Ase fe kö epuni e lo itre Ita Ne Thup ne lo itre treu ka ase hë? Haawe, sa jë la itre hnyinge celë:

Eue la Iesu a “cainöje kowe la nöjei u hnine la kalabus”? (1 Pet. 3:19)

Haawe, kola mekune ka hape, ame la ijine nyidrëti a qaja koi angatre la pune nyine tro angatre a kapa pine la ngazo i angatr, tre e thupene hë la melehmaca i Iesu.—15/6, götrane 23.

Nemene la köni jole nyine troa elë hun matre troa tro loi la hna nyihnaaluene faipoipo?

Ame la hnapan, tre, tha tro kö a nue la faipoipo hnapane troa ajojezine la faipoipo i nyipunie enehila, ame la hnaaluen, tre, tro la itre sinee a majemi kowe la hnaaluene föi nyipunie; nge ame la hnaakönin, tre, loi e tro nyipunieti a mejiune kowe la föi nyipunie, ke hna nyi xetë triji nyipunie hnene lo föi nyipunie hnapan.—1/10, götrane 9-10.

Eue la kola amekötine hnei Iesu la itre atr, itre ka troa mamoe maine gootr? (Mat. 25:32)

Tro Iesu, Atre Amekötin a nyiqaane amekötine la nöjei nöje asë, e ase jë apatrene la hmi ka thoi ngöne la ijine akötre atraqatr.—15/7, götrane 6.

Eue la troa treije me kiki inyö hnene la angetre kuca la ngazo lo hna qaja ngöne la ceitune ne lo qitre me zizania? (Mat. 13:36, 41, 42)

Tro lai a eatre ngöne la ijine akötre atraqatr, la angatre a öhne ka hape, pëkö hnë kötre kow.—15/7, götrane 13.

Eue la kola eatre la trenge ithanata i Iesu göne la hlue ka nyipici me ka inamacan? (Mat. 24:45-47)

Tha kolo kö a eatre lo ijine Penetekos macatre 33 M.K, ngo e thupene 1914. Ame lo 1919, hna acile la hlue hune la itre atrene la hnalapa, kola qaja la nöjei Keresiano asë hna thuane ngöne la götrane u.—15/7, götrane 21-23.

Eue la Iesu a acile la hlue ka nyipici hune la itre ewekë i nyidrëti asë?

Tro lai a eatre elanyi ngöne la ijine akötre atraqatr, la kola kapa hnene la itre ka nyiatrene la hlue la edrö i angatre e hnengödrai.—15/7, götrane 25.

Hapeu, ame laka tha qaja kö la Tusi Hmitrötr la ëjene la itre xa atr, tre kolo kö lai a hape, itre ka ngazo maine ka pë hnënyöngöne angatr?

Tha tro kö sa mekune tune lai, ke ame e hnine la Tusi Hmitrötr, tre, patre fe kö la itre xa ëjene la itre atr ka loi me itre xa atr ka ngazo. (Rutha 4:1-3; Mat. 26:18) Ketre, lue ëjene angela hi hna hane qaja qa ngöne la itre angela ka nyipici.—1/8, götrane 10.

Nemene la ka xatuane la 230 lao Itretre Anyipici Iehova troa mele pe qa ngöne la trongene mec, lo kola tro qa ngöne la itre iuma ne kalabus e Sachsenhausen?

Eje hi laka, hna xatua angatre hnene la mene qaathei Akötresie, ngo hnei angatre fe hna ithuecatrekeu matre tha tro kö a patre la ala cas, ngacama kucakuca catre angatre hnei mecijin, me mec.—15/8, götrane 18.

Pine nemene matre kola ithuecatre koi së la kola tro sasaithe la Hneopegejë Ne Ioridrano hnene la angetre Isaraela qëmekene troa lö kowe la Nöje Hna Thingehnaean?

Ngacama kola kaca la tim, ngo hnei Iehova hna kuca matre cile ju hi la tim, me tha neni. Celë hi ka aijijëne la nöje i Nyidrë troa tro sasaithe la hneopegejë. Eje hi laka, hna acatrene la lapaune me mejiune i angatre koi Iehova, nge tro fe lai a ketr la hni së hnene la edromë cili.—15/9, götrane 16.

Nemene la aqane eatre enehila la hna perofetane ngöne Mika 5:5 göne la itre hene nöje me itretre thupë mamoe?

Easa trotrohnine ka hape, ame la ‘sevene lao itretre thupë mamoe me eitre lao hene nöje’ hna qaja ngöne Mika 5:5, tre, kola qaja la itre qatre thupe hna acile ngöne la itre ekalesia, nge ka ithuecatrene la nöje i Akötresie ngöne la kola troa icilekeu me angatre elanyi.—15/11, götrane 20.