HNA qaja hnyawane hnene la Tusi Hmitrötre koi trahmany ka hape: “Loi e tro nyipunie a isa hnime föene tui nyipunieti kö.” Ketre tui föe, tro angeic a “metötëne la trahmany.” Tro nyidroti a isa kuci hnëqane tune la ka “ca ngönetei.” (Efe. 5:33; Gen. 2:23, 24) Tro ju pë hë la itre drai nge kolo pala hi a catrehnine catre la aqane imelekeu i nyidro, tune la ihnimekeu i nyidro. Ijije troa aceitunëne lai aqane imelekeu i nyidro memine la itre wane la lue isinöe ka cia ieasenyi. Celë hi aqane ilöthine la hni ne la trahmanyi me föe ka mele madrin.

Ngo ue ju hë e meci ju la trahmanyi maine föe? Haawe, ame lo otrene ka catre ka iothekeu nyidro ngöne la ijine mel, tre tro hë lai a xeci. Ame pë hë itre xa trahmanyi maine föe hna meci trij, angatre pe hi a mele fë la hacehni, me hleuhleu cas, maine pena troa lapa fë trenge wesitr, me sipu upe koi angatre kö la zön. Traqa ha Daniella kowe la 58 lao macatre ne faipoipoi angeic, matre nyimu atr hnei angeice hna atre ka meci föen. a Ngo ame fe hë la kola meci triji angeic, öni angeic: “Thatre pengöne kö ni la mele celë ekö. Ewekë lai hne së hna thatreine trotrohnine e tha ase kö së melën.”

Önine la itre ka thele ewekë ka hape, pë hmaca ju kö ka angazone la mele së hune la troa patre la hnimina së. Nyimu ka meci föen ka mekune tune lai. Hna meci triji Millie hnene la föi angeic a nyimu macatre hë enehila. Ame pë hë la angeice a mele sine föe, öni angeic: “Kösë ketre götrane la ngönetreinge a patr.” Aqane drenge hi angeice lai e kuhu hni angeic, thupene la hna meci la föi angeic ka 25 lao macatren.

Öni Susana pena kö ekö, ame la itre sine föe ka  melëne la itre akötre i angatre ngöne la itre macatre ka nyimutre, tre, ketre tru menu pala ha la hnei angatre hna amamane la hleuhleu i angatr. Ngo ame hë e thupen, meci pi fe hi la föi angeic ngöne la nyidrëti a 38 lao macatre. Thupene la 20 lao macatre, öni angeic: “Pëkö drai ne tha meku nyidrë hneng. Kolo pala hi a xölaxöla la trenge timidrang, ke tha patre kö nyidrë e kuhu hning.”

Tusi Hmitrötre a anyipicine ka hape, ame la hace ne la hna meci trij, tre ka akötre catr, nge ka hut. Ame la kola meci hnei Sara, hnei Aberahama, föi eahlo hna traqa me “teije latesi pi Sara.” (Gen. 23:1, 2) Ngacama ka tru la lapaune i Aberahama kowe la melehmaca, ngo atraqatre la akötre i nyidrë la kola meci triji nyidrë hnene la hnimina i nyidrë. (Heb. 11:17-19) Thupene la hna meci hnei Rakela, hnimina i Iakobo, thatreine pi kö nyidrëti thëthëhmine la föi nyidrë. Hnei nyidrë hna qaja atrunyi eahlo kowe la itre nekö i nyidrë.—Gen. 44:27; 48:7.

Nemene la ini nyine tro sa xome qa ngöne la itre tulu hne së hna ce wange qa hnine la Tusi Hmitrötr? Tru la akötre ne la itre sine föe me trahmanyi ngöne la nyimu macatre thupene la hna meci triji angatr. Tha tro kö sa goeëne la hleuhleu me treije i angatre ceitu me itre ka pë lapaunen, ngo tro pe sa trotrohnine laka, ewekë lai ka traqa qa ngöne la hna meci triji angatr. Loi e tro pe sa utipi angatr me xatua angatre pala hi.

Tha hmaloi kö la troa lapa sine föe maine sine trahmany. Thupene la itre macatre ne faipoipo, ketre atre kö la trahmanyi la nyine kuca kowe la föe göi troa akeukawane me xatua eahlo ngöne la itre hnepe ijine jol. Celë hi matre e patre hë nyidrë, ketre patre fe hë la qeqe ne ihnimi me iakeukany. Ketre tune mina fe, thupene la itre macatre, atre hnyawa ha föe la nyine kuca matre madrine me mele ka loi la trahmany. Pëkö ketre ewekë ka sisitria hune la trenge ihnimi hna amamane hnene la föe me itre trenge ithanata ka menyike hna qaja hnei eahlo koi nyidrë. E meci hë eahlo, ketre patre ju fe hi la nöjei ewekë ka tru hnei nyidrë hna kapa qaathei eahlo. Haawe, ame la itre xa hna meci trij, tre angatre a kukehnin, kola seseu me xou ke, thatre hë angatre la pengöne la mele i angatre elany. Nemene la trepene meköti ka troa xatua angatre matre tingetinge hmaca jë la hni angatre me mele xetietë?

