ÖNI Iesu Keriso: “Trojë kowe la hnalapa i ’ö, me ite sine i ’ö, me amamane koi angate la ite ewekë atraqate hnei [Iehova] hna kuca koi ’ö, me hna hnimi ’ö.” Ame ngöne la ijine Iesu ezine la traone Gadara ngöne la götrane ahuë ne la ngöne gejë ne Galilaia, hnei nyidrë hna ithanata kowe la thupëtresije ka ajane troa hane xötrethenge nyidrë. Kola mama ngöne la itre ithanata i Iesu ka hape, atre hnyawa hi nyidrë la ketre ewekë ka eje thene la atr, ene la ajane troa ce thawa la itre mekune ka nyipi ewekë, memine la itre atrene la hnalapa i angeic.—Mar. 5:19.

Ka mama hnyawa fe la pengöne cili ngöne la hnedrai së, nge ame ngöne itre xa nöj, tre ka mama catr. Haawe, ame la ketre a nyiqaane nyihlue i Iehova, canga saqe hi angeice ce thawa la lapaune i angeic memine la itre xa atrene la hnalapa i angeic. Nemene la hnei angeice hna troa kuca? Nemene la aqane tro angeic a ketr la hni ne la itre atrene la hnalapa i angeice ka hetre ketre hmine kö, maine ka tha hmi kö? Tusi Hmitrötre a hamëne la itre eamo hmekune la atr, me ka ithuecatr.

Ame lo hneijine i Iesu, Anederea la ketre atr ka pane wangatrehmekune laka, Iesu hi la Mesia. Nge drei la hnei angeice hna canga thuemacan? “Angeic’ a pane öhne la tejine me angeice, Simona, me hape koi angeic, Öhnë hë huni la Mesia, (pengön, Keriso).” Anederea a tro sai Peteru ju koi Iesu, ijiji Peteru jë fe hi troa hane ketre atre drei Iesu.—Ioane 1:35-42.

Ngöne la sikisi lao macatre thupen, lo Peteru a lapa e Iopa, hna upi angeice kowe la götrane kolopi ne Kaisaria troa wange la lapa i Konelio, ketre tane isi. Drei la hnei Peteru hna öhne hnine la uma? “Konelio a teqe [Peteru me itre ka ce tro me angeic], nge ase hë icasinekeune la lapa ka cahae me angeice me ite sine i angeic.” Hane hi lai aqane aijijëne Konelio la itre  atrene la hnalapa i angeice troa hane drenge la hna qaja hnei Peteru matre isa atreine angatre xomi mekune thenge la hnei angatre hna dreng.—Ite hu. 10:22-33.

Nemene la ini nyine tro sa xome qa ngöne la aqane ujë i Anedera me Konelio kowe la itre atrene la hnalapa i nyidro?

Tha hnei Anederea kö me Konelio hna meku nyidroti hi. Hnei Anederea hna sipu tro sai Peteru koi Iesu, nge hnei Konelio hna icasinekeune la itre atrene la hnalapa i angeice troa ce drenge la hnei Peteru hna troa qaja. Ngo tha hnei Anederea kö me Konelio hna musinë angatr, maine iaö angatre pena matre tro fe angatre a hane itretre drei Keriso. Öhne fe hi epuni la ini qa ngöne lai? Ka loi tro fe sa hane ujë tune lai. Hane jë fe ce thewe mekune memine la itre atrene la hnalapa së, me hane thele jëne matre tro angatre a atre la itre nyipici qa hnine la Tusi Hmitriötr, nge tro fe a atre la itre trejine me easë. Ngo easa metrötrëne la aqane isa ië ewekë hnei angatr, nge tha tro kö a imusinë. Tro sa ce wange la hna melëne hnene lue trefëne qaa Alema, Jürgen me Petra göi aqane troa xatuane la itre sinee së.

Hnei Petra hna inine la Tusi Hmitrötre memine la Itretre Anyipici Iehova, nge ame hë la ketre ijin, angeic a xome ju la bapataiso. Ame Jürgen, föi angeic, tre, ketre tane isi ngöne la hna soc. Ame petre kö ngöne la xötrei, xele Jürgen ma wange la hna kuca hnei föe. Ngo qea ha, öhne jë hi angeice laka, itre nyipici qa hnine la Tusi Hmitrötre la hna cainöjëne hnene la Itretre Anyipici Iehova. Ame hnei angeice fe hna nue la mele i angeice koi Iehova, nge ame hë enehila, ketre qatre thupe angeice ngöne la ekalesia. Nemene hë la itre eamo hnei angeice hna hamëne koi së göi troa ketr la ketre atrene la hnalapa së, tha sine hmi së kö?

