Xatuane Jë Troa Huliwane La Hna Atrein
“Tro ni a haji ’ö me alamekë eö.” —SAL. 32:8.
1, 2. Nemene la aqane goeëne Iehova la itre hlue i Nyidrëti isa ala cas?
AME la kola elo hnene la itre nekönatr, tre kola sesëkötr e itre xa ijine hnei keme me thin la nyidroti a öhne la itre ewekë hna atreine kuca hnene la ha nekö i nyidro. Ma ase fe hë epuni a hane öhne lai. Maine jë ka atreine elone la ketre elo la ketre, nge ka atreine dessin ketre, maine ka atreine ketre sipu akötrehnine pena ketre. Nge ame ju hi la keme me thin a öhne la hna atreine hnei ha kuku, tre madrine nyidro troa xatuane la ha nekö i nyidro troa huliwane hnyawane la atreine ka eje thei nyudren.
2 Ketre ame fe la Keme së, ene Iehova, tre ka hnehengazone me goeëne fe Nyidrëti la itre hlue i Nyidrë. Itre atr lai hna “ajane” hnei Nyidrë, ke itre ka nyipici, me mele nyipici koi Nyidrë. (Hag. 2:7) Ngo ma öhne jë fe epuni laka, isa hetrenyi thene la itre trejine me epuni la itre talan me itre hna atreine ka isapengön. Ame la itre xan, tre ka maca troa cile fë cainöj, ame itre xan, tre ka atreine thewe huliwa. Ame la itre xa Keresiano föe, tre canga atreine hi angatre inine la itre xa qene hlapa, me wange la itre wezipo, me hamë ithuecatre kowe la itre ka kucakuca. (Rom. 16:1, 12) Nge madrine catre së troa cememine la itre trejine me easë cili e hnine la ekalesia së.
3. Nemene la itre mekune hne së hna troa ce ithanatan?
3 Ame la itre xa Keresiano, ene lo itre xötre ka co me itre ka xötrei bapataiso, tre tha mama pala kö koi angatr la eloi angatr hnine la ekalesia. Tro sa xatua angatre tune kaa troa huliwane hnyawane la atreine ka eje thei angatr? Hnauëne laka tro sa nyitipu Iehova, me thele la itre hna atrein ka eje thene la itre trejine me easë?
ÖHNE KÖ IEHOVA LA LOI KA EJE THE SË
4, 5. Nemene la hnei Iehova hna öhne thei Gideona? Nemene la hna ini së hnene la pengö i Iehova cili?
4 Easa atre jëne la Tusi Hmitrötr ka hape, tha Iehova hmekuje kö a öhne la itre thiina ka loi ne la itre hlue i Nyidrë, ngo Nyidrëti mina fe a öhne la itre hna atrein ka eje thei angatr. Ka tui Gideona ekö, lo Iehova a ië angeice troa amele angetre Isaraela qaathene la ithupëjia me angatr, angetre Midiana. Gideona ekö a mekune ka hape, pëkö hnei angeice hna atrein; celë hi matre, angeic a goe catr la kola qaja hnene la angela ka hape: “Trahmanyi ka cate fe, eje kö Iehova thei ’ö.” Ame koi Gideona, tre tha “ka cate” kö angeic, nge thatreine kö angeice troa amelene la nöje i Akötresie. Ngo ketre pengöne kö la aqane goeë angeice hnei Iehova. Öhne hi Nyidrëti la atrein ka eje thei Gideona, nge atre hi Nyidrëti ka hape, ijije tro Nyidrëti a upi angeic troa amele angetre Isaraela.—E jë la Angete Amekötin 6:11-16.
