3:16.
5, 6. (a) Hnei Iesu hna ië drei troa thupëne la itre mamoe i nyidrë? Nemene la nyine tro la itre mamoe a kuca matre tro angatre a öhnyi manathithi qa ngöne la aqane thupë angatre hnei Iesu? (b) Nemene la sipu kepine matre hetre aja së troa xötrethenge la itre hna amekötine hnene la itre qatre thup?
5 Nemene la aqane amamane la itre mamoe ka hape, Iesu Keriso la Atre Thupë mamoeë angatr? Öni Iesu: “Dengë hë la ite mamoenge la aqane ewekëng, nge ate hmekunyi angate kö ni, nge angat’ a xöte thenge ni.” (Ioane 10:27) Itre mamoe a drenge la aqane ewekë ne la Atre Thupëne Aloine hnene la hna drengethenge la itre hna amekötine hnei nyidrë. Kolo lai a hape, angatre a drengethenge la itre hnei nyidrëti hna acile troa xatua nyidrë thupëne la hnënge mamoe. Ame ngöne lo hneijine la itre pane Keresiano, hnei Iesu hna iëne la anga aposetolo, me itretre drenge troa thupëne la itre mamoe. Hnei nyidrëti hna upi angatre troa inine me ithuane la “ite mamoe [i nyidrë].” (Mat. 28:20; e jë la Ioane 21:15-17.) Kolo pala hi a cainöjëne la maca ka loi, nge kolo fe a kökötre catre la etrune la itretre drei Keriso. Celë hi matre, Iesu a thupëne matre tro pala hi a hetrenyi la itretre thupë mamoe ka macaje göi troa tro xome trongëne la itre ekalesia.—Efe. 4:11, 12.
6 Ame hë e thupen, hnei Paulo hna cinyihane kowe la itretre thupe ne la ekalesia ne Efeso me hape: “Hnei [u]ati [h]mitöte hna acilë nyipunie nyine itete thup, troa hiane la ekalesia i Akötesie.” (Ite hu. 20:28) Hna acile fe la itretre thupe enehila jëne la uati hmitrötr. Pine nemene matre easa qaja tune lai? Pine laka hna acili angatre thenge la itre hna amekötine hnine la Wesi Ula i Akötresie. Celë hi matre ame la easa drengethenge la itre qatre thup, easë hi lai a metrötrë Iehova me Iesu, lue ka Thupë Mamoe ka tru. (Luka 10:16) Celë hi sipu kepine lai matre hetre aja së troa drengethenge la itre qatre thup. Ngo hetre itre xa kepine kö matre tro sa xötrethenge la itre hnei angatre hna amekötin.
7. Nemene la hna kuca hnene la itre qatre thupe troa acatrene la imelekeu i epuni me Iehova?
7 Ame la itre ithuecatre me itre hna amekötine hnene la itre qatre thupe hna hamëne kowe la itre trejin, tre, hna nyi trepene pala hi qa hnine la Tusi Hmitrötr. Tha mekunane kö la itre qatre thupe troa musinëne la melene la itre trejin. (2 Kor. 1:24) Ngo aja i angatre pe troa xatuane la itre trejine matre atreine angatre xome la itre trepene meköti ne la Tusi Hmitrötre matre amekötine la mele i angatr. Aqane huliwane hi la itre qatre thupe lai matre xatuane la ekalesia troa cas me tingeting. (1 Kor. 14:33, 40) Kola qaja la itre qatre thupe hnene la Tusi Hmitrötre ka hape, “angat’ a hmekëne thatraqane la ite u i nyipunie.” Kolo lai a hape, aja ne la itre qatre thupe troa isa hamë ixatua kowe la itre trejine asë ne la ekalesia matre troa lapa qale koi Iehova. Celë hi matre, canga saqe i angatre hi xatuane la ketre trejine ka tria la aqane xomi mekun, maine ka tro pena a xomi mekune menu. (Gal. 6:1, 2; Iuda 22) Hane hi la itre kepine ka loi matre xötrethenge jë së la hna hape, “ideiju kowe la ite mekene i nyipunie.”—E jë la Heberu 13:17.
