SINE foë ka puafala a haluthe la nekö i eahlo trahmanyi ka cas. Thatreine kö eahlo troa mekune la ewekë celë. Ngo qëmekene lai, eahlo a treije xome la nekö i eahlo a meci hë. Kola goeëne madrine hmaca hnene la föe la nekö i eahlo hna amelene hmaca a dredrehnyima. Önine jë hi la atr hnei eahlo hna kapa ka hape: “Hana wang, melë hë la nekö i nyipo.”

Traqa ha enehila koi 3 000 lao macatre thupene la hna amelene ekö lo nekönatr, hna qaja ngöne la 1 Ite Joxu mekene 17. Elia perofeta i Akötresieti hi lai hna kapa. Nge drei lai thin? Tha hna qeje ëjene kö, ngo ketre sine föe ka mele ngöne la traon ne Sarepeta. Ame la melehmaca ne lai nekönatr, tre, celë ketre ewekë ka tru lai ka traqa kowe la mele i eahlo ka acatrene la lapaune i eahlo. Hetre ini nyine tro sa xome qa ngöne la hne së hna ce wange la pengö i eahlo.

Ase hë Iehova qaja amë ka hape, troa traqa la ketre hneijine qaqacile ngöne la baselaia i Ahaba, lo joxu ne Isaraela ka ngazo. Thupene jë hi la hnei Elia hna ithuemacanyine lai, Akötresieti a juetrë Elia ju e Ahaba me traqa fë areto (falawa) me miitr kowe la perofeta jëne la ketre oreba (halo). Nge Iehova a upi Elia jë me hape: “Cilejë, trojë Sarepeta eë e Sidona, nge lapaju e cili, hana wang, ase hë ni upe la kete sine fö’ e cili troa thu a i ’ö.”—1 Ite jo. 17:1-9.

Ame la kola traqa hnei Elia e Sarepeta, öhne ju hi nyidrë la ketre sine föe, kola nyi sinöe. Kolo jë kö lo föe lai ka troa ithuane la perofeta? Troa thuane tune kaa nge ka puafala pe? Ngacama tha nyipi mama kö koi Elia ka hape, eahlo hi, ngo hnei nyidrëti pe hna canga ithanata koi eahlo. Öni nyidrë: “Epi troja xome tepe imeng, mate tro ni a ij.” Ame la eahlo a traqa fë la trepe tim, öni Elia hmaca jë hi: “Epi xome fe koi ni la sine areto ka co.” (1 Ite jo. 17:10, 11) Pëkö ejolene e troa hamë tim kowe la trehnyiwa, ngo jole ka tru catre la troa hamë falawa.

Sa jë hi eahlo ka hape: “Loine Iehova Akötesi nyipë, a pëkö nene areto theng, ngo  hnepe falawa hi tune la hnatrapaime ngöne la tengen, me hnepe wakacu ngöne la ge ; nge hana wang, ini a nako she pune sinöe, mate tro ni a löjë me deuth’ eje thatraqai ni me neköng, mate xen, nge meciju pë ho.” (1 Ite jo. 17:12) Pane mekune jë së la ini nyine tro sa xome qa ngöne la hna ithanata hnei nyidro.

Wangatrehmekunyi Elia hi hnene la sine föe ka hape, ketre atre Isaraela nge hlue i Akötresie. Hna amamane lai hnene la itre ithanata i eahlo celë, “Loine Iehova Akötesi nyipë.” Ngacama ka nango atre Akötresieti hi hnei eahlo, ene la Akötresi angetre Isarala, ngo ame la eahlo a qeje Iehova, tha öni eahlo kö “Akötresingö.” Atre Sarepeta eahlo, ketre traone i angetre Sidona. Ame la angetre Sarepeta, itretre nyihlue i Baala, ngo ame pe tha sihngödri kö koi Iehova la hni ne la sine föe celë.

Ngacama kola mele hnene la sine föe nyipine la itre ka nyihlue kowe la itre haze, ngo hnene la itre huliwa i eahlo hna amamane ka hape, lapaune fe hi eahlo kowe la Akötresi angetre Isaraela. Hnei Iehova hna upi Elia kowe la föe nyine loi koi nyidro asë, kowe la föe memine fe lai perofeta. Hetre ini ka tru nyine tro sa xome qa ngöne la ewekë celë.

Ame e Sarepeta, tha itre ka nyihlue i Baala asë kö la ka kuca la itre ewekë ka ngazo. Ame la Iehova a upi Elia kowe la sine föe cili, tre Nyidrëti hi lai a amamane ka hape, öhne hi Nyidrëti la itre atr ka hni ka meköt ngacama tha ka nyihlue i Nyidrëti petre kö angatr. Eje hi laka, “hna kapa hnei anganyidëti la ate qoue nyidë me kuca la thina ka meköt, ngöne la nöjei nöj’ asë.”—Ite hu. 10:35.

