1, 2. Nemene la hna troa kuca hnene la Baselaia i Akötresie, nge hne së hna atre tune kaa ka hape, troa traqa la Baselaia?

 AME e hune la wetr ezine Kaperenauma ngöne la macatre 31 M.K., hnei Iesu Keriso hna qaja kowe la itretre drei nyidrë troa thith me hape: “Epi traqa pi la Baselaia i Cilie.” (Mat. 6:10, MN) Ala nyimu enehila la itre ka lueluëne ka hape, tro jë kö a traqa la Baselaia. Ngo, ame koi së, eje hi laka tro Iehova a kapa la hne së hna thithi fë, ene la troa traqa la Baselaia.

² Jëne la Baselaia, tro Iehova a icasinekeune la lapa ka cahae e koho hnengödrai me e celë fen. Tro ha eatre la aja i Iehova. (Is. 55:10, 11) Kola mama hnene la itre ewekë ka tru ka traqa ngöne la 100 lao macatre ka ase hë ka hape, Iehova ha mus, nge Nyidrëti a kuca la itre ewekë nyine hain thatraqane la itre milio lao hlue i Nyidrë. (Zaka. 14:9; Hna ama. 15:3) Ngo, isa pengöne kö la Iehova a mus memine la kola traqa la Baselaia i Akötresie lo hna upi së hnei Iesu troa thithi fë. Nemene la eisapengönene la lue ewekë cili, nge nemene la thangane lue eje koi së?

3. (a) Eue la kola acili Joxu Iesu, nge ekaa? (b) Nemene la itre ka anyipicine ka hape, cile hë la musi Iesu lo 1914? (Wange ju la ithuemacanyi e cahu fen.)

³ Ame lo 20 lao macatre qëmekene lo 1900, hnene la itre hlue i Akötresie hna nyiqaane trotrohnine la ketre hna perofetane hna cinyihane hnei Daniela, a 2 500 lao macatre hë enehila: “Ngöne la ite drai ne  la ite joxu cili tro Akötesieti ne hnengödrai a axulune la kete baselaia ka tha tro kö a apaten’ epine palua.” (Dan. 2:44) Ngöne la itre macatre ka nyimutre hnene la Itretre Inine La Tusi Hmitrötr hna ithuemacanyine ka hape, 1914 la ketre macatre ka nyipi ewekë, nge ka hetre pengön. Ala nyimu la itre atr ngöne la ijine cili, ka hetre mejiune kowe la itre drai ka troa xulu. Hnene la ketre atr ka cinyanyi tus hna cinyihane ka hape: “Ame lo itre atr ka mele ngöne lo 1914, tre, mele drai la hnei angatr hna lapa treqen.” Ngo, thupene jë hi lai ngöne pala hi la macatre cili, nyiqaane jë hi lo Pane Isi Ka Tru, nge eatre jë hi la hna perofetane hnene la Tusi Hmitrötr. Traqa pi hi la itre jiin, me sa, me mec, me itre xa hna perofetane ju kö hnei Tusi Hmitrötr, nge mama pi hi ka hape, cile hë la musi Iesu Keriso e hnengödrai ngöne la Baselaia i Akötresie lo 1914. a Haawe, ame hë la kola acile la Hupana i Nyidrë lo Mesia matre Joxu, kösë ketre pengöne aqane musi Iehova lai.

4. Nemene lo pane ewekë hna kuca hnei Iesu lo nyidrëti a Joxu? Nemene fe la hnei nyidrëti hna kuca e thupen?

⁴ Ame la pane ewekë hna kuca hnene la Joxu ka hnyipixe hna acile hnei Akötresie, tre ene la troa isi memine la ithupejia ne la Tretretro i nyidrë, ene Satana. Hnei Iesu me itre angela i nyidrë hna waja ukapië Diabolo me itre dremoni angeic qaa hnengödrai. Ame hna madrine atraqatre e hnengödrai, ngo kolo pe a elë catre la akötre e celë fen. (E jë la Hna Amamane 12:7-9, 12.) Thupene lai, hnene la Joxu hna nyiqaane nyidrawane la itre hlue i nyidrë, me ini angatr, me hnëkë angatr e celë fen matre troa kuca la aja i Akötresie. Tro sa ce wange la tulu ne idrengethenge i angatre kowe la itre hna amekötine hnei Iesu, nyine tro fe sa xötrethenge enehila.

