“Tro Nyipunie a Anyipici Ni”
“Öni [Iesu] koi angat, ka hape . . .Tro nyipunie a anyipici ni . . . uti hë la cane la fene hnengödrai.”—ITE HU. 1:7, 8.
1. Drei lo “ate anyipicine ka nyipici me meköt”?
AME ngöne la kola kootrë Iesu hnei Ponetio Pilato, atre Roma nge gavena i angetre Iudra, tre, catrecatre Iesu, ke, tha hnei nyidrëti kö hna cile troa qaja kowe la gavena, ka hape: “Hna hnaho ni thatraqane lai, nge traqa ni e celë fene thatraqane lai, mate tro ni a anyipicine la nyipici.” (E jë la Ioane 18:33-37.) Itre macatre thupen, hnei Paulo aposetolo hna hë Iesu ka hape, atre anyipicin, atre “ulatine la amamane ka loi qëmeke i Ponetio Pilato.” (1 Tim. 6:13) Easa melëne la ketre fene hna musinëne hnei Satana nge hna jilapane hnene la imethinë. Maine easa ajane tro pala hi sa anyipicin maine cainöj, nyipi ewekë tro sa catre tui Iesu, “ate anyipicine ka nyipici me meköt.”—Hna ama. 3:14.
2. Nemene la aliene la ëje i Iesu, nge nemene la hnei nyidrëti hna kuca matre troa kepe angetre Iudra hmaca hnei Iehova?
2 Hna hëne asë hi la itretre Iudra ka hape itretre anyipici Iehova, ngo Iesu kö la atre anyipicine ka sisitria. (Is. 43:10) Qëmekene troa hnaho Iesu, hnene la ketre angela hna qaja koi Iosefa, keme ka hia nyidrë ka hape: “Tro eö a ati atesi anganyidë Iesu ; ke tro anganyidëti a amelene la nöjei ate i anganyidë qa ngöne la nöjei ngazo i angat.” (Mat. 1:20, 21) Ame la aliene la ëje i Iesu qene Heberu, tre, “Iehova La Iamele.” Iehova a troa amelene la nöjei atr qa ngöne la ngazo me mec, jëne Iesu. Hnei Iesu hna qaja kowe la itretre Iudra ka hape nyipi ewekë tro angatr a ietrane la itre ngazo i angatr matre troa kepe angatre hmaca hnei Iehova. (Mat. 10:6; 15:24; Luka 19:10) Hnei nyidrëti hna cainöjëne la Baselaia i Akötresie. Öni Mareko: “Iesu a ithuëti Galilaia eë, kola cainöjëne la maca ka loi Akötesie, ka hape, eatë hë la hmekun, nge eashenyi hë la Baselaia i Akötesie ; ietraju nyipunie, me kapa la maca ka loi.” (Mar. 1:14, 15) Catrecatre Iesu ngöne la nyidrëti a cainöj. Goi amekötine fe nyidrë la itre tane la hmi angetre Iudra, celë hi kepine lai matre angatr a humuthi Iesu.—Mar. 11:17, 18; 15:1-15.
“ITE HULIWA KA MENE I AKÖTESIE”
3. Nemene la ewekë ka traqa ngöne la hnaakönine drai thupene la hna humuthi Iesu?
3 Köni drai thupene la hna humuthi Iesu, hetrenyi la ketre ewekë ka tru ka traqa. Hnei Iehova hna amele nyidrëti hmaca, tha ngöne ngönetrei ne atr kö, ngo ceitu me u. (1 Pet. 3:18) Hnei Iesu hna anyipicine kowe la itretre drei nyidrë ka hape, ase hë amele nyidrëti hmaca. Hnei nyidrëti hna xome la ngönetrei ne atr matre troa iamamanyi koi angatr. Ame la drai thupene la hna amele nyidrëti hmaca, afaifi lao iamamanyi nyidrë kowe la itretre drei nyidrë ka ala nyim.—Mat. 28:8-10; Luka 24:13-16, 30-36; Ioane 20:11-18.
4. Nemene la ewekë ka traqa ngöne la Iesu a iamamanyi kowe la itretre drei nyidrë, nge nemene la hnei nyidrëti hna ahnithe koi angatr?
4 Ame ngöne la hna afaifine iamamanyi Iesu, tre, hmekune lo kola icasikeu hnei ange aposetolo me itretre drei nyidrë. Hnei nyidrëti e cili hna xatua angatre troa trotrohnine ka hape, ase hë qaja amë ngöne la Itre Hna Cinyihan, laka troa meci me amele nyidrëti hmaca. Ame ngöne la kola nyipune la icasikeu cili, tre, hnei Iesu hna qaja kowe la itretre drei nyidrë la nyine tro angatr a kuca. öni nyidrë, “troa cainöjëne ngöne la nöjei nöje asë qan’ e Ierusalema, la ietra me troa nue tije la ngazo ngöne la ëje i nyidë.” Thupene lai, nyidrëti a ahnithe koi angatre ka hape: “Nyipunieti pe hi la angete anyipicine la nöjei ewekë cili.”—Luka 24:44-48.
