Nemene La Aqane Tro Pala Hi Ni a Mejiun Me Treqen?

“Tro ni a mejiune [me treqene] la Akötesie ate amele ni.”—MIKA 7:7.

NEMENE LA AQANE TRO NYIPUNIETI A SA?

Nemene la ini koi së qa ngöne la tulu i Mika?

Nemene la itre ewekë hne së hna treqen?

Nemene la aqane tro sa amamane la ole së pine la hnei Iehova hna itreqe?

1. Hnei nemene matre thatreine hë së itreqe?

 KOLA nyiqaane la itre drai ne la pune la fene i Satana lo 1914, ijine kola acili Joxu Keriso e hnengödrai. Hna isi e hnengödrai ngöne la macatre cili, nge hnei Iesu hna waja ukapië Diabolo me itre dremoni i angeice kowe la fen. (E jë la Hna Amamane 12:7-9.) Atre hë Satana laka, “xoxopate pe hi la ijine i nyën.” (Hna ama. 12:12) Ngacama “xoxopate pe hi la ijine” cili, ngo ame koi itre xan e easë, tre, qea pala ha. Hapeu, thatreine hë tro sa treqen, ke loi e canga traqa pi la drai ne tro Iehova a nyipune la fene i Satana?

2. Nemene la itre hnyinge hna troa sa hnene la tane mekune celë?

² Ka hetre ethanyine catre e troa thatreine itreqe. Pine nemen? Pine laka e thatreine hë së itreqe, tro së lai a huliwa menu, ke tha ase kö së pane mekune hnyawa la nyine kuca. Haawe, nemene la ka aijijë së tro pala hi sa mejiune me treqen? Tro la tane mekune celë a xatua së troa sa la itre hnyinge celë. (1) Nemene la ini hne së hna kapa qa ngöne la aqane itreqe i Mika perofeta? (2) Nemene la itre ewekë ka troa traqa, hatrene laka easenyi hë la pun? (3) Tro sa amamane tune kaa la ole së pine la hnei Iehova hna itreqe?

NEMENE LA INI KOI SË QA NGÖNE LA TULU I MIKA?

3. Nemene la itre ewekë ekö ka traqa e Isaraela ngöne la hneijine i Mika?

³ E jë la Mika 7:2-6. Hnei Mika perofeta hna öhne trongëne la kola nanazije trootro la lapaune ne la angetre Isaraela koi Iehova, nge ngöne la ijine i Ahaza Joxu, patre hnyawa ha la lapaune i angatr. Hnei Mika hna aceitunëne la kola patre la lapaune ne la angetre Isaraela memine la ketre isinöe ka ithiny, ka thine la ketre atr. Ame la aceitunëne jë la angetre Isaraela memine la isinöe ka ithiny, ke, hnene la hnei angatre hna akötrëne la itre xan. Hnene laka ka jole catre la aqane mele cili, patre hë la  ihnimikeu thene la lapa ka cas. Atre hnyawa hi Mika laka, thatreine kö tro angeice a saze la aqane mele cili, celë hi matre thithi jë angeice koi Iehova hnene la hni ka pexej. Thupene lai, hnei angeice hna mejiun, me treqene tro Iehova a eatrëne la thithi angeic. Xecie hnyawa koi Mika laka, tro kö Iehova a amekötine la ewekë cili ngöne la sipu ijine hnei Nyidrëti hna sa.

