1, 2. Nemene la ka troa acatrene la lapaune së ka hape, troa eatre elanyi la aja i Akötresie jëne la Baselaia, nge pine nemen? (Wange ju la pane iatr.)

EASË Itretre Anyipici Iehova a catre cainöjëne ka hape, Baselaia hmekuje hi la nyin la itre jole ka traqa koi së. Hapeu, xecie hnyawa kö koi së ka hape, cile hë la Baselaia nge tro ej a aeatrën elany la aja i Akötresie? Pine nemene matre easa catre lapaune kowe la Baselaia?—Heberu 11:1.

² Tro ha eatre elanyi la aja i Iehova kowe la itre atr jëne la Baselaia Ne La Mesia. Ame la ecatrene la trepene la Baselaia celë, tre, ene laka meköti Iehova troa mus. Drei la Joxu ne la Baselaia celë? Drei la itre xa ka troa ce musi memine la Joxu celë? Drei la itre hna troa musi kow, nge nemene götran hnei angatre hna troa musi kow? Hnei Iehova hna acile thenge la meköt la köni ewekë ka tru jëne la itre isisinyikeu. Ame la itre isisinyikeu celë, tre itre hna ce axeciëne ngöne la meköt hnei Iehova maine Hupuna i Nyidrë, Iesu Keriso. Maine tro sa waipengöne hnyawa la itre isisinyikeu cili, tro hë së a trotrohnine la aqane troa eatre elany la aja i Iehova, memine la kepine matre xecie hnyawa koi së ka hape, ka cile hut la Baselaia.—E jë la Efeso 2:12.

3. Nemene la hne së hna troa ce wange ngöne la tane mekune celë, me ngöne la tane thupen?

 ³ Ame e hnine la Tusi Hmitrötr, hetrenyi la sikisi lao isisinyikeu ka tru hna iothekeune memine la Baselaia hna cilëne hnei Iesu Keriso. Kola qaja la (1) isisinyikeu me Aberahama, (2) isisinyikeu me Davita, (3) isisinyikeu matre troa atre huuje tui Melekisedek, (4) isisinyikeu ne la Wathebo, (5) isisinyikeu ka hnyipixe, me (6) isisinyikeu göi Baselaia. Tro sa ce wange la pengöne la isa ca isisinyikeu me aqane tro itre eje a eatrëne la aja i Akötresie kowe la ihnadro me itre atr.—Wange ju la itre mekune ngöne la götrane 9.

4. Tune la hna qaja ngöne la tusi Genese, nemene la itre hna amekötine hnei Iehova kowe la itre atr?

⁴ Hnei Iehova hna hnëkëne la ihnadro matre tro la itre atr a mele ngön. Thupene lai, hnei Nyidrëti hna amekötine la köni ewekë celë: (1) Tro Akötresie a xupe la itre atr hnaiji Nyidrë. (2) Tro la itre atr a aparadraisone la ihnadro me nyialiene hnene la itre matra i angatr ka meköt. (3) Tha tro kö la itre atr a xeni la wene la sinöe ne la atrehmekune la loi me ngazo. (Genese 1:26, 28; 2:16, 17) Ame la köni hna amekötine celë, tre celë hi aqane mele hna ajane hnei Akötresie kowe la atr me kowe la ihnadro. Haawe, pine nemene kö matre kuca jë Nyidrëti la itre isisinyikeu?

5, 6. (a) Pine nemene matre ka nyipi ewekë catre la itre isisinyikeu? (b) Nemene la aqane ujë i Iehova kowe la icilekeu e Edena?

⁵ Hnei Satana hna nyiqaane icilekeu me Akötresie memine fe la aja i Nyidrë. Hnei angeic hna thele matre tha tro kö la atr a drengethenge Akötresie. Celë hi matre hnei angeice hna iaö Eva troa xeni la wene sinöe ne la atrehmekune la loi me ngazo. (Genese 3:1-5; Hna Amamane 12:9) E cili, angeice hi lai a jelengazone la  musi cile i Iehova. Ame hë e thupen, hnei Satana fe hna jelengazone la itre atr ka hape, angatr a nyihlue i Akötresie göi thupen.—Iobu 1:9-11; 2:4, 5.

