Nyihlue i Akötresie Jë Nyipine La Itre “Aköte Ka Kösau”
“Qâ shë troa lö kowe la baselaia i Akötesie hna jëne la ite aköte ka kösau.”—ITE HULIWA 14:22.
1. Pine nemene matre itre hlue i Akötresieti a ixelë memine la itre “aköte ka kösau”?
HAPEU, tro kö së lai a sesëkötre la easa ixelë memine la itre “aköte ka kösau” qëkemene troa kapa la mele ka pë pun? Ohea. Ngacama ekö ju hë së nyihlue i Iehova, ngo easë asë hi a melëne la itre akötre cili. Pine nemen? Ame la ketre kepin, tre, easa mele ngöne la fene i Satana.—Hna Amamane 12:12.
2. (a) Nemene la itre xa akötr hna melën hnene la itre Keresiano? (Wange ju la pane iatr.) (b) Drei la qaane la itre iaxösisi, nge hne së hna atre tune kaa?
2 Kola traqa kowe la nöjei atr asë la nöjei pengöne jol, pine laka itre ka tha pexeje kö angatr. Ngo hetre itre xa akötre kö hna sipu melëne hnene la itre Keresiano. (1 Korinito 10:13) Ame la ketre akötr hnei angatr hna melën, tre ene la iaxösisi, ke, catre la aja i angatre troa mele nyipici koi Akötresie. Öni Iesu kowe la itretre drei nyidrë: “Tha tru kö la hlue hune la tixe i angeic. Maine ase hë angat’ axösisi ni, tro angat’ a axösisi nyipunieti fe.” (Ioane 15:20) Drei la qaane la itre iaxösisi cili? Satana. Öni Tusi Hmitrötr e qeje angeic ka hape, “kösë liona ka ho, kola thele tha [itre hlue i Iehova] i nyën.” (1 Peteru 5:8) Satana a kuca asë la nöjei pengöne ewekë matre troa thë la aqane imelekeu së me Iehova. Tro sa ce wange la ewekë ka traqa koi Paulo aposetolo.
IAKÖTRË E LUSETARA
3-5. (a) Nemene la iakötrë ka traqa koi Paulo e Lusetara? (b) Pine nemene matre ka ithuecatre la eamo i Paulo göi itre iakötrë?
3 Nyimu ijine hna akötrë Paulo pine la aqane mele nyipici angeic koi Akötresie. (2 Korinito 11:23-27) Ame la ketre ijin e Lusetara, hnei Paulo hna aloine la ketre sin atr. Jëne la iamamanyikeu cili, hna mekune hnene la itre atr ka hape, lue haze lae Paulo me Banaba. Hnei nyidroti hna qaja ielene kowe la ka ala nyimu matre tha tro kö angatre a thili koi nyidro! Ngo tha qea ju kö, nge traqa pi hi la itre tane la hmi i angetre Iudra troa li ithanata koi angatr. Ame hnene la ka ala nyimu hna kapa la itre tranga thoi cili. Ame hë la thangan, hnei angatre hna tranyi Paulo hnei etë uti hë la mekune angatr ka hape, meci hë.—Ite Huliwa 14:8-19.
4 Thupene la hnei Paulo me Banaba hna wange la ekalesia ne Derebe, “nyidoti hë a hmaca Lusetara eë, me Ikonio, me Anetioka, kola acatene la ite hni angete deng, me eamo angate troa cile huti ngöne la lapaun, me hape, qâ shë troa lö kowe la baselaia i Akötesie hna jëne la ite aköte ka kösau.” (Ite Huliwa 14:21, 22) Nyipici laka, tha ewekë ka ixatua kö la troa qaja la itre “aköte ka kösaue.” Ngo hnauëne kö laka Paulo me Banaba “a acatene la ite hni angete deng” ngöne la nyidroti a ahnith ka hape, tro hmaca kö angatr a cile kowe la itre xa iakötrë?
