1, 2. (a) Nemene la aliene la troa ketre atre anyipicin, nge nemene la hna tha kuca hnene la itre nuvel ne fen? (b) Pine nemene matre tha nyipi ewekë kö koi Iehova troa xome la itre nuvel ne fen matre troa anyipici Nyidrë?

 NEMENE la aliene la troa ketre atre anyipicin? Hna qaja hnene la ketre diksioner ka hape, ame la atre anyipicine, tre, “ketre atr ka öhne la ketre ewekë ka traqa, me qajaqaja la ewekë cili.” Ngöne la Götrane Ailojë Ne Afirik, hna hëne la ketre zonale ka 160 hë lao macatre ka hape, Atre Anyipicin. Ketre ëje lai ka loi hi, pine laka hna kuca lai zonal göi troa qajaqaja hnyawa la itre ewekë ka traqa. Hna sisinyi hnene la atrekë zonalen ka hape, tro eje a qaja “la nyipici, nge nyipici hmekuje hi.”

² Ngazo pe, tha hnene kö la itre nuvel ne la fen hna qajaqaja hnyawa la itre ewekë ka traqa, nge nanyi pala ha lai troa hane qaja la nyipici göi Akötresie, me itre ewekë hnei Nyidrëti hna kuca. Ngo, ame Iehova kapucatine asë e koho hnengödrai me e celë fen, tre, tha nyipi ewekë kö koi Nyidrë troa xome la itre nuvel matre troa anyipici Nyidrë. Öni Akötresieti koi Ezekiela perofeta: “Tro ite ethen’ a ate laka ini Iehova.” (Ezek. 39:7) Hetrenyi Iehova la eitre milio la etrune la itre atr ka anyipici Nyidrë e cailo fen. Angatre a qaja kowe la itre atr la itre hnei Akötresie hna kuca thatraqane la nöje i Nyidrë ekö me enehila. Angatre fe a qaja la itre ewekë ka mingöminge hnei Nyidrëti hna thingehnaeane thatraqane la itre drai elany. Kola qaja ngöne Isaia 43:10 ka hape: “Nyipunie la itete anyipici ni, öni Iehova, nge hluenge lo hnenge hna iën.” Ame ngöne la easa cainöje trootro, celë hi huliwa lai ka sisitria catre ngöne  la mele së, nge easë hi lai a amamane ka hape, Itretre Anyipici Iehova së.

3, 4. (a) Eue la kola nyiqaane hëne la itretre ini tusi hmitrötr ka hape, Itretre Anyipici Iehova, nge nemene la mekuna i angatr göne la ëje ka hnyipixe cili? (Wange ju la pane iatr.) (b) Nemene la lue hnyinge hne së hna troa ce ithanatan?

³ Tro pala hi a cile hut epine palua la ëje i Iehova, ke, Nyidrëti la “Joxu ka eje palua kö.” Ketre, öni Nyidrëti fe: “Celë hi ëjenge epine palua, nge celë hi nyine meku ni ngöne la nöjei xöt.” (1 Tim. 1:17; Eso. 3:15; nge pane wange ju fe la Ate Cainöj 2:16.) Kola atrunyi së la kola hë së hnene la ëje i Iehova. Ame lo 1931, kola madrine hnene la Itretre Ini Tusi Hmitrötr la angatre a nyiqaane xome la ëj, Itretre Anyipici Iehova. Nyimutre la itre ka cinyanyi göi troa fe amamane la ole i angatre kowe lai hna amekötine cili. Hnene la ketre ekalesia ne Kanada hna cinyanyi ka hape, jëne la ëje i angatre ka hnyipixe celë, kola thuecatre i angatre troa amadrinë Iehova hnene la aqane mele i angatr.

⁴ Tro sa amamane tune kaa ka hape, ka tru koi së troa hë së ka hape, Atre Anyipici Iehova? Ketre, ijije kö tro epuni a qaja la kepine matre hë së jë hnei Iehova ka hape, Itretre Anyipici Nyidrëti së, tune la hne së hna e ngöne la tusi Isaia?

