THUPENE la hna kelikelë Iesu, ame hnei Peteru hna treije hleuhleu. Maine nyipici laka, hna kucakuca la lapaune i Peteru, ngo aja i Iesu tro angeic a xatuane la itre xa trejin. Celë hi matre öni Iesu lo koi angeic: “E hmaca ha eö, tro eö a acatene la ite tejine me eö.” (Luka 22:32, 54-62) Ame hë e thupen, Peteru ekö la ketre ikapa ne la ekalesia. (Gal. 2:9) Ketre tune mina fe, ame la ketre trejine trahmanyi ka nue ekö la hnëqa ne qatre thup, tre ijije hmaca troa xome la hnëqa cili, me öhnyi madrine troa ithuecatrene la itre trejine me angeic ngöne la u.

Hnene la itre xa atre thup hna amë ekö hna mekune ka hape, tha ijiji angatre hmaca kö troa xome la hnëqa cili. Öni Julio, a ka 20 lao macatre ne qatre thup e Bolivie ka hape: “Ketre götrane gaa tru ne la melenge la troa hnëkë cainöj, me wange la itre trejin, me thupëne la itre atrene la ekalesia! Aca tro patre ju hi la itre ewekë cili, nge kösë eni pe hi a mele menu. Ketre ijine lai laka kola hace me jole la meleng.” Ame enehila qatre thupe hmaca ha Julio.

Öni Iakobo: “Nyine amadin’ atraqat’ e traqa koi nyipunie la nöjei itupathi ka nyimu pengön.” (Iako. 1:2) Iakobo la a qaja la itre akötr ka xulu qa ngöne la hna icilekeu me qa ngöne laka, itre atr ka ngazo së. Hnei angeic hna qaja la itre aja ne ngönetrei, ene la troa ië hna hnim, me itre xa ewekë ju kö. (Iako. 1:14; 2:1; 4:1, 2, 11) E haji së jë hnei Iehova, tro së lai a pane akötr. (Heb. 12:11) Ngo, tha tro kö la itre akötre cili a hun me thapa qaathe së la madrin.

Maine eje hi laka hna pane xome qaathe së itre hnëqa ngöne la ekalesia, ngo ka loi e tro pala hi tro sa waipengöne la lapaune së me amamane la ihnimi së koi Iehova. Loi e tro fe sa mekune la kepine matre easa nyihlue i Iehova. Hapeu, easë kö a ajane la hnëqa cili göi tro sa mama maine pine la ihnimi së koi Iehova, ke xecie koi së ka hape, ewekë i Nyidrë la ekalesia,  nge qa së troa thupëne hnyawa? (Ite hu. 20:28-30) Ame la itre ka qatre thupe hë ekö, nge ka catre nyihlue i Iehova pala hi, tre, angatr a amamane koi nöjei atr, me Satana mina fe, ka hape, ka nyipici la ihnimi angatre koi Iehova.

Ame ngöne la kola haji Davita Joxu pine nyidrë kuca la ngazo, hnei nyidrëti hna kapa, ame hna nue pi la ngazo i nyidrë. Öni Davita e nyiman ka hape: “Manathithi la ate e hna apatene la hna shashaith, me hna he la ngazo i angeic. Manathithi la ate tha hna qaja hnei Iehova la ngazo i angeic, nge pëkö iaö ngöne la u i angeic.” (Sal. 32:1, 2) Hnene la ihaji hna wenë amekötine la mele i Davita, ame hna sisitria la aqane thupëne angeic la nöje i Akötresie ka lolo.

Kola mama laka, ame la itre trejine ka xome hmaca la hnëqa ne qatre thup, tre, maca catre hë angatre ngöne la aqane thupëne angatre la ekalesia. Önine la ketre qatre thupe ka hane melëne lai: “Trotrohnine hnyawa ha ni enehila la aqane troa xatuane la itre trejine ka kuca la ngazo.” Önine fe la ketre qatre thup: “Eni ha wangatrune hnyawa enehila la hnëqang, ene la troa ce huliwa memine la itre trejin.”