5. Nemene la huliwa ne inyidrawa ka eatre akawane lo 1914 memine lo kola xejë la 1919?

⁵ Thupene la hnei Iesu hna nyidrawane la hnengödrai qa ngöne la iajojezi Satana me itre dremoni angeic, hnei Iehova me Iesu hna waipengöne hnyawa me nyidrawane la itretre drei nyidrë e celë fen. Hnei perofeta Malaki hna qeje pengöne lai ceitu me huliwa ne inyidrawa. (Mal. 3:1-3) Kola mama ngöne la aqane trongene la itre ewekë ka hape, hna eatre la huliwa ne inyidrawa cili lo akawane 1914 memine lo kola xejë lo 1919. b Haawe, maine easa ajane troa sine la lapa ka cahae i Iehova e koho hnengödrai me e celë fen, nyipi ewekë tro sa pë ethan, maine tro sa hmitrötr. (1 Pet. 1:15, 16) Nyipi ewekë tro sa thupëne wanga apuingazone pi la hmi së hnene la hmi ka thoi me politik.

6. Nemene la aqane hamëne la xeni ne la u, nge pine nemene matre ka nyipi ewekë catre la xeni cili?

⁶ Pine laka Joxu hë Iesu, ame hnei nyidrëti hna huliwane la musi nyidrëti matre troa acile la “hlue ka nyipici me ka inamacan.” Tro la hlue cili a thawa lapaane la xen ngöne la götrane u kowe la nöjei ka sine la “hna axö mamoe” ka cas, angetre lapa fene la mus i Iesu. (Mat. 24:45-47; Ioane 10:16) Qaane lo 1919, hnene la hlue cili hna eatrëne hnyawa la hnëqa i angeic ka nyipi ewekë catr, ene la troa thewe xen kowe la itre atrene la “hnalapa” i Iesu. Kola hamë së hnene la hlue ka nyipici me ka inamacane la xeni ngöne la götrane u ka mana catre, matre tro pala hi a acatrene catrëne la lapaune së. Kolo lai a acatrene la aja së matre tro pala hi a pë ethane la hmi së, me aqane ujë së, me itre mekune së, me ngönetrei së, me nöjei ewekë hne së hna hetrenyi, matre ihmeku itre eje memine la itre trepene meköti Akötresie. Ketre, itre xen ne la u fe a ini së me hnëkë së troa huliwa catre ngöne la hna cainöje trootro, huliwa ka sisitria catre e celë fen. Hapeu, epuni fe kö a hane nyipiewekëne lapaane la xeni ne la u?

7. Nemene la huliwa ka sisitria catre hnei Iesu hna kuca lo nyidrëti e celë fen, nge troa nyipune e eue la huliwa cili?

⁷ Ame la Iesu a nyiqaane la huliwa ne cainöje i nyidrë e celë fen, öni nyidrë: “Qânge troa cainöjëne la maca ka loi ne la baselaia i Akötesie  kowe la ite xa lapa pena ; ke hna upi ni thatraqane lai.” (Luka 4:43) Ame ngöne lo köni macatre nge sin ne nyidrë e celë fen, ka sisitria catre kowe la mele i nyidrë la huliwa ne cainöj. Hnei nyidrëti hna inine la itretre drei nyidrë me hape: “Troja cainöj, me hape, Eashenyi hë la baselaia ne hnengödrai.” (Mat. 10:7) Thupene la melehmaca i Iesu, hnei nyidrë hna qaja amë ka hape, tro la itretre drei nyidrë a tro fë la maca celë “uti hë la cane la fene hnengödrai.” (Ite hu. 1:8) Hnei nyidrëti hna thingehnaeane koi angatre ka hape, tro pala kö nyidrëti a isa xatua angatre ngöne la huliwa ne iamele cili uti hë la pune la fene celë.—Mat. 28:19, 20.