Öni Jürgen: “Tha tro kö sa musinë angatr, me trai ime i angatre hnene la itre ithanata qa hnine la Tusi Hmitrötr. Tro angatre lai a xele catre ma dreng. Ame la nyine kuca ka loi, tre, tro hi a hamëne la ka ijije ngöne la itre ijine ka nyimutre. Ketre ka loi fe troa upe koi angatre la itre trejin, sine xötre i angatre, nge ka ceitu hi la itre hna ajan. Aqane tro lai a ahmalahni angatr.”

Hnei Peteru aposeto me itre atrene la hnalapa i Konelia hna canga drengethenge la maca qa hnine la Tusi Hmitrötr. Ame pë hë itre xan ngöne lo hneijine i Iesu, ngacama itre ka drenge hë la nyipici, ngo tha canga mekune pe troa trongëne la hna dreng.

Nyimu atrene la hnalapa i Iesu ka lapaune ngöne lo nyidrëti a tro fë la huliwa ne cainöj. Tune la lue aposetolo, Iakobo me Ioane nekö i Salome, nge ma ame nyidro, tre lue xa trejine jë me Iesu, nekö i lue föe, ke ame Salome, kola mekune ka hape, ketre trejine me Maria, thine i Iesu. Ma eahlo jë lo ketre e “ite xane ka kösau, hna thue ewekë i nyidë qa ngöne la ite ewekë i angat [Iesu me anga aposetolo].”—Luka 8:1-3.

Ngo tha hnene asë kö la itre xa atrene la hnepe lapa i Iesu hna canga lapaune koi nyidrë. Ca macatre thupene la hna bapataiso Iesu, hnene la ka ala nyium hna icasikeu göi troa drei nyidrë ngöne la ketre hnalapa. “Nge ate hë ite sine i nyidë, ame hna tropi angate troa xölehuji nyidë, ke öni angat Hmo hë nyidë.” Nge thupene hë hnene la itre trejin, ce thin me Iesu, hna ithanatane la tronge i nyidrë, tha hnei nyidrëti kö hna canga sa mekötin koi angatr. Pine nemen? Pine laka, “tha lapau nyidëti kö hnei ite tejine me nyidë.”—Mar. 3:21; Ioane 7:5.

Nemene la ini nyine tro sa xome qa ngöne la ithanata i Iesu kowe la itre trejin me nyidrë? Tha hnei nyidrëti kö hna wesitre pine la hna jele hmo nyidrë hnei angatr. Thupene la hnei Iesu hna mec me mele hmaca, hnei nyidrë hna anyipicine kowe la itre atrene la hnepe lapa i nyidrë laka, nyidrëti hi la Mesia, lo kola iamamanyi  koi Iakobo, trejine me nyidrë. Thupene jë hi la hna iamamanyi koi Iakobo, mejiun jë hi angeic me itre xa trejin me angeic laka, Iesu hi la Mesia. Ketre, ce angatre hi lo e Ierusalema memine lo itre xa aposetolo me itre xane ju kö ngöne la hnahage ka he koho, lo hnei angatre hna kapa la uati hmitrötr. Thupene hë, atraqatre la madrine i Iakobo me Iudra lo ketre trejin, ce thin me Iesu, qa ngöne la hna kapa la itre xa ewekë ka tru hmaca kö.—Ite hu. 1:12-14; 2:1-4; 1 Kor. 15:7.

Tune lo hneijinen lo itre pane Keresiano, loi e tro sa pane nue ijine kowe la itre atrene la hnalapa së göi troa xötrëne la gojenyi ne mel. Tro sa ce wange la ketre ceitun, ame Roswitha ka catre eahlo ekö ngöne la hmi Katolik, lo ijine kola bapataisone la föi eahlo troa hane Anyipici Iehova lo 1978. Pine laka, ka catre Roswitha ngöne la hmi, hnei eahlo hna pane icilekeu me föi eahlo. Ngo tro ju pë hë la itre macatre, puje hnine hë la icilekeu i eahlo, nge eahlo ha kapa laka, ka nyipici la itre ini hna hamëne hnene la Itretre Anyipici Iehova. Ame hë lo 2003 eahlo fe hë a xomi bapataiso. Nemene la ka ujëne la mekuna i eahlo? Ame la ijine kola traqa la icilekeu, loi la aqane ujëne la föi Roswitha, ke hnei nyidrë hna nue ijine koi eahlo matre ketre sipu ujë jë la mekuna i eahlo. Haawe, nemene la eamo hnei eahlo hna hamën koi së? “Kola traqa koi së la itre ewekë ka loi e hne së hna xomihni, xomihni, xomihni pala hi.”

