Drösinöe i Angeice La Troa Huliwa i Akötresie!

Ame la kola traqa la lue pionie ngöne la ketre hnalapa e Kenya, tre lö goeëne ju hi nyidroti la he ne la atr hune la ibeetr. Coco la neköi mano i angeic, nge ketre hopatre fe la lue ime i angeic. Ame ju hi la nyidroti a amamane koi angeice la hna thingehnaeane hnei Akötresie, laka tro ha “sheshë draië la ite ka genyi ca tune la aila,” tre hnyima pi hi lai trahmany.—Is. 35:6.

Kola atre hnene la lue pionie laka kola troa easenyi koi 40 lao macatre i Onesmus, nge ame ekö la angeic a mala, tre sine wezipo hë, a ka meci fë meci ne ijun. Neköi nemene ju kö, nge canga xeci hi la june i angeic. Pine laka, ka pë nyin la mec i angeic, haawe, kola mekune hnei Onesmus laka, aqane akötre me ti icea i angeice pë hë lai.

Hnei Onesmus hna kapa troa inine la Tusi Hmitrötr. Ngo, hna xele pë hë hnei thine tro angeic a hane sine la itre icasikeu i Keresiano, ke kola xouene e eatre ju angeic, nge nyi xane jë la akötre ka eje thei angeic. Celë hi matre hnene lo itre trejine hna enregistrer la itre icasikeu, matre tro pë hë Onesmus a ketre drenge e koilo hnalapa i angeic. Thupene la faifi lao treu ne ini Tus i Onesmus, angeic a mekune ju troa hane sine la itre icasikeu, ngacama hetre itre ejolen.

Hapeu, hna nyi xane kö la akötre i Onesmus hnene la hnei angeice hna hane sine la itre icasikeu i Keresiano? Ohea. Kola qaja hnei Onesmus ka hape: “Kolo pe a xapo la akötrenge ngöne la itre ijine icasikeu.” Kola mekune hnei angeice ka hape, mele hë angeic hnene la lapaune i angeic ka hnyipixe. Kola öhne hnei thin me madrine la elolone la mele i Onesmus, ene pe hane ju hi eahlo mekune troa hane inine la Tusi Hmitrötr. Öni eahlo jë hi: “Drösinöe ne la nekönge la troa huliwa i Akötresie.”

Kola tro la itre drai, nge kolo fe hë a hane cainöje hnei Onesmus. Ame hë e thupen, angeice fe hë a hane xome la bapataiso, nge drikona fe hë angeic. Ngacama thatreine pë hë Onesmus enijëne la lue ca i angeic memine la ketre ime i angeic, ngo ame pe, hetrenyi thei angeice la ajane troa kuca asë la hnei angeice hna atreine troa nyi hlue i Iehova. Angeic a mekune ju troa hane pionie ka ixatua, ngo nango luelu angeic troa xome la huliwa cili. Pine nemen? Pine laka, nyipi ewekë troa hetre ka troa uku angeice pala hi. Ame hë la angeic a amexeje la jole ka eje thei angeic, önine jë hi la itre trejine Keresiano, ka hape tro hë angatr a hane xatua angeic. Nge celë hi hnei angatre hna kuca, matre troa xatua Onesmus troa hane pionie ka ixatua.

Eje fe la aja thei Onesmus troa hane pionie lapa, ngo nyipi ewekë pala hi koi angeice troa hetre ka iuku. Ame e cili, angeic a kapa la ketre ithuecatre ka lolo qa ngöne la topik ne la drai. Ame la topik, tre, Salamo 34:8 kola hape: “Demeju, nge atejë laka ate ihnimi Iehova.” Ame hë e thupene la hnei Onesmus hna sine thele la xötr, angeice pë hë a axecië mekune pi troa hane pionie lapa. Enehila, foa lao drai ne la wiike ne angeic a hane cainöj, nge ala nyimu la itre hnei angeice hna ini Tusi memin, a kola kökötre lolo ngöne la götrane u. Ame hë ngöne la macatre 2010, angeice fe hë a hane sine la Ini Thatraqane La Huliwa Ne Pionie. Ame hë la angeic a öhne laka, ame la ketre trejine ka troa hamë ini, tre kolo hi lo trejine ka cainöje ekö koi angeice ngöne lo xötrei, ene pe elitrauje pi hi la madrine i Onesmus!

Meci hë la keme me thine i Onesmus, ngo tha patre kö la itre trejine trahmanyi me föe ne la ekalesia xatua angeic ngöne la nöjei drai. Tru la hni ne ole i Onesmus pine la itre manathithi hnei angeice hna kapa, nge angeic a trengeneune la ijine “tha tro kö a qaja hnene la ate lapan [la ihnadro], ka hape, Ini a mec.”—Is. 33:24.

[Iatr ne la götran 15]

[Iatr ne la götran 15]