1, 2. Pine nemene matre cia hlöeë jë la iaö ngöne la fen, nge nemene la aqane iaö hne së hna öhne enehila? (Wange ju la pane iatr.)

 AME la iaö me thoi, tre, lue ewekë ka cia hlöeë ngöne la fen. Tha sesëkötre kö së. Tusi Hmitrötre a qaja hnyawa ka hape, Satana Diabolo la taane la iaö ka amenune la itre atr, me atre musi kowe la fene celë. (1 Tim. 2:14; 1 Ioane 5:19) Easë a easenyi catre kowe la pun, nge kola elë catre la trenge hni Satana, ke, “xoxopate pe hi la ijine i nyën.” (Hna ama. 12:12) Haawe, tha tro kö sa sesëkötr, ka hape, ame la itre hna ajojezine hnei Satana, tre tro pala hi angatre lai a huliwa thoi. Tro angatre lai a thele jëne troa iaöne la itre hlue i Iehova.

² Ame la kola qaja la Itretre Anyipici Iehova me itre ini hnei angatre hna mejiune kow ngöne televizio; me ipoos, me zonal, tre, tha hna qaja asë kö la nyipici, maine kolo pena a sili trengathoi. Hna xome la itre taane mekune ka tru hna amë ngöne itre zonal, maine hna amamane ngöne televizio, maine ngöne ëternet, göi troa akökötrene la itre trengathoi. Matre itre atr a hnehengazo, maine pena kola wesitr, pine laka hnei angatre hna canga kapa ju hi la itre trengathoi cili, ngo tha hna pane wange kö ka hape ka nyipici kö.

3. Nemene la ka troa xatua së matre tha tro kö a amenu së?

³ Eloine pe, ijije hi troa thupë së qa ngöne la itre trengathoi Satana. Tusi Hmitrötre la ka “nyipi ewekë . . . nyine eamo,” nge eje a hmekë së matre tha tro kö a iaö së. (2 Tim. 3:16) Ame laka cinyihane jë Paulo aposetolo tune lai, ke, hna amenune la itre xa Keresiano ne Thesalonika hnene la itre trengathoi. Öni angeice koi angatr: “Eëhuni a iele nyipunie, ange tejin. . . ka hape, the canga enienije kö la ite hni nyipunie.” (2 Thes. 2:1, 2) Nemene la itre ini nyine tro sa xome qa ngöne la ithuemacanyi hna hamëne hnei Paulo, nge nemene la aqane tro sa trongëne itre ej?

4. Hna thuemacane tune kaa la itre Keresiano ne Thesalonika göi troa hmekëne la ‘drai i Iehova,’ nge kolo fe a thuemacanyi së tune kaa?

⁴ Ame ngöne la pane tusi Paulo kowe la itre Keresiano ne  Thesalonika, hnei angeice hna thuemacanyi angatre ‘la drai Iehova.’ Tha ajane kö angeice tro angatre a luelue, me tha hmek. Öni angeic, angatre la “ite nekö ne la lai,” nge angeice a sisedrëne hmaca ju me hape: “Tro sha hmekëne me inamacanepi.” (E jë la 1 Thesalonika 5:1-6.) Ame enehila, easa treqene la troa thë trije la Babulona Atraqatr, ene la itre hmi ka thoi asë. Tro hi a nyiqaane tune hi lai lo drai ka tru i Iehova elany. Atre hnyawa hi së la aqane tro Iehova elanyi a eatrëne la aja i Nyidrë. Ame hnine la ekalesia, kola amexeje lapane koi së la itre ithuemacanyi ka xatua së troa hmekëne la drai i Iehova. Maine drenge hnyawa së la itre ithuemacanyi hna amexeje lapan, ‘tha tro kö a enienijëne la hni së,’ ngo tro pe sa catre nyihlue i Akötresie.—2 Thes. 2:2.