5 Atre kö Iehova la atreine ka eje thei Gideona. Öhne hi Iehova la aqane nue asë hnei Gideona la trenge catre i angeic, göi troa lep me hnëkëne lo qitr. Hnene la itre ka eëny ekö hna lapaa majemine huliwa e kuhu trön. Ngo ame Gideona, tre hnei angeic hna hnëkëne la qitr hnine lo hnë wejeweje wene vin, matre tha tro ju kö a öhne me atrekënö la iqitre i angeic hnene la angetre Midiana. Öhne hnyawa hi Iehova ka hape, tha ka huliwane hmekuje kö Gideona la iwanakoime i angeic. Ngo ka hetrenyi mina fe thei angeic la wang atrehmekun, nge atreine angeice troa xome la itre mekune ka loi, matre troa triane la itre hulö. Itre ewekë lai hnei Iehova hna öhne thei Gideona, matre Nyidrëti pë hë a ini angeice jë.
6, 7. (a) Pine nemene matre isapengöne kö la aqane goeë Amosa hnei Iehova me angetre Isaraela? (b) Pine nemene matre lolo la aqane ië Amosa hnei Iehova?
6 Hetre hna atrein hnei Iehova hna öhne fe thei Amosa perofeta. Ame koi itre atr, tre ketre trahmanyi lai ka nango lapa thaup, nge ka pëkö enyipiewekën. Ame la itre huliwa hnei angeic hna kuca, tre ene la troa thupë mamoe, me eëny. Ngo hnei Iehova hna ië Amosa troa hajine lo treene lao tribu ne Isaraela ka tha hmi hmaca kö koi Nyidrë. Ma hnene jë la itre xa atre Isaraela hna mekune ka hape, tha loi kö troa upi Amosa. Pine nemen?—E jë la Amosa 7:14, 15.
7 Pine laka ka xulu Amosa qa ngöne la ketre nöje ka tha mama kö. Ngo ma drei mejene hë angeice la itre hna majemine kuca, memine la pengöne la itre joxu ne la itre nöj e cili ezin, jëne la itre atr ka saleme trootro, ka cili thenge ngöne la tribu i angeic. Nge ma atre fe hë Amosa la engazone la pengöne la nöje i angetre Isaraela. (Amosa 1:6, 9, 11, 13; 2:8; 6:4-6) Ka atreine Amosa ekö cinyany. Ngacama hmaloi hi la itre trenge ewekën, ngo ka jui pe la itre mekun. Tha xou i angeice kö troa jelengazo Amazia, lo atre huuj ka ngazo. Hatrene hi lai laka, meköti la aqane iëne Iehova la hlue i Nyidrë ka troa tro fë la maca i Nyidrë. Öhne hi Nyidrë thei Amosa la itre hna atrein laka pë fe kö thei itre xan.—Amosa 7:12, 13, 16, 17.
8. (a) Nemene la hnei Iehova hna qaja koi Davita? (b) Pine nemene laka, ithuecatre koi së la hna qaja ngöne Salamo 32:8?
8 Öhn asë hi Iehova la itre hna atrein hnene la itre hlue i Nyidrë, nge aja i Nyidrë troa xatua angatr asë troa huliwane hnyawane la atrein ka eje thei angatr. Öni Iehova koi Davita ekö ka hape, tro Nyidrëti a eatrongë angeic me hamëne koi angeice la itre eamo ka nyipi ewekë koi angeic. (E jë la Salamo 32:8.) Pine nemene laka ithuecatre lai koi së? Pine laka, ngacama easa mekune ka hape, tha ijiji së kö, ngo atreine kö Iehova troa xatua së. Ceitui Nyidrë memine la atre ini ka xatuane la ketre hnainin troa maca trootro, matre ini së troa huliwane hnyawane la atrein ka eje the së. Ame itre xa ijin, tre Nyidrëti a xatua së jëne hi la itre trejine me easë. Ngöne nemene götran?