8. Hnene la Joxu hna aciane tune kaa la aja thene la itretre drei nyidrë troa cainöje e cailo fen?

⁸ Qaane lo 1919, ame “la maca ka loi celë ne la baselaia,” tre, hetre aliene eje ka hnyipixe. (Mat. 24:14) Musi hë la Joxu e hnengödrai, nge hnei nyidrëti hna icasinekeune la neköi lapa ka co, ene la itretre drei nyidrë hna nyidrawane e celë fen. Hnene la neköi lapa cili hna canga drengethenge la hna amekötine qaathei Iesu, ene la troa cainöjëne ngöne la fene asë la maca ka loi, me hape, musi hë la Baselaia i Akötresie e hnengödrai! (Ite hu. 10:42) Ame lo Semitrepa 1922, traqa koi 20 000 lao atr ka sajuëne la Baselaia, angetre sine la asabele ka tru e cailo fen e Cedar Point, Ohio, Etazini. Pane mekune jë la madrine ka eje thei angatr la kola drei Trejine Rutherford a hamëne la cainöje hna hape, “Eashenyi Hë La Baselaia Ne Hnengödrai,” me hape: “Hanawang, musi hë la Joxu! Nyipunieti hi la itretre tro fë maca i nyidrë. Celë hi matre ahlemune jë, ahlemune jë, ahlemune jë la Joxu memine la baselaia i nyidrë.” Ame la drai thupen, lue thauzane e angatr ka tro troa cainöje trootro, nge ame itre xan, nanyi la gojenyi angatr, traqa koi 72 km qa ngöne la hna asabele kowe la hnë troa cainöje ngön. Önine la ketre trejine föe: “Thatreine kö ni troa thëthëhmine la kola ihë göi troa ahlemune la Baselaia memine la trenge ajane la itre atrene la asabele!” Ala nyimu fe la itre xa trejine ka mekune tune lai.

9, 10. (a) Nemene la itre ini ka hnëkë së thatraqane huliwa ne cainöj? (b) Nemene la thangane hnei epuni hna kapa qa ngöne la itre ini cili?

⁹ Ame lo 1922, ase hë sasaithe la 17 000 lao ka cainöje trootro ngöne la 58 lao nöje e cailo fen. Ngo, nyipi ewekë troa ini angatre hnyawa. Ame ngöne la hneijine ne lo itre pane Keresiano, hnene la Joxu hna acile hna hamëne kowe la itretre drei nyidrë la itre hna amekötine göi aliene nyine troa cainöjën, me hnë troa cainöje ngön me aqan troa cainöj. (Mat. 10:5-7; Luka 9:1-6; 10:1-11) Ketre tune mina fe enehila, Iesu a hmekëne matre tro la nöjei ka cainöje a hetrenyi la itre hna amekötin, me itre jia ne huliwa matre atreine angatre troa hamëne hnyawa la ini. (2 Tim. 3:17) Iesu a huliwane la ekalesia matre troa inine la itretre drei nyidrë thatraqane la huliwa ne cainöj. Ame la ketre aqane ini angatre hnei nyidrë, tre, jëne la Ini Ne Cainöj Qaathei Akötresie ngöne 111 000 lao ekalesia nge hetre munën e cailo fen. Ame la ini cili, tre, kola hamëne kowe la sevene milio nge hetre munën lao atr la aqane troa cainöj, nge kola ini angatre fe troa xatuane “la nöjei ate asë.”—E jë la 1 Korinito 9:20-23.

¹⁰ Hetre itre Ini Ne Cainöj Qaathei Akötresie göi troa hnëkëne la itre qatre thup, me itre pionie,  me itre trejine trahmanyi ka pë föen, me itre trefën, me itre atrene la Kometr Ne La Hnalapa Ne Thewe Huliwa me itre föi angatr, me itretre thupe ka iwai trootro me föi angatr, me itre mesinare. c Hnene la itre ka sine la ketre Ini Thatraqane La Itre Trefën Keresiano hna qaja la madrine i angatr, me hape: “Hna acatrene la ihnimi huni koi Iehova me atreinë huni troa xatuane la itre atr hnene la ini ka ketre pengöne celë hne huni hna kapa.”