5, 6. (a) Nemene la hna cinyihane hnei Paulo ngöne la hnaaluene tusi angeice koi angetre Thesalonika? (b) Nemene la hnei Iesu hna troa kuca elany, nge nemene la itre mekune nyine tro sa hnyingëne thel?

⁵ Hnei Paulo hna cinyihane la hnaaluene tusi angeice koi angetre Thesalonika. Ame ngöne la tusi cili, angeice a qaja la akötre ka troa xulu, kolo ijine tro Iesu a eatrëne la itre hna amekötine hnei Akötresie “troa nyi thupen koi angete tha ’te Akötesie, me koi angete tha denge thenge la maca ka loi.” (2 Thes. 1:6-8) Ame ngöne la mekene  2 ne la tusi Paulo, angeice a qaja la itre xane ngöne la ekalesia, laka tru catre la hnei angatre hna “kuke hnine” la drai Iehova, matre angatre a mekune ka hape, saqe catre hë. (E jë la 2 Thesalonika 2:1, 2.) Tha nyipi trotrohnine kö la itre pane Keresiano ekö la aqane troa eatre la aja i Iehova, tune la hna atrehmekune hnei Paulo göne la itre hna perofetan, matre cinyihane jë angeice ka hape: “Ate hë shë la sin, nge eësha perofetane la sin. Ngo e traqa la ka pexeje, te, pa hmaca kö sin.” (1 Kor. 13:9, 10) Jëne la itre ithuemacanyi hnei Iehova hna upi Paulo, me Peteru aposetolo me itre xa hna iëne ju kö troa cinyihane ngöne la ijine cili, ijije hi tro angatre a mele nyipici qa ngöne la hna mele thenge itre ej.

⁶ Ame göi troa amekötine la itre mekuna i angatr, hnei Akötresieti hna upi Paulo troa qeje pengöne ka hape, qëmekene troa traqa la drai Iehova, troa pane hetrenyi la iamenumenu ka tru, memine “la ate ne la ngazo.” a Thupene lai, ngöne la drai hna sa hnei  Akötresie, tro Iesu a “apatrene” maine apëne paluane “la ate ne la ngazo” memine la nöjei atr hna amenune hnei angeic. Öni Paulo ka hape, ame la kepine matre nyipune jë koi angatre tune lai, tre, hnene laka “tha hnei angate hna kapa la tenge ewekë ka nyipici memine la madine kow.” (2 Thes. 2:3, 8-10) Loi e tro sa isa hnyingëne thele ka hape: ‘Nemene la etrune la ihniminge kowe la nyipici? Eni fe kö a hane inine la zonale celë me itre xa sine tusi kö hna thawa kowe la nöje i Akötresieti e cailo fen, matre tro ni a trotrohnine la itre ini qa hnine la Tusi Hmitrötre hna kapa ngöne la sipu ijin?’

7, 8. (a) Nemene la itre xa nyine hmekëne hnene la itre pane Keresiano ekö? (b) Nemene la ewekë nyine tro pala kö la itre Keresiano a thupëne catrëne enehila?

⁷ Tha itre ini qaathei ange ka iamenumenu hmekuje kö la itre nyine troa hmekëne hnene la itre Keresiano. Hnei Paulo fe hna cinyihane koi Timoteo ka hape, “ame la aja mani, celë hi ine la nöjei ngazo asëjëihë.” Öni angeice hmaca jë, “Ame hna menupi angate qa ngöne la lapaun, me umajo angate hnei angate kö hnene la ite aköte ka kösau.” (1 Tim. 6:10) Haawe, ame la “ite huliwa ne la ngönetei,” nyine tro fe a hane hmekën.—Gal. 5:19-21.