THELE JË LA KA LOI THEI ITRE XAN
9. Tro sa “isa wange” tune kaa la itre hna atrein thene la itre trejine me easë?
9 Hnei Paulo hna ithuecatrene la itre Keresiano asë troa “isa wange” la itre hna atrein hnene la itre trejine me angatr. (E jë la Filipi 2:3, 4.) Kola hape ue lai? Kola hape, tro sa wang atrehmekune la itre hna atreine hnene la itre trejine me easë, me qaja aloin. Nemene la hne së hna dreng, la kola qaja aloinyi së? Easa ajane tro pala hi sa huliwa catr. Tune fe hi lai kowe la itre trejine me easë. Maine tro sa qaja aloine la itre hna kuca hnene la itre trejine me easë, tre tro hë lai a xatua angatre troa huliwa catr pala hi, me thele pala hi troa kuca aloine la huliwa i angatr koi Iehova.
10. Drei la hne së hna troa wang atrune catrën?
10 Aja së asë hi troa wang atrune la huliwa së hnei itre xan. The qaja pala ha la itre thöth, me itre ka xötrei xomi bapataiso. Celë hi lai ka troa xatua nyudreni troa mekune laka, ka nyipi ewekë fe nyudren e hnine la nöje i Iehova. Tusi Hmitrötr a ithuecatrene la itre trahmany troa xome la itre hnëqa ka tru. (1 Tim. 3:1) Ngo maine tha wang atrune kö së la huliwa i nyudreni, tro hë lai a apujene la aja i nyudren troa catre huliwa koi Iehova.
11. (a) Tune kaa la aqane xatuane la ketre thöth hnene la ketre qatre thup? (b) Nemene la hna ini së hnene la pengö i Julien?
11 Kola qaja hnei Ludovic, ketre qatre thup, ka hape, ame la easa wang atrune la ketre trejin, tre canga saqe hi angeice maca ngöne la huliwa. Ka tui Julien. Hnei Ludovic hna öhne thei Julien laka ka nango lapa pe hi angeic, nge ame la angeic a thele troa catre huliwa kowe la ekalesia, tre canga cile hnö ju hi angeic, ke angeic a mekune laka tha ijiji angeice kö. Ngo öni Ludovic ka hape: “Öhne hi ni, ka hape, ketre nekö trahmanyi ka loi thiina angeic, nge hetre aja i angeice troa ixatua.” Celë hi kepine matre, tha hnei Ludovic kö hna qaja angazo Julien, ngo hnei nyidrëti pe hna goeëne la itre thiina ka lolo thei Julien, me thuecatre i angeic. Ame hë la pun, tre hna aijijë Julien fe hë troa hane drikona, nge angeice fe a pionie lapa.
XATUANE JË TROA HULIWANE LA HNA ATREIN
12. Tro sa xatuane tune kaa la itre trejine me easë? Hamëne jë la ketre ceitun.
12 Maine easa ajane tro la itre trejin a huliwane hnyawane la atrein ka eje thei angatr, nyipi ewekë catr troa wang atrunyi angatr. Tha tro kö sa lapaa majemine wang la itre hnepe tria, me itre hna thatreine hnei angatr, ngo tro pe sa goeëne catrëne la itre thiina ka loi me itre hna atrein ka eje thei angatr. Celë hi lai hnei Iesu hna kuca koi Peteru. Ame lo xötrei, kösë lo tha ijije kö troa hane hamë hnëqa i Peteru. Ngo öhne kö Iesu la itre thiina ka loi angeic, celë hi kepine matre nyidrëti a qaja ka hape, tro angeic a tune la etë hut.—Ioane 1:42.
13, 14. (a) Nemene la aqane goeë Mareko ekö hnei Banaba? (b) Nemene la ixatua hna kapa hnei Alexandre qaathene la ketre qatre thup? (Wange ju la pane iatr.)