11. Nemene la ka aijijëne la itretre drei Iesu troa catre cainöje ngacama tru la icilekeu i Satana?

¹¹ Tha sihngödri kö koi Satana, ene lo ithupëjia, la itre aqane catre ne la itre atr troa cainöjëne me inine la maca ka loi. Angeice a ajane troa thingijëne la huliwa ne cainöj, celë hi matre xome jë angeice la nöjei aqane troa icilekeu memine la maca ne la Baselaia, me angetre tro fë ej. Ngo tha hune kö angeic. Hnei Iehova hna acile la Hupuna i Nyidrë “e koho palua hune la nöjei Joxu, me mus, me men, me ite tan.” (Efe. 1:20-22) Iesu Joxu a huliwane la musi ka eje thei nyidrë troa thupëne me amekötine la itretre drei nyidrë me hmekëne matre troa eatre la aja ne la Tretretro i nyidrë. d Ame enehila, kolo pala hi a cainöjëne la maca ka loi, nge kola inine la itre milio lao atr ka meköt troa atrunyi Iehova. Ewekë ka tru koi së la troa hane kuca la huliwa ka lolo cili!

12. Qaane lo 1914, nemene la itre ewekë hna saze trongëne me ahnyipixene ngöne la nöje i Akötresie?

¹² Qaane lo Iesu a nyiqaane musi lo 1914, nyidrëti hi lai a saze trongëne la aqane troa huliwa hnene la itre hlue i Akötresie matre troa kuca la aja ne la Tretretro i nyidrë. (E jë la Isaia 60:17.) Ame lo 1919, hna acile la ketre trejine troa ameköti huliwa (directeur de service) ngöne la itre ekalesia asë matre troa cilë mekene la huliwa ne cainöj. Ame lo 1927, hnene la itre ekalesia hna nyiqaane cainöje lapaa e nöjei Sabath. Ame lo 1931, kola hëne la itre hlue i Iehova ka hape, Itretre Anyipici Iehova, celë hi ka thuecatre i angatre hmaca kö ngöne la huliwa ne cainöj. (Is. 43:10-12) Ame la kola xejë lo 1938, tha kolo hmaca kö a vot göi troa acile la itre trejine ka troa cilë mekene la ekalesia. Ngo kola acilë angatre ngöne la itre hnëqa cili, ke itre ka melëne angatre la itre hna amekötine hnei Tusi Hmitrötr. Ame hë lo 1972, tha ca trejine trahmanyi hmaca kö la ka thupëne la ekalesia, ngo hna nue la hnëqa cili kowe la lapa ne la itre qatre thup. Ame asë hi la itre trejine ka macaje ngöne la götrane u, tre kola thuecatre koi angatre troa hetrenyi la ajane troa thupëne la ekalesia. (1 Pet. 5:2) Ame lo 1976, hna eköthe la sikisi lao kometr ngöne la Lapa Ne Xomi Meköt matre troa elemekene la huliwa ne cainöjëne la Baselaia e cailo fen. Eje hi laka, Iesu pala hi a hnëkëne trongëne la itretre drei nyidrë matre troa kuca la itre ewekë thenge la aja i Akötresie.

13. Nemene la ka ketri epuni qa ngöne itre huliwa hna kuca hnene la Joxu Mesia fene la mus i nyidrë?

 ¹³ Pane ce wange jë së la nöjei huliwa hna kuca hnene la Joxu Mesia ngöne la pane hadredre lao macatre ne musi nyidrë! Hnei nyidrëti hna nyidrawane la neköi lapa ka co göi troa tro fë huliwa i Iehova. Hnei Iesu hna elemekene la huliwa ne cainöjëne la maca ka loi ngöne la 239 lao nöj, me inine la itre milio lao atr troa atrunyi Iehova. Hnei nyidrëti fe hna iacasinekeune la sevene milio nge hetre munën lao itretre drei nyidrë ka ajane troa nue la mele i angatre göi troa kuca la aja ne la Tretretro i nyidrë. (Sal. 110:3) Hnei Iehova hna huliwane la Baselaia i Keriso matre troa kuca la nöjei ewekë nyine hain. Ngo hetrenyi pala kö la itre ewekë ka tru ka troa traqa elany!

14. (a) Nemene la hne së sipone koi Akötresie ngöne la easa thith ka hape: “Epi traqa pi la Baselaia”? (b) Nemene la topike ne la macatre 2014, nge pine nemene matre hna iëne hnyawane la topike cili?

