Itretre Thupe Fe, Tune Jë La Atre Thup Ka Sisitria
Itretre Thupe Fe, Tune Jë La Atre Thup Ka Sisitria
“Hnei Keriso hna xomi aköte thatraqai nyipunie, kola hamë tulu thatraqai nyipunie, mate tro nyipunie a xöte thenge la ite thupa ca i nyidë.”—1 PET. 2:21.
NEMENE LA AQANE TRO NYIPUNIETI A SA?
Nemene la aqane tro la itre qatre thup a nyitipu Iehova?
Nemene la aqane tro la itre qatre thup a nyitipu Iesu Keriso?
Pine nemene matre kola iwai trootro hnene la itre qatre thup?
1, 2. (a) Maine troa hamëne la ka nyipi ewekë kowe la itre mamoe, nemene hë la thangan? (b) Hnauëne laka, kola aceitunëne lo itre atr ne lo hneijine i Iesu memine la itre mamoe ka pë atre thupën?
TROA lolo la itre mamoe, e hna thupëne hnyawa nyudreni hnene la atre thupë mamoe. Kola qaja hnene la ketre itus ka hape, maine tro la atre thupë mamoe a fejane trongëne hi la itre mamoe, ngo tha hna mekune kö la itre xa ewekë hnei nyudreni hna ajan, tro ha kucakuca me wezipo trootro. Ngo e tro la atre thupë mamoe a hamëne hnyawa la ka nyipi ewekë koi nyudreni isa ala cas, troa kökötre lolo me pipixenyë la itre mamoe.
2 Ceitune hi lai memine la ekalesia. Maine tro la itretre thup Keresiano a thupëne me hamëne la ka nyipi ewekë kowe la itre Keresiano isa ala cas, tro ha hetre loi kowe la ekalesia. Mekune ju së lo ijine Iesu a utipine la itre ka ala nyim pine laka, “kucakuca ha angat, me isa ije hë, tune la nöjei mamoe ka pa ate thupën.” (Mat. 9:36) Hnauëne laka, ceitui angatre memine la itre mamoe ka pë atre thupën? Pine laka ka calogitr nge catrehnine la aqane iameköti ne la itre hna acile troa ini nyudreni la wathebo i Akötresie, nge ketre, tha trongëne pena kö angatr la hnei angatre hna inin. Tha hnime kö itre hene ne hmi la itre atr, me hamëne la ka nyipi ewekë koi nyudren, ngo angatre pe a thue ejolene la itre atr, matre hace hë koi nyudreni troa nyi hlue i Akötresieti hnyawa. Kösë lo hna atë hui nyudreni la itre “ehnefe ka hace.”—Mat. 23:4.
3. Nemene la nyine tro la itre qatre thup a mekune hnyawa ngöne la angatr a thupëne la itre mamoe?
3 Ketre ka tru mina fe la hnëqa ne la itre qatre thup enehila, pine laka angatr a thupëne la itre mamoe i Iehova me Iesu. Nge pine laka hnimi nyudreni catre hnei Iesu, “ate thupëne aloine la ite mamoe,” goi hamën fe nyidrëti la mele i nyidrë koi nyudren. Hnei Keriso hna “itö” nyudreni hnene la ‘sipu madra i nyidrë ka tru alameken.’ (Ioane 10:11; 1 Kor. 6:20; 1 Pet. 1:18, 19) Tha tro pi kö la itre qatre thup a thëthëhmine laka, Iesu Keriso la he i angatr, nge “ate thupë mamoe [ka] sisitia.” Tro kö angatr a troa isa qeje thiinane koi nyidrë, qa ngöne la aqane thupëne angatre la itre mamoe.—Heb. 13:20.
4. Nemene la hne së hna troa ce ithanatane ngöne la tane mekune celë?
4 Nemene la aqane tro la itretre thupe Keresiano a thupëne la itre mamoe? Hna ithuecatre kowe la itre atrene la ekalesia asë troa ‘drenge la ite mekene i nyudren.’ Ngo hnei Iehova mina fe hna qaja kowe la itre qatre thup, tha tro kö a “qene joxune la ite qâ” i angatr, ene la itre mamoe i Akötresie. (Heb. 13:17; e jë la 1 Peteru 5:2, 3.) Nemene la aqane tro pala hi la “ite mekene” a thupëne matre tha tro kö angatr a “qene joxune” la hnëqa i angatr? Kolo lai a hape, nemene la aqane tro la itre qatre thup a thupëne matre tha tro kö a sasaithe la aqane musi angatre hune la itre mamoe hna ahnithe koi angatr hnei Akötresie?