4. Nemene la itre jole ka eje the së?

⁴ Tui Mika, easë fe a mele e nyipine la itre atr ka tha imeku. Ala nyimu la itre atr ka “tha ole kö, me tha metöte kö, angete tha hnimi sinen.” (2 Tim. 3:2, 3) Kola ajolëne la mele së hnene la itre sine huliwa së me itre sine ini së me itre ka lapa easenyi së, angetre meku angatre hi. Tha fene itupathi kö lai kowe la itre xan e easë. Öni Iesu kowe la itretre drei nyidrëi ka hape, tro ha traqa la icilekeu qa ngöne la sipu hnepe lapa i angatre kö. Ka ceitu hnyawa hi la trenge ewekë i nyidrë memine la hna qaja hnei Mika 7:6. Öni Iesu: “Traqa ha ni troa iananyine la kuku memine la keme i angeic, me jajinyi memine la thine i angeic, me tesine memine la tesi angeic. Ame la nöjei ithupëjia memine la ate, te, it’ eje kö ngöne la hnalapa i angeice kö.” (Mat. 10:35, 36) Tro kö a jole catre e tha ka nyihluei Iehova kö la itre atrene la hnepe lapa, itre ka ihnyimasai, me icilekeu me easë. Maine ketre itupathi ka tune hi la hne së hna melën, tha tro pi kö sa thixötr. Mele nyipici ju pe koi Iehova, me mejiune me treqene tro Nyidrëti a amekötine la ewekë cili. Maine tro sa catre sipo ixatua thei Nyidrë, tro hë Nyidrëti a hamë së la trenge catre me inamacane ka ijije matre tro pala hi sa mele nyipici koi Nyidrë.

5, 6. Hnei Iehova hna amanathithi Mika tune kaa? Nemene pë hë la itre xa hna perofetane hnei Mika hna tha öhn?

⁵ Hnei Iehova hna nyijune la aqane itreqe i Mika. Hnei Mika hna öhne la kola nyipune la musi me meci Ahaza Joxu ka ngazo. Öhnyi Hezekia hi, nekö i Ahaza hnei angeic, la kola cile troa joxu, me xatuane la angetre Isaraela troa hmaca kowe la hmi ka wië. Hnei Mika fe hna öhne la aqane eatre la hnei angeice hna perofetane göi Samaria, lo kola lepe la baselaia i Isaraela götrane kolopi hnei angetre Asuria.—Mika 1:6.

⁶ Ngo tha öhne asë ju kö Mika la nöjei hnei angeice hna perofetane tune la aqane upi angeice hnei Iehova troa cinyany. Drei la ketre ceitun, öni Mika: “Ngöne la ite drai hnapine troa acili hutine la wete ne la ēnē i Iehova hune la hene la ite wet, nge troa adraiën’ eje hune la ite shashala, nge tro la nöjei nöj’ asë a xöte kow’ ej. Nge troa traqa la nöjei nöje ka ala nyimu, me hape, Trojë fe, mate elëjë shë kowe la wete i Iehova.” (Mika 4:1, 2) Ngacama ngazo ju hë la mele ne la itre atr ka mele xötreithi Mika, ngo ka xecie e kuhu hni angeice troa mele nyipici koi Iehova uti hë mec. Öni angeic: “Nöjei ate asë a isa tro ngöne la ëjene la ite haze i angat, tro pe kö sha tro ngöne la atesiwa i Iehova Akötesi shë epine palua.” (Mika 4:5) Hnei Mika hna mejiune me itreqe hnyawa ngöne la itre ijine ngazo, ke xecie koi angeice laka, tro Iehova a eatrëne asë la itre hnei Nyidrëti hna thingehnaean. Hnene la perofeta hna mejiune hnyawa koi Iehova.

7, 8. (a) Nemene la kepine matre tro sa mejiune koi Iehova? (b) Hnei nemene matre ame koi së, tha hmitre kö la drai Iehova?

⁷ Tro fe kö sa hane mejiune koi Iehova tui Mika? Ka loi fe tro sa hane tun. Öhne hë së la kola eatre la hna perofetane hnei Mika. Ame ngöne la itre drai ne la pune celë, itre milio lao atr qa ngöne la nöjei nöj, me nöjei tribu me qene hlapa a traqa kowe “la wete ne la ēnē i Iehova.” Ngacama angatre a traqa qa ngöne la itre nöje ka itö isi, ngo ame la itre hlue i Iehova celë, hnei angatre hna “lepelepe la ite taua i angate mate nyine uja dro,” nge xele fe angatre ma hane “ini ishi.” (Mika 4:3) Ketre madrine ka tru koi së tro sa nyiatrene la nöje i Iehova, nöje ka thele tingeting!

