PËKÖ hneijine ka jole catre tune la hneijine hne së hna melëne enehila. (2 Tim. 3:1-5) Kola tupathe e nöjei drai la ihnimi së koi Iehova memine la aja ka eje the së troa melëne la itre trepene meköti Nyidrë. Hnei Iesu hë hna qaja amë la hneijine jole cili, me qaja axeciëne kowe la itretre drei nyidrë ka hape, tro angatr a kapa la ixatua ka ijije matre troa cile hut uti hë la pun. (Mat. 24:3, 13; 28:20) Hnei nyidrëti hna acile la hlue ka nyipici troa thewe xeni ngöne la götrane u “ngöne la nyipi ijin.”—Mat. 24:45, 46.

Qaane la kola acile la hlue ka nyipici lo 1919, hna icasinekeune e hnine la organizasio i Akötresie la itre atrene la “hnalapa” ka xulu qa ngöne la nöjei qene hlapa, nge itre hna thuane ngöne la götrane u. (Mat. 24:14; Hna ama. 22:17) Ngo, tha ceitu kö la etrune la itre hna ujën ngöne la nöjei qene hlapa asë, ketre, tha nöjei atr asë kö la ka goeëne la itre itusi së jëne ordinatör. Drei la ketre ceitun, tru hnei atr ka tha hane kö goeëne la itre video, me itre tane mekune ka mama ngöne la sit së jw.org. Hapeu, kolo kö lai a hape tha kapa kö angatre la xeni ka ijije matre tro angatr a cile hut ngöne la götrane u? Maine easa ajane troa traqa kowe la mekune ka meköt, loi e tro sa waipengöne la aqane sa la foa lao hnying.

Ame ngöne lo Satana a tupathi Iesu troa ujëne la itre etë matre falawa pi, öni Iesu e sa ka hape: “Tha tro kö a mele la ate hnei areto hmekuje hi, ngo hnene la nöjei tenge ewekë asë ka xulu qa ngöne la ine ula i Akötesie.” (Mat. 4:3, 4) Hna amë la itre trengewekë i Iehova e hnine la Tusi Hmitrötr. (2 Pet. 1:20, 21) Haawe, Tusi Hmitrötre hi la sipu aliene la xeni ngöne la götrane u.—2 Tim. 3:16, 17.

Hnene la organizasio i Iehova hna kuca sinëne maine apexejene la Tusi Hmitrötr, hna hape, Les Saintes Écritures. Traduction du monde nouveau ngöne la 120 lao qene hlapa. Nge, e nöjei macatre kolo pala hi a ujëne ej ngöne la itre xa qene hlapa hmaca ju kö. The qaja kö la itre xa Tusi Hmitrötr ka hetrenyi ngöne la itre thauzane lao qene hlapa, laka hna kuca sinën itre xan, nge pexeje itre xan. Ka ce tro hi la aqane eatre la ewekë ka tru celë memine la aja i Iehova, “lo ate ajane la nöjei ate asëjëihë troa mele me wangate hmekune la nyipici.” (1 Tim. 2:3, 4) Nge, pine laka “tha sihngödi kö kete ewekë hna xupe ngöne la xajawa i [Iehova],” haawe xecie hnyawa hi koi së ka hape, tro Nyidrëti a ea “la ite ka pë ewekë ngöne la u” kowe la organizasio i Nyidrë, me thawa la xeni ne la u koi angatr.—Heb. 4:13; Mat. 5:3, 6; Ioane 6:44; 10:14.

Maine ajane la atr troa acatrene la lapaune i angeic, hetre nyine tro pala kö angeice a kuca hune hi la troa e la Tusi Hmitrötr. Nyipi ewekë tro angeic a trotrohnine la hnei angeic hna e me trongëne la hna inin. (Iako. 1:22-25) Hna trotrohnine la mekune cili hnene la ketre eunuka ne Aithiope. Angeic a e la Wesi Ula i Akötresie la kola hnyingë angeice hnei Filipo, atre cainöj ka hape: “ Trotrohninë hë nyipëti la hnei nyipëti hna e ?” Önine la eunuka e sa ka hape: “Tro ni a ate tune ka e pëkö ate troa amekötine koi ni ?” (Ite hu. 8:26-31) Hnei Filipo hna sa me xatuane la eunuka troa trotrohnine hnyawa la Wesi Ula i Akötresie. Hna ketr la hni ne la eunuka hnene la hnei angeice hna inin, ame hnei angeic hna xomi bapataiso. (Ite hu. 8:32-38) Ketre tune mina fe, kola xatua së hnene la itre itusi së ka qejepengöne la Tusi Hmitrötr troa trotrohnine hnyawa la nyipici. Itre eje a ketr la hni së me upi së troa trongëne la hne së hna inin.—Kol. 1:9, 10.

Mana la itre xeni ngöne la u hna kapa hnene la itre hlue i Iehova jëne la itre itus. (Is. 65:13) Drei la ketre ceitun, hnene la Ita Ne Thup ka mama ngöne la 210 lao qene hlapa, hna qejepengöne la itre hna perofetane hnei Tusi Hmitrötr, me xatua së troa trotrohnine hnyawa la itre nyipici ka jui, ame hna upi së troa mele thenge la itre trepene meköti ne la Tusi Hmitrötr. Kola mama la Réveillez-vous ! ngöne la 100 lao qene hlapa, nge eje a akökötrene la atrehmekune së göne la itre hnei Nyidrë hna xup, me amamane koi së la aqane troa trongëne la itre eamo qa hnine la Tusi Hmitrötr ngöne la mele së. (Ite edomë 3:21-23; Rom. 1:20) Kola hamëne hnei hlue ka nyipici la itre tane mekune qa hnine la Tusi Hmitrötr ngöne la 680 lao qene hlapa nge hetre munën! Epuni kö a hane ami ijine e nöjei drai troa e la Tusi Hmitrötr? Epuni kö a hane e la nöjei zonal me nöjei itus ka hnyipi mama ngöne la sipu qene hlapa i epun?