8. Nemene la aqane thupëne la ekalesia hnene la itre qatre thup?
8 Hnei Paulo aposetolo, ketre atre thup, hna thuemacane la itre trejine ne Kolose me hape: “Wange kö ke thöeë nyipunie hnei kete ate hnene la pi inamacane me tenge iaö nyine amenun, thenge la edomë i ate, me ite ini hnapane ne la fen, nge tha thenge Keriso kö.” (Kol. 2:8) Ketre ithuemacanyi la ka troa xatua së troa wange la ketre kepine matre nyipi ewekë tro sa xötrethenge la itre hna amekötine hnene la itre qatre thup. Angatre a thupëne la itre trejine wanga ananyi nyudreni pi hnene la itre xa atr qaathei Iehova. Hnei Peteru aposetolo hna hmekë angatre me hape, tro la “nöjei perofeta thoi” me “nöjei ate ini thoi” a thelejëne matre tha drei Iehova pi hnene la itre Keresiano ka nango nanazij. (2 Pet. 2:1, 14) Ame mina fe enehila, nyipi ewekë tro la itre qatre thupe a hamëne la itre ithuemacanyi ka nyipi ewekë. Ame la itre qatre thup, tre itre Keresiano ka inamacan, nge ka melëne hnyawa ha la itre hna amekötin. Nge hna acile la itre qatre thupe pine laka, hnei angatre hna amamane ka hape, trotrohnine hnyawa hi angatre la Tusi Hmitrötr, nge atreine angatre troa inine la itre nyipici qa hnine la Tusi Hmitrötr. (1 Tim. 3:2; Tito 1:9) Pine laka, itre ka maca angatre me ka macaj, nge hetrenyi fe thei angatre la inamacane qa hnine la Tusi Hmitrötr, celë hi itre ewekë ka aijijë angatre troa tro xome hnyawa la itre trejine me angatr.
KOLA THUANE ME THUPËNE LA ITRE MAMOE HNENE LA ATRE THUPËNE ALOIN
9. Nemene la aqane ithuane me amekötine Iesu la ekalesia enehila?
9 Iehova a huliwane la organizasio i Nyidrë matre troa inine me amekötine la itre trejin, itre Keresiano asë e cailo fen. Hne së hna kapa la itre eamo ka nyimutre qa hnine la Tusi Hmitrötre jëne la itre itusi së. Ame itre xa ijin, hnene la organizasio hna hamëne la itre hna amekötine jëne la itre qatre thupe ne la ekalesia. Itre qatre thupe a kapa la itre hna amekötine cili jëne la itre itus maine itre ithuemacanyi hna hamëne hnene la itretre thupe ka iwai trootro. Itre jëne ixatua lai matre tro la itre mamoe a kapa la itre hna amekötin.
10. Nemene la hnëqane la itre qatre thupe la kola nuetrije la ekalesia hnene la ketre trejin?
10 Hnëqane la itretre thupë mamoe troa hmekëne me thupëne la itre mamoe. Itre qatre thupe fe a hnehengazone la itre Keresiano ka nanazije maine ka kuca pena la ngazo ka tru. (E jë la Iakobo 5:14, 15.) Nanyi hë itre xane qa ngöne la ekalesia, nge tha nyi hlue i Akötresieti hë hnei angatr. Nemene la nyine tro la qatre thupe a kuca göi troa hamë ixatua? Tro angeice a kuca asë la hnei angeice hna atreine matre troa thele la itre atr cili me xatua angatre troa bëeke hmaca kowe la ekalesia. Öni Iesu: “Tha ajane kö la Tetetro i nyipunie e hnengödrai, laka troa pate la kete ka co celë.”—Mat. 18:12-14.
NEMENE LA AQANE TRO SA GOEËNE LA ITRE QATRE THUPE KA THA PEXEJE KÖ?
11. Pine nemene matre nango jole e troa drengethenge la itre qatre thup?
11 Ame Iehova, me Iesu, tre lue ka Thupë Mamoe ka pexej. Ame la itre atr, itretre thupë mamoe hnei nyidroti hna ce huliwa memin göi troa thupëne la ekalesia, tre itre ka tha pexej. Tro jë lai a ajolëne la itre xane troa drengethenge la itre qatre thup. Ma tro angatre jë hi a mekune ka hape: ‘Ame la itre qatre thup, itre ka tu së hi angatr, itre ka tha pexej. Hnauëne laka tro sa drenge la itre eamo qaathei angatr?’ Nyipici, ngacama itre ka tha pexeje la itre qatre thup, ngo tha tro pe sa wangatrune la pengöi angatre cili me itre tria i angatr.