5, 6. (a) Drei la hna troa anyipicine hnene la itretre drei Iesu? (b) Nemene la hna troa anyipicine hnene la itretre drei Iesu?
5 Fotre lao drai thupen, ngöne lo kola iamamanyi tixenuë hnei Iesu, hna trotrohnine hnei ange aposetolo lo hnei nyidrëti hna ahnithe koi angatr. Öni nyidrë: “Tro nyipunie a anyipici ni e Ierusalema, me Iuda asë, me Samaria, nge uti hë la cane la fene hnengödrai.” (Ite hu. 1:8) Ame la itretre drei nyidrë, tre kolo angetre Isaraela, laka itretre anyipici Iehova hë angatr. Tro hë angatre enehila a Anyipici Iesu fe. Kola hapeue lai?
Tune lo itretre drei Iesu ekö, easë fe a hane qaja koi itre atr la aja i Iehova kowe la itre drai elany (Wange ju la paragarafe 5, 6)
6 Tro hë angatr a qaja trongëne ka hape, Iehova hë a amelene la nöjei atr jëne Iesu. Jëne iamele lai ka sisitria kö hune la aqane amele angetre Isaraela ekö hnei Iehova. Ijije hë troa thapa la itre atr qa ngöne la ngazo me mec, hnene la mec me melehmaca i Iesu. Ame la kola iëne hnei uati hmitrötr la itretre drei Iesu lo Penetekos macatre 33, angatre hi lai a nyiqaane cainöjëne maine anyipicine “la ite huliwa ka mene i Akötesie.” Ala nyimu la itre ka ietra me lapaune kowe la mele hna huujëne hnei Iesu, thupene la hnei angatre hna drenge la maca cili. Hetre hnëqa i Iesu hë e hnengödrai ka hnyipixe, nge jëne nyidrë, Iehova a amelene la itre thauzane lao atr e celë fen.—Ite hu. 2:5, 11, 37-41.
“THUPENE MELE NE LA NÖJEI ATE KA KÖSAU”
7. Nemene la hna amamane hnene la itre ewekë ka traqa ekö lo Penetekos macatre 33?
7 Kola mama jëne lo itre ewekë ka traqa ngöne lo Penetekos macatre 33 ka hape, hnei Iehova hna kapa la mele hna huujëne hnei Iesu, ene lo thupene mel ka nyipi ewekë matre troa thapa la itre atr qa ngöne la ngazo. (Heb. 9:11, 12, 24) Hnei Iesu hna qaja ka hape, traqa ha nyidrë troa “hamëne la mele i [nyidrë] nyine thupene mele ne la nöjei ate ka kösau.” (Mat. 20:28) Hapeu, angetre Iudra hmekuje hi la ka troa kepe thangane la thupene mele cili? Ohea, thupene mele “la ate geigeietine [xometrije] la ngazo ne la fene hnengödrai.” Akötresie “lo ate ajane la nöjei ate asëjëihë troa mele.”—Ioane 1:29; 1 Tim. 2:4-6.
8. Hna aijijëne tune kaa la itretre drei Iesu ekö troa anyipici nyidrë, nge nemene la hnei angatre hna kuca?
8 Hnene la itretre drei Iesu ekö hna catre anyipici nyidrëti pala hi. Hna tune kaa? Tha hnene kö la sipu trenge catre i angatr, ngo hnei angatre pe hna sipo Iehova la uati hmitrötre i Nyidrë matre troa hamëne la trenge catre ka ijije koi angatr. Celë hi matre angatre pala hi a catre cainöj, me anyipicin. (E jë la Ite Huliwa 5:30-32.) Thupene la 27 lao macatre ne anyipici Iesu hnene la itretre dreng, hnei angatre hë hna cainöjëne la “wesi ula ka nyipici ne la maca ka loi” kowe la angetre Iudra me koi angetre Ethen me “kowe la nöjei ate asëjëihë e celë fen.”—Kol. 1:5, 23.
9. Tune lo hna ahnithe hë, nemene la ewekë ka traqa kowe la ekalesia i Keresiano?
9 Ngazo pe, kola tro la itre drai, nge kolo ha nyiqaane hamëne hnene la itre atrene la ekalesia la itre ini ka thoi. (Ite hu. 20:29, 30; 2 Pet. 2:2, 3; Iuda 3, 4) Ame hë e thupen, kola apoizinëne la ekalesia hnene la itre ka hamëne la itre ini cili. Ase hë Iesu lo ahnithe ka hape, tro pala hi a kökötre la iamenumenu uti hë la “hneijin ne kola troa nyipune la fen.” (Mat. 13:37-43, MN) Ame ngöne lo Okotropa 1914, hnei Iehova hna acili Joxu Iesu hune la fen asë. Qaane ju hi lai, kolo hi a nyiqaane lo “itre drai hnapin” ne la fene i Satana.—2 Tim. 3:1.