Önine la atre cinyihane la salamo: “Tha tro kö [Iehova] a iwenine [wesitr] palua.” (Sal. 103:9) Celë hi matre, tha tro pi kö sa mekune ka hape, tha tro hmaca kö Akötresie a mejiune kowe la ketre atr ka kuca la ketre ngazo tru. Nyimu macatre ne pane qatre thupe Ricardo, nge hna pane ami angeic qa ngöne la hnëqa cili. Öni angeic: “Tru catre la hleuhleunge hnene la ewekë cili. Nyimu macatre ne eni a lapa fë la mekune laka, tha ijijinge kö troa xome hmaca la hnëqa ne qatre thup. Ame koi eni, thatreine hmaca kö troa mejiune koi ni. Ngo, qa ngöne la eni a madrine troa xatuane la itre atr, hetre itre atr hnenge hna ini Tusi Hmitrötr kow, nge eni fe a xatuane la itre trejine ngöne la Uma Ne Baselaia, me ce huliwa me angatre ngöne la hna cainöje trootro. Celë hi ewekë lai ka xatua ni troa mekune laka, ijijinge hmaca ha troa hane xome la hnëqa ne qatre thup. Ame enehila qatre thupe hmaca ha ni.”

Maine hetre wesitre hna lapa fë, tro lai a sawa la ketre trejine troa xome la hnëqa ne qatre thup. Ka loi ju kö e troa tui Davita, ketre hlue i Iehova ka kötre Saulo, lo Joxu ka zalu ka thele troa humuthi angeic! Ngo  tha hna itëkeune kö hnei Davita, ngacama hetre ijine ka ijije koi angeic troa humuthi Saulo. (1 Sam. 24:4-7; 26:8-12) Ame la kola meci hnei Saulo ngöne la isi, hna treije latresi hnei Davita, me qeje Saulo me Ionathana ceitu me lue atr ka “loi me sheminge.” (2 Sam. 1:21-23) Tha hnei Davita kö hna lapa fë wesitr.

Maine epuni a mekune laka, tha hna trotrohni epuni kö maine tha meköti kö la hna kuca koi epun, the nue kö la wesitr troa musinë epun. Drei la ketre ceitun, ame la kola pane ami William qa ngöne la hnëqa ne qatre thup, huliwa hnei angeic hna kuca koi 30 lao macatre e Agele, hnei angeic hna wesitr kowe la itre xa qatre thup. Nemene la ka xatua William matre tha tro kö angeic a wesitre menu ju pë hë? Öni angeic: “Hna xatuane ni hnene la eni a e la tusi Iobu. Maine nyipici laka hnei Iehova hna xatua Iobu troa ce mele tingetinge memine la köni sinee i angeic, eje hi laka tro mina fe Nyidrëti a xatua ni troa ce mele tingetinge memine la itre qatre thup!”—Iobu 42:7-9.

Maine epuni a mekune laka, tha tro hmaca kö epuni a thupëne la ekalesia, haawe, loi e tro epuni a wange hnyawa la kepin. Hapeu, hace menu catre pala ha la itre jole ka traqa koi epun? Hetre itre xa ewekë hë ka sisitria koi epun? Hna athixötrë epuni kö hnene la ngazo i itre xan? Maine itre kepine ju hë lai, ngo mekune kö laka ame la hnëqa ne qatre thup, tre jëne tro epuni a xatuane la itre trejine ka ala nyimu. Hnene la itre cainöje hnei epuni hna cile fë hna acatrene la lapaune i angatr, nge hnene la tulu i epuni hna xatua angatr, nge hnene fe la iwai epuni hna xatua angatre troa cile hut ngöne la itre jole ka traqa koi angatr. Hnene la huliwa i epuni hna amadrinëne la hni Iehova, tune la aqane amadrinë epuni hnene la huliwa i epun.—Ite edomë 27:11.

Hnei Iehova hna xatuane la itre atr troa hetre madrine hmaca, me aja troa cilë mekene la ekalesia. Maine hnei epuni hna sipu mekune troa nue la hnëqa ne qatre thup, maine hna ami epuni pena, ngo ijiji epuni hmaca troa ‘ajane la hnëqa ne atre thup.’ (1 Tim. 3:1) ‘Tha mano kö [Paulo] thithi’ laka, troa atiqane la itre trejine ne Kolose hnene la atrehmekune ne la aja i Akötresie “mate tro pala hi nyipunie ijije koi [Iehova], kolo pala hi a amadi nyidë.” (Kol. 1:9, 10) Maine epuni hmaca ha xome la hnëqa ne qatre thup, mejiune ju koi Iehova troa hamë epuni la trenge catr, me xomihni, me madrin. Ame ngöne la itre drai tixenuë celë, itre hlue i Akötresie a thele me ajane la ixatua ne la itre qatre thup trene ihnim. Hapeu, hetre aja i epuni kö troa acatrene la lapaunene la itre trejin?