⁶ Nemene la aqane ujë i Iehova kowe la icilekeu cili? Maine ju, ke ijije hi tro Nyidrëti a lepe apatrene la itre ka icilekeu. Ngo ame pe, tha tro hë elanyi a eatre lo aja i Nyidrë, ene la troa nyialiene la fen hnene la itre matra i Adamu me Eva. Celë hi kepine matre tha apatrenyi angatre ju kö. Hnei Iehova pe hna hamëne la ketre hna perofetane ka tru, ene lo hna thingehnaean e Edena. Ej a anyipicine ka hape, tro ha eatr asë la itre hnei Akötresie hna thingehnaean kowe la ihnadro me itre iatr.—E jë la Genese 3:15.

7. Nemene la hna amamane ngöne la hna thingehnaeane e Edena göne la un me matra i angeic?

⁷ Jëne la hna thingehnaeane e Edena, hnei Iehova hna ahnëjinëne la un, me matra i angeic, kola qeje Satana Diabolo me itre ka ce xöle me angeic troa icilekeu memine la musi cile i Akötresie. Hnei Iehova hna hamëne la men kowe la matra i föe troa lepe apatrene la itre ka icilekeu. Celë hi matre, kola amamane ngöne la hna thingehnaeane e Edena ka hape, tro ha apatrenyi Satana me itre ethanyine la icilekeu i angeic. Kolo fe a amamane ngöne la hna thingehnaeane celë la aqane tro lai a eatr elany.

8. Nemene la pengöne la föe me matra i angeic?

⁸ Drei la matrane la föe? Tha ketre atre kö ngo u pe. Pine nemene matre qaja jë së tune lai? Pine laka ame la matran, tro ej a ‘apatenyi’ Satana, ketre u. (Heberu 2:14) Haawe, ijije hi tro sa qaja ka hape, ame la föe ka troa hnahone lai matran, tre ketre u fe. Maine nyipici laka canga mama hi la matra ne la un nge ka canga kökötre la etrune ej, ngo ame la föe memine la matra i angeic, tre hna mama pë hë 4 000 lao macatre thupene lo ewekë hna thingehnaean e Edena. Nge ame ngöne la ijine cili, hnei Iehova hna kuca la sikisi lao isisinyikeu ka troa amamane trongëne la matrane la föe, me amamane la aqane tro Akötresieti a apatrene la itre ethanyine la icilekeu i Satana.

9. Nemene la aliene la isisinyikeu me Aberahama, nge eue la ijine ej a nyiqaane eatr?

⁹ Traqa koi 2 000 lao macatre thupene lo ewekë hna thingehnaean e Edena, hnei Iehova hna upi Aberahama troa trotrije la hnalapa i angeic e Ure a tro Kanana. (Ite Huliwa 7:2, 3) Öni Akötresie koi angeic: “Tropi qa ngöne la zi ’ö, me lapa i ’ö, me hnalapa ne la keme i ’ö, kowe la nöje tro ni a amamai ’ö ; nge tro ni a celohmë eö mate nöje atraqat, nge tro ni a amanathithi ’ö me atrune la ëje i ’ö ; nge tro eö a manathith ; nge tro ni a amanathithi angat’ angete amanathithi ’ö, me ëji angate angete ëji ’ö ; nge tro ha manathithi qa thei ’ö la nöjei lapa asë e celë fen.” (Genese 12:1-3) Kola hëne lai hna thingehnaean celë ka hape isisinyikeu me Aberahama. Ngacama tha nyipi mama kö koi së la ijine Iehova a kuca la  isisinyikeu cili, ngo atre hi së laka hna nyiqaane melëne lai ngöne la macatre 1943 qëmeke i Keriso. Kolo ijine Aberahama a 75 lao macatre nge angeice lo a tro qa Haran me sasaithe la hneopegejë ne Euferata.

10. (a) Nemene la ka anyipicine ka hape, ka catre la lapaune i Aberahama kowe la itre hna thingehnaean hnei Iehova? (b) Nemene la itre xa ithuemacanyi hnei Iehova hna hamëne göne la matrane la föe?

¹⁰ Hnei Iehova hna anyimua amexeje koi Aberahama lo hnei Nyidrëti hë hna thingehnaean me hamë angeic fe la itre xa ithuemacanyi. (Genese 13:15-17; 17:1-8, 16) Hnene laka tru catre la lapaune i Aberahama kowe la itre hna thingehnaean hnei Iehova, ame hnei angeic hna huujëne la nekö hnimina i angeic. Celë hi ka upi Iehova troa anyipicine la hnei Nyidrëti hna sisinyi koi Aberahama me qaja xeciëne ka hape tro eje lai a eatr. (E jë la Genese 22:15-18; Heberu 11:17, 18.) Thupene lo macatre 1943 qëmeke i Keriso, Iehova hi lai a nyiqaane hamëne trongëne la itre xa ithuemacanyi ka tru göne la matrane la föe. Ame la matrane cili tre tha ala casi kö ngo nyimu atrene pe, itre ka xulu qaathene la lapa i Aberahama nge ka troa joxu. Tro angatr a apatren elanyi la nöjei ithupëjia me Akötresie, me axulune la itre manathithi ka tru kowe la itre atr.