10. (a) Nemene macatre la hna cainöjëne hnene la itre hna iën? (b) Nemene la ewekë ka traqa ngöne la Okotropa 1914, nge hne së hna atre tune kaa?
10 Qëmekene lo Okotropa 1914, kola e la 30 lao macatre nge hetre munën hna xome hnene la itre hna iën troa cainöjëne ka hape, troa musi ngöne la macatre cili la Baselaia i Akötresie. Angatre a trotrohnine lai jëne la hna waipengöne hnyawa lo hna perofetane hnei Daniela. Kola qaja la sinöe atraqatr hna thupa, nge thupene lai, kola cia hmaca thupene la “sevene lao ijin [macatre].” (Dan. 4:16) Kolo ijine lai hnei Iesu hna qaja ka hape, “ijine i angete ethen.” Nyidrëti a amexeje lai ngöne lo nyidrëti a qaja la ketre hatren ka troa xatuane la itretre drei nyidrë troa atrehmekune laka, Joxu hë nyidrë, nge nyiqaane hë la itre drai ne la pun. Ame lo itre ewekë ka traqa qaane lo 1914, tre, itre ej a anyipicine hnyawane ka hape, Joxu hë Iesu. (Mat. 24:3, 7, 14; Luka 21:24) Ngöne la “ite huliwa ka mene i Akötesie” hne së hna cainöjën enehila, tre, easë fe a hane qaja lo Iehova a acili Iesu Joxu ne la Baselaia lo 1914.
11, 12. (a) Nemene la ewekë ka traqa lo 1919? (b) Nemene la ewekë ka mama hnyawa lo 1935? (Wange ju la pane iatr.)
11 Ame lo 1914, ngöne lo kola acili Iesu Keriso Joxu, nyidrëti ha thapa la itre hna iëne qa hnine la “Babulona Atraqat,” ene lo hmi ka thoi. (Hna ama. 18:2, 4) Ame lo 1919, thupene lo Pane Isi Ka Tru, pë hmaca kö ka sawa la itre hna iën troa cainöj e cailo fen. Hnei angatre hna anyipicine la emenene la thupene mel, memine la maca ka loi ne la Baselaia i Akötresie. Ame hë la thangane lai, nyimutre catre la itre atr ka atre la nyipici, nge hna ië angatre troa hane ce mus me Keriso e koho hnengödrai.
12 Ame lo 1935, mama hnyawa ha laka, ase hë Keriso nyiqaane iacasinekeune la “ite xa mamoe” i nyidrë. Ame enehila, itre milio la etrune la itre mamoe cili e cailo fen. Ce angatr memine la itre hna iën, angatr a xötrethenge la tulu i Iesu, me hane anyipicine kowe la itre atr. Itre xa mamoe fe a hane lapaune kowe la mele hna huujëne hnei Iesu, nge sipu jëne mele hi lai koi angatr. Atre hnyawa hi angatre ka hape, maine tro angatr a cile huti ngöne la huliwa ne anyipicin, me amadrinë Iehova hnene la aqane mele i angatr, tro hë angatr a mele pe qa ngöne la “aköte atraqat” me mele ngöne la fene ka hnyipixe i Akötresie.—Ioane 10:16; Hna ama. 7:9, 10, 14.
‘CATRE PI QAJA LA MACA KA LOI’
13. Nemene la aja ka catre the së, Itretre Anyipici Iehova, nge nemene la aqane tro sa nyitipune lo itre pane Keresiano?
13 Ketre manathith ka tru koi së troa anyipicine kowe la itre atr la “ite huliwa ka mene” hnei Iehova hna kuca ha, me itre hnei Nyidrëti hna thingehnaeane thatraqane la itre drai elany. Nyipici laka, tha ka hmaloi kö troa kuca pala hi la huliwa cili. Itre atr a thipetrije me akötrë së hnene la maca hne së hna tro fë. Loi e tro sa nyitipu Paulo me itre sine ce huliwa i angeic. Öni angeic: “Catepi hë huni thupene lai göi Akötesi shë troa qaja koi nyipunie la maca ka loi Akötesie memine la aköte atraqat.” (1 Thes. 2:2) Haawe, nyipi ewekë tro sa catre mele thenge la hne së hna sisinyi koi Iehova. Epi tro pala hi sa Itretre Anyipici Iehova uti hë la troa apatrene epine palua la fene i Satana. (Is. 6:11) Thatreine kö tro sa cile hut, e hne së hna mejiune kowe la sipu trenge catre së. Tune lo itre pane Keresiano, nyipi ewekë tro sa sipo Iehova la uati hmitrötre i Nyidrë matre hetrenyi fe së la “etrune la men.”—E jë la 2 Korinito 4:1, 7; Luka 11:13.