Paulo pe a qaja atrune e celë la thupen ka tru hna troa kapa hnene la itre ka mele nyipici koi Akötresie
5 Öni Paulo e sa ka hape: “Qâ shë troa lö kowe la baselaia i Akötesie hna jëne la ite aköte ka kösau.” Tha angeice kö a qaja ka hape: “Tro sa cile huti ngöne la itre akötr.” Ngo Paulo pe a qaja atrune e celë la thupen ka tru hna troa kapa hnene la itre ka mele nyipici koi Akötresie; tha ketre pu ne jidri kö. Öni Iesu: “Ame la ate xomi hni uti hë la pun, te, tro ha mel.”—Mataio 10:22.
6. Nemene thupen hna troa kapa hnene la itre ka cile huti ngöne la itre iakötrë?
6 Maine tro sa cile huti ngöne la itre iakötrë, tro së elanyi a kapa la thupen. Ame koi itre Keresiano hna iën, tre, troa joxu me Iesu e hnengödrai, nge tha tro kö angatr a hane mec. Ame koi “ite xa mamoe,” tre mele ka tha ase palua kö e celë fen. (Ioane 10:16; 2 Peteru 3:13) Ngo qëmekene troa traqa kowe lai, tro sa pane melëne la itre “aköte ka kösau.” Tro sa ce wange la lue pengöne itupath ka traqa koi së.
IAKÖTRË
7. Nemene la ketre ewekë ka troa traqa kowe la itre Keresiano?
7 Hnei Iesu hna perofetan ka hape: “Tro angat’ a nue nyipunie kowe la ite ishenyin, nge tro ha thaucë nyipunie ngöne la ite sunago ; me e nyipunie koi ite gavana me ite joxu.” (Mark 13:9) Iesu a qaja e celë ka hape, troa axösisine la itre Keresiano. Ame itre xa ijin, itre hene ne hmi me politik hi la qaane la itre iaxösisi cili. (Ite Huliwa 5:27, 28) Pane mekune hmaca jë së la tulu i Paulo. Hapeu, angeice kö hnehengazo menu la angeice a mekune la itre iakötrë ka troa traqa koi angeic? Ohea.—E jë la Ite Huliwa 20:22, 23.
8, 9. Hnei Paulo hna amamane tune kaa ka hape, ka xecie e kuhu hni angeice troa cile hut? Nemene la aqane cile hutine la itre trejine enehila ngöne la itre iakötrë?
8 Hnei Paulo hna catre cile kowe la itre iakötrë qaathei Satana, ame hnei angeice hna qaja ka hape: “Tha ini kö a nyipi ewekëne la melenge mate nyipi koi ni, mate tro ni a umuthe la hna isasaqeng memine la qânge hnenge hna kapa qa thei Joxu Iesu, troa anyipicine la maca ka loi ne la ihnimi gufa i Akötesie.” (Ite Huliwa 20:24) Atre hnyawa hi Paulo ka hape, troa axösisi angeic, ngo ame pe ka xecie e kuhu hni angeice troa cile hut. Ame koi angeic, ngacama akötrë angeice ju hë, ngo tro pala kö angeic a “anyipicine la maca ka loi.”
9 Ame enehila, nyimutre la itre trejin, trahmany me föe ka mele nyipici ngöne la itre iakötrë ngöne la itre ijine iakötrë. Ame ngöne la ketre nöj, hna akalabusine la Itretre Anyipici Iehova koi 20 lao macatre, ngo tha hna tro kö koi hna kootr. Hna sasaithe la treene lao macatre ne lapa kalabusi angatr. Pine nemen? Pine laka, xele kö angatre troa hane lö hnine la politik. Hna wathebone la itre hnepe lapa i angatre troa wai angatr, nge ame itre xa hna akalabusin, tre, hna lep me axösisin.
