1, 2. Nemene la drai nyine amekunëne ka nyipi ewekë tro la itre Keresiano a wangatrun, nge pine nemen?

 AME la epuni a drenge la trenge ithanata hna hape “aniverser,” maine drai nyine amekunëne ngöne la macatre, nemene la ka canga mama koi epun? Ma kolo drai ne faipoipo i epun. Ame itre xan, angatre a mekune la ketre drai ka tru thenge la ketre ewekë hna kuca hnene la nöj. Ngo, atre kö epuni la ketre drai nyine amekunën hna atrune lapan, laka ase hë sasaithe la 3 500 lao macatre ne kola kuca lapane enehila?

² Paseka la drai cili nyine amekunën. Kolo drai ne atrune la kola thapa la angetre Isaraela qa ngöne la hna thahluë angatre e Aigupito. Loi e tro fe a sisitria koi epuni la Paseka. Pine nemen? Pine laka hetrenyi la itre xa götrane ka nyipi ewekë ne la mele i epuni hna hane ketr fe hnene ej. Maine jë tro epuni a mekune ka hape: ‘Ame la Paseka, tre, ketre drai nyine atrune hnei angetre Iudra, ngo ame ni Keresiano, tha atre Iudra kö ni. Pine nemene matre tro fe ni a wangatrune la Paseka?’ Troa sa la hnyinge celë hnene la itre trenge ewekë ka tru aliene celë : “Hna humuthe la paseka shë, ene Keriso.” (1 Kor. 5:7) Nemene la aliene lai? Maine easa ajane troa trotrohnine la hna qaja ngöne la xötre celë, nyipi ewekë tro sa atre hnyawa la aliene la Paseka i angetre Iudra, me ce wange ka hape nemene la aqane ihmeku ne eje memine la hna amekötine kowe la itre Keresiano asë.

3, 4. Nemene la ewekë ka traqa qëmekene la kola xötrei kuca la Paseka?

³ Itre hadredre milio lao atr ngöne la fen tha itretre Iudra kö angatr, ngo atre fe hi angatre la ka traqa qëmekene lo kola xötrei kuca la Paseka. Hnei angatre hna e la itre ewekë cili ngöne la tusi Esodo hnine la Tusi Hmitrötr, maine hna drenge lai qaathei itre xane pena, maine hna goeëne la kola kuci sineman. Mekune hi epuni lo ewekë ka traqa ekö?

⁴ Ame ngöne la kola thahluëne la angetre Isaraela e Aigupito ngöne la itre macatre ka nyimutre, hnei Iehova hna upi Mose me Arona koi Farao troa nue la nöje i Nyidrë. Ngo hnei Farao hna pi tru me xele ma nue la angetre Isaraela. Haawe, hnei Iehova hna lepi angetre Aigupito hnene la treene lao  akötre ka tru. Ame ngöne la hnaatreenene akötr, hna humuthe la itre neköne haetra ne la angetre Aigupito. Thupene lai, mekune jë hi Farao troa nue la angetre Isaraela.—Eso. 1:11; 3:9, 10; 5:1, 2; 11:1, 5.

5. Nemene la itre nyine kuca hnene la angetre Isaraela qëmekene troa nue angatr? (Wange ju la pane iatr)

⁵ Ngo qëmekene troa nue angetre Isaraela, mele i angatre la troa xötrethenge hnyawa la itre hna amekötine thatraqai angatr. Kolo ijine qëmekene la hneijine hedredrei lo macatre 1513 qëmekei Keriso, ngöne la treu Abib, hna hëne e thupen ka hape Nisan. a Hnei Akötresieti hna qaja ka hape ame e drai 10 Nisan, tro angatre a nyiqaane hnëkëne la ketre ewekë ka troa traqa e drai 14 Nisan thupene la hna lö la jö. Pine nemene matre troa kuca lai e kola lö la jö? Pine laka, ame thei angetre Heberu, hna nyiqaane la drai ngöne la kola lö la jö, nge troa fenesi e kola lö hmaca la jö. Ame hë la kola traqa la 14 Nisan, kola qaja kowe la itre hnepe lapa asë troa humuthe me hnëkëne la ketre neköi mamoe trahmany (maine gootr), me thathane la madra ne eje ngöne la hune qënehlö ne la uma. (Eso. 12:3-7, 22, 23) Tro la hnepe lapa a hnëkë a i angatre hnene la neköi mamoe hna atrone ngöne eë, memine la falawa tha hna levenëne kö me nyiwetrëne hnene la itre dröne hnitre ka haitr. Tro la angela i Akötresie a xötrëne la itre hnalapa, me humuthe la itre neköne haetra ne la angetre Aigupito, ngo tro pe kö a nu amelene la itre neköne haetra i angetre Isaraela. Thupene jë hi lai, ame hna nue pi la nöje i Akötresie.—Eso. 12:8-13, 29-32.