14, 15. (a) Ame ngöne la hneijine i itre pane Keresiano, nemene la hna kuca koi angatr, nge nemene la aqane thuecatre i angatre hnei Peteru? (b) Nemene la nyine tro sa mekun, e traqa ju akötrë së pine laka itretre anyipici Iehova së?
14 Itre milio enehila la itre atr ka qaja ka hape, itre Keresiano angatr, ngo angatre pe a kuca la hna sisine hnei Akötresie, nge tha hna kepe angatre kö hnei Nyidrë. (Tito 1:16) Ame ngöne la hneijine i itre pane Keresiano, nyimutre la itre atr ka tha nyihlue i Akötresieti kö thenge la aja i Nyidrë. Hna xele ma wange la itre nyipi Keresiano ngöne la ijine cili. Hnei Peteru hna thuecatrene la itre Keresiano cili, me hape: “Maine qaja angazo nyipunie pine la atesiwa i Keriso, manathithi hë nyipunie.” Pine nemene matre hetre madrine i angatre pala hi? Pine laka, hna kepe angatre hnei Akötresie, nge eje thei angatre la uati hmitrötre i Nyidrë.—1 Pet. 4:14.
15 Hapeue la Itretre Anyipici Iehova enehila, hna “qaja angazo [angatr] pine la atesiwa i Keriso”? Eje hi, hna qaja angazo angatr, ke, angatre fe a hane anyipici Iehova, me qeje Iesu, me cainöjëne ka hape, Joxu hë nyidrë ngöne la Baselaia i Akötresie. Hna akötrë Iesu fe, pine laka, ketre atre anyipici Iehova nyidrë. Öni nyidrëti kowe la itre ka icilekeu: “Traqa ha ni ngöne la atesi Angakaka, nge tha kepe ni kö hnei nyipunie.” (Ioane 5:43) Haawe, e akötrë epuni jë fe pine la hnei epuni hna anyipicin, mekune pala kö laka, Akötresieti a kepe epun, nge eje thei epuni la uati hmitrötre i Nyidrë.
16, 17. (a) Nemene la mekuna ne la itre hlue i Iehova e cailo fen göne la huliwa ne cainöj? (b) Nemene la aja ka catre the së?
16 Ketre, tha tro kö sa thëthëhmine laka, nyimutre la itre atr e cailo fen ka hane lö kowe la nyipici. Ame ngöne la huliwa ne cainöj, ke, ngacama isa nöje kö hna mele ngön, nge hetrenyi la itre götrane hna kuca lapan, ngo hetrenyi pala hi la itre atr ka ajane troa drenge la maca së ka lolo. Celë hi matre e öhne jë së la itre atr ka hetre hni ne ajan, loi e tro sa bëeke me thele troa inine la Tusi Hmitrötre me angatr. Ame hë e cili, easa xatua angatre troa atre Iehova matre tro fe angatr a hane nue la mele i angatre koi Nyidrë, me xome fe la bapataiso. Nemene la hnei epuni hna hane mekune ngöne la epuni a kuca la huliwa cili? Hna qaja hnei Sarie qaa Afirik, ka nyihlue i Iehova a 60 hë lao macatre, ka hape: “Atraqatr la madrineng troa atre ka hape, jëne la mele hna huujëne hnei Iesu, ijije hi tro ni a hane imelekeu hnyawa me Iehova, Atre Musi e hnengödrai me e celë fen, nge madrine fe ni troa hane qaja trongëne la ëje i Nyidrë ka lolo.” Hnei eahlo me Martinus, föi eahlo hna xatuane la köni nekö i nyidro memine fe la itre xa atr troa hane nyihlue i Iehova. Öni eahlo hmaca jë: “Pëkö ketre huliwa ka tune lai ka hamë madrine ka tru, nge jëne la uati hmitrötre i Iehova, Nyidrëti a hamëne koi së la trenge catre hne së hna ajane matre troa catre xome la huliwa cili ka iamele.”
17 Hna bapataiso së ju hë maine tha hna bapataiso së pena, ngo loi e tro pala hi sa olene la manathith ka eje the së, ene la troa cas memine la Itretre Anyipici Iehova. Haawe, catre pi së troa ce anyipicine memine la itre hlue i Nyidrë e cailo fen, me catre thupëne matre tha tro kö a adronyi së hnene la fene i Satana. Maine tro sa ujë tune lai, tro hë sa atrune la Akötresi së hne së hna nyi trenge ewekën, Iehova Tretretro së ka ihnimi e koho hnengödrai.