⁸ Hnei Paulo hna hmekëne catrëne la angetre Thesalonika qa ngöne lo itre hna hëne ka hape, “ite aposetolo thoi.” Hnene la itre xane e angatre hna “qaja la ite ewekë ka qaliqali, troa hule koi angate la itete deng.” (2 Kor. 11:4, 13; Ite hu. 20:30) Hnei Iesu hna qaja aloine la ekalesia ne Efeso, ke, tha hnei angatre kö hna kapa la “angete kuca la ngazo” ngöne la ekalesia. Hnei angatre hna anyipicine ka hape, ame la itre atr cili, tre, tha itre nyipi aposetolo kö, nge itre ka thoi. (Hna ama. 2:2) Ngöne la hnaaluene tusi koi angetre Thesalonika, hnei Paulo hna hamëne la ihaji celë: “Eëhuni a ahnithe koi nyipunie ange tejin, ngöne la atesieti ne la Joxu shë Iesu Keriso, ka hape, iananyipi nyipunie memine la ite tejin asëjëihë ka qali thina.” Thupene lai, angeice a qaja jë la itre xa Keresiano ka hape, “xele kö [angatr] ma hane huliwa.” (2 Thes. 3:6, 10) Haawe, maine nyipici laka, ka nyipi ewekë tro angatre a ananyine la atr ka genyi me xele ma huliwa, tro pala kö angatre a ananyine catrëne la atre iamenumenu. Eje hi laka, ame la troa iëne ekö troa nyi sineene la itre atr ka tune lai, tre, hna mecin, nge ka nyipi ewekë catre troa ananyin. Haawe, tha saze kö enehila.—Ite edomë 13:20.

9. Pine nemene matre tro sa ananyine la itre atr ka sine la itre icasikeu së nge ka thele troa qaja la itre sipu mekuna i angatre ka isazikeu memine la Tusi Hmitrötr, me ka qaja angazone la organizasio i Iehova?

⁹ Easë a easenyi catre kowe la akötre atraqatre me kowe la pune la fene celë ka ngazo. Ame la itre ithuemacanyi hna hamëne kowe la itre pane Keresiano ekö, tre ka nyipi ewekë catre pala kö koi së enehila. Tha ajane pi kö së troa “kapa gufane . . . la ihnimi gufa i Akötesie.” Maine eje hi, gufa ha koi së la mele ka tha ase palua kö. (2 Kor. 6:1) Loi e tro sa ananyine la itre atr ka sine la itre icasikeu së nge ka thele troa qaja la itre sipu mekuna i angatre ka isazikeu memine la Tusi Hmitrötr, maine kolo pena a qaja angazone la itre qatre thupe me itre xa hlue i Akötresie.—2 Thes. 3:13-15.

10. Nemene la itre ini nyine troa trongëne hnene la itre Keresiano ne Thesalonika?

¹⁰ Hnei Paulo hna eamo kowe la itre trejine me angeice qaa Thesalonika troa “cile huti,” me catre troa huliwa thenge la itre hnei angatre hna inin. (E jë la 2 Thesalonika 2:15.) Nemene la itre “ini” hnei angatre hna kapa? Kolo itre ini qaathei Iesu, memine la itre mekune qaathei Akötresie hna cinyihane hnei Paulo me itre xane ju kö. Tha kolo kö lo itre ini qaathene  la itre hmi ka thoi. Hnei Paulo hna qaja aloine la itre trejine ne Korinito. Ame laka qaja aloinyi angatre jë, ke öni angeic: “Hnei nyipunie hna meku ni ngöne la nöjei ewekë asëjëihë, me xölehuje catëne la ite hna ini, tune la hnenge hna hamë nyipunie.” (1 Kor. 11:2) Pine laka ka xulu la itre ini cili qaathei Iehova me Hupuna i Nyidrë, haawe, itre ini hi lai nyine tro sa mejiune kow.

11. Nemene la itre thangane ka traqa kowe la itre atr hna amenun?

¹¹ Lue ewekë hnei Paulo hna qaja kowe la angetre Heberu ka troa aluzine la lapaune i angatr, me tro triji Iehova. (E jë la Heberu 2:1; 3:12.) Ame ngöne la hna cinyihane hnei Paulo, hnei angeice hna qaja ka hape, troa uthi së qaathei Iehova me iananyi me Nyidrë. Ka tha canga mama kö la kola uth me kötre la he qa ngöne la ngönëtë. Tro eje lai a manije trootro me nanyi qa ngöne la ngönëtë. Ngo, hetre atr fe ka sipu ukune la he i angeice matre nanyi pi qa ngöne la ngönëtë. Kola amamane hnene la lue ewekë celë la ka traqa kowe la atr hna amenune ke tha hna hmeke kö, me kowe fe la atr ka thë hi troa ananazijëne la lapaune i angeic.