Hetre atr fe kö ngöne la nöje së ka tune la sine föe ne Sarepeta? Ngacama angatre petre kö ngöne la itre hmi thoi, ngo ame la aja i angatr, tre, ene la troa hetrenyi la aqane mele ka loi. Nango atre Akötresieti hë hnei itre xan, ame itre xan, thatre pala kö, matre nyipi ewekë troa xatua angatre troa hane lö kowe la nyipi hmi. Hapeu, epuni kö a hane thele la itre atr ka tune lai matre xatua angatr?

Mekune hi së lo hna sipone hnei Elia kowe la sine föe. Hnei eahlo lo hna hape, xeni tixenuë hi lai hnei eahlo hna troa kuca thatraqai eahlo me nekö i eahlo, nge thupene lai, mec la hnei nyidroti hna treqen. Ngo nemene la hnei Elia hna qaja? “The qou kö, troja kuca tune lo hnei nyipoti hna qaja ; ngo pane kuca thatraqai ni la nene areto qa ngöne hnep’ ej, me tro fë pi koi ni ; nge thupene lai tro nyipoti a kuca thatraqai nyipoti luete me nekön. Ke dei la hna ulatine hnei Iehova Akötesi angete Isaraela, ka hape, Tha tro kö a ae la hnepe falawa, nge tha tro kö a ea la hnepe wakacu, uti hë la drai ne tro Iehova a upe la manie kowe la hnadro.”—1 Ite jo. 17:11-14.

Maine kolo ju a qaja koi ketre atr menu kö, tro angeice lai a qaja ka hape, ‘Ka tro eö a hmo, tro pë hë ni a xeni nemen!’ Ngo tha hna ujë tune kö lai hnene la sine föe. Ngacama thatre Iehova hnyawa kö hnei eahlo, ngo hnei eahlo hna mejiune koi Elia, me kuca la hnei nyidrëti hna sipon. Ngacama itupathe la ka tru koi eahlo, ngo ka inamacane pe la aqane ujë i eahlo.

Tha hnei Akötresieti kö hna nue axöje la sine föe. Tune la hna thingehnaeane hnei Elia, hnei Iehova hna amanane la hnepe xeni ka co pe hi hnei eahlo hna hetreny matre nyine mele thatraqai Elia, memine la sine föe me nekö i eahlo uti hë la pune la hneijine qaqacil. Eje hi laka, “tha ae kö la hnepe falawa, nge tha ea [maine uti] kö la hnepe wakacu, tune la wesi ula i Iehova hnei nyidëti hna ulatine jëne Elia.” (1 Ite jo. 17:16; 18:1) Maine tha ujë tune ju hnene la föe, eje hi laka, hnepe xeni tixenuë pe hi lo lai koi eahlo. Ngo hnei eahlo hna  ujë cememine la lapaun, me mejiune koi Iehova, me thua i Elia pa.

Ame la ketre ini nyine tro sa xome qa ngöne lai, tre, ene la tro Akötresieti a amanathithi itre ka lapaune koi Nyidrë. Maine troa traqa koi epuni la ketre itupath ka tru, nge tro epuni a amamane la lapaune i epun, eje hi laka, tro Iehova a xatua epun. Nyidrëti la Atre thuewekë së, me Atre thupë së, nge Enehmu së e traqa ju koi së la itre drai ka ngazo.—Eso. 3:13-15.

Ame lo 1898, hetre ini hna hamëne ngöne la zonal hna hape, Le Phare de la Tour de Sion qa ngöne la hna edromëne la pengöne la sine föe: “Hnene la lapaunen la sine föe, matre ijiji nyiidro ju hi troa kapa la ixatua i Joxu jëne lo Perofeta; ngo maine tha lapaune ju nyiidro, tro pena ha hamëne la ixatua cili kowe la ketre sine föe kö. Ka tu së mina fe, laka, kola aijijë së hnene la Joxu troa melëne la itre ewekë ka tupath la lapaune së ngöne la ijine easa mel. Maine tro sa lapaun, tro hë së lai a kepe manathith; ngo maine tha lapaune kö së, tro lai a luzi la manathith.”