13 Tro pena sa ithanatane enehila la pengö i Banaba me Mareko. (Ite hu. 12:25) Qâ i Mareko ekö troa xatua Paulo me Banaba, me wange la itre ka nyipi ewekë koi nyidro, ngöne lo nyidroti a xötrei xome la huliwa ne mesinare. Ngo ame hë la angatr a xep e Pamafulia, tre Mareko hi lai a tro triji nyidroti pi. Paulo casi pë hë me Banaba, hna nuaxöj ngöne la ketre götrane gaa ngazo. (Ite hu. 13:5, 13) Nemene hë la aqane goeë Mareko hnei Banaba e thupen? Tha hnei Banaba kö hna wang atrune la itre tria i Mareko; hnei angeice pe hna goeëne la itre thiina ka lolo i Mareko. Tha hnei angeice kö hna mekune ka hape, tha ijiji Mareko kö. Hnei Banaba pe hna thei Mareko me ini angeic; nge ame hë e thupen, tre ketre Keresiano hë Mareko ka macaj. (Ite hu. 15:37-39) Itre macatre e thupen, Mareko hë a xatua Paulo e Roma, ngöne lo ijine nyidrëti e kalabus. Nge ame la Paulo a cinyanyi koi angetre Kolose, tre hnei nyidrëti fe hna hane qaja aloinyi Mareko. (Kol. 4:10) Easa pane mekune la etrune la madrine i Banaba, la Paulo hmaca a sipone tro Mareko a hane xatua nyidrë.—2 Tim. 4:11.
14 Hna hane xatuane fe la ketre trejin, ka qatre thupe hë enehila; Alexandre la ëjen. Öni angeic: “Ame ngöne lo itre macatre ka ase hë, jole catre koi ni troa thithi thatraqane la ekalesia. Ngo hnene la ketre qatre thup hna amamane koi ni la aqane tro ni a hnëkë, me triji xou. Tha hnei nyidrëti kö hna nue ni, ngo hnei nyidrëti pala hi hna sipo ni troa thithi pe ngöne la itre icasikeu ne cainöje trootro. Celë hi lai ka hamë trenge catre koi ni.”
15. Nemene la aqane amamane Paulo ka hape ka tru catre la itre trejine koi nyidrë?
15 Nemene la ewekë hnei epuni hna kuca, la epuni a öhne la itre thiina ka lolo thei itre xa Keresiano? Epuni kö a hane qaja aloinyi angatr? Ame ngöne Roma mekene 16, Paulo a wang atrune me qaja aloine la itre thiina ne lo ala 20 nge hetre munëne lao Keresiano, trahmanyi me föe. (Rom. 16:3-7, 13) Hnei Paulo hna qaja aloinyi Anedroniko me Iunia, pine la etrune la huliwa i nyidro koi Keriso, memine la aqane catre i nyidro. Hnei Paulo mina fe hna qaja aloine la thine i Rufo, pine la aqane hnimi nyidrë hnei eahlo.
Hnei Frédéric (götrane mi) hna thuecatrei Rico troa nyihlue i Iehova (Wange ju la paragarafe 16)
16. Nemene la thangan e tro sa hane qaja aloine la itre thöth?
16 Tro kö sa öhne la itre thangane ka loi, e hne së hna hane majemine qaja aloine la itre xan. Tro sa pane ce wange la pengö i Rico, ketre nekö trahmany ka mele e Faras. Tha ka hmi kö koi Iehova la kem, nge tha madrine kö Rico, pine laka tha ajane kö nyidrë tro angeic a xomi bapataiso. Ngo tha ajane kö Rico troa treqene la angeic a tru matre xomi bapataiso jë angeic. Nge kolo mina fe a akötrë Rico e koilo hna ini hnene la itre sine ini angeic, pine la hmi angeic. Eloine pe hnei Frédéric, ketre qatre thup, hna qaja aloinyi Rico, ke öni Frédéric ka hape, kolo lai a hetre icilekeu me angeic pine laka, ka catrecatr angeice cainöj. Hnene la itre ithanata ka lolo i Frédéric hna hamë trenge catre koi Rico, me uku angeice hë troa atreine ce mel memine la keme i angeic. Ame hë la pun, tre hnei Rico hna xomi bapataiso, nge 12 hi lao macatre i angeic.