12, 13. (a) Nemene la itre tria hna kuca ekö hnene la itre hlue i Akötresie trene hnëqa? (b) Pine nemene matre nue pi Iehova troa cinyihane ngöne la Tusi Hmitrötre la tria ne la itre hlue i Nyidrë trene hnëqa?
12 Hnene la Tusi Hmitrötre hna qaja amamane la tria hna kuca hnene la itre atr hnei Iehova hna huliwane troa tro xome trongëne ekö la nöje i Nyidrë. Ame la ketre ceitun, tre, Davita, hna iëne hnei Iehova troa joxu ne Isaraela, ngo ame e thupen, hnei nyidrëti hna kuca la ngazo xajawa i Akötresie. Hnei nyidrëti hna ce meköle memine la ketre föe ka faipoipo hë me humuthe la föi eahlo e thupen. (2 Sam. 12:7-9) Mekune ju fe lo pengöi Peteru aposetolo. Ngacama trene hnëqa ka tru ngöne la ekalesia i Keresiano, ngo nyimu ngazo ka tru hnei angeice hna kuca. (Mat. 16:18, 19; Ioane 13:38; 18:27; Gal. 2:11-14) Pëkö ala cas ka pexeje qaane lo ijine i Adamu, me Eva, ngo Iesu hmekuje hi.
13 Pine nemene matre nue pi Iehova troa cinyihane ngöne la Tusi Hmitrötr la tria ne la itre hlue i Nyidrë trene hnëqa? Ame la ketre kepin, tre nyine amamane ka hape, Nyidrëti a xome la itre atr ka tha pexeje troa tro xome la nöje i Nyidrë. Eje hi laka, celë pala hi la hnei Nyidrëti hna kuca. Celë hi matre tha tro pi kö sa goeëne catrëne la itre tria ne la itre qatre thupe enehila nyine nyi kepine troa eetr, me tha metrötrëne la musi angatr. Ame la aja i Iehova koi së, tre ene la tro sa metrötrë angatr, me drengethenge angatr.—E jë la Esodo 16:2, 8.
14, 15. Nemene la ini nyine tro sa xome qa ngöne la aqane hamëne Iehova la itre hna amekötine kowe la nöje i Nyidrë ekö?
14 Ka nyipi ewekë catre tro sa drengethenge la itre qatre thup. Pine nemen? Pane mekune jë la aqane hamëne Iehova la itre hnei Nyidrëti hna amekötine ekö kowe la nöje i Nyidrë ngöne la itre ijine ngazo, matre amele angatre pe. Ame la ketre ceitun, tre ene la kola mejë hnene la angetre Isaraela qaa Aigupito, nge hnei Akötresie hna hamëne la itre hna amekötine kowe la nöje jëne Mose me Arona. Ketre, nyipi ewekë tro la angetre Isaraela a drengethenge la itre hna amekötine matre amele angatre qa ngöne la hnaatrenene akötr. Hna qaja koi angatre troa kuca la xeni ka ketre pengöne kö, me humuthe la ketre mamoe, me thathane jë pë hë la madrane eje hune la lue sinetë qëhnelö, me itre qëhnelö i angatr. Hnei Akötresieti kö hna sipu ithanata kowe la nöj? Ohea, tro la nöje a drenge la itre qatr, angetre kapa la itre hna amekötine qaathei Mose. (Eso. 12:1-7, 21-23, 29) Aqane kuca Iehova hi lai matre tro Mose me itre qatre a amekötine la nöj. Ame enehila, Iehova fe a ce huliwa tune memine la itre qatre thupe Keresiano.