5, 6. (a) Nemene la aqane anyipici Iehova hnene la keme me thin ne Isaraela? (b) Nemene fe la nyine tro la keme me thin ne Isaraela a kuca, nge pine nemene matre tro fe la keme me thin enehila a kuca tun?

⁵ Hnei Iehova hna iëne la nöje Isaraela matre troa Itretre Anyipici Nyidrë. Qa i angatr isa ala cas troa anyipici Nyidrë. (Is. 43:10) Drei la ketre ceitun, tro la itre keme me thin a anyipicine kowe la itre nekö i angatr, ene la troa qaja koi angatre la itre ewekë ka tru hnei Iehova hna kuca ekö. Hnei Iehova hna amekötine kowe la itre keme me thin troa qeje pengöne la Paseka kowe la itre nekö i angatr. Öni Nyidrë: “Nge e troa qaja koi nyipunie hnei ite nekö i nyipunie, ka hape, Nemene la huliwa i nyipunieti celë ? Tro nyipunieti a sa, ka hape, Celë hi huje paseka koi Iehova lo ate tro shashaithe la ite uma ne la nöjei nekö i Isaraela e Aigupito, ngöne lo hnei nyidëti hna  lepi angete Aigupito, me amelene la ite lapa shë.” (Eso. 12:26, 27) Hnene la itre keme me thin hna qaja ekö koi nyudren ka hape, hnei Farao hna xele ma nue la angetre Isaraela kowe la hnapapa matre troa hmi koi Iehova. Öni Farao: “Dei Iehova ma tro ni a denge la aqane ewekë i nyëne troa nue angete Isaraela ?” (Eso. 5:2) Hnene mina fe la itre keme me thin hna qaja kowe la itre nekö i angatr la hnei Iehova hna sa koi Farao, me aqane amamane Nyidrë ka hape, Ka Pucatinasë Nyidrë. Hnei Nyidrëti hna lepi Aigupito hnene la treene lao akötr, me amelene la angetre Isaraela qa ngöne la itre soce i angetre Aigupito ngöne la Hneopegejë Ka Palulu. Hnene la angetre Isaraela hna öhne hnyawa e cili ka hape, Iehova hi la nyipi Akötresie, nge ka eatrëne pala hi Nyidrë la hnei Nyidrëti hna thingehnaean.

⁶ Ame kowe la angetre Isaraela, tre ketre manathith ka tru la troa anyipici Iehova. Hnei angatre hna ce ithanatane memine la itre nekö i angatre me itre hlue i angatre la itre ewekë ka mingöming hnei Iehova hna kuca. Ketre, atre hnyawa hi la angetre Isaraela ka hape, nyipi ewekë tro pala hi angatr a hmitrötre me wië la aqane ujë i angatr. Öni Iehova: “Hmitöteju nyipunie ; ke hmitöte ni Iehova Akötesi nyipunie.” Tro la itre keme me thin ne Isaraela a inine la itre neköi angatre troa hmitrötr, ene la troa mele thenge la itre hna amekötine hnei Iehova. (Lev. 19:2; Deu. 6:6, 7) Tro fe la itre keme me thin enehila a hane kuca tun. Tro angatr a inine la itre nekö i angatre matre tro fe nyudreni a hane atrune la ëje i Akötresie!—E jë la Ite Edomë 1:8; Efeso 6:4.

7. (a) Ame la kola drengethenge Iehova hnene la angetre Isaraela, nemene la hna öhne hnene la itre nöje ethen? (b) Nemene la qa ne la nöjei ka nyi trenge ewekë Iehova?