6. Pine nemene matre atrune jë la Paseka e nöjei macatre?

⁶ Tha tro pi kö la angetre Isaraela a thëthëhmine la drai ne thepe angatre hnei Akötresie qaa Aigupito. Öni Akötresieti koi angatr: “Tro ha la drai celë a amekunë nyipunie ; nge tro nyipunie a pui ne xeni koi Iehova ; tro nyipunie a pui ne xeni ngöne la nöjei xöte i nyipunie thenge la wathebo epine palua.” Thupene jë hi la hna atrune la Paseka ngöne la drai 14 Nisan, tro hmaca kö a sevene lao drai ne tro la angetre Isaraela a atrune ne la Pui ne Xeni Areto Hna Tha Levenëne Kö. Matre ame lai eitre lao drai cili, ijije troa hëne ka hape, Paseka. (Eso. 12:14-17; Luka 22:1; Ioane 18:28; 19:14) Ame la Paseka, tre, ketre pui ne xeni lai hna amekötine kowe la angetre Isaraela troa atrun e nöjei macatre.—2 A. l. ite jo 8:13.

7. Nemene la ewekë ka hnyipixe nyine troa atrun hna ahnithe hnei Iesu kowe la itretre drei nyidrë?

⁷ Itretre Iudra asë hi Iesu me ange aposetolo, nge itre ka xötrethenge la Trenge Wathebo i Mose, celë hi matre angatre a atrune la Paseka. (Mat. 26:17-19) Ame ngöne la angatre a ce atrune la Paseka tixenuë, hnei Iesu hna ahnithe kowe la itretre drei nyidrë troa atrune la ketre ewekë ka hnyipixe e nöjei macatre. Ame la ewekë cili, tre hna hëne ka hape, Pui Ne Xeni Ne La Joxu. Ngo eue la drai ne tro angatre a atrune lai pui ne xeni cili?

8. Nemene la mekune hna pi atre hnene la itre atr göi Paseka me Pui Ne Xeni Ne La Joxu?

⁸ Hnei Iesu hna amekötine la itre nyine kuca thatraqane la Pui Ne Xeni ne la Joxu thupene hi la kola ase atrune la Paseka memine la ange aposetolo i nyidrë. Haawe, casi hi la drai ne la Pui Ne Xeni Ne La Joxu memine la drai ne la Paseka. Ma öhne fe hi epuni laka, tha hnene fe kö la angetre Iudra enehila hna atrune la Paseka ngöne la drai hmekune la easa atrune la Drai Ne Amekunëne la meci Keriso. Pine nemene matre kola isapengön? Tro la hna amekötine hnei Akötresie kowe la angetre Isaraela lo kola nyiqaane la Paseka a xatua së troa sa la hnyinge celë. Hnei Akötresie lo hna amekötine kowe la nöje i Nyidrë göi drai 14 Nisan troa humuthe me hnëkëne la neköi mamoe, nge ame la ijine cili, kolo hi lai a nyiqaane la Paseka.—E jë la Esodo 12:5, 6.

9. Thenge la hna qaja ngöne Esodo 12:6, eue la ijine kola humuthe me hnëkëne la neköi mamoe göi Paseka? (Wange ju la mekune hna eköhagen hna hape “Nemene Ijine Ngöne La Drai?”)

⁹ Tune la hna qaja ngöne Esodo 12:6, hna humuthe me hnëkëne la neköi mamoe “e heji.” Hna qaja hnene la itre xa Tusi Hmitrötre Tune la Tusi Hmitrötre i angetre Iudra (Tanakh) ka hape  “hejihej.” Ngo ame pena ngöne la ketre itusi angetre Iudra (The Pentateuch and Haftorahs) hna qaja hnyawa ka hape, ame la kola humuthe me hnëkëne la neköi mamoe, tre, e “akawa i lue hej.” Hnene fe la itre xa Tusi Hmitrötre hna ujëne tune lai. Nge itre xane a ujëne ka hape, “hejiheji jidr,” maine “ömöme hë.” Haawe, troa humuthe me hnëkëne la neköi mamoe ngöne la kola xejë la drai 14 Nisan, e thupene la hna lö la jö, ngo lai petre kö.