Loi e tro epuni a mejiune koi Iehova, me cile catre e hnine la iakötrë
10. Pine nemene matre tha tro kö sa hnehengazo menune la itre jole ka aca traqa ju hi koi së?
10 Ame ngöne la itre xa götran, itre trejin a melëne la itre akötr hnene la hna aca traqa ju hi koi angatr la ketre jol. Maine ewekë lai ka traqa koi epun, the hnehengazo menu kö. Mekune ju la pengöi Iosefa. Sesëkötre ju hi angeic la kola salemë angeic ceitu me hlue. Ngo hnei Iehova hna “amele angeice qa ngöne la nöjei aköt’ asë i angeic.” (Ite Huliwa 7:9, 10) Atreine hi tro Iehova a ujë tune lai koi epun. The thëthëhmine kö laka, “ate kö la Joxu [Iehova] la aqane amelene la itete thina ka ijiji Akötesie qa ngöne la nöjei itupath.” (2 Peteru 2:9) Loi e tro epuni a mejiune koi Iehova, me cile catre e hnine la iakötrë. Mejiune ju laka, atreine hi Iehova troa amele epuni qa ngöne la fene ka ngazo celë, me hamë epuni la mele ka tha ase palua kö.—1 Peteru 5:8, 9.
NYINYITHIINA I SATANA
11. Nemene la pengöne la iakötrë, memine la pengöne la nyinyithiina?
11 Loi tro fe sa hane cile catre qëmekene la itre nyinyithiina i Satana. Ame la itre iakötrë, tre ceitu me itre enyi ka catrehnin nge ka aca tro lepe apatrene la uma i epun. Ame pena la itre nyinyithiina i Satana, tre ceitu me itre neköi fenifen ka xuje trongëne la uma i epun. Ame hë la epuni a öhne la itre engazone la uma, tre, pë hmaca kö ewekë nyine troa kuca, ke kolo ha troa kei la uma.
12. (a) Nemene la ketre nyinyithiina i Satana, nge pine nemene matre ka hetre thangane catr? (b) Hna ketri Paulo tune kaa hnene la kucakuca?
12 Satana a ajane troa thë la aqane imelekeu së me Iehova. Angeic a traqa kowe la aja i angeic jëne la itre iakötrë, me itre nyinyithiina, tune la kucakuca. Ka hetre thangane catre la nyinyithiina celë, ke, atreine hi tro eje a ananazijëne trongëne la aqane imelekeu së me Iehova. Ame itre xa ijin, hna traqa la kucakuca koi Paulo, goi qaja fe angeice la ketre ijin, ka hape, “ngazo hë ni.” (E jë la Roma 7:21-24.) Pine nemene matre hna hane fe kucakuca hnei Paulo? Ketre atr angeic ka imelekeu hnyawa me Iehova, ketre ka hane sine angeic la lapa ne xomi meköt ekö. Ngo hnene la itre ngazo ka eje thei angeic, ame hnei angeic hna kucakuca. Aja i angeic troa kuca la meköt, ngo tha ewekë ka hmaloi kö koi angeic. Maine hetrenyi thei epuni la mekune cili, tro epuni a öhnyi ixatua qa ngöne laka hnei Paulo hna hane isi memine la itre mekune cili.
13, 14. (a) Pine nemene matre itre hlue i Akötresie a kucakuca? (b) Aja i drei tro sa hmaca troa nyihlue i Iehova, nge pine nemen?
13 Ame itre xa ijin, kola nango kucakuca hnene la itre trejin, me seseu, goi mekune fe angatr ka hape, pëkö eloi angatr. Hnene la ketre trejine föe ka pionie hna qaja ka hape: “Mama pala hi qëmekenge la tria hnenge hna kuca, matre ajolëne catrëne la hning. E tro ni a mekune la nöjei ewekë ka ngazo hnenge hna kuca, kösë ame koi ni, pëkö ka hnimi ni, goi tha hnimi ni fe hnei Iehova.”
14 Pine nemene matre kola hace la hni ne la itre xa hlue i Iehova ka mele nyipici tune lo trejine föe hna qaja e caha ka kucakuca? Hetrenyi la itre kepine ka nyimutre, ngo maine jë hnene laka, ame koi angatr, pëkö eloi angatr nge pëkö eloine la mele i angatr. (Ite Edomë 15:15) Nge itre xan a mekune tune lai, ke hna tithi angatr hnei mec, ame hna akötrëne la hni angatr. Maine hetrenyi thei epun la itre mekune ka iathixötrë cili, ngo the thëthëhmine pi kö laka, hetre ka ajane troa xome la itre mekune cili matre troa thë la aqane imelekeu i epun me Iehova. Drei lai? Satana hi. Hetre pune hna hnëkëne hë koi angeic, ene la hnëjin, matre angeic a ajane tro fe epuni a hane mekune ka hape, pëkö manathith ka ijiji koi epuni elany. (Hna Amamane 20:10) Satana a ajane troa ajolëne la hni së me ananazijëne la trenge aja së troa nyihlue i Iehova. Maine tro Satana a nyi jëne lo itre iakötrë, maine itre nyinyithiina pena, ngo ame la aja i angeic, tre ene la tro sa hmaca troa nyihlue i Iehova. The nue Satana kö troa amenu epun; catre pi pe, ke ame la itre hlue i Akötresie, angatr a isine troa catre mele nyipici koi Iehova.
The nue Satana kö troa amenu epun; catre pi pe, ke ame la itre hlue i Akötresie, angatr a isine troa catre mele nyipici koi Iehova
15. Tune la hna qaja ngöne 2 Korinito 4:16, 17, nemene la ka xecie koi së?
15 Loi e xecie e kuhu hni së troa cile catr. Goeëne hutine jë la thupen. Öni Paulo kowe la angetre Korinito: “Celë hi mate tha kucakuca kö hun ; loi pe ame la ate huni e tröne kola ethit, ngo kola ahmadradran’ o drai pala hi la ate e kuhu hnin. Ke ame la aköte huni ka malomaloe, nge ka canga pate, te, kola acian’ atrune trotro thatraqai huni la lolo ka hace, nge epine palua.”—2 Korinito 4:16, 17.
HNËKË JË ENEHILA KOWE LA ITRE AKÖTR
Hna inine la itre thöth me itre ka tru troa cilëgöline la lapaune i angatr (Wange ju la paragarafe 16)
16. Pine nemene matre nyipi ewekë tro sa hnëkë enehila kowe la itre akötr?
16 Nyimutre la “ite nyinyithina” i Satana ka tupathi së. (Efeso 6:11) Celë hi kepine matre nyipi ewekë tro sa xötrethenge la eamo hna qaja ngöne 1 Peteru 5:9: “Thipe tiji nyëne pi, nge cile huti ju nyipunie, ngöne la lapaun.” Maine easa ajan troa cile hut, loi e tro sa hnëkëne hnyawane la mekune me hni së enehila matre troa hetre aja së troa kuca la loi. Tro sa xome la ketre ceitun: Qëmekene tro la soc a tro troa isi, tre angeic a pane inine isi. Ceitune hi lai me easë. Thatre kö së elanyi la itre ewekë ka troa traqa koi së. Matre nyipi ewekë tro sa catre hnëkë enehila e ijine loi petre kö. Hnei Paulo aposetolo hna ithuecatrene la itre Keresiano me hape: “Thelejë e kuhu ite hni nyipunieti kö, hape u, nyipunieti hë ngöne la lapaun ; tupathi nyipunieti ju kö.”—2 Korinito 13:5.
17-19. (a) Tro sa isa waipengö së tune kaa? (b) Nemene la aqane tro la itre thöth a hnëkë matre troa cilëgöline la lapaune i angatre ngöne la hna ini?
17 Ame la ketre aqane tro sa isa waipengö së kö, tre ene la troa hnyinge tune la: ‘Eni kö a thithi lapa? E tro itre xan a uku ni troa kuca la ngazo, eni kö a pane drengethenge Akötresie, nge pi atr pë hë? Eni kö a hane sine lapane la itre icasikeu? Hapeu, hetre ajange kö troa ce thawa memine la itre xan la itre ini hnenge hna mejiune kow? Ka canga saqe kö ni hane nue la ngazo ne la itre trejin, tune la ajange tro fe angatr a hane nue la ngazong? Eni kö a drengethenge la itre qatre thup ne la ekalesia, memine fe la itre ka thupëne la itre ekalesia e cailo fen?’
Maine easa ajan troa cile hut, loi e tro sa hnëkëne hnyawane la mekune me hni së enehila matre troa hetre aja së troa kuca la loi
18 Easa mel e nyipine la itre atr ka thele troa ajojezine la mekuna së. Nyimutre la itre trejine thöth ka catre qaja la pengöne la hmi angatr ngöne la hna ini. Ketre tha hmahma kö angatre maine xoue pena. Nemene la ka xatua angatre troa catre ujë tune lai? Hnei angatre hna xome la itre mekune nyine ixatua e hnine la itre zonale së. Hnene lo Réveillez-vous ! ne Julai 2009 hna qaja ka hape, e hnyinge jë hnene la ketre sine ini epun ka hape: “Pine nemene matre tha hane kö eö mejiune kowe la ini évolution?,” sa jë ka hape: “Ke tro pena ni a mejiune fë nemen kowe la ini cili? Nga ame itre ka kuci sias, tre, tha hane fe kö angatr kapa, ngo angatre hi lo lai itre ka atre hnyawa la ini cili!” Keme me thine fe, ce ithanatane jë me itre nekö i epun la itre aqane troa isigöline la lapaune i angatr matre hnëkë angatr elany kowe la hna ini.
Keme me thine fe, ce ithanatane jë me itre nekö i epun la itre aqane troa isigöline la lapaune i angatr
19 Eje hi laka, tha ka hmaloi kö troa cilëgöline la itre ini së maine troa kuca la aja i Iehova, tune la troa hane sine la itre icasikeu. Maine thupene jë la hne së hna huliwa ngöne la drai, easa kucakuca, ngo ame pe easa thele troa hane tro kowe la hna icasikeu. Maine pena, nango jole tro sa canga hlë e hmakany matre tro sa hane cainöje trootro. Ngo tha tro pi kö sa thëthëhmine laka, maine hne së hna majemine troa kuca la itre ewekë celë enehila, tro ha hnëkë së elanyi e traqa jë la itre akötre ka tru.
Hna kapa hnei Paulo la thupene mel, me mejiune laka, thatraqai nyidrëti fe la meci Iesu
20, 21. (a) E tro sa mekune hnyawa la thupene la mel, tro ha xatua së tune kaa troa cile kowe la itre mekune ka iathixötrë? (b) Nemene la nyine tro sa catre kuca?
20 Nemene la aqane tro sa ujë e traqa ju së kucakuca? Ame la ketre aqane troa kuca, tre ene la troa mekune hnyawa lo mele hna huujëne hnei Iesu. Celë hi hna kuca lai hnei Paulo aposetolo. Ame la ketre ijin, tre hnei nyidrëti hna pane kucakuca. Ngo, atre hnyawa hi nyidrëti ka hape, hnei Keriso hna meci thatraqane la itre la atr ka ngazo tui nyidrë, ngo tha thatraqane kö la itre atr ka pexej. Öni nyidrë: “Ini a mele hnene la lapaune kowe la Hupuna i Akötesie, lo ate hnimi ni, me hamë nyidëti kö thatraqai ni.” (Galatia 2:20) Nyipici, hna kapa hnei Paulo la thupene mel, me mejiune laka, thatraqai nyidrëti fe la meci Iesu.
21 Troa hetre thangane ka loi mina fe koi nyipunie, e hnei nyipunieti hna hane kapa la thupene mel ceitune me ketre ahnahna hna sipu hamëne koi nyipunie hnei Iehova. Tha kolo kö lai a hape, tro ha canga patre ju hi la kucakuca. Ame itre xan, tre, angatre pë hë a troa xomihnine la aqane mele cili uti hë la kola acile elanyi la fene ka hnyipixe. Ngo, mekune hnyawa kö së laka, ame la manathith, tre, thatraqai angetre cile hut uti hë la pun. Kola tro la itre drai, nge easa easenyi catre trootro kowe la ijine kola troa traqa la Baselaia i Akötresie. Nge e traqa ha elanyi la Baselaia, tro ha tingetinge la fen, nge tro fe ha pexeje la nöjei atr asë. Catre pi së tro sa huliwa matre tro sa hane ‘lö kowe la Baselaia’ cili, ngacama catrehnine ju hë la itre akötr ka traqa koi së.