11, 12. Hna amamane tune kaa hnene la Tusi Hmitrötr ka hape, hetre ketre aqane troa eatr lo hna sisiny hnei Iehova koi Aberahama, nge nemene la aliene lai koi së?

¹¹ Hna pane eatre lo isisinyikeu me Aberahama ngöne lo ijine kola lö hnine la nöje hna thingehnaean hnene itre matra i angeic. Ngo, Tusi Hmitrötr a amamane hnyawa laka tru catre hmaca kö la itre manathithi hna troa kapa qa ngöne la isisinyikeu cili. (Galatia 4:22-25) Hnei Paulo lo hna qaja ka hape Iesu hi la igötranene ka tru ne la matra i Aberahama. Ame lai ketre igötranene tre kolo ala 144 000 keresiano hna iën. (Galatia 3:16, 29; Hna Amamane 5:9, 10; 14:1, 4) Nge ame la föe? Kolo götrane ka tha mama kö ne la organizasio i Iehova. Hna hëne lai föe cili ka hape “Ierusalema qa koho,” laka itre u ka nyipici  la itre atren. (Galatia 4:26, 31) Tune lo hnei Iehova hna sisinyi koi Aberahama, tro la matrane la föe a axulune elanyi la itre manathithi kowe la nöjei atr asë.

¹² Hnene la isisinyikeu me Aberahama hna anyipicine laka, tro ha hetre Baselaia e hnengödrai nge kolo fe a fe gojenyine la itre hna iën troa ce musi memine la Joxu ngöne la Baselaia. (Heberu 6:13-18) Uti hë eue la troa cile la isisinyikeu cili? Genese 17:7 a sa ka hape “isisinyikeu ka tha ‘se palua kö.” Tro ej a cil uti hë la troa apatrene paluan la itre ithupëjia i Akötresie, me amanathithine la nöjei lapa asë e celë fen. (1 Korinito 15:23-26) Ngo ame la itre manathithi hna troa kapa jëne la isisinyikeu cili tre ka epine palua. Ame la isisinyikeu cili? tre ketre hatrene laka atraqatre la aja i Iehova troa eatrëne lo aja i Nyidrë kowe la fen, ene la troa “atiqane la fene hnengödrai” hnene la itre atr ka meköt.—Genese 1:28.

13, 14. Nemene la hna anyipicine hnene la isisinyikeu me Davita?

¹³ Kola ini së hnene la hna thingehnaeane e Edena me isisinyikeu me Aberahama ka hape, hna nyitrepene pala hi la musi Iehova hune la itre trepene meköti Nyidrë. Celë hi matre hna hane nyitrepene fe la Baselaia Ne La Mesia hune la itre trepene meköti cili. (Salamo 89:14) Hapeu, tro kö a angazone la Baselaia Ne La Mesia? Tro kö a nyihnane elanyi la Baselaia cili? Kola anyipicine hnene la ketre isisinyikeu ka hape, tha tro pi kö a traqa tun.

¹⁴ Hetre ewekë hnei Iehova hna thingehnaeane koi Davita, ketre Joxu ekö e Isaraela. Hna hëne ka hape, isisinyikeu me Davita. (E jë la 2 Samuela 7:12, 16.) Hnei Iehova hna thingehnaeane ka hape, ketre matra i Davita elanyi la Mesia. (Luka 1:30-33) Qa ngöne lai, hnei Nyidrëti hna hamëne la itre ithuemacanyi göne la xötrapane ne la Mesia. Öni Nyidrë, tro la matra i Davita cili a “ate troa amekötine” matre troa Joxu ngöne la Baselaia. (Ezekiela 21:25-27) Troa cile hut la therone i Davita elanyi ke, “tro pala kö a eje la [“matra i angeic,” MN] memine la therone i angeice tune la jö qëmekeng,” kolo hi a qeje Iesu, matra i Davita. (Salamo 89:34-37) Eje hnyawa the së la mejiun laka, tha tro jë kö a angazone la musi ne la Mesia, nge tro kö a cile hut epine palua la itre manathithin!