⁷ Ame la kola drengethenge Akötresie hnene la angetre Isaraela, Nyidrëti a amanathithi angatr. Öhne hnyawa hi hnene la itre nöje ethen ka lapa xötreithi angatr ka hape, Iehova a thupëne la nöje i Nyidrë. (Deu. 28:10) Ngazo pe, anyimua tha idrei hnene la angetre Isaraela. Hnei angatre hna thili kowe la itre idrola, me itre haze ne Kanana ka iakötrë. Hane jë fe hi angatre tune la itre haze cili. Hnei angatre hna huujëne la itre sipu neköi angatr, me qanangazone la itre puafala. Hetre ketre ini ka tru hne së hna xome qa ngöne la tulu ka ngazo i angatr. Nyipi ewekë tro sa nyitipu Iehova, me hmitrötr, ke, easa nyi trenge ewekë i Nyidrë, Atre Hmitrötre Ka Sisitria.

8. Nemene la hnei Iehova hna upi Isaia troa kuca, nge nemene la hna kuca hnei Isaia?

⁸ Hnei Iehova, jëne Isaia, hna thuemacane la angetre Isaraela ka hape, tro Nyidrëti a lepe apatrenyi Ierusalema, traone ka tru i angatr, me nue troa apon la nöje i Nyidrë. Hnei Iehova fe hna qaja amë ka hape, tro Nyidrëti a kuca la ketre “ewekë ka hnyipixe,” me thepe angatre qa hna po. (Is. 43:19) Atre hnyawa hi Iehova ka hape, itre tha ka tro kö a ietra la angetre Isaraela, ngo hnei Nyidrëti hna upi Isaia matre tro pala hi angeice a thuemacanyi angatr. Ame la pane sikisi lao mekene la tusi Isaia, tre, nyine thuemacanyi angatre la aqane troa lepe apatrenyi Ierusalema. Aja i Isaia troa atre ka hape, uti hë eue la troa tha drei Iehova hnene la nöj. Öni Akötresie: “Uti hë pë hë wene la ite lapa, nge pë hë ate lapan’ it’ ej, nge pë hë ate ngöne la ite uma; nge pë pe wene la nöj.”—E jë la Isaia 6:8-11.

9. (a) Eue la kola eatre la hna perofetane hnei Isaia göi Ierusalema? (b) Nemene la ithuemacanyi nyine tro sa wangatrune enehila?

⁹ Traqa koi 46 lao macatre ne thuemacanyi angetre Isaraela hnei Isaia göi troa lepi Ierusalema. Hnei angeice hna nyiqaane perofetane lai ngöne la macatre tixenuë ne musi Uzia Joxu, lo 778 uti hë lo 732 qëmeke i Keriso, ngöne la ijine musi Hezekia Joxu. Thupene lai, hnei Iehova hna thuemacane la nöje i Nyidrë uti hë lo 607 qëmeke i Keriso, ijine kola lepi Ierusalema. Haawe, nyimu macatre qëmekene troa eatre lai hna perofetan, hna  thuemacanyi angetre Isaraela ha. Ame enehila, Iehova a thuemacane la itre atr jëne la itre hlue i Nyidrë göne la itre ewekë ka troa traqa elany. Ame ngöne la itre macatre, hnene la Ita Ne Thup hna thuemacane la itre atr ka hape, easenyi hë matre patre pi la mus i Satana e celë fen, nge tro pë hë Keriso a musi e cailo fen asë.—Hna ama. 20:1-3, 6.

10, 11. Nemene la aqane anyipicine angetre Isaraela ngöne la angatr a öhne e Babulona la aqane eatre lo hna perofetane hnei Isaia?

¹⁰ Hna mele pë hë hnene la itre xa angetre Iudra ngöne lo kola lepi Ierusalema. Hnei angatre hna drengethenge la itre hna amekötine hnei Iehova, ene la troa nue angatre kö koi angetre Babulona matre troa aponyi angatr. (Iere. 27:11, 12) Semitre lao macatre thupen, kola anyipicine hnene la itre xan e angatr la aqane eatre la ketre hna perofetane hnei Isaia, kola hape: “Dei la hna ulatine hnei Iehova, ate itö nyipunie, Kahmitöte i Isaraela, hnenge hna upe Babulona eë göi nyipunie, me thenge la ite po angat’ asëjëihë.”—Is. 43:14.