⁸ Aja së asë hi tro Iehova a canga apatrene la fene ka ngazo celë. Ngo ame pe, e tro sa  mejiune me treqen, loi fe troa ceitu la aqane mekune së me Iehova. Ase hë Nyidrë ië Iesu Keriso troa amekötine la itre atr, nge ase fe hë Nyidrëti sa la drai cili. (Ite hu. 17:31) Ngo qëmekene troa traqa la drai cili, Akötresieti a aijijëne la nöjei atr troa “wangate hmekune la nyipici,” me melëne la itre hnei angatre hna inin, matre mele fe angatr. The thëthëhmine kö së ka hape, hetre itre atr nyine troa amelen. (E jë la 1 Timoteo 2:3, 4.) Saqe catre hë matre traqa pi la pun. Maine tro sa catre xatuane la itre atr troa atre Iehova, tro së lai a öhne ka hape, tha tro kö a hmitre koi së la drai Iehova. Nge e traqa ha la pun, tro hë lai a tru la madrine së pine la hne së hna catre cainöj!

NEMENE LA ITRE EWEKË KA TROA TRAQA, HATRENE LAKA EASENYI HË LA PUN?

9-11. Eatre ju kö lo hna qaja ngöne 1 Thesalonika 5:3? Qeje pengöne jë.

⁹ E jë la 1 Thesalonika 5:1-3. Easenyi hë matre qaja jë hnene la itre nöje ka hape, “Tingetingë hë ; me lapa xetietë.” Maine tha ajane kö së troa amenu së, nyipi ewekë ‘tro sa hmeke me inamacan.’ (1 Thes. 5:6) Tro së enehila a ce ithanatane la itre xa ewekë ka traqa qëmekene troa qaja la ithuemacanyi cili.

¹⁰ Thupene lo lue isi ka tru, kola thele catrëne la tingetinge hnene la itre nöj. Thupene la pane isi ka tru, eköthe jë hi la Société des Nations matre troa hetre tingeting. Ame hmaca pena ha e thupene la hnaaluene isi ka tru, itre atr a mejiune ka hape, tro la ONU (Organizasio Ne La Itre Nöj Ka Ce Xöl) a traqa fë la tingeting. Hnene la itre ka cilëne la mus, me itre hene hmi hna amë la mejiune i angatre kowe la lue organizasio cili. Ame la nyine anyipicin, tre, ame lo 1986, hnene la ONU hna qaja ka hape, ame la macatre cili, tre Macatre Ne Tingetinge Kowe La Fen. Ame la macatre cili, ala nyimu la itre hene politik me hene hmi ka casi memine la tane la itre hmi Katolik göi troa ce thithi thatraqane la tingeting.

¹¹ Ngazo pe, ame asë hi lo hnei angatre hna qaja, me thithi fë, tre tha eatrëne kö lo hna qaja ngöne 1 Thesalonika 5:3, kola hape, “Tingetingë hë ; me lapa xetietë.” Pine nemen? Pine laka, tha traqa ju kö lo hna hape, troa “canga traqapi koi angate la hnëjin.”

12. Nemene la hne së hna atre göne lo ithuemacanyi hna hape, “Tingetingë hë ; me lapa xetietë”?

 ¹² Tro drei a ithuemacanyine elanyi ka hape, “Tingetingë hë ; me lapa xetietë”? Nemene la hna troa kuca elanyi hnene la itre hene hmi Keresiano göi ëjen, memine la itre hene la itre xa hmi ju kö göne la ewekë cili? Nemene la aqane troa lö hnine elanyi hnene la itre mus? Pëkö hna qaja koi së hnene la Tusi Hmitrötr. Ngo ame la hne së hna atre, tre, ngacama qaja ju hë ka hape, “Tingetingë hë ; me lapa xetietë,” nge kösë ewekë ka troa ej, ngo ame pe, tha celë kö la nyipi tingetinge lai me lapa xetietë. Satana pala kö la ka troa musi kowe la fene celë. Tha tro jë pi lö la fene a saze, ke tro pala hi a ngazo catr. Ekölö hi ni së elanyi e mejiune menune jë së kowe la itre trenge iaö i Satana, me hane sine menune la fen!