NYIDRËTI A “XEPI NYUDENI NGÖNE LA IMANO I NYIDË”
5. Nemene la hna ini së hnei Isaia 40:11 göi Iehova?
5 Öni Isaia perofeta göi Iehova ka hape: “Tro nyidëti a hiane la hnënge mamoe i nyidë tune la ate thupë mamoe ; tro nyidëti a hatupe la ite nekö i mamoe i nyidë ngöne la lue ime i nyidë, me xepi nyudeni ngöne la imano i nyidë, me engëne hmidrane la itete aiji thin.” (Is. 40:11) Kola amamane hnene la xötre celë la aqane nyi hnyawane Iehova la itre ka kucakuca, me itre nyine tro Nyidrëti a thupën. Atre pengöne kö Iehova la hna isa ajane hnene la itre atrene la ekalesia, nge madrine Nyidrë troa xatua nyudren, tune la atre thupë mamoe ka atre pengöne hnyawa la hna isa ajane hnene la itre si nyidrë. Ketre, Iehova a thue keukawa me nyihnyawa së ngöne la easa melëne la itre ijine akötre me ijine jol, tune la aqane nango xom acone la nekö i mamoe ka hnyipi mala hnene la atre thupë mamoe. Nyidrëti hi la “Tetetroti ka ihnim.”—2 Kor. 1:3, 4.
6. Nemene la aqane tro la qatre thup a nyitipu Iehova?
6 Hane hi lai tulu ka lolo hna amamane hnene la Tretretro së kowe la atre thup ngöne la ekalesia! Loi e tro angeic a atrehmekune la itre hna ajane hnene la itre mamoe, tui Iehova. Maine tro la qatre thup a atre pengöne la itre jole hna melëne hnei nyudren, tro hë angeic a atre la ijine me aqane tro angeic a hamëne la itre ithuecatre me ixatua ka ijij. (Ite edomë 27:23) Kolo lai a a hape, tro la qatre thup a xomi ijine troa pane ce ithanata memine la itre trejine me angeic, trahmanyi me föe, me drei nyudren. Ngacama kola thupëne hnene la qatre thup matre tha tro kö a lö hnin menune la mele i nyudren, ngo ame pe angeic a wang atrune la itre hnei angeice hna öhne me dreng e hnine la ekalesia, me xomi ijine troa “xatuane la ite ka kucakuca.”—Ite hu. 20:35; 1 Thes. 4:11.
7. (a) Nemene la aqane thupëne ekö la itre mamoe i Akötresie hnene lo itretre thup ne lo hneijine i Ezekiela me Ieremia? (b) Nemene la ini nyine tro la itre qatre thup a kapa qa ngöne la aqane ujë i Iehova kowe la itretre thupe cili ka ngazo?
7 Pane mekune ju hi së la thiina ne la itretre thupëne la nöje i Akötresie ngöne lo hneijine i Ezekiela me Ieremia. Hnei Iehova hna thipetriji angatr pine laka, hnei Nyidrëti hna upi angatre troa thupëne la itre mamoe i Nyidrë, ngo tha aeatrëne hnyawane kö angatre lai hnëqa cili. Öni Iehova ka hape: “Ite öninë hë la ite öni ne hnit’ asë la ite mamoeng, ke pëkö ate thupën, nge tha hna thele la hnënge mamoenge hnene la itete thupë mamoeng, nge hnei itete thupë mamoe hna thu a i angate kö, ngo tha hna thu a ne pe la hnënge mamoeng.” Kola akötre la nöje pine laka, tha meku nyudreni kö hnene la itretre thupë nyudren, nge goi hlawa fe angatre la enufa i nyudren. (Ezek. 34:7-10; Iere. 23:1) Itre kepine hi lai, matre Akötresieti fe a thipetrije enehila la itre hene ne hmi. Nemene la ini ka tru nyine tro la itre qatre thup a kapa qa ngöne la aqane ujë i Iehova kowe la itretre thupe cili ka ngazo? Nyipi ewekë tro angatr a thupëne me hnime hnyawa la itre mamoe i Iehova.
“ASE HË NI HAMË NYIPUNIE LA TULU”
8. Nemene la aqane tro la itre qatre thup a nyitipu Iesu ngöne la angatr a hamë eamo kowe la itre trejine me angatr?
8 Pine laka, itre atr ka ngazo së, maine jë troa hetre itre xan e hnine la ekalesia ka tha nyipi trotrohnine hnyawa kö la hnei Iehova hna thele thei angatr. Maine jë, tro angatr a xome la itre mekune tha hna nyi trepene kö hnene la Tusi Hmitrötr, maine pena, troa mama ngöne la thiina ne la itre xa Keresiano laka, tha ka macaje pala kö angatr. Nemene la aqane troa ujë hnene la itre qatre thup? Loi e tro angatr a nyitipune la aqane xomihnin ahoeane Iesu la itretre drei nyidrë. Tha mano kö la itretre drenge iwesitrë göi troa atre la ka sisitria e angatr ngöne la Baselaia, ngo tha hnei Iesu kö hna hane elëhni koi angatr. Hnei nyidrëti pe hna catre ini angatr, me hamëne hnyawa koi angatre la itre eamo göne la aqane troa hni ka ipië. (Luka 9:46-48; 22:24-27) Goi hnea fe nyidrëti la itre waca ne la itretre dreng göi troa amamane koi angatr la pengöne la atr ka ipië. Ketre ame fe enehila, loi e tro la itre qatre thup a hetrenyi la hni ka ipië.—E jë la Ioane 13:12-15; 1 Pet. 2:21.
9. Nemene la thiina ne lo lue aposetolo nyine tro Iesu a wenë amekötin?
9 Ame la mekuna i aposetolo Iakobo me Ioane, tre qâ ne la atre thup troa musi hui itre xan. Celë hi matre hnei nyidro hna sipone koi Iesu troa cilëne la göhnë ka tru ngöne la Baselaia. Ngo hnei Iesu hna amekötine la aqane wai ewekë i nyidro, me ini nyidro troa saze mekun. Öni nyidrë: “Ate hë nyipunie laka thina i angete musinë angete etheni troa qene joxu hui angat, nge hna musinë angate hnei ite ka tru. Tha tro kö a tune lai thei nyipunie ; ngo ame la ate ajane troa tru thei nyipunie, te, tro angeic’ a huliwa i nyipunie.” (Mat. 20:25, 26) Nyipi ewekë tro la lue aposetolo a isi memine la ajane troa ‘musinëne’ la itre trejine me nyidro, ene la troa qaja lapaane koi angatre la itre nyine tro angatre a kuca.
10. Nemene la aqane tro la itre qatre thup a thupëne la itre mamoe, tune la hna upi angatr hnei Iesu? Nemene tulu la hna hamëne hnei Paulo?
10 Aja i Iesu tro la itre qatre thup a thupëne la itre mamoe i nyidrë, tune la aqane ujë i nyidrë. Loi e tro angatr a huliwa thatraqane la itre trejine me angatr, itre trahmanyi me föe, ngo tha tro pe a nyi maseta. Hnei Paulo hna hane huliwa koi itre xan, tui Iesu. Öni angeice ngöne la tusi angeic kowe la itre qatre thup ne Efeso ka hape: “Ate hë nyipunie la thinange ngöne la nöjei ijine hnenge thei nyipunie, qane ngöne lo drai hnapane lo traqa ni e Asia. Hnenge hna nyi hlue i Joxu memine la hni ka ipië.” Aja i Paulo tro la itre qatre thup a hetrenyi la hni ka ipië me catre huliwa thatraqane la itre trejine me angatr. Hnei Paulo hna inine la itre qatre thup jëne la thiina i angeic la aqane “troa xatuane la ite ka kucakuca.” (Ite hu. 20:18, 19, 35) Öni angeice ngöne la tusi angeice koi angetre Korinito ka hape, tha angeice kö a musinëne la lapaune i angatr. Angeice pe la ketre hlue i Akötresie tui angatr, nge aja i angeice troa xatua angatre troa nyi hlue i Akötresie fë la madrin. (2 Kor. 1:24) Paulo la ketre atr ka catre huliwa me ipië, nge tulu lai thatraqane la itre qatre thup enehila.
LOI E TROA NYI TREPENE LA EAMO HNENE “LA WESI ULA KA NYIPICI”
11, 12. Nemene la aqane tro la ketre qatre thup a xatuane la ketre trejine troa axecië mekun?