Hna bapataiso Monika lo 1974, nge thupene treen lao macatre, kola xomi bapataiso fe hnene la lue nekö i eahlo trahmany. Ame pena Hans föi eahlo, ngacama tha ka hane fe kö nyidrë icilekeu me angatr, ngo hna bapataiso nyidrë pe hi lo 2006. Nemene hë lai eamo hnei angatr hna hamën koi së? “Mele nyipici jë koi Iehova nge wange kö ke angazone pi la lapaune i epun.” Eje hi laka, hna qaja pala hi hnei angatr koi Hans laka tha saze kö la ihnimi angatre koi nyidrë. Nge angatre pala hi a mejiune laka, troa traqa la ijine tro nyidrë a hane nyihlue i Iehova tui angatr.

Hnei Iesu hna aceitunëne la maca ne la nyipici me tim ka hamëne la mele ka pë pun. (Ioane 4:13, 14) Aja së tro la itre atrene la hnalapa së a ije la nyipi tim ka loi, ene la nyipici. Eje hi laka, tha tro kö së lai a tra ime i angatr uti hë la thatreine mano. Qa ngöne la aqane qeje pengöne së la lapaune së kowe la atr, tro së lai a thuecatre koi angeic, maine tro pena ha heti angeice hnene la itre ithanata së. Öni Tusi Hmitrötr, “Tro la hni ne la ate ka meköt’ a mekune nyine sa,” nge “ame la hni ne la ate ka inamacan, te, ate inine la qe i angeic, me nyi xane la inamacane kowe la ukeineqe i angeic.” Tro sa trongëne tune kaa la eamo celë?—Ite edomë 15:28; 16:23.

Hna ajane hnei föe troa qeje pengöne la lapaune i eahlo koi föi eahlo. Maine tro eahlo a canga “mekune [la] nyine sa, tro eahlo lai a iëne hnyawa la itre ithanata ka loi, nge tha tro kö a canga saqe ithanata. Tha tro kö eahlo a pi nyi ka meköt me wajahuje la trahmany. Ame la itre ithanata hnei eahlo hna tuluthe hnyawa, tre, tro lai a ithue egöcatr me aciane la tingeting. Eue la ijine ka loi troa ithanata memine la trahmany? Nemene la itre mekune hnei angeice hna pi ithanatane me pi e? Pi tro kö angeice a atrepengöne la hna qaja hnene la sias, maine politik, maine ka pi wai elo pena? Ame la aja i eahlo, tre troa thue ajane la trahmanyi troa ithanatane la Tusi Hmitrötr, nge aja i eahlo fe troa metrötrëne pala hi la itre mekuna i nyidrë, me aqane waimekune i nyidrë, haawe, nemene la nyine tro eahlo a kuca? Maine tro eahlo a mekune hnyawa la itre ewekë celë, tro lai a xatua eahlo troa atreine tuluthe la itre ithanata nyine qaja me ujë cememine la inamacan.

Ame la troa ketr la hni ne itre atrene la hnalapa së ka tha ce hmi kö me easë, tre tha hnene hmekuje kö la itre ithanata hna tuluth, ngo ka loi e tro la itre ithanata së a ce tro memine la aqane ujë së.

Öni Jürgen, lo hna qaja e caha lo: “Trongëne jë la itre trepene meköt qa hnine la Tusi Hmitrötr o drai, nge the saze kö.” Eamo ka lolo catre lai matre sipu tro kö la itre atrene la hnalapa së a isa sipu öhne la aqane mele së, ngacama tha kapa kö angatre la nyipici. Ka tune fe hi la mekuna i Hans, ka xomi bapataiso, 30 lao macatre thupei föi nyidrë. “Ame la thiina ka loi ne la Keresiano, tre, jëne tro hi la itre atrene la hnalapa a wange la thangane la nyipici ngöne la mele së.” Loi e öhne la eloine la lapaune së hnene la itre atrene la hnalapa së; isa pengö së catre me itre xan.

Hnei Peteru aposetolo hna hamëne la ketre eamo ka tru kowe la itre föe tha ka hmi kö la föi angatr: “Loi e tune fe nyipunie ite fö, denge thenge ju la ite fö’ i nyipunie ; thatraqan’ e hetete tha denge thenge la wesi ula, mate ahmalanyi angate hnene la thina ne la ite ifënekö i angat, ngo tha hnei wesi ula [trenge ewekë] ; e goeëne hnei angate la thina i nyipunie a pë ethan, nge kola qou. Ame la ipi angat, te, tha tro kö a thaipine la  ngönetei ene la kola ele ihnaihe, me thaipine la gol, me xetëne la ite ixet ; ngo loi pe troa amingömingöne la ate ka sihngödi e kuhu hni, ene la ixete ka tha hnyeqete kö, ene la hni ka menyike me thilimek, celë hi nyipi ewekë atraqate xajawa i Akötesie.”—1 Pet. 3:1-4.

Peteru a qaja e celë la aqane troa ketr la trahmanyi hnene la thiina ka loi ne la föi angeic. Mekuna i Chista fe hi lai thupene lo kola bapataiso angeic lo 1972. Ngacama ketre ka ini Tusi hë la föi angeic, ngo tha nyipiewekëne kö la nyipici. Ka sine angeice la itre icasikeu, nge iatre hnyawa hi angeice memine la itre atrene la ekalesia. Nge angatre fe a hane metrötrë angeice thenge la sipu pengöi angeic. Hnei Christa hna thele tune kaa troa ketr la hni angeic?

“Eje hi laka, ka xecie koi ni troa trongëne la itre jë i Iehova. Nge eni fe a ajane tro ni a ahmalane la hni ne la föeng, ‘tha hnei trenge ewekë’ ngo hnene la thiinange ka loi. Maine hetre aja i nyidrë, nge tha hna wathebone kö hnei Tusi Hmitrötr, eni a kapa. Nge ketre eni a metrötrëne la itre aqane ië ewekë i nyidrë, me nue eje koi Iehova.”

Kola amamane ngöne la aqane mele i Christa la enyipiewekëne la troa atreine melëne la nöjei pengöne jol. Angeice pala hi a trongëne la itre hnei angeice hna majemine kuca ngöne la götrane u, ene mina fe la troa traqa lapa ngöne la itre ijine icasikeu, me cainöje trootro. Ngo, atreine fe angeice trotrohnine la aja ka eje thene la trahmany, ene la tro angeic a hamëne koi nyidrë la ihnim, me traem, me inyipiewekë. Ame koi itre ka ce mele me itre ka tha hmi kö, tre aqane ujë ne ka inamacan la troa atreine itrotrohni, me atreine troa melëne la nöjei pengöne jol. Öni Tusi Hmitrötr: “Hete pui ne la nöjei ewekë asë.” Kolo lai a qaja la itre ijine easa ce mele memine la itre atrene la hnalapa, ene mina fe la föe së ka tha ce hmi kö me easë. Ame la itre hnepe ijine easa ce mele, itre ijine ka aijijë së lai troa ifekeune la itre mekun. Kola amamane ngöne la mele së laka, e tro sa ifekeune la itre mekun, tha tro kö lai a traqa koi së la mekune ka hape, easë hmekuje hi, maine hna xele ma wai së, maine tro pena a imekuhni.—Ate cai. 3:1.

Öni Holger, neköne la ketre thupëtresije hna bapataisone ngöne la 20 lao macatre thupene la itre xa atrene la hnalapa: “Ka nyipi ewekë catre troa amamane la ihnimi së kowe lai atrene la hnalapa së, nge loi e tro fe a thithi sai angeic.” Öni Christa hmaca jë, loi e ‘tro pala hi angeice a mejiune ka hape, tro la föi angeice elanyi a nue la mele i nyidrë koi Iehova, me kapa la nyipici.’ Loi e tro pala hi a loi la aqane waipengöne së la itre atrene la hnalapa së ka tha ce hmi kö me easë, nge loi fe tro pala hi sa catre mejiun.

Epi tro pala hi sa atreine ce mele matre aijijëne la itre atrene la hnalapa së troa atre la nyipici, nge tro fe a ketr la hni angatr hnene la maca ne la Tusi Hmitrötr. Nge e hune la nöjei ewekë asë, loi e tro pala hi sa ujë cememine la “menyike me qou.”—1 Pet. 3:15.