“The kuke hnine kö göi elany ; ke qâ i elanyi troa kuke hnine göi nyëne kö. Ijije la drai memine la ngazo i nyën.” (Mat. 6:34) Ame la itre trenge ithanata i Iesu celë, tre kola qaja la itre hna ajane hnene la ngönetrei, ngo itre ithanata la ka xatuane hë la itre atr ka nyimutre troa cile kowe la itupathi ka tru, lo ijine kola meci la atr hnei angatre hna hnim. Itre treu thupene la hna meci hnene la föi Charles, hnei angeice hna cinyihane ka hape: “Atraqatre pala hi la akötrenge qa ngöne la hna meci hnei Monique, nge hetre ijine kö laka, eni a drenge catrën. Ngo ame pe, atre hi ni laka, tro kö a traqa tun, ke troa pane nue ijine uti hë elanyi la troa lapa kötre trootro.”

Eje hi laka, nyipi ewekë tro Charles a xomihnine la “ijine” cili. Hnei angeice hna xomihnine tune kaa? Öni angeic: “Jëne la ixatua i Iehova, eni a mele o drai.” Tha tru menu kö la hleuhleu i Charles. Tha hna canga tro patre kö la akötre ka eje thei angeic, ketre tha hna akötrëne menune kö la mele i angeic. Maine epuni la ketre hna meci trij, catre jë troa atreine melëne lai o drai. Ke thatre kö së ka hape, nemene la ewekë ka loi me ixatua ka troa traqa koi së elany.

 Ame ngöne la qaan, tha aja i Iehova kö tro la atr a mec, ngo eje pe a xulu qa ngöne la “ite huliwa i diabolo.” (1 Ioane 3:8; Rom. 6:23) Meci me xou la hna huliwane hnei Satana matre troa xome acone la mele ne la itre atr ka nyimutre, me apë mejiunë angatr. (Heb. 2:14, 15) Tru la madrine i Satana la kola öhne la ketre atr a kolo pe hi a mele menu, tha ajane kö troa hetre mele ka loi enehila, nge tha mejiune hë kowe la mele ka hnyipixe i Akötresie. Celë hi matre, ame la akötre ne lai atr hna meci trij, tre ka xulu qa ngöne la ngazo i Adamu me itre nyinyithina i Satana. (Rom. 5:12) Tro Iehova a lepe apatrene asë la itre ewekë ka ngazo hna axulune hnei Satana, me thepe së qa ngöne la jia ne isi angeic, ene la mec. Ame la itre hna troa thapa qa ngöne la xou ka cia qaathei Satana, tre kolo fe hi a qaja la itre atr ka nyimutre hna meci trij, laka ma epuni jë fe hi la ketre.

Ame göi itre hna troa amelene hmaca e celë fen, tre, nyimutre catre la itre ewekë ka hnyipixe ngöne la aqane tro angatre a imelekeu memine la itre xa atr. Pane mekune jë së la itre keme me thin, me itre qaqa hmunë, me itre xötrapane hna troa amelene hmaca, nge tro angatre asë a pexeje trootro cememine la itre nekö i angatre me itre api angatr. Pë hmaca kö ka qatre me ka qatre föe. Maine jë tha ceitune hmaca kö la aqane tro la itre xötre nekönatre enehila a goeëne la itre xötrapane i angatre elany. Nge tune kaa la mekuna së, tha itre ewekë kö lai ka troa amingömingöne la mele ne la itre atr elany?

Nyimutre catre la itre hnyinge hna amejëne hnene la troa iamele hmaca elany, tune göi itre hna anyimua meci triji hnei föe hmunë. Hnene la itre Sadukaio hna hnyingë pengöne la föe hna meci trji hnene la pane föi angeic, thupene lai meci pi fe hi la hnaaluen, nge hna  meci fe la itre xa ka faipoipo hmaca me angeic. (Luka 20:27-33) Tro jë a tune kaa la aqane imelekeu i angatre elanyi thupene la melehmaca? Thatre kö së, nge nyine u la tro sa ithanatane la itre mekune hne së hna thatre pengön, nga tro pena ha itre eje lai a angazone la itre mekuna së. Loi pe tro sa mejiune koi Akötresie. Ame la ka eje koi së, tre, tro Iehova elany a kuca koi së la nöjei ewekë ka loi thenge la itre hne së hna mejiune kow, ngo tha thenge kö la itre ewekë nyine ajolëne la mele së.

