1, 2. (a) Pine nemene matre gomegome jë la ekalesia ne Kolose? (b) Nemene la eamo ka xatuane la itre trejine ne Kolose matre tro pala hi a cas?

KOLA cia la gomegome ekö ngöne la ekalesia ne Kolose pine laka, hnene la itre xa trejine hna qaja ka hape, tro la nöjei trejin a trongëne la Trenge Wathebo i Mose. Nge itre xan a qaja ka hape, tha loi kö troa kuci madrin. Ame hnei Paulo hna hmekë angatr qa ngöne la ethanyine la itre mekune cili, me hape: “Wange kö ke thöeë nyipunie hnei kete ate hnene la pi inamacane me tenge iaö nyine amenun, thenge la edomë i ate, me ite ini hnapane ne la fen, nge tha thenge Keriso kö.”—Kolose 2:8.

² Maine kei thenge ju hnene la itre Keresiano cili la itre mekuna i atr, haawe, tro hë angatre lai a nuetrije la edrö i angatr, ene la troa itre nekö i Akötresie. (Kolose 2:20-23) Hnei Paulo hna xatua angatr troa wangatrune la imelekeu i angatr me Iehova me hape: “Hninejë [maine goeëne hutine jë] nyipunie la nöjei ewekë e koho, ngo the hnine kö la nöjei ewekë e celë fen.” (Kolose 3:2) Nyipi ewekë tro itre Keresiano hna iën  cili a mekune pala hi la edrö i angatr troa mele e hnengödrai epine palua.—Kolose 1:4, 5.

3. (a) Nemene la mejiune ka eje thene la itre Keresiano hna iën? (b) Nemene la itre hnyinge nyine tro sa ce ithanatane ngöne la itre tane mekune celë?

³ Hnene fe la itre keresiano hna iën enehila hna goeëne hutine la baselaia i Akötresie, memine la edrö i angatr troa “ce matrane me Keriso” e hnengödrai. (Roma 8:14-17) Ngo tune kaa pë hë kowe la itre ka mejiun kowe la mele e celë fen? Nemene la aqane eatre la itre hna ithanata i Paulo koi angatr? Nemene la aqane tro angatr a goeëne hutine “la nöjei ewekë e koho”? (Ioane 10:16) Hnei Aberahama me Mose hna goeëne hutine la itre ewekë e koho, ngacama traqa ju hë la itre jole koi nyidro. Tro sa nyitipu nyidro tune kaa?

4. Nemene la aqane tro sa goeëne hutine la itre ewekë e koho?

⁴ Loi e tro la itre ka mejiune troa mele e celë fen a goeëne hutine la itre ewekë e koho. Angatre hi a ujë tune lai ngöne la angatr a amë panë Iehova me Baselaia i Nyidrë ngöne la mele i angatr. (Luka 10:25-27) Celë hi hna kuca hnei Keriso, nge nyine tro fe së lai a kuca. (1 Peteru 2:21) Hna haöthe la hneijine i itre pane Keresiano hnene la itre mekune ka thoi, me itre inamacane i atr, me pi aja mo. Easë fe a hane öhne la itre ewekë cili enehila ngöne la fene i Satana. (E jë la 2 Korinito 10:5.) Nyipi ewekë tro sa nyitipu Iesu me thupëne matre, pëkö ketre ewekë ka troa angazone la aqane imelekeu së me Iehova.

5. Ame göi mani me pi hetreny, nemene la itre hnyinge nyine tro sa lapa mekun?

⁵ Hna hane kö ajolë së hnene la aqane wange la fen la mani me pi hetreny? Easa amamane la hne së hna hnin jëne la itre mekuna së me itre huliwa së. Celë hi hnei Iesu hna qaja la kola hape: “Ame la hna amë la tenge nyi ’ö ngön, te, eje fe hi la hni ’ö.” (Mataio 6:21) Loi e tro sa isa sipu waipengö se ka hape, ‘Nemene la ka tru koi së.’ Tru kö hnei traeme hne së hna xome troa thele mani, me troa hetre huliwa ka loi, maine troa hetre mele ka loi? Maine pena hne së kö hna thele troa ahmaloeëne la mele së matre troa acatrene la imelekeu së me Iehova? (Mataio 6:22) Öni Iesu, maine tro sa catre thele troa amë thatraqa së la “tenga mo e celë fen,” tro lai a luzi la aqane imelekeu së me Iehova.—Mataio 6:19, 20, 24.

6. Tro sa hune tune kaa ngöne la easa isi memine la itre aja së?

⁶ Qa ngöne laka itre atr ka tha pexeje kö së, haawe, tha jole kö koi së troa kuca la ngazo. (E jë la Roma 7:21-25.) Eje hi laka, maine tha mejiune kö së kowe la uati hmitrötre i Akötresie, tro hë së lai a hane sine la ‘itre feet, me hmo hnei ka hait,’ me kuci ngazo, me “inagala [maine aqane ujë ka sis],” nge pë hë metrötre së lai kowe la itre wathebo i Akötresie. (Roma 13:12, 13) Ka isi pala hi së memine la itre aja së ka ngazo. Ngo tro së lai a hun, e hne së hna goeëne hutine la itre ewekë e koho. Celë hi matre hnei Paulo hna qaja la enyipiewekëne troa catr, öni angeic:  “Ini a xom’ acone la ngöneteing, me tha hluën’ ej.” (1 Korinito 9:27) Loi e tro mina fe sa xomehnöthe la itre aja së. Tro sa ce wange la tulu ne la lue hlue i Iehova.—Heberu 11:6.

7, 8. (a) Nemene la itre jole ka traqa koi Aberahama me Sara? (b) Nemene la hnei Aberahama hna lapa mekun?

⁷ Ame la Iehova a upi Aberahama troