“Mekuneju La Jëne La Lue Ca i ’ö,” Matre Macaje Pi ’ö
AME la kola tro ekö qa Babulona hnene la itre hlue i Akötresie lo 537 M.P.K., hnei Iehova hna thupë angatr ngöne la gojenyi ne tro Ierusalema. Öni Nyidrëti koi angatr: “Hnëkënejë la jëne la nöj ; xupejë draië, xupejë draië la gojeny ; shemejë la it’ etë.” (Is. 62:10) Pane mekune jë eö la aqane aeatrëne angatr la hna upi angatre troa kuca. Itre ka tro pa a pane keleme trongëne la itre qene hnaop, me nyidrawane la gojeny. Aqane kuca hi angatre lai, matre troa aijijëne la itre trejine me angatr troa ixötrethenge, me bëeke hmaca kowe la nöje i angatr.
Kola amekunë së hnene la tulu i angatr ka hape, easë fe a trongëne la ketre gojeny ka xomi së kowe la itre aja së ngöne la götrane la u. Iehova a ajane tro sa traqa kowe lai, nge pëkö ewekë ka troa sewe së menu. Kola qaja hnene la Wesi Ula i Nyidrë ka hape: “Mekuneju la jëne la lue ca i ’ö, mate cile huti la nöjei goje i ’ö asë.” (Ite edomë 4:26) Nyine loi koi së asë, itre ka tru me itre ka co, la eamo celë qaathei Akötresie.
HNËKËNE JË LA JË I ’Ö
Maine jë, drenge hë eö la kola qaja göne la ketre thöthi ka hape: ‘Ketre nekö jajinyi la ka atrein’ maine pena, ‘Ketre nekö trahmanyi la ka lai he.’ Ame la itre thöth, tre itre ka egöcatre hnyawa nyudren, nge ka sasaqe hi trotrohnine la itre ewekë, nge pi tro nyudreni a canga traqa kowe la itre hna ajan. Celë hi kepine matre Tusi Hmitrötr a qaja ka hape: “Ame la emingeminge ne la ite thupëtesiji, te, hmae i angat.” (Ite edomë 20:29) Ame la thöthi ka huliwane hnyawane la hnei angeice hna atrein, me itre talane i angeic ngöne la huliwa i Iehova, tre tro angeic a aeatrëne la itre aja i angeic ngöne la u, me melëne la nyipi madrin.
Ngazo pe, maine jë öhne hë eö ka hape, kolo fe a hane piine la itre hna atreine hnene la thöth Keresiano, hnene la fen. Maine kola goeëne hnene la ketre ka ini, maine ketre sine ini ka hape, lolo catre la hna ini hnene la ketre thöth Keresiano, tro hë angatre lai a uku nyën troa tro kowe la itre ini ka tru, matre tro nyën a öhnyi huliwa ka loi ngöne la fene celë. Ka tune fe la thöthi Keresiano ka loi göi elo; ma tro hë la itre ka ini nyën a uku nyën troa hane lö ngöne la itre hna ini me kuci elo ka tru. Hapeu, hna hane kö traqa koi eö la ewekë celë, maine kowe la ketre thöthi pena hnei eö hna atre? Nemene la ka troa xatuane la Keresiano troa ië ewekë hnyawa?
Atreine la Tusi Hmitrötr troa xatuane la atr troa iëne la gojenyi ka loi ngöne la mele i angeic. Öni Ate Cainöj 12:1: “Mekuneju la ate xupi ’ö ngöne la ite drai e thupëtesiji ’ö.” Nemene la aqane tro eö a ‘mekune la Atre Xupi ’ö’?
Pane wange ju la ewekë ka traqa koi Eric, * qa Afrique. Ka pi feni balo catr angeic. Ame la kola 15 lao macatre i Eric, tre hna hane ië angeic troa hane elo ngöne la ketre ekip ka tru, lo hna hape, équipe nationale. Nge maine tro angeic a tro, tre tro angeice a lö kowe la ketre götrane e Erope hnë troa hnëkë angatr koi itre macatre, göne la troa traqa kowe la itre ekip ne feni balo ka tru. Ngo tro hë angeic a ‘mekune la Atre Xupi angeic’ tune kaa? Nge nemene la ini koi eö, maine kowe la ketre thöthi hnei eö hna atre?
Ame lo angeice petre kö a ini, hnei Eric hna nyiqaane ini Tusi Hmitrötr memine la Itretre Anyipici Iehova. Hnei angeice hna inine ka hape, tro hë la Atre Xup i angeic a nyi nyin asë la itre jol ne la fene hnengödrai. Nge ame e cili, Eric a trotrohnine la enyipiewekëne la troa nue la traeme i angeic, me trenge catre i angeic kowe la huliwa i Akötresie. Qa ngöne lai, tha mekune hmaca ju hi Eric troa lö kowe la hna elo ka tru. Hnei angeice pe hna xomi bapataiso me thele troa macaje ngöne la götrane la u. Ame hë e thupen, tre drikona ha angeic, ene pe hë angeice ju hi troa hane sine lo ini hna hape, Ini Thatraqane La Itre Trejine Trahmanyi Ka Pë Föen.