11 Loi e tro pala hi la qatre thup ne la ekalesia a hamëne la eamo hna nyi trepene hnene “la wesi ula ka nyipici,” ene la Tusi Hmitrötr. (Tito 1:9) Nge loi e tro fe a hamëne lai eamo “ngöne la hni ka menyik.” (Gal. 6:1) Ame la atre thup ka lolo, tre tha angeice kö a musinëne la itre trejine me angeic, ngo angeic a thele troa xatua angatre troa ketre sipu axeciëne la itre mekune hna nyi trepene hnene la ihnimi angatre koi Iehova, memine la Wesi Ula i Nyidrë. Drei la ketre ceitun, xatuane jë hi la ketre trejine hnene la ketre qatre thupe matre tro angeice a atreine sipu axeciëne la ketre mekune ka tru. Hnene lai qatre thupe hna xatuane lai trejine hnene la itre ithanata qa hnine la Tusi Hmitrötre me qa ngöne la ketre tane mekune e hnine la itre itusi së. Ase jë hi, angeice a hnyingëne ju kowe lai trejine la pengöne elanyi la imelekeu i angeice me Iehova qa ngöne lai aqane axecië mekune i angeic. Hnene fe lai qatre thupe hna amekunë angeice la enyipiewekëne troa sipo ixatua thei Akötresie, qëmekene troa axecië mekun. (Ite edomë 3:5, 6) Ame hë la nyidroti a ase ithanata, kolo pë hë a nue angeice hnene la qatre thup troa ketre sipu axecië mekun.—Rom. 14:1-4.
12 Ame la musi hna cilëne hnene la itre qatre thup, tre ka xulu qa hnine la Tusi Hmitrötr. Celë hi kepine matre nyipi ewekë tro pala hi angatr a huliwane hnyawane la Tusi Hmitrötr me nyi trepene la itre eamo hnene ej. Aqane tro hi la itre qatre thupe lai a kuca matre tha tro kö a sasaithe la musi hna nue koi angatre hnei Akötresie. Tha ewekë i angatre kö la itre mamoe. Ame hë elany, isa qanyine pë hë la itre atrene la ekalesia troa isa qeje thiinane koi Iehova me Iesu, qa ngöne la aqane axecië mekune i angatr isa ala cas.—Gal. 6:5, 7, 8.
“TULU NE LA HNËNGE MAMOE”
13, 14. Tro la itre qatre thup a amamai tulu ka loi ngöne nemene götran?
13 Ase jë hi Peteru qaja kowe la itre qatre thup ka hape tha tro kö a “qene joxune” maine musinëne la itre trejin, angeice pë hë a ithuecatre jë koi angatre troa nyi “tulu ne la hnënge mamoe.” (1 Pet. 5:3) Nemene la aqane tro la qatre thup a amamai tulu kowe la itre mamoe? Hane hi la lue thiina nyine troa huliwane hnene la ketre trejine ka ajane troa qatre thup. Ame la hnapan, nyipi ewekë tro angeic a atreine “mekun.” Kolo lai a hape, trotrohnine hnyawa hi angeice la itre trepene meköti ne la Tusi Hmitrötr, nge atre fe angeice la aqane troa trongëne ngöne la mele i angeic. Tha ka hnehengazo menu kö angeice ngöne la itre ijine jol, ngo angeice pe a mekune hnyawa, qëmekene troa axecië mekun. Ame la hnaaluen, tre loi e tro angeic a “musinëne aloine la lapa i angeic.” Kolo lai a hape, maine ka trene föe hmunë me ha kuku la qatre thup, loi e tro angeic a amamai tulu ka loi, “ke maine tha’ teine la ate troa musinëne la lapa i angeice kö, tro angeic’ a thupëne tune ka la ekalesia i Akötesie ?” (1 Tim. 3:1, 2, 4, 5) Lue thiina lai ka upe la itre Keresiano ne la ekalesia, itre trahmanyi me föe, troa mejiune kowe la itre qatre thup.
14 Itre qatre thup mina fe a amamai tulu ka loi ngöne la aqane elemekene angatre la huliwa ne cainöj, tui Iesu ekö. Ka tru koi Iesu ekö la troa cainöjëne la maca ka loi ne la Baselaia, nge hnei nyidrëti fe hna hane inine la itretre drei nyidrë la aqane troa tro xome la huliwa cili. (Mar. 1:38; Luka 8:1) Ame enehila, madrine catre la itre trejine troa ce cainöje memine la itre qatre thup. Tha sihngödri kö koi nyudreni la aqane catr ne la itre qatre thup ngöne lai huliwa cili, nge nyudreni a xomi ini qa ngöne la aqane hamë ini hnei angatr. Ame la kola öhne hnei nyudren la hna xomi ijine me trenge catre hna kuca hnene la itre qatre thup ngöne la huliwa ne cainöj, ngacama tru catre la jol, haawe, hane jë fe hi nyudreni lai enije tun. Kolo fe a amamai tulu ka loi hnene la itre qatre thup jëne la aqane hnëkëne angatre la itre icasikeu, me hamë mekun, me kuca la itre xa hnepe jole tune la troa nyihnyawa Uma Ne Baselaia.—Efe. 5:15, 16; e jë la Heberu 13:7.