¹¹ Nyine haine la aqane eatrëne Iehova la hna perofetane celë. Ame la ketre jidri ne Okotropa 539 qëmeke i Keriso, hna feet hnene la joxu i angetre Babulona memine la itre tane la nöj matre troa atrune la itre haze i angatr. Hnei angatre hna ijine la itre ge hna ënö qa ngöne la ēnē i Iehova. Ngo ame ju fe kö la jidri cili, hna traqa hnei Koreso Joxu me itre soce i angeic troa lepi Babulona. Angatre pë hë a musinëne jë la traone me thapa asë la nöje Babulona. Lue macatre thupene lai, Koreso a amekötine kowe la angetre Iudra troa bëeke Ierusalema eë me acile hmaca la ēnē. Hnei Iehova hna thupë angatr, ngöne la itre jëne tronge i angatr; matre eatre ju kö lo hna perofetane hnei Isaia. Ame la kola öhne hnene la nöje i Akötresie laka cile hmaca ha la ēnē, angatre hi lai a anyipicine jë laka, Iehova hi la nyipi Akötresie, nge ka eatrëne pala hi Nyidrë la hnei Nyidrëti hna thingehnaean. Hnei Akötresie hna hëne la itre ka bëeke Ierusalema eë ka hape, ‘nöje hnenge hna xupe thatraqai ni, tro angatr a amamane la lolong.’—Is. 43:21; 44:26-28.

12, 13. (a) Nemene la ewekë ka traqa lo kola bëeke hnei angetre Isaraela troa acile hmaca la ēnē? (b) Nemene la manathith ka eje thene la “ite xa mamoe,” nge nemene la hnei angatre hna lapa treqen?

¹² Ame la kola bëeke hnei angetre Isaraela troa acile hmaca la ēnē, itre thauzane lao trenyiwa ka ce tro me angatre troa nyihlue i Iehova. Ame hë e thupen, itre xa trenyiwa hmaca kö a hane ce hmi me angatr. (Ezera 2:58, 64, 65; Esetera 8:17) Ame enehila, itre hna iën la nöje i Akötresie, ene la “Isaraela i Akötesie” nge “ka ala nyimu atraqat” la “ite xa mamoe,” angatr a traqa ne troa hane ce nyihlue i Iehova memine lo itre hna iën. (Gal. 6:16; Hna ama. 7:9, 10; Ioane 10:16) Manathithi ka tru kowe la itre hna iën me itre xa mamoe troa hane hë angatre ka hape, Itretre Anyipici Iehova.

 ¹³ Ame ngöne la fene ka hnyipixe, hetre hna troa kuca hnene la ka ala nyimu atraqatr. Tro angatr a qaja kowe la itre hna amelene hmaca la pengöne la mele ne la Atre Anyipici Iehova, ngöne la itre drai ne la pun ne la fene i Satana. Celë hi matre nyipi ewekë tro pala hi a hmitrötre la thiina së. Ngacama easa catre thele troa trongëne la itre hna amekötine hnei Iehova, ngo easë pala hi a tria e nöjei drai. Celë hi matre loi e tro pala hi sa sipone koi Iehova troa nue la itre ngazo së. Maine tro pala hi së a thele troa hmitrötre la thiina së, easë hi lai a amamane la hni ne ole së koi Iehova qa ngöne la hnei Nyidrëti hna aijijë së troa nyi trenge ewekë i Nyidrë.—E jë la 1 Ioane 1:8, 9.

14. Nemene la aliene la ëje i Iehova?

¹⁴ Maine easa ajane troa trotrohnine hnyawane la manathith ka eje the së, ene la troa hë së hnene la ëje i Iehova, nyipi ewekë tro sa atre la alien ej. Ame la ëje i Iehova, tre, ka xulu qa ngöne la hnaewekë qene Heberu hna hape, “ka ej.” Ame la aliene la ëje i Akötresie, tre kola hape, “Ka Aejëne Nyidrë.” Iehova a xome la ëje cili, ke, Nyidrëti a ajane tro sa atre la pengöi Nyidrë. Nyidrëti la Atre xupe la nöjei ewekë asëjëihë. Ketre, ame la Iehova a qaja ka hape, tro Nyidrëti a kuca la ketre ewekë, pëkö ka atreine troa sewe Nyidrë, goi thatreine fe Satana.

