ITRE HNA KUCA EKÖ

“Ceitunge Ekö Me Itret”

AME ngöne lo macatre 1929, tre naene lao drai ne pane catre cainöje la itre trejin, qaane lo treu Ogas koi Semitrepa; traqa koi 10 000 nge hetre munëne la etru i angatr, itre ka trongëne la Etazini asë. Hnei angatre hna tro fë la 250 000 lao itus me sine tus kowe la itre atr. Ame thene la itre ka cainöj, tre kola e mina fe lo itre hna hape, colporteurs (kolo aqane hëne ekö la itre pionie), ca thauzane la etrun. Kolo pala hi a kökötre la etru i angatr! Hna qaja hnene la Bulletin a ka hape “tha nyine qaja kö” la etrune la itre ka pionie, qaane lo macatre 1927 koi 1929.

Ame hë la pune la macatre 1929, traqa ju hi la jole ka tru. Ame lai Draimenu 29 Okotropa 1929, kösë kola pë enyipiewekëne la mani, matre tru catre la thangan. Itre thauzane la itre baak hna thing, memine lo itre hnë tra feja, me itre usines ka tru. Pë hë huliwane la itre atr, a traqa koi itre milio la etru i angatr. Ame lo macatre 1933, hnene la mus i Amerika hna xome hmaca la itre hnalapa ne la itre atr, a traqa koi 1 000 e ca drai; kolo itre hnalapa laka tha fenesi ju kö itre atr nyi thupen.

Nemene ju hë la hna kuca hnene la itre ka cainöje ngöne la drai ka pexej, matre troa cile kowe lai jole cili? Ame la ketre ewekë, tre ene la troa kuca hnyawa la ketre loto matre nyine hnalapa ju fe hë. Pëkö troa louer uma, me nyi thupene taxe, nge kolo fe a aijijëne la itre pionie tro pala hi a cainöj, me melëne la ka ijije hi. b Ame ngöne la ketre ijine asabele, hna xome la ketre loto ka tune lai, nyine hnë meköle ne la itre ka traqa. Ame hë lo macatre 1934, hnene lo Bulletin hna qeje pengöne la itre nyine troa kuca matre troa hetre tim me hnë kuci xen, me hnë meköl, me aqane troa kuca matre keukawa e koho hnine la loto e ijine hnötr.

Ame la itre ka cainöje ka atrein, tre angatre pë hë a ketre kuca jë kö la loto i angatr matre nyine uma i angatre ju fe hë. Hnei Victor Blackwell hna mekune hmaca la pengö i Noa me hape: “Ame Noa lo, tre tha ka cai he kö, nge ketre ame ni tre pëkö ca hnenge hna atreine ngöne lai aqane troa kuca matre nyine hnalapa jë fe la loto.” Ngo ame pe, angeice kö la ka sipu kuca matre nyine hnalapa jë la loto i angeic.

Hetrenyi fe Avery me Lovenia Bristow la ketre loto ka tune lai. Öni Avery: “Ceitunge ekö me itret, ame la jëng, jë i umange fe.” Ka ce pionie ekö la lue trefëne celë memine la lue xa trefën, Harvey me Anne Conrow la ëje i nyidro, nge ame la hnine la loto i nyidro, tre hna ami koltrane la itre pepa, nge afedrene ju hë. Uke mina pi la itre pepa. Mekune pala hi Avery lai loto, nge öni angeic: “Hane petre hi lai ketre loto, laka ketre pengöne pi kö!” Ngo ame pe, angeic a qaja lai lue trefëne me lue nekö i nyidro trahmanyi ka hape, “pëkö ha treneköne ka madrine tui angatr.” Hna cinyihane hnei Harvey Conrow ka hape: “Pë ju kö itre xa ewekë hne huni hna ajan, tingetinge la mele hun ngöne la huliwa i Iehova, nge tha sihngödri kö la ihnim i Nyidrëti koi hun.” Angatre pë hë a ce tro jë troa sine la Ini Gileada nge e thupen, upi angatre jë hi a tro Peru matre troa mesinare e cili.