“XATUANEJË LA ITE KA KUCAKUCA”
15. Hnauëne laka kola iwai trootro hnene la itre qatre thup?
15 Ame la atre thupë mamoe ka lolo, tre canga saqei angeice hi xatuane la mamoe ka eatr, maine ka wezipo pena. Ceitune hi lai memine la itre qatre thup laka, loi e tro fe angatr a canga xatuane la itre atr ka akötr maine ka aja eamo maine ithuecatre pena. Nyipici laka ame la itre qatre memine la itre ka wezipo, tre hetre aja i angatre ngöne la nöjei drai, ngo ame la ka nyipi ewekë catre kö, tre ene la troa thuecatrei angatre me akeukawanyi angatre jëne la Tusi Hmitrötr. (1 Thes. 5:14) Ame pena la itre thöthi ne la ekalesia, tre nyudreni a isi memine “la ite aja i thupëtesij.” (2 Tim. 2:22) Tro hë la itre qatre thup a xatuan asë la ekalesia, jëne la hna iwai trootro. Ame ngöne la itre ijine iwai cili, angatr a tupath troa trotrohnine la itre hna melëne hnene la itre trejin, me hamëne koi nyudreni la ixatua qa hnine la Tusi Hmitrötr. Maine tro la itre qatre thup a canga hamëne kowe la itre trejine trahmanyi me föe la ixatua ka ijij, tro hë la itre jole ka tru a trianyi nyudren.
16. Ame la kola traqa la ketre jole ka tru kowe la ketre atrene la ekalesia, nemene la nyine tro la itre qatre thup a kuca?
16 Ngo tune kaa ju hë e traqa ju la ketre jole ka tru kowe la ketre trejin, nge ajojezine pi la aqane imelekeu i angeice me Iehova? Öni Iakobo: “Hape u, hetete meci thei nyipunie ? tro angeic’ a thenge la ite qate ne la ekalasia ; nge tro angate a thithi thatraqai angeic, me sië wakacu angeice ngöne la atesieti ne la Joxu ; nge ame la thithi lapaun, te, tro ha amelene la wezipo, nge tro Joxu a acilë angeice jë ; nge maine hnei angeice hna kuca la nöjei ngazo, tro ha shenge tije pi.” (Iako. 5:14, 15) Maine hetre “meci” ne lo lai trejin, nge tha “thenge [kö angeice] la ite qate,” nge atre ju hi angatre la ewekë ka traqa koi angeic, loi e tro la itre qatre thup a canga xatua angeic. Ame la kola ce thithi hnei angatre memine la itre trejin, maine thatraqai nyudreni pena, me xatua nyudreni ngöne la itre ijine jol, itre qatre thupe hi lai a amamane laka, itretre thupe ka lolo angatr, nge ka hamë ithuecatre kowe la itre trejine me angatre troa nyi hlue i Akötresieti pala hi, fë la hni ka madrin.—E jë la Isaia 32:1, 2.
17. Ame la itre qatre thup a nyitipune “la ate thupë mamoe nge sisitia,” nemene hë la thangane kowe la ekalesia?
17 Kola isa catre hnene la itre qatre thup Keresiano troa nyitipu Iesu Keriso, “la ate thupë mamoe nge sisitia,” ngöne la nöjei huliwa i angatr asë e hnine la organizasio i Iehova. Itre trejine lai ka trene hnëqa, nge ka xatuane la itre mamoe troa macaje trootro me nyipici koi Akötresie. Easa olene atraqatre kowe la itretre thup cili ka ihnim, me koi Iehova mina fe, Atre Thupë Mamoeë së ka sisitria.
[Thying]
[Iatr ne la götran 26]
[Iatr ne la götran 29]
Itre qatre thup a xatuane la hnepe lapa i angatr troa hnëkë kowe la huliwa ne cainöij (Wange ju la paragarafe 13)
[Iatr ne la götran 30]
Itre qatre thup a amamai tulu ka loi ngöne la huliwa ne cainöj (Wange ju la paragarafe 14)