¹⁴ Maine nyipici laka, hnei Iehova hna acile la Hupuna, ene Iesu Keriso, Joxu Mesia lo 1914, ngo tha pexeje pala kö lo hna sa lo thithi së, lo hna hape, “Epi traqa pi la Baselaia i Cilie.” (Mat. 6:10, MN) Hnei Tusi Hmitrötre hna qaja amë göi Iesu, ka hape, tro nyidrëti a ‘musinëne la nöjei ithupëjia me nyidrë.’ (Sal. 110:2) Tro pala kö la itre musi atr ka lapa fene la ihnatrapaime i Satana a icilekeu memine la Baselaia i Akötresie. Ame la easa thith matre traqa pi la Baselaia i Akötresie, tre easë hi lai a sipo Akötresie matre tro la Joxu Mesia memine la ala 144 000 a apatrene la musi ne la atr, memine la itre atr ka icilekeu memine la Baselaia. Ame la kola traqa la itre ewekë cili, eatre hë la hna perofetane hnei Daniela 2:44. Kola qaja e cili ka hape, tro la Baselaia i Akötresie “a lep’ anyilanyilane me apatene la nöjei baselaia asëjëihë cili.” Tro eje a apatrene la nöjei mus ka ithupëjia memine la Baselaia. (Hna ama. 6:1, 2; 13:1-18; 19:11-21) Eje hi laka easenyi catre hë matre eatre jë la hna perofetane celë, celë hi matre ijije tro la macatre 2014 a xome la topike celë ngöne Mataio 6:10: “Epi traqa pi la Baselaia i Cilie, MN.” Traqa ha koi ca hadredre lao macatre enehila ne Iesu a cilëne la musi e hnengödrai!

15, 16. (a) Nemene la itre ewekë ka tru ka troa eatr ngöne la itre macatre ka ca thauzan ne musi Keriso? (b) Nemene ju hë la ewekë tixenuë hna kuca hnei Iesu, lo Joxu Mesia? Nemene hë la aqane troa eatre la aja i Iehova?

¹⁵ Tro Iesu a nyiqaane “apatene la ite huliwa i diabolo,” ene la troa pane apatrene la itre ithupëjia me Akötresie. (1 Ioane 3:8) Thupene lai, tro nyidrëti a kuië Satana me itre dremoni angeice hnine la hnaope koi ca thauzane lao macatre. (Hna ama. 20:1-3) Qa ngöne laka, pë hë ka iajojezi, haawe, tro hë la Baselaia i Akötresie a hamëne la ixatua kowe la itre atr, matre tro angatre a canga kepe thangane ka loi qa ngöne la huuje i Iesu nyine thupene mel, nge tro eje lai a apatrene paluane la itre ethanyine la ngazo i Adamu. Tro la Joxu a amelene hmaca la itre milio lao atr, me eköthe la ketre porogarame ne ini e cailo fen matre troa ini angatr la pengö i Iehova. (Hna ama. 20:12, 13) Tro ha paradraiso asë la ihnadro tune lo hlapa ekö e Edena, nge tro fe ha pexeje asë la itre atr ka mele nyipici.

¹⁶ Thupene la itre macatre ka ca thauzan ne musi Keriso, eatre hë la aja i Iehova kowe la ihnadro. Ase jë hi lai, tro Iesu a nue hmaca la Baselaia kowe la Tretretro i nyidrë. (E jë la 1 Korinito 15:24-28.) Tha nyipi ewekë hmaca kö troa hetre ka nyi gojenyi së koi Iehova. Tro hmaca ha cas la itre nekö i Akötresie e hnengödrai me itre nekö i Nyidrë e celë fen, matre tro angatre asë a cas memine la Tretretro i angatr. Haawe, lapa ka cahae asë hë la itre nekö i Akötresie e hnengödrai me e celë fen.

17. Nemene la ewekë nyine tro epuni a kuca thatraqane la Baselaia, ka xecie e kuhu hni epun?

¹⁷ Kola mama jëne la itre ewekë nyine haine hna kuca ngöne la itre macatre ka ca hadredre ne musi ne la Baselaia ka hape Iehova la ka mus, nge eje hi laka, ame la aja i Nyidrëti kowe la ihnadro, tre, tro eje a eatr. Epi tro sa catre nyihlue i Nyidrë thenge la nyipici, me ahlemune la Joxu, memine la Baselaia. Tha luelue kö së laka, easenyi catre hë matre kapa jë Iehova lo hne së hna thithi fë ka hape, “Epi traqa pi la Baselaia, MN”!