Hnei Jérôme (götrane maca) hna thuecatre i Ryan troa hane mesinare (Wange ju la paragarafe 17)
17. (a) Tro sa xatuane tune kaa la itre trejine me easë troa hamën asë la itre hnei angatr hna atrein koi Iehova? (b) Hna xatuane tune kaa la itre xa nekö trahmanyi hnene la ketre mesinare? Nemene hë la thangan?
17 Maine tro pala hi sa qaja aloine la itre trejine me easë pine la itre ewekë ka loi hnei angatr hna kuca, tro pala hi angatre lai a hamën asë la itre hnei angatr hna atrein koi Iehova. Kola qaja hnei Sylvie, ketre trejine ka huliwa ngöne la Bethela e Faras ka hape, ka nyipi ewekë fe tro la itre Keresiano föe a hane qaja aloine la itre Keresiano trahmany. * Ame koi angeic, ke qâ i angeice fe hi lai. (Ite edomë 3:27) Ame itre xa ijin, hetre itre ewekë ka mama koi itre Keresiano föe, ngo tha hna öhne kö hnene la itre Keresiano trahmany. Celë hi kepine matre ame la kola qaja aloine la huliwa ne la itre Keresiano trahmany hnene la itre Keresiano föe, tre kolo lai a nyixane la itre ithuecatre hna hamëne hë hnene la itre Keresiano trahmanyi ka macaj. Hetre itre nekö trahmanyi e Guyane Française hna xatuane hnei Jérôme, ketre trejine ka mesinare. Öni nyidrë ka hape, ame la nyidrëti a qaja aloine la itre nekö trahmany pine la aqane cainöje i angatr, maine pine la ketre mekune hna hamëne ngöne la hna icasikeu, tre kösë lo hetre trenge catre i angatre jë hi, nge angatre fe a maca trootro ngöne la huliwa.
18. Nemene la eloine la troa ce huliwa memine la itre trejine trahmany ka co?
18 Tro fe la itre Keresiano a catr, e tro sa ce huliwa me angatr. Maine jë tro la ketre qatre thup a sipone kowe la ketre thöth Keresiano troa fejane qa ngöne lo sit jw.org, la itre xa ithuemacany ka nyipi ewekë kowe la itre xötre ka tru, nge ka pëkö ordinatör. Maine pena, troa sipo angeice troa nyidrawane maine nyihnyawane hmaca la ketre ewekë ka xeci e hnine la Uma Ne Baselaia. Maine ka ce huliwa epuni memine la itre xötre ka co, tro epuni a öhne e cili la itre hna atrein hnei nyudren, me qaja aloinyi nyudren, me drei nyudreni e hane qeje mekun.—Ite edomë 15:23.
MEKUNE KÖ LA ITRE DRAI ELANY
19, 20. Nemene la enyipiewekëne la troa xatuane la itre xan troa macaj?
19 Hnei Iehova ekö hna ië Iosua troa elemekene la nöje Isaraela. Ame ngöne la ijine cili, hnei Akötresieti hna upi Mose troa inin, me ‘hajin,’ me “thue cate” i Iosua. (E jë la Deuteronomi 3:28.) Ame enehila, tru catre la itre atr ka xötrei lö kowe la nyipi hmi. Nge nyipi ewekë troa hetre itre trejine trahmany ka elemekene la organizasio. Qa ngöne lai, qâ së asë hi troa xatuane la itre trejine trahmanyi ka co me ka xötrei bapataiso, troa huliwane hnyawane la atrein ka eje thei angatr. Ke jëne tro hi angatre lai a hetre aja troa huliwa koi Iehova ngöne la drai ka pexej, me “ateine troa ini.”—2 Tim. 2:2.
20 Atrein asë hi së troa ixatua ngöne la organizasio, ngacama ka sine ju hë së la itre ekalesia ka tru, nge ka tru hnei trejine trahmany ka macaj, maine ka sine pena hi së lo itre gurup. Ngo qâ së troa nyitipu Iehova me atreine goeëne la hna atrein ka ej thei itre xan.
^ par. 17 Hna saze la ëj.