Ame la easa mele hnine la itre itupath ka tru, nyipi ewekë tro sa thele ixatua hnine la Tusi Hmitrötre me hnine la itre sine tusi ne la hmi së. Thupene lai, tro sa ujë thenge la itre hna amekötine hnei Iehova ngacama ka jole koi së troa trongën. Maine aja së troa hane manathith, loi e tro sa trongëne la hna edromëne celë: “Lapauneju koi Iehova hnene la hni ’ö ka pexej, ngo the lapa qale kowe la hnei ’ö hna trotrohnin. Mekuneju koi nyidë ngöne la nöjei goje i ’ö asë, nge tro pena nyidëti a amekötine la ite jë i ö.”—Ite edomë 3:5, 6.

Hetre ketre itupath ka traqa kowe la sine föe. Önine la Tusi Hmitrötr: “Thupene la ite ewekë cili kola meci la nekö ne la fö, ene la tene uma, nge atraqate cate la meci nyëne mate tha mano hmaca kö nyën.” Kola thele la aliene la hulö ka traqa koi eahlo, matre öni eahlo koi Elia: “Nemene ni koi nyipëti ate i Akötesie ? traqa ha nyipëti koi ni troa amekunë ni la ngazong, me humuthe la neköng ?” (1 Ite jo. 17:17, 18) Nemene la aliene la itre ithanata ka akötre celë?

Hapeu, ma eahlo jë a qaja ka hape, hetre ewekë ka angazone la mekuthetheu i eahlo? Nge ma eahlo jë a mekune ka hape, ame la meci ne la nekö i eahlo, tre aqane nyithupene Akötresieti la ngazo i eahlo, nge Elia a traqa fë la maca ne hleuhleu? Tha hna qaja e hnine la Tusi Hmitrötr la lue mekune celë ngo, ame la ewekë ka mama hnyawa ngöne la itre akötre celë, tre tha hnei eahlo kö hna upe zö Akötresie.

Maine jë hna sesëkötre hnei Elia la kola meci la neköne la sine föe, ka tune mina fe la kola drenge ka hape, pine laka perofeta nyidrë, nyidrë la atrekë zöne la akötre i eahlo. Thupene la hna elë fë la nekönatre kowe la hnahage e koho, Elia a hë jë koi Iehova me hape: “Iehova fe, Akötesingö, hape u, hnei enëtilai hna aeatene fe la ngazo kowe la sine föe lo hnenge hna lapa then, mate humuthe la nekö i nyido ?” Thatreine kö la perofeta lapa mekune laka, troa apuingazone la ëje i Akötresie, e tro Nyidrëti a nue la föe, trene ihnim me atre ikep, a mele hnine la akötr. Haawe, Elia a iele fë jë koi Iehova me hape: “Iehova fe, Akötesingö, epi ahmacaneju la u ne la nekönate ce kowe ha hni nyën.”—1 Ite jo. 17:20, 21.

Drenge hë Iehova. Hnene la sine föe hna ithuane la perofeta i Nyidrë, me mejiun. Eje hi laka, hnei Akötresieti hna nue la kucakuca ne la nekönatre uti hë la meci nyën, ke, tro hmaca kö Nyidrëti a amele nyën, nge qa ngöne lai tro fe a thue mejiunene la itre xötre atr ka troa xulu. Pane melehmaca hi lai hna qaja hnene la Tusi Hmitrötr. Ame la Elia a sipo iel koi Iehova, hnei Nyidrëti hna dreng, ene pe amelene hmaca jë Nyidrëti la nekönatr. Tha nyine qaja kö la madrin ne la sine föe la Elia a qaja ka hape: “Hana wang, melë hë la nekö i nyipo”! Önine jë hi la sine föe koi Elia: “Hnene hi lai ini a ate hmekune enehila laka ate i Akötesie cilie, nge nyipici la wesi ula i Iehova ngöne la qe i cilie.”—1 Ite jo. 17:22-24.

Pë hmaca ju kö xa hna qaja ngöne 1 Ite Joxu mekene 17 göne lai sine föe. Pine laka hna qaja aloinyi eahlo hnei Iesu, kola mekune laka, ma hnei eahlo pë hë hna nyihlue i Iehova ngöne la mele i eahlo ka pexej. (Luka 4:25, 26) Kola ini së hnene la pengöne la föe celë ka hape, Akötresieti a amanathithine la itre ka kuca la loi kowe la itre hlue i Nyidrë. (Mat. 25:34-40) Kolo fe a amamane ka hape, Akötresieti a thue ewekëne la itre ka mele nyipici, ngöne fe la itre ijine ngazo. (Mat. 6:25-34) Ame fe la hna edromëne celë, tre ketre nyine anyipicine hnyawa la aja i Iehova me atreine i Nyidrë troa amelene hmaca la ka meci hë. (Ite hu. 24:15) Drei la itre ewekë ka tru nyine tro sa kapa elany, haawe, mekune pala kö së lo sine föe ne Sarepeta!