10. Eue la ijine kola humuthe me hnëkëne la mamoe ne Paseka tune la hna mekune hnei itre xan, ngo nemene la hnyinge hna amejëne hnene lai?

¹⁰ E thupene hë, hnene la itre xa angetre Iudra hna mekune ka hape, loi e troa tru la traeme göi troa humuthe me hnëkëne la itre mamoe asë hna traqa fë kowe la ēnē. Celë hi matre mekune jë angatre ka hape, ame lai “[akawa i lue hej, MN],” ngöne Esodo 12:6, tre, kola qaja la pune la drai 14 Nisan, akawane la ijine kola nyiqaane uti trootro la jö ngöne la hnaipajö memine la ijine ej a lö. Ngo maine troa humuthe me hnëkëne la itre mamoe ngöne la pune la drai 14 Nisan, eue pë hë la ijine troa xeni la Paseka hnene la angetre Isaraela? Tro hë lai a xeni la Paseka e drai 15 Nisan, önine la ketre Porofesör Jonathan Klawans. Ngo ame la hnei angeice hna atrehmekune hnyawa, tre tha celë kö lo hna qaja lai hnene la Tusi Hmitrötre ngöne la tusi Esodo. Öni angeice fe ka hape, ame ngöne la itre hna cinyihane hnei itre rabi, tha hnei angatre fe kö hna hane qejepengöne la aqane atrune la Paseka qëmekene la macatre 70, ijine kola thëtrije la ēnē.

11. (a) Nemene la ewekë ka traqa koi Iesu lo drai ne Paseka ngöne la macatre 33? (b) Pine nemene matre hna hëne jë la Sabath drai 15 Nisan macatre 33 ka hape, “drai atraqate”? (Wange ju la ithuemacany)

¹¹ E nemene drai hö, la kola atrune la pui ne xeni ne la Paseka lo macatre 33? Qëmekene la Paseka, lo drai 13 Nisan, öni Peteru koi Ioane: “Lue trojë nyipo, nge hnëkënejë la paseka thatraqai shë troa xen.” (Luka 22:7, 8) Thupene lai, lo drai 14 Nisan, lo heji ne drai ka co thupene la hna lö la jö, Iesu hi lai a ce xeni ju la Paseka memine la ange aposetolo i nyidrë. Ase jë hi angatre xen, nyidrëti a hamëne ju la itre ithuemacanyi thatraqane la Pui Ne Xeni Ne La Joxu. (Luka 22:14, 15) Kolo jidri cili la kola xolouthi nyidrë me axösisi nyidrë. Kola athipi Iesu hune la sinöe ne iaxösisi nge lelehao la jö, ke midi hë, nge meci ju fe kö nyidrë la hnaipajö cili. (Ioane 19:14) Haawe, Iesu la paseka së, ke hna huujëne la mele i nyidrë ngöne la drai ka ihmeku hnyawa memine lo kola humuthe me hnëkëne la mamoe ne Paseka ekö. (Mat. 26:2; 1 Kor. 5:7; 11:23) Hna kelemi Iesu qëmekene troa xejë la drai 15 Nisan. b—Lev. 23:5-7; Luka 23:54.

12, 13. Pine nemene matre ka nyipi ewekë fe kowe la itre nekönatre ne Isaraela la kola atrune la Paseka?

¹² Ame ngöne lo kola pane kuca la pane Paseka e Aigupito, hnei Akötresie hna upe la itretre Isaraela troa atrune la ewekë cili e nöjei macatre uti hë “epine palua.” Ame e nöjei macatre ngöne la ijine Paseka, tro la itre nekönatre a hnyingëne kowe la itre keme me thine i angatre la kepine matre kola atrune ej. (E jë Esodo 12:24-27; Deu. 6:20-23) Haawe, tro la Paseka a ketre drai nyine “amekunë[n],” laka goi tro fe la itre nekönatre a kepe ini qa ngön.—Eso. 12:14.

¹³ Tro ju pë hë la itre xötr atr, nge itretre Isaraela pala hi a inine la itre nekö i angatr la itre ini ka sisitria göne la pengöne la Paseka. Ame la ketre ini, tre, ene la Iehova a isigöline la itre hlue i Nyidrë. Qa ngöne lai, itre nekönatre a atrepengöne laka, Iehova la Akötresie ka mel, nge ka ej, nge Atre thupëne me isigöline la nöje i Nyidrë. Kola mama lai ngöne la hnei Nyidrëti hna thupëne la itre neköne haetra ne la angetre Isaraela ngöne la hnaatreenene akötre e Aigupito.