15-17. Tune la hna qaja göne la isisinyikeu matre troa atre huuj tui Melekisedek, nemene la ketre huliwa ne la joxu ne la Baselaia, nge pine nemen?

¹⁵ Kola anyipicine hnene la isisinyikeu me Aberahama memine la isisinyikeu me Davita ka hape, tro ha joxu hnene la matrane la föe. Ngo maine kola ajane troa hetre thangane ka loi kowe la itre atr asë, ke, tha tro hmekuje kö a joxu hi. Nyipi ewekë fe tro la matran a hane kuca la hnëqa ne la atre huuj. Atre huuje hmekuje hi la ka ijije troa huuje matre troa thapa la itre atr qa ngöne la ngazo, me aijijë  angatre troa hane sine hmaca la lapa i Iehova e koho hnengödrai me e celë fen. Hnei Iehova hna kuca hmaca la ketre isisinyikeu matre troa mama hnyawa laka, atre huuje lo lai matran. Hna hëne la isisinyikeu cili ka hape, isisinyikeu matre troa atre huuj tui Melekisedek.

¹⁶ Hnei Akötresieti hna amamane jëne Davita Joxu laka, tro kö Nyidrëti a sipu isisinyikeu me Iesu. Lue ewekë hna qaja ngöne la isisinyikeu cili. Ame la hnapan, tro Iesu a ‘lapa ngöne la götrane maca i Akötresie,’ nge hetre mene i Nyidrë troa apatrene la itre ithupëjia me Nyidrë. Ame la hnaaluen, tro Iesu a “ate huje epine palua tune la pengö i Melekisedek.” (E jë la Salamo 110:1, 2, 4.) Pine nemene matre tro Iesu a atre huuj tune “la pengö i Melekisedek”? Qëmekene tro la itre matra i Aberahama a thapa lo Nöje Hna Thingehnaean, ame Melekisedek, tre, nyidrëti lo joxu ne la traon ne Salema, nge “ate huje koi Akötesie ka sisitia.” (Heberu 7:1-3) Iehova kö la ka sipu acili Melekisedek matre troa joxu me atre huuj. Angeice hmekuje hi la ka cilëne la lue göhnë cili qëmekene troa traqa hnei Iesu. Nge pine laka, pëkö ketre atr hna atre ka cilëne hë la hnëqa cili ekö, haawe, qeje Melekisedek ju pë hë ka hape, “ate huje palua kö.”

¹⁷ Kola mama ngöne la isisinyikeu cili laka, Akötresieti la ka sipu acili Iesu matre troa atre huuj. Tro kö Iesu a ketre “ate huje epine palua tune la pengö i Melekisedek.” (Heberu 5:4-6) Jëne la isisinyikeu celë, Iehova a anyipicine hnyawa laka, jëne la Baselaia Ne La Mesia, tro Nyidrëti a eatrëne elanyi la aja i Nyidrë kowe la itre atr me ihnadro.

18, 19. (a) Nemene la aqane iothekeune lo lai köni isisinyikeu memine la Baselaia? (b) Nemene la hne së hna troa ce ithanatane ngöne la tane mekune ka troa xulu?

¹⁸ Ase hë së ce ithanatane la köni isisinyikeu. Atre hë së la aqane iothekeune la itre isisinyikeu cili memine la Baselaia Ne La Mesia, memine fe la aqane eköthe la Baselaia hune la itre isisinyikeu. Hna anyipicine hnene lo hna thingehnaeane ekö e Edena laka, jëne la matrane la föe, tro kö Iehova a aeatrëne la aja i Nyidrë kowe la ihnadro me kowe la itre atr. Kola qaja hnene la isisinyikeu me Aberahama la pengöne la matran, memine la hnëqa ne lai matran.

¹⁹ Kola ithanatane atrune hnene la isisinyikeu me Davita la pengöne la xötrapan ne la Mesia. Kolo fe a qaja hnene la isisinyikeu cili laka, meköt tro Iesu a mus epine palua hune la ihnadro. Ame mina fe la isisinyikeu matre troa atre huuj tui Melekisedek, tre ej a anyipicine laka, tro la matran a ketre atre huuj. Ngo ame pe, tha Iesu hmekuje kö la ka troa xatuane la itre atr matre pexeje jë angatr. Hetrenyi kö la itre xa atr hna acile matre tro angatr a hane joxu me atre huuj. Ka xulu angatr qaa kaa? Tro pë hë së a sa la hnyinge celë ngöne la tane mekune ka troa xulu.