15 Ma mekune jë hi epuni lo itre ijine ka nyimutre hna qaja hnine la Tusi Hmitrötr, lo Iehova a huliwane la itre atr me itre angela troa hamëne la itre hnei Nyidrëti hna amekötine kowe la nöje i Nyidrë. Nyimu ijine ekö, laka, ame laka mele pi angatr, tre, hnene la itre hna amekötine celë. Ame asë hi la itre ijine cili, hnei Akötresie hna axeciëne matre hnëqane la itre xa atr troa ithanata ngöne la ëje i Nyidrë, matre qaja kowe la nöje la nyine tro angatre a kuca ngöne la itre ijine kola traqa la jol. Tro fe hi së lai a mekune ka hape, celë hi aqane tro fe Iehova elanyi lai a kuca kowe la nöje i Nyidrë e Amagedo. Eje hi laka, ame la itre qatre thup, angetrekë hnëqane troa tro fë trenge ewekë i Iehova me tro fë trenge ewekë ne la organizasio i Nyidrë enehila, tre, nyipi ewekë tro angatre a thupëne wanga sasaithe pi angatre la tulu ne tro angatre a kuca la hnëqa hna athipe koi angatr.
“CASI HI LA HNA AXÖ MAMOE, NGE CASI HI LA ATE THUPËN”
16. Nemene la “aqane ewekë” nyine tro sa dreng?
16 Ame la nöje i Iehova, tre, “casi hi la hna axö mamoe, nge casi hi la ate thupën,” ene Iesu Keriso. (Ioane 10:16) Hnei Iesu hna qaja ka hape, ce nyidrë me itretre drei nyidrë “ngöne la nöjei drai asëjëihë uti hë la hneijin ne kola troa nyipune la fen.” (Mat. 28:20, MN) Qa ngöne la hna nyijoxu i nyidrë e hnengödrai, atreine nyidrëti troa kuca matre eatre jë la nöjei ewekë ka troa traqa qëmekene tro nyidrëti a apatrene la fene i Satana. Nemene la aqane tro sa casi hnyawa me lapa xetietë hnine la organizasio i Akötresie? Tusi Hmitrötre a sa ka hape: “Nge tro la lue hnangenyë i ’ö a denge la aqane ewekë hutrö i ’ö, kola hape, Dei la gojeny, tro nyipunie a trongën’ ej.” Ame la “aqane ewekë” celë, tre kola qaja la ini hnei Iehova hna hamë së e hnine la Tusi Hmitrötr, memine fe la aqane tro fë trenge ewekë i Nyidrëti me Iesu hnene la itre qatre thupe hnei nyidroti hna acil.—E jë la Isaia 30:21; Hna Amamane 3:22.
17, 18. (a) Qa ngöne nemene matre traqa pi itre xa ijine la jole kowe la itre hlue i Akötresie? Nemene la ewekë ka xecie koi së? (b) Nemene la nyine tro sa inine ngöne la tane mekune ka troa xulu?
17 Öni Tusi Hmitrötr, ame la pengöi Satana, tre “kösë liona a ho, kola thele tha i nyën.” (1 Pet. 5:8) Tune la ketre öni ka ses, nge ka mecijine ka thele tha, angeice a thupë ijine troa sesë troa xolouthe la mamoe ka kucakuca, maine ka nanyi qa ngöne la hnënge mamoe. Hane hi lai ketre kepine matre nyipi ewekë tro pala hi a lapa qale catre kowe la ekalesia me kowe la “Ate thupëne . . . la ite u i nyipunie.” (1 Pet. 2:25) Hna Amamane 7:17 a qaja la itre ka troa mele pe qa ngöne la akötre atraqatr, me hape, Iesu “a e angate kowe la timi ka mele ka qeqe ; nge tro Akötesieti a köle tije la nöjei tenge timida asë qa ngöne la nöjei lue meke i angat.” Drei la ketre hna thingehnaeane ka lolo catr!
18 Ka nyipi ewekë catre la hnëqa ne la itre qatre thupe Keresiano, angetre thupëne la ekalesia. Tro la itre hna acili cili a atre tune kaa ka hape, loi la aqane thupëne angatre la itre mamoe i Iesu? Tro sa sa la hnyinge cili ngöne la tane mekune ka troa xulu.
[Thying]
[Iatr ne la götran 21]
[Iatr ne la götran 23]
Itre qatre thupe a thupëne la ekalesia tune la atre thupë mamoe (Wange ju la paragarafe 8)
[Iatr ne la götran 25]
Catre la itre qatre thupe hmekëne la itre keme maine thin ka hiane casine la itre nekö i angatr qa ngöne la itre ka troa ajojezi angatr (Wange ju la paragarafe 17, 18)