Ketre, kola hnëkëne hnei organizasio i Iehova la itre tane cainöje ka qejepengöne la Tusi Hmitrötr, lo itre hna cile fë ngöne lo itre icasikeu së, me ngöne la itre asabele. Epuni kö a hane kapa madrine la itre cainöj, me itre hna elon, me itre iamacany, memine la kola ce ithanata me itre xa trejin ngöne la itre icasikeu celë? Eje hi laka, Iehova a hamë së la xeni ka tru ngöne la götarne u!—Is. 25:6.

Ohea. Ketre, tha tro kö sa sesëkötre ka hape, hetre itre xa hlue i Iehova ka kapa atrune la xeni ne la u hui itre xan. Pine nemen? Tro sa ce wange la pengöi anga aposetolo. Tru la ithuemacanyi hnei angatre hna kapa hune la itre xa atre dreng ngöne lo hneijine i angatr. (Mar. 4:10; 9:35-37) Ngo ame la itretre dreng ka kapa acon, tre, hetre xeni hnei angatre hna kapa, angatr a kapa la ka ijij.—Efe. 4:20-24; 1 Pet. 1:8.

Ketre, loi e troa atre laka, tru la itre ewekë hnei Iesu hna qaja me kuca lo nyidrë e celë fen, nge tha hna cinyihane asë kö ngöne la itre evangelia. Hna cinyihane hnei Ioane aposetolo ka hape: “Kösaue pe kö la nöjei ewekë hnei Iesu hna longëtin [kuca], me maine cengöne cinyihan’ asë jë, te, ini a mekun, tha ijije kö e celë fene la nöjei tusi hna cinyihan.” (Ioane 21:25) Maine nyipici laka tru catre la itre ithuemacanyi göi Iesu atr ka pexej hna atre hnene la itretre drei nyidrë ekö hu së, ngo hetrenyi së la ka ijij. Iehova a thupëne matre tro sa atre Iesu hnyawa göi troa xötrethenge la itre thupaca i nyidrë.—1 Pet. 2:21.

Pane mekune jë fe lo itre tus hna iupi fë hnene la anga aposetolo kowe la itre ekalesia ekö. Hetre tusi hna cinyihane ekö hnei Paulo tha hna fejane kö hnine la Tusi Hmitrötr. (Kol. 4:16) Hapeu, tha ka pexeje kö la xeni ne la u hne së hna kapa pine laka tha hna kapa kö la tusi cili? Ohea. Atre kö Iehova la ka ijije koi së, nge Nyidrëti a hamëne la ka ijije matre tro pala hi a catre la lapaune së.—Mat. 6:8.

Ame enehila, tru catre kö la xeni ne la u hna kapa hnene la itre xa hlue i Iehova hui itre xan. Hapeue la qene hlapa hnei epuni hna ithanatan, xalaithe hi la itre itus hna hetrenyi? Maine eje hi, loi e tro epuni atre ka hape Iehova a kukehni epun. Inine jë la itre itusi hnei epuni hna hetrenyi, nge maine ijij, sine ju la itre icasikeu ngöne la qene hlapa hnei epuni hna trotrohnin. Nge, the luelue kö, tro kö Iehova a thupëne matre tro pala kö a catre la lapaune i epun.—Sal. 1:2; Heb. 10:24, 25.

Ame ngöne la sit Web së, hetrenyi la itre zonale së me itre xa itusi së. Hetrenyi fe la itre hna cinyihan, ixatua kowe la itre trefën, me itre thöth, me itre nekönatr. Itre hnepe lapa a kepe thangane lai qa ngöne la hna ce wange la itre mekune cili ngöne la itre ijine Hmi Hnepe Lapa. Ketre, hetre itre xa ewekë fe hna amaman, tune la itre diplômes ne la itre ka qa hna sine la Ini Ne Gileada, memine la icasikeu hna kuca lapane e nöjei macatre. Nge kolo fe a thuemacane la itre trejine e cailo fen la itre ewekë ka traqa, itre götrane hna angazone hnei wene maine sa, me itre thangane kootr ka traqa kowe la itre hlue i Iehova. (1 Pet. 5:8, 9) Ketre jia ne huliwa ka tru göi troa tro fë cainöje ka hetre thangane catre la sit Web, matre ijije jë fe troa ketr la itre nöje hna thinge kowe la maca ka loi.

Ngacama tro ju hë së kowe la sit Web maine tha tro pena, ngo ijije hi tro pala hi a catre la lapaune së. Tru la hna huliwa hnene la hlue troa hamëne koi së la nöjei itus hna fejan matre troa thuane hnyawane la itre atrene asë la hnalapa. Celë hi matre, tha tro kö sa mekune ka hape, ma ka loi troa itöne la itre ewekë nyine tro kowe la sit jw.org. Ame itre xa trejin, hnei angatre hna fejane la itre hna cinyihane qa ngöne la sit Web, me hamëne kowe la itre trejine ka thatreine tro kowe la sit. Ngo tha hna amekötine kö tune lai kowe la itre ekalesia.

Easa olene koi Iesu la hnei nyidrëti hna aejëne la hnei nyidrëti hna thingehnaean, ene la troa hamëne la itre hne së hna ajane ngöne la götrane u. Kolo pala hi a easenyi catre la pune la itre drai tixenuë celë, nge xecie hnyawa koi së laka tro pala hi Iehova a hamëne la xeni ne la u “ngöne la nyipi ijin.”