Nemene La Aqane Tro Sa Xatuane La Itre Atr

ÖNI François, ketre qatre thup ka mele ngöne la ketre nöje gaa tha tru pala kö hnei mo, ka hape: “Ame la nyiqaane isi jë e celë, tre hnene laka, tha kapa kö itre atr la hna voot, nge celë hi kepine matre kotrene pi hnene la Itretre Anyipici Iehova la itre hnalapa i angatr. Tha ijiji hë la xeni me drösinöe, nge ame pe hi la ka hetrenyi pe, tre tru catre pala ha la thupen. Kolo ha thinge la itre baak, nge kola pë manien trootro, me ngazo lo itre masiin hnë xomi mani.”

Hnene la itre trejine trahmanyi ne la hnalapa ne thewe huliwa hna canga thele jëne troa hamë mani memine la itre xa ka nyipi ewekë kowe la Itretre Anyipici Iehova ka traqa itronyi ngöne la itre Uma Ne Baselaia ne lai nöj. Hnene la itre gurup ka isi hna kuci barage, ngo pine laka, atre hi angatre ka hape, tha hane kö la Itretre Anyipici Iehova lö hnine lai isi cili, haawe, hnei angatre pala hi hna nue gojenyine la itre loto ne la hnalapa ne thewe huliwa.

Öni François ka hape: “Ame ngöne la ketre ijine eahuni a tro kowe la ketre Uma Ne Baselaia, tre huji kuqane ju hi la loto huni hnene la ketre atr ka maca troa ikuqany. Ame pe, trianyi eahuni ju kö hnene la itre wene saatr. Ame la eahuni a öhne la ketre soc e nyenyape koi hun fë ikuqa, thaujë jë hi eahuni a kötre bëeke kowe la hnalapa ne thewe huliwa. Eahuni pë hë a olene jë koi Iehova laka, mele kö hun. Ame hë elany, hna tro hnene lo ala 130 la itre trejine kowe la ketre götrane gaa tingeting. Ame itre xan, tre traqa pi hë angatre kowe la hnalapa ne thewe huliwa, nge eahuni pë hë a hamë angatre ju la itre ka nyipi ewekë ngöne la götrane la u me götrane ngönetrei, uti hë la kola ase lo isi.”

Öni François ka hape: “Tru la tus hna kapa hnene la hnalapa ne thewe huliwa qaathene la itre trejine qa ngöne la nöj asë cili, göi troa qaja la hni ne ole i angatr. Ame la angatr a öhne la itre aqane xatua angatre hnene la itre trejine qa ngöne la itre xa nöj, tre kökötre catre jë hi la mejiune i angatr koi Iehova.”

Ame la kola lepe la itre trejine hnene la itre hulö ka traqa xan, maine zö i atr pena, tha easë hmekuje kö a qaja ka hape, “keukawaju me meji jë.” (Iako. 2:15, 16) Ngo tro pe sa hamëne la nyine troa akeukawanyi angatr ngöne la götrane la ngönetrei. Kola tune lo itretre dreng ekö ngöne lo hneijine i Iesu, laka ame la angatr a drenge laka troa traqa la ketre jiin, “hnei [angat] hna ce ewekëne troa upe la nyine ixomexatua koi ange tejine hna lapa e Iuda, cei tune memine la hnei angate hna isa atein.”—Ite hu. 11:28-30.

Ame easë itre hlue i Iehova, tre aja së hi la troa xatuane la itre atr ka aja ixatua ngöne la götrane la ngönetrei. Ngo hetre ajane fe la itre atr ngöne la götrane la u. (Mat. 5:3) Celë hi kepine matre hnei Iesu hna upe la itretre drei nyidrë troa inine la itre  atr, matre xatua angatre troa atrehmekune la aja cili, me thele troa eatrën. (Mat. 28:19, 20) Easë asë a isa xomi ijin, me nue trenge catr, me hamëne la hne së hna hetreny göi troa eatrëne lai mekune cili. Kola huliwane hnene la organizasio së la mani hna ithingë matre troa itö ewekë göi troa ixatua, ngo ame la pane nyine troa eatrën, tre ene la troa sajuëne la itre ewekë ne la Baselaia, me troa ixatua cainöjëne la maca ka loi. Aqane tro hi së lai a amamane la ihnimi së koi Akötresie, me kowe la atre lapa ezi së.—Mat. 22:37-39.