13. Pine nemene matre kola pane cila xome la itre enyi ne apatren hnene la itre angela?

¹³ E jë la Hna Amamane 7:1-4. Ame la easa treqene matre eatre jë la 1 Thesalonika 5:3, itre angela ka tru trenge catren a cila xome la itre enyi ne akötre atraqate nyine iapatreny. Nemene la hnei angatre hna treqen? Hnei Ioane aposetolo hna cinyihane ka hape, pane ase jë kapa hnene la itre hna iën, ene la “nöjei hlue i Akötesi shë” la hna pelehatrene tixenuë. a E ase hë lai, itre angela hë a nue pi la itre enyi ne apatren. Nemene ju hë la ka traqa e thupen?

14. Nemene la ka amamane koi së ka hape, tha hmitre pe kö matre apatrenyi Babulona Atraqatre pi?

¹⁴ Tro hë Babulona Atraqatr, ene la hmi ka thoi e cailo fen, a kepe thupene la huliwa i angeic, tro ha apatrenyi angeic. Mama hnyawa ha koi së laka, calemi hë la pune koi angeic. Ame la kola traqa lai, pëkö ixatua ka ijij. (Hna ama. 16:12; 17:15-18; 18:7, 8, 21) Öhne hnyawa ha së enehila laka, itre zonale a qaja angazone la itre hmi me itre ka elemeken itre ej. Ngo ame pe la itre hene hmi, öni angatre pala hi, pëkö hulö ka troa traqa koi angatr. Ngazo pe, angatre a mekune menun! Ke, thupene jë hi la hna qaja ka hape, “Tingetingë hë ; me lapa xetietë!” tro la itre musi a aca tro cile troa lepe la hmi ka thoi, me apatrene paluane ej. Patre palua ha Babulona Atraqatr! Epi tro sa atreine treqene hnyawa la nöjei ewekë cili.—Hna ama. 18:8, 10.

TRO SA AMAMANE TUNE KAA LA OLE SË PINE LA HNEI IEHOVA HNA ITREQE?

15. Pine nemene matre Iehova a itreqe hnyawa?

¹⁵ Ngacama itre atr a ahleuhleune la ëje i Iehova, ngo Nyidrëti a treqene hnyawa la nyipi ijine tro Nyidrëti a nyipune koi angatr. Tha ajane kö troa meci la itre atr loi thiina. (2 Pet. 3:9, 10) Easë fe kö a hane mekune tune lai? Qëmekene troa traqa la pun, nyimu aqane tro sa amamane la ole së pine la hnei Iehova hna pane itreqe.

16, 17. (a) Pine nemene matre loi troa hetre aja së troa xatuane la itre atr ka nanazij? (b) Pine nemene matre ijine hi la tro la itre ka nanazije a bëeke koi Iehova?

¹⁶ Xatuane jë la itre trejine ka nanazij. Öni Iesu, tru catre kö la madrine e hnengödrai la kola öhne hmaca la mamoe ka patr. (Mat. 18:14; Luka 15:3-7) Ka tru pala hi koi Iehova la itre ka hni koi Nyidrë, ngacama angatre a nango nanazije enehila. Tru la madrine i Iehova me itre angela la easa xatuane la itre atr troa bëeke koi Iehova.