12. Nemene la ka troa angazone la aqane imelekeu së me Iehova?

¹² Hna amenune ekö la itre xan e angetre Thesalonika. Tro fe kö lai a hane tune enehila? Tru hnei huliwa ka aluzi traem. Pane mekune jë së la itre hawa hna xome kowe lo itre nyine iamadrinë, me troa porotrik jëne ëternet, maine e me sa la itre maca ngöne mail, maine goeëne me e la itre nuvele ne lo itre ka kuci elo. Ijije hi tro la itre huliwa cili a ananyine me ananazijëne la itre Keresiano qa ngöne la itre huliwa i Iehova. Nemene ju hë la thangane lai? Tëtë hë la itre thithi angatr. Ketre, co catre hë la traeme i angatre göi troa inine la Tusi Hmitrötr, me tro koi itre hna icasikeu, me tro kowe la hna cainöje trootro. Nemene la nyine tro sa kuca matre tha tro kö a enienijëne la hni së?

13. Tune la hna perofetane hnei Tusi Hmitrötr, nemene la aqane ujë ne la ka ala nyim, nge nemene la ka troa thupëne la lapaune së?

¹³ The thëthëhmine kö ka hape, easenyi catre hë la pune la fene i Satana, nge tro lai a hetre ethane koi së e tro pala hi sa ce mele memine la itre atr ka tha jele thoine ka hape, easa melëne la itre “drai hnapin.” Hnei Peteru aposetolo hna cinyihane göne la hneijine së ka hape: “Troa xulu la nöjei ate iamakökö kola xöte thenge la ite aja i angate kö, me hape, E ka la hna thinge hnaeane la tro nyidëti a traqa ? ke qane la ijine meköle la ite xötapan, cile huti pala kö la nöjei ewekë asëjëihë qane ngöne la qane la hna xup’ it’ ej.” (2 Pet. 3:3, 4) E tro sa e me inine la Tusi Hmitrötre o drai, tro lai a xatua së troa lapa mekune ka hape, easë a melëne la “ite drai hnapin.” Ame la iamenumenu hna perofetane hnine la Tusi Hmitrötr, tre, ase hë nyiqaane ekö, nge eje pala kö enehila. Nge ame “la ate ne la ngazo,” tre, angeice pala hi la, nge kolo pala hi a icilekeu memine la itre hlue i Akötresie. Qa ngöne lai, the thëthëhmine pi kö së ka hape, easenyi catre hë la drai Iehova.—Zef. 1:7.

14. Tro lai a thupë së tune kaa ngöne la hne së hna catre huliwa i Akötresie?

¹⁴ Ame la ketre aqane matre tha tro kö a enienijëne la hni së, tre ene la troa cainöjëne lapane la maca ka loi. Haawe, ame la Iesu Keriso a upe la itretre drei nyidrë troa inine la itre atr ne la nöjei nöje asëjëihë, me ini angatre troa trongëne la nöjei ewekë hnei nyidrëti hna ahnithe koi angatr, nyidrëti fe lai a anyipicine koi angatre ka hape, tha tro jë pi kö nyidrëti lai a nuetriji angatr. (Mat. 28:19, 20) Tro la angetre xötrethenge la hna amekötine celë a catre cainöje trootro. Pane mekune jë së lo aqane huliwa ne lo itre trejine ne Thesalonika, hapeu, tha angatre kö ekö lo a cainöje matre ase pi? The thëthëhmine kö së la hna cinyihane hnei Paulo koi angatr, lo kola hape: “The  apineju kö la [u]a ; the sixane kö la ite hna perofetan.” (1 Thes. 5:19, 20) Ka mingöminge catre la itre hna perofetane hne së hna inine me ce thawa me itre xan!