Loi e troa xeci koi nyipunie itretre ithingë göi troa sajuëne la huliwa hna kuca e cailo hnene la Itretre Anyipici Iehova, laka hna huliwane hnyawa la itre ahnahna i nyipunie. Ijiji nyipunieti kö troa xatuane la itre trejin? Pi tro fe kö nyipunie a hane inine la itre atr? Haawe, “the cipane kö la loi e ate kë ewekën, e atein’ eö troa kuca.”—Ite edomë 3:27.

[Iatr ne la götran 8]

[Hna eköhagen götran 9]

AHNAHNA THATRAQANE LA HULIWA NE INI

Nyimutre la itre ka hnëkëne amë la etrune la mani nyine troa kuiëne hnine la itre trengene mani thatraqane la itre ahnahna göi huliwa ne ini.

Ijije mina fe troa iupi fë mekötine la itre chèque koi Bethela. Loi e troa cinyanyine la ketre tusi matre troa amamane hnyawa ka hape, itre ahnahna.

CONTRATS DE PRÊT

Ijije hi troa nue kowe la ketre association ka tha huliwa mani kö la ketre mani ka tru, matre tro angatr a huliwan, pëkö intérêt. Ka tune la, ka hape, maine easa mekune troa pane nue la manie së kowe la Association Les Témoins de Jéhovah ne Kaledoni matre tro angatr a pane huliwan, tre ijije hi, nge pëkö intérêt.

ITRE XA AQANE SAJUËNE LA HMI

Hetre itre xa aqane troa sajuëne la huliwa ne la Baselaia.

Contrats d’assurance vie: Ijije hi troa kuca matre e meci hë së, tro pë hë a kapa la mani maine mo hnene la ketre association ka tha huliwa manie kö.

Prélèvements bancaires à l’initiative d’un donateur: E ajane la ketre atr troa hamë ahnahna thatraqane la hmi, ijije hi troa xome mekötine la mani hnei angeice hna ce axeciëne me baak.

Donations: Ame ngöne la itre xa nöj, ka tune e Faras me e Kaledoni, maine hetre itre ewekë së, maine mani, ijije hi troa tro koi notaire matre qaja ka hape troa hamëne kowe la ketre association hna kapa hnei mus nge ka ijije troa kapa. Ngo qëmekene troa hamë ewekë, tune la troa nue uma, loi e troa pane iatrene la Bethela.

Testaments: Ijije troa hamë ewekë maine mani pena kowe la ketre association ka tha huliwa mani kö, jëne la ketre testament hna fejan amë hnyawa. Qanyi së isa wange maine troa hamëne hi la sin, maine troa hamën asë.

Ijije tro la Association Les Témoins de Jéhovah a hane kapa lo itre hna hape donations maine legs. Maine ketre atr a mekune troa fejane la testament, loi e tro angeic a pane mekune hnyawa la etrune la itre ewekë hnei angeice hna troa hamën. Maine hnei angeice kö hna fejane lai testament (hna hape, olographe qene wiwi), loi e tro kö angeic a sipu tro fë koi notaire.

Nyimu aqane troa sajuëne hnei mani la huliwa ne la Baselaia; celë hi kepine matre, loi kowe la atre ham troa pane mekune hnyawa. Nge ketre, nyipi ewekë troa pane hnyingë pengöne hnyawa kowe la ketre notaire, maine ketre atr cilëne la itre götrane cili. Ijije mina fe troa cinyanyi kowe la Bethela, maine hë pena jëne la numero celë: 43 75 00. Tro la Bethela a hamëne la itre ithuemacany ka ijij, göne la itre ejolene göi edrö me göne lo hna hape itre donations, me itre dons de bienfaisance.