¹⁷ Hapeue ju hë, maine epuni fe la ketre trejine ka nanazije enehila? Maine jë patre hë epuni ngöne la itre icasikeu, pine laka, hna akötrëne la hni epuni hnene la ketre atrene la ekalesia. Maine jë ekö hë epuni patr. Pane mekune jë epuni ka hape: ‘Nemene la pengöne la melenge enehila, ka loi kö hune ekö, nge tru catre kö la madrinenge hune ekö? Iehova la Atre akötrë ni, maine ketre atr hi ka tha pexeje tung? Hetre  ketre ewekë hë hnei Iehova Akötresieti hna kuca nyine akötrëne la meleng?’ Lolo pala hi la aqane thupë së hnei Iehova. Ngacama tha eatrëne kö së enehila lo hne së hna saene troa nyihluei Nyidrë, ngo Nyidrëti pala hi a aijiji së troa öhnyi madrine qa ngöne la itre ewekë ka lolo hnei Nyidrëti hna hamëne thatraqane la mele së. (Iako. 1:16, 17) Ketre, easenyi catre hë la drai Iehova. Ijine tro hi së la a bëeke koi Iehova, Tretretro së ka ihnim, me kowe la ekalesia. Celë hmekuje hi göhnë lai, hnë mele xetietë ngöne la itre drai ne la pune celë.—Deu. 33:27; Heb. 10:24, 25.

18. Pine nemene matre tro sa xatuane la itretre elemeken?

¹⁸ Xatuane hnyawa jë së la itretre elemeken. Tune la Atre Thupë mamoe ka tru ihnimin, Iehova pala hi a tro xomi së me thupë së. Hnei Nyidrëti hna acile la Hupuna i Nyidrë, Atre Thupë Mamoe Ka Sisitria. (1 Pet. 5:4) Hnene la itre qatre thupe ngöne la 100 000 nge hetre munën lao ekalesia hna xomi ijine troa thupëne la itre mamoe i Akötresie asë me isa wai angatre isa ala cas. (Ite hu. 20:28) Ame la easa xatuane hnyawane la itretre elekemen, easë hi lai a amamane koi Iehova me Iesu la hni ne ole së kowe la itre huliwa i nyidro koi së.

19. Nemene la aqane tro sa thingijëne la ithupëjia?

¹⁹ Qale catre jë së kowe la itre trejin. Kola hapeue lai? Ame la kola nyinyape troa lepe la itre sooce ka maca troa isi hnene la itre ithupëjia, tro la itre sooce cili a iqalekeu matre tha tro kö a nyijë i ithupëjia. Kösë ipetre i angatre ka catre lai. Catrehnine catre la isi Satana memine la itre hlue i Akötresie. Tha ijine tro pi kö së la a icilekeu memine la itre trejine me easë. Ijine tro pe së la a qale catre kowe la itre trejin, me elë hune la itre tria i angatr, nge tro fe sa mejiune koi Iehova.

20. Nemene la nyine tro sa kuca enehila?

²⁰ Epi tro pala hi sa acatrene catrëne la aqane imelekeu së me Iehova, me amamane ka hape, easa mejiune me treqen. Epi tro pala hi sa treqene hnyawa e qaja jë ka hape, “Tingetingë hë ; me lapa xetietë,” memine la kola troa pelehatrene tixenuëne la itre hna iën. Thupene jë hi lai, tro ha nue la enyi ne apatren hnene la eke angela, ame hna lepe apatrenyi Babulona Atraqatre pi. Ame ngöne la ijine easa lapa treqene la itre ewekë cili, loi e tro pala hi sa xötrethenge la itre hna amekötine qaathene la itretre elemekene ngöne la organizasio i Iehova. Wange kö, ke nyijëi Satana jë së me itre Dremoni! Ijine tro hi së la a xötrethenge la eamo hna hamëne hnene la atre cinyihane la salamo: “Catejë, nge tro nyidëti a aegöcatene la ite hni nyipunie asë angete teqe Iehova.”—Sal. 31:24.

[Ithueamacany]

[Thying]

[Iatr ne la götran 10]

[Iatr ne la götran 12]

Itre hlue i Iehova a kuca asë la hnei angatre hna atreine matre troa xatuane la itre ka nanazije troa bëeke koi Iehova (Wange ju la paragarafe 16, 17)

[Iatr ne la götran 14]

Ijine tro hi së la a qale catre kowe la itre trejine matre tha tro kö a nyijëi Satana me itre dremoni! (Wange ju la paragarafe 19)