14. Nemene la ini qa ngöne la Paseka nyine tro la itre Keme me thine Keresiano a hamëne kowe la itre nekö i angatr?

¹⁴ Itre keme me thine fe Keresiano, ngacama tha hna amekötine kö koi epuni troa edromëne la aliene la Paseka e nöjei macatre, ngo hapeue la aliene la Paseka, hnei epuni kö hna inine la itre nekö i epun la ini nyine troa xome qa ngön, ene laka Akötresieti la Atre thupëne la nöje i Nyidrë? Ka mama hnyawa kö kowe la itre nekö i epuni ka hape, eje thei epuni la mejiune laka, Akötresieti pala hi la ka thupë së enehila? (Sal. 27:11; Is. 12:2) Epuni kö a hamëne la ini celë ngöne la epuni a porotrike me angatre hune la tro hi a hamë itusi nyine tro angatr a e? Tro la ini celë a xatuane la hnepe lapa i epuni troa acatrene la mejiune i epuni asë koi Iehova.

15, 16. Nemene la hne së hna inine göi Iehova qa ngöne la Paseka me qa ngöne la hna edromëne ngöne la tusi Esodo?

¹⁵ Ame la ketre ini ka tru nyine tro sa xome qa ngöne la Paseka, tre, Iehova a thupëne la itre hlue i Nyidrë, nge Nyidrëti fe a amele angatr. Pane mekune jë së la aliene la Paseka kowe la angetre Isaraela lo Iehova ekö a amele angatre qaa Aigupito. Hna eatrongë angatre lo ngöne la Hneopegejë Ka Palulu jëne la iawe ka cile meköti me eë ka cile meköt. Thupene lai, hnei angatre hna öhne la Iehova a thawaluëne la hneopegejë matre kösë lue git a isa cil. Ase jë hi lai, ame hnei angatre hna tro ngöne la gaa weliwel. Ame ju hi la angatre a traqa ngöne la ketre götrane la hneopegejë, öhne ju hi angatre la kola hnyihnyi lo tim me kacatrane la itre soce i angetre Aigupito asë. Ame hnene la angetre Isaraela hna atrunyi Iehova jëne la nyima ke hna amele angatr: “Tro ni a nyima koi Iehova . . . ase hë nyidëti kuiëne la hose memine la ate tithe hnagejë eë. IA la tenge catenge me nyimang, nge nyidëti la ameleng.”—Eso. 13:14, 21, 22; 15:1, 2; Sal. 136:11-15.

¹⁶ Maine hetre nekö i epun, epuni kö a xatua angatre troa goeë Iehova ceitu me Akötresie ka trene men nge ka troa amelene la nöje i Nyidrë? Ame la epuni a axecië mekun maine ithanata kowe la itre nekö i epun, mama hnyawa kö koi angatre la mejiune i epun, laka tro Iehova a amele epuni me hnepe lapa i epun? Loi e tro epuni a ce ithanatane ngöne la ijine hmi ne la hnepe  lapa la aqane amelene Iehova la nöje i Nyidrë tune la aqane qaja Esodo mekene 12-15 maine Ite Huliwa 7:30-36 maine Daniela 3:16-18, 26-28. Loi e troa xecie koi së asë, itre ka co me itre ka tru, ka hape, tune la aqane amelene Iehova la nöje i Nyidrë ekö, tro fe Nyidrëti a hane amele së ngöne la itre drai ka calemi.—E jë 1 Thesalonika 1:9, 10.

17, 18. Pine nemene matre ka sisitria kö la madra i Iesu hune la madra ne la mamoe ne Paseka?

¹⁷ Tha hna hane fe kö atrune la Paseka hnene la itre nyipi Keresiano. Ketre drai nyine amekunëne lai hna amekötine hnene la Trenge Wathebo i Mose, ngo tha nyine tro hmaca kö sa xötrethenge. (Rom. 10:4; Kol. 2:13-16) Ame fe easë, hetre ketre drai nyine amekunëne nyine tro fe sa hane atrun, ene la meci ne la Hupuna i Akötresie. Ngo hetre ini fe nyine tro sa xome qa ngöne la aqane atrune la Paseka hna nyiqaane e Aigupito.