15. Nemene la itre xa ewekë nyine tro sa ce wange ngöne la ijine hmi ne la hnepe lapa?

¹⁵ Aja së asë hi troa xatuane la itre atrene la hnepe lapa së troa catre cainöjëne la maca ka loi. Celë hi matre, hnene la itre trejine trahmanyi me föe ka nyimutre hna xome la ketre ijine la hmi ne la hnepe lapa i angatr, göi troa kuca la itre iamacanyi thatraqane la huliwa ne cainöj. Maine jë tro epuni a hnëkëne la aqane troa iwaihmaca. Nemene la itre mekune nyine tro epuni a ce ithanatan? Nemene la nyine tro epuni a qaja matre hetre ajane jë lai atr? Nemene la ijine ka loi e troa iwaihmaca? Ala nyimu la itre ka xome la ketre ijine la hmi ne hnepe lapa i angatre matre troa hnëkëne la itre icasikeu. Hapeu, ijije kö tro epuni me hnepe lapa i epuni a hane kuca tune lai? Ame la epuni a hane qeje mekune ngöne la itre icasikeu, kolo fe lai a acatrene la lapaune i epun, me xatua epuni matre tha tro kö a enienijëne la hni epun. (Sal. 35:18) Kola thupë së hnene la hmi ne la hnepe lapa matre tha tro kö sa qaja la itre ithanata thenge la sipu mekuna së ka isazikeu memine la Tusi Hmitrötr, nge kolo fe a xatua së matre tha tro kö sa luelu.

16. Nemene la ka acatrene la mejiune ne la itre Keresiano hna iëne matre tha tro kö a enienijëne la hni angatr?

¹⁶ Ngöne la itre macatre, hnei Iehova hna amanathithine la nöje i Nyidrë, ene la hna aijijë angatre troa trotrohnine hnyawa la itre hna perofetane e hnine la Tusi Hmitrötr. Kolo lai a acatrene catrëne la mejiune së kowe la mele ka mingöminge nyine tro sa kapa elany. Ame ange hna iën, angatre a mejiune troa ce mele e hnengödrai me Keriso. Eje hi laka, kolo hi lo mejiune lai ka acatrene la lapaune i angatre matre tha tro pi kö a enienijëne la hni angatr! Ame la hnei Paulo hna cinyihan, tre, thatraqane fe la itre hna iëne enehila: “Tro pala hi huni a olene koi Akötesie göi nyipunie, ange tejine fe hna hnimi hnei Joxu, ke hna ië nyipunie hnei Akötesie . . . ngöne la ahmitötëne hnei [u]a me kapa la nyipici.”—2 Thes. 2:13.

17. Nemene la aqane thuecatre së hnene la hna cinyhane ngöne 2 Thesalonika 3:1-5?

¹⁷ Ame la itre ka mejiune kowe la mele ka pë pune e celë fen, tre angatre a kuca asë la hnei angatre hna atreine matre tha tro kö a enienijëne la hni angatr, tune la hna kuca hnene la itre hna iën. Maine epuni a ajane troa mele palua e celë fen, drenge thenge jë la ithuecatre hna hamëne hnei Paulo cememine la ihnim kowe la itre trejine hna iën ne Thesalonika. (E jë la 2 Thesalonika 3:1-5.) Loi e hetre hni ne ole së kowe la itre ithanata celë hna hamëne thenge la ihnim. Kola hmekë së hnene la itre tusi koi angetre Thesalonika, wanga tro sa qaja la itre ithanata thenge la sipu mekuna së ka isazikeu memine la Tusi Hmitrötr, me jele nyipicine la itre mekune ka pë enyipicin. Pine laka traqa ha së kowe la pune la fen, tro sa olene catrëne kowe la itre ithuemacanyi celë nyine hmekë së.