Ame la itre xa hnepe lapa ka pionie, tre Battaino la ëjen. Ame hë la kola atre hnei Giusto me Vincenza ka hape, hace hë Vincenza, haawe, nyidroti a nyihnyawane jë la ketre neköi kamio, kolo Ford ne 1929, lo model hnapan, matre nyi uma nyidro, “kösë ketre hnahage ne hotel ka mingöming,” tha tune kö lo uma mano hnei nyidroti hna lapa ngön ekö. Ngacama hetre nekö i nyidroti  hë jajiny, ngo hnei nyidroti pala hi hna xome la huliwa ne pionie, me cainöje kowe la angetre Itali ka mele e Etazini.

Nyimutre la itre atr ka drenge la maca ka loi, ngo pine laka, ka puafala, nge pëkö huliwa i angatr, haawe, jole koi angatre troa hamë mani nyine thupene la itre itus. Ngo ame pe, tre, angatre a hamëne la nöjei ewekë ka lolo nyine hnan la itre itus. Hnene la lue pionie hna fejane ngöne ipepa la 64 lao pengöne ewekë hna hamëne hnene la itre atr ka drei nyidro. Kola e fe ngöne la ipepa ka hape, “ceitu me itre ewekë hna xeene amë thatraqane la ketre nöj.”

Hnei Fred Anderson hna cainöje kowe la ketre atre axö öni ka hamëne la lue thulu i thine i angeice nyine hnan la itre itus. Ame pena ngöne la ketre hna axö öni, tre, hetre ajane la ketre trahmanyi troa e la itre itusi së, ngo öni angeic, “Thatreine kö ni troa e, ke, pëkö thulueng.” Eloine pe laka, hna hamë angeice hë lo lai lue thulu, matre tha jole hë koi angeice troa hane e la itre itus; tru la madrine i angeice troa hamë ahnahna nyine hnan lo lai itre itus me lue thulu.

Hetre neköi uma i gutu ka pë aliene hna xome trongëne hnei Herbert Abbott hnine la loto i angeic. Angeice a tro pi troa thele könitre maine foa lao gutu, me tro troa salemëne itre eje ngöne la hna maketr, me nyialiei saasi ne la loto i angeic. Hnei angeice hna cinyihane ka hape, “Maine hna pë manie i nyiho ngöne la itre xa ijin, ngo tha celë kö la ka sewe nyiho. E hetre saasi ne la loto, nyiho a catre huliwa, me mejiune koi Iehova.”

Hnene la mejiune ne la itre hlue i Iehova me aqane catre i angatre hna xome trongë angatre me xatua angatre ngöne la itre macatre ka jole cili. Ame ngöne la ketre ijine ne hnahna enyi me mani, hna mala trane la loto i Maxwell me Emmy Lewis, eloine pe, hnei nyidroti hna canga kötre qa hnine la loto. Hna cinyihane hnei Maxwell ka hape: “Tha celë kö la itre ewekë cili la ka troa sewe nyiho troa kuca la huliwa. Tru catre pala kö la nyine troa kuca, nge aja i nyiho troa eatrën.” Tha hna kucakuca kö hnei Maxwell me Emmy, ngo hnei nyidroti hna nyihnyawane hmaca la loto i nyidro, nge hna xatua nyidroti fe hnene la itre sinee i nyidro.

Ame ngöne la itre hneijine jole enehila, casi hi la aqane catre huliwa ne la Itretre Anyipici Iehova, itre milio la etrun. Eje hi laka, tune lo lai itre pionie cili, loi e tro pala hi sa catre cainöje uti hë la tro Iehova elanyi a umuthe la huliwa.

[Ithueamacany]

[Iatr ne la götran 31]

[Iatr ne la götran 32]

Hna nyinyape fë la loto hna nyi uman hnei sine botre hune la hneopegejë ngöne la ijine mani atraqatr e Ëëd