¹⁸ Ame la madra ne la mamoe, tre hna thathane hnene la angetre Isaraela hune la itre hune qënehlö i angatre matre amelene la itre neköne haetra i angatr. Ame enehila, tha easë fe kö a hamëne la itre madra ne öni koi Akötresie ngöne la ijine Paseka maine itre xa ijine ju kö. Ngo hetre madra hna huujëne ka sisitria catre pala kö. Tro la itre atr hna amelene hnene la madra cili a mele epine palua. Madra i Iesu hi lai tune la hna qejepengöne hnei Paulo aposetolo ka hape, “madra nyine sihnötën [maine thathan]” ka aijijëne la itre Keresiano hna iëne troa mele palua e hnengödrai. Angatre hi la “ite haetra, lo hna cinyihan’ e hnengödrai.” (Heb. 12:23, 24) Madra i Iesu fe a aijijëne la itre xa mamoe troa hetrenyi la mejiune kowe la mele ka tha ase palua kö e celë fen. Mekune pala kö së lo hna thingehnaeane ka hape: “Hetenyi hë shë jëne nyidë la hna itö mele hnene la madra i nyidë, ene la shenge la ite ngazo, thenge la etrune la ihnimi gufa i nyidë.”—Efe. 1:7.

19. Hnene la aqane meci Iesu hna acatrene tune kaa la mejiune së kowe la itre hna perofetane hnene la Tusi Hmitrötr?

¹⁹ Ame la kola humuthe me hnëkëne la mamoe thatraqane la Paseka, tre, hna amekötine kowe la angetre Isaraela ka hape, tha tro kö a axeciëne la ketre june ej. (Eso. 12:46; Num. 9:11, 12) Hapeue la itre june la “Arenio i Akötesie” lo atre hamëne la mele i nyidrë nyine thupene mel? (Ioane 1:29) Hna athipi nyidrë hune la sinöe ne iaxösisi, nge lue xa atr ka ngazo a thipe ngöne la götrane maca me götrane mi nyidrë. Hnene la angetre Iudra hna sipo Pilato troa lepe xecie la june la lue ca i Iesu memine fe la june la lue ca ne la lue atr ka ngazo, matre canga meci pi angatr. Kolo hi matre troa canga hule la itre ngönetrei angatr qa ngöne la sinöe ne iaxösisi e tha traqa pala kö kowe la drai 15 Nisan, kolo drai hna hape, Sabath atraqatr. Hna lepe xecie la lue ca ne lue atr ka ngazo hnene la itre soc, “nge traqa ha angate koi Iesu, me öhnyi nyidëti a elelengëti hë [meci hë], tha hnei angate kö hna lepe xecie la lue ca i nyidë.” (Ioane 19:31-34) Tune la itre june la mamoe ne Paseka ekö, tha hna axeciëne kö la itre june i Iesu. Haawe, mamoe ne la Paseka a nyi “ahnue” ne la mele i Iesu hna huujëne lo drai 14 Nisan macatre 33. (Heb. 10:1) Eatre hë lo hna qaja ngöne Salamo 34:20. Hane hi lai ka acatrene la mejiune së kowe la itre hna perofetane hnene la Tusi Hmitrötr.

20. Nemene la eisapengönene la Paseka memine la Pui Ne Xeni Ne La Joxu?

²⁰ Ngo, tha ceitu kö la aqane atrune la Paseka ekö hnene la angetre Iudra memine la aqane atrune la Pui Ne Xeni Ne La Joxu tune la hna amekötine hnei Iesu kowe la itretre drei nyidrë. Tro la angetre Isaraela a öni la mamoe, ngo tha tro kö angatre a iji la madran ej. Tha ceitu kö memine la hna amekötine hnei Iesu troa kuca hnene la itretre drei nyidrë. Öni nyidrë, ame la itre ka troa mus “ngöne la baselaia i Akötesie,” tre tro angatre a xeni la areto me iji la waina, hatrene la ngönetrei me madra i nyidrë. Troa qeje pengöne hnyawa koi së la Drai ne Amekunëne la meci Keriso ngöne la taane mekune ka troa xulu.—Mar. 14:22-25.

21. Pine nemene matre loi e tro sa atrepengöne hnyawa la Paseka?

²¹ Ketre ewekë ka tru la Paseka ngöne la mele ne la nöje i Akötresie, nge hetre itre ini nyine tro sa isa xome qa ngön. Maine nyipici laka ketre drai nyine “amekunën” la Paseka thatraqane la angetre Iudra, ngo ame easë itre Keresiano, loi e tro fe sa atrepengöne hnyawa ej memine la itre ini ka tru qa ngön, ke, “qa thene la [u]a i Akötesie la hna cinyihan’ asë.”—2 Tim. 3:16.