15. Qa ngöne la hnei Iehova hna qaja koi Mose, nemene la hne së hna trotrohnine göne lo ëje i Nyidrë?

¹⁵ Tru catre kö la hnei Iehova hna qeje pengöne la aliene la ëje i Nyidrë koi Mose. Ame la Iehova upi angeice troa thapa la nöje i Nyidrë qaa Aigupito, öni Nyidrë koi Mose: “Eje kö Ni Ngöne La Hnenge Hna Mekune Troa Ej.” Öni Iehova hmaca jë: “Tro eö a qaja tune la kowe la nöjei nekö i Isaraela, ka hape, Eje Kö Ni la ate upi ni koi nyipunie.” (Eso. 3:14) Haawe, ame ngöne la nöjei ewekë ka traqa, ijiji Iehova asë hi troa ej matre traqa pi kowe la aja i Nyidrë. Ame kowe la angetre Isaraela, tro kö Iehova a kuca asë la hnei Nyidrëti hna atreine matre troa Amele angatr, me Thupë angatr me Eatrongë angatr, me Hamëne la ka nyipi ewekë koi angatr.

16, 17. (a) Tro sa olene tune kaa koi Iehova la hnei Nyidrëti hna aijijë së troa hane xome la ëje i Nyidrë? (b) Nemene la hne së hna troa ce ithanatane ngöne la tane mekune ka troa xulu?

¹⁶ Tha saze kö Iehova enehila. Kola amekunë së hnene la ëje i Nyidrë ka hape, ijiji Iehova asë hi troa ej matre thupëne la nöje i Nyidrë. Drei la ketre ceitun, Nyidrëti a hamëne koi së la nöjei ewekë thatraqane la mele së o drai, me hane acatrene fe la lapaune së. Hetre ketre ewekë mina fe hna ini së hnene la ëje i Iehova. Nemene jë? Iehova a kuca matre tro la nöjei ewekë hnei Nyidrëti hna xup a aejëne la aja i Nyidrë. Drei la ketre ceitun, Nyidrëti a aeatrëne la huliwa i Nyidrë jëne la Itretre Anyipici Nyidrë. Celë fe ka hane xatua së lai troa hane tro fë hnyawa la maca i Nyidrë. Hnei Kåre qaa Norvège, ka catre nyihlue i Iehova a 70 hë lao macatre hna qaja ka hape: “Ame koi ni, ketre manathith ka tru la troa nyihlue i Iehova, Joxu ka epine palua, me hane ketre atrene la nöje hna ati ëjene hnene la ëje ka hmitrötre i Nyidrë. Ketre ewekë ka tru pala hi koi ni troa qeje pengöne la Tusi Hmitrötr kowe la itre atr, me öhne la kola madrine la iqëmeke i angatr, ke angatr a trotrohnine la itre nyipici. Kola thue madrinenge la eni a qeje pengöne koi angatre la eloine la thupene mele i Keriso. Nge jëne la thupene mele cili, tro fe angatr elanyi a hetrenyi la mele ka tha ase palua kö ngöne la fene ka hnyipixe, nge e cili hi la tingeting, me thiina ka meköt.”

¹⁷ Ame ngöne la itre götranen la fen, jole troa öhne la itre atr ka ajane troa atre Iehova. Ngo tui Kåre, madrine fe së ngöne la easë a hane öhne la ca atr ka ajane troa atre la ëje i Iehova. Ngo, maine nyipici laka Itretre Anyipici Iehova së, ngo nemene la aqane tro sa hane anyipici Iesu? Tro sa ce ithanatane lai ngöne la tane mekune ka troa xulu.