Maine tro ju Eric troa hane feni balo ngöne la itre hna elo ka tru, tre ma tro ha atre angeic hnei nöjei atr, nge tro fe a tru la trenge manie i angeic. Ngo hnei angeic hna wang atrehmekune la enyipicine la hna qaja hnei Tusi Hmitrötr ka hape: “Ame la tenge nyi ne la ate tena mo, te, hnapo i angeice ka cat ; nge tune la thithë [hna zae] ka hoea draië ngöne la mekune i angeice kö.” (Ite edomë 18:11) Nyipici laka, mekuna i atr lai laka, tro sa mele xetietë jëne la mani, ngo tha eje kö lai. Ketre, ame la itre atr ka aja mani tre troa ‘umajo angate hnei angate kö hnene la ite aköte ka kösau.’—1 Tim. 6:9, 10.
Eloine pe, tru catre la itre thöth ka öhnyi loi me mele xetietë, jëne la hna huliwa i Akötresie ngöne la drai ka pexej. Öni Eric: “Hnenge hna lö kowe la ketre ‘ekip’ ka tru, ekip ne la Itretre Anyipici Iehova ka huliwa i Nyidrë ngöne la drai ka pexej. Pëkö ekip ka lolo tune la ekip celë, nge eni a olene koi Iehova la hnei Nyidrëti hna amamane koi ni la nyipi jëne madrine me gojenyi kowe la mele ka loi.”
Ngo tune kaa fe eö? The nyenyape thenge kö la itre aja ne la fen, ngo hane ju pionie, matre cile catre la “goje i ’ö” thei Iehova.—Wange ju lo “ Pë Fe Kö Ngöne Université,” hna eköhagen.”
NYIDRAWANE JË LA JË I ’Ö
Ame la kola pane ihamë hnene la lue trefëne Keresiano ngöne la hnalapa ne thewe huliwa e Amerika, drenge hi nyidro la madrine ka eje thene la itre ka huliwa i Iehova e cili. Öni föe ngöne la tusi angeic: “Casi hi la ka tru koi nyiho ekö, a huliwa i nyiho hi me mele i nyiho.” Qa ngöne lai, lue trefëne pë hë a ce axeciëne ju laka, tro hë nyidroti a hane nue la traeme i nyidro me trenge catre i nyidro ngöne la huliwa i Akötresie.
Nyipici laka, hace pi hë kowe la lue trefën troa sazene la mele i nyidro. Ngo ame ju hi lai ketre drai, hnei nyidroti hna thele la aliene la xötr ne la topik. Kolo trenge ewekë i Iesu ngöne la tus i Ioane 8:31; kola hape: “Maine tro nyipunie a xome hutine la tenge ewekënge, itete dei ni nyipunie ka nyipici.” Öni nyidroti jë hi: “Ngacama hace troa ahmaloeëne la mele i nyiso, ngo tro lai a hetre thangane ka loi.” Nyidroti pë hë a salemëne jë la iuma ka tru, me nuetrije la itre xa ewekë ka thipahacenyi nyidro, nge thupene jë hi lai, nyidroti a tro ju kowe la ketre ekalesia ka aja ixatua. Nyidroti enehila a pionie, me hane sine la itre huliwa ne xup Uma Ne Baselaia, me hane ixatua ngöne la itre ijine asabele ne distrik. Nemene hë la aqane goeëne nyidro la mele i nyidro? Öni nyidro: “Nyiho a haine la madrine hnei nyiho hna öhn, qa ngöne la hnei nyiho hna ahmaloeëne la mele i nyiho, matre atreine nyiho troa kuca la hna upi nyiho hnene la organizasio i Iehova.”
TRO HNYAWA JU KÖ NGÖNE LA NYIPI GOJENY
Öni Solomona ekö: “Goe meköti ju la lue meke i ’ö, nge tro la lue inemeke i ’ö a cile meköti qëmeke i ’ö.” (Ite edomë 4:25) Tha tro pi kö sa goe menu, wanga thëthëhmine pi së, nge tha aeatrëne ju së la itre mekuna së ngöne la götrane la u. Loi e tro pe sa tune la atr ka xomi loto, nge ka goeëne pala hi la gojenyi angeic.
Nemene la itre aja ngöne la götrane la u hnei eö hna troa iën, me aeatrën? Ka loi la troa huliwa i Iehova ngöne la drai ka pexej. Maine pena troa tro kowe la ketre ekalesia ka ajane la itre hna inine troa cainöj, göi troa cainöje ngöne la götrane hna ahnithe koi angatr. Maine pena troa tro kowe la ekalesia ka tha tru kö hnei qatre thup, me drikona. Maine ijiji eö fe hi troa hane kuca la ketre ne la itre huliwa cili, hane ju ithanatane memine la atre thupëne la sirkoskripsio i epun. Nge maine eö a ajane troa ixatua ngöne la itre xa götrane kö gaa nany, hnyingëne ju ka hape, ekaa la gaa aja ixatua. *
Mekune hi eö lo hna qaja ngöne Isaia 62:10? Hnene la angetre Iudra hna catre huliwa göi troa nyidrawane lo gojenyi ka troa xomi angatr kowe la zi angatr, matre hmaloi kowe la itre hlue Akötresie. Maine eö a kuca asë la hnei eö hna atrein göi troa huliwa i Akötresie, the nue pi kö la huliwa i eö. Tro Akötresieti a xatua eö troa aeatrëne la itre aja cili. Catre pi pe sipo Iehova la inamacan, göi troa elë hune la itre jol qëmeke i eö. Tro kö eö lai a öhne la aqane tro Nyidrëti a xatua eö troa ‘mekune la jëne la lue ca i ’ö.’—Ite edomë 4:26.