Ame la ketre ini qa hnine la Wesi Ula i Akötresie ka mama hnyawa, tre, tro la itre ka meci hne së hna hnim a mele hmaca. Ame lo nöjei hna amelene hmaca hna qaja e hnine la Tusi Hmitrötr, tre, nyine troa anyipicine laka “tro la nöjei ate ngöne la ite hua a denge la aqane ewekë i [Iesu], me tropi.” (Ioane 5:28, 29) Tro la itre atr elanyi ka mele ngöne la ijine cili a madrine la angatre a iöhnyi hmaca memine la itre hna amelene qa hna mec. Ame ngöne la ketre götran, tre thatreine kö tro sa qeje pengöne la madrine atraqatre ka eje thene la itre hna troa amelene hmaca.

E patre hë la mec, elitrauje jë hi la fene hnene la madrin, nge tha hna hane fe kö traqa tun. Tro la itre miliare lao ka mec a traqa hmaca kowe la itre ka mel. (Mar. 5:39-42; Hna ama. 20:13) E troa lapa mekune la itre iamamanyikeu cili, tro lai a akeukawane la hni ne la nöjei atr hna meci trij.

Tro pala kö lai a hetre ka hleuhleu nge kolo pe a mele hmaca hnei itre ka mec? Öni Tusi Hmitrötr, Ohea! Hna qaja hnei Isaia 25:8 ka hape: “Tro [Iehova] a cengöne apatene la mec.” Kolo lai a hape, tro ha apatrene paluane asë la akötre ka xulu qa ngöne la mec, ke, önine fe la hna perofetan: “Tro Joxu Iehova a köle tije la ite tenge timida qa ngöne la nöjei qëmek’ asëjëihë.” Maine epuni a hleuhleu enehila pine la hna meci triji epun hnene la föi epun, eje hi laka, tro la melehmaca a thue madrine i epun.

Pëkö atr ka atrepengöne hnyawa la nöjei ewekë hna troa kuca elanyi hnei Akötresie ngöne la fene ka hnyipixe. Öni Iehova, “Ke draië qa la hnengödrai hune la fen, tune lai la ite jëng’ a draië qa hune la ite jë i nyipunie ; nge ite mekuneng’ a draië qa hune la ite mekune i nyipunie.” (Is. 55:9) Qa ngöne la melehmaca ka troa xulu lo hna thingehnaeane hnei Iesu, celë hi lai ka aciane la mejiune së jë koi Iehova, tui Aberahama lo. Ame la ewekë ka tru nyine tro la itre Keresiano a  isa kuca, tre, ene la troa kuca la aja i Akötresie, nge qa ngöne lai, tro angatre a “ite ka ijije troa hetenyi la nöje cili me troa mele qa hna mec.”—Luka 20:35.

Mejiune jë, ngo the xou kö. E tro sa waiewekë tui atr, hleuhleu la mele ne la atr elany. Ngo Iehova pe a hamë së la mejiune kowe la ketre mele ka sisitria. Thatre pengöne pala kö së la aqane tro Iehova a eatrëne elanyi la itre aja së, me itre mekuna së, ngo tha luelue kö së laka, tro kö Nyidrëti elanyi a eatrën. Hnei Paulo aposetolo hna cinyihane ka hape: “Ame la mejiune ka mama, te, tha mejiune kö lai ; ke tro la ate a mejiune tune ka la hnei angeice hna öhn ? Ngo maine mejiune shë la hne shë hna tha öhn, eësha teqen’ eje memine la xomi hni.” (Rom. 8:24, 25) Maine ka catre la mejiune i epuni kowe la itre hna thingehnaeane hnei Akötresie, tro hë lai a xatua epuni troa atreine xomihni. Pine laka hetre xomihni thei epun, tro fe hë epuni elanyi a melëne lo hna hape, “tro [Iehova] a hamë eö la ite hna sipone hnene la hni ’ö.” Tro Nyidrëti elanyi a “amejine la ite ewekë ka mele asëjëihë.”—Sal. 37:4; 145:16; Luka 21:19.

Tha hmitre pe kö matre meci pi Iesu, ame hna hnehengazo hnei ange aposetolo. Iesu a akeukawanyi angatre ju hnene la itre trenge ithanata celë: “The hlohlo kö la ite hni nyipunie ; nyipunie a lapaune koi Akötesie, lapaunejë fe koi ni.” Öni nyidrëti hmaca jë: “Tha tro kö ni a nue nyipunie kösë ite neköeng ; ngo tro ni a traqa koi nyipunie.” (Ioane 14:1-4, 18, 27) Kolo itre trenge ithanata la ka xatuane la itre Keresiano hna iën ngöne la itre macatre ka nyimu hadredr, troa acatrene la mejiune i angatr, me troa catre xomihni. Tha tro pi kö nyipunie itre hna mecitrij a luelu, ke tro hmaca kö nyipunieti elanyi a kapa la itre hnei nyipunieti hna hnim ka meci hë. Thatreine kö tro Iehova memine la Hupuna i Nyidrë a nue nyipunie troa latresi palua. Haawe, tha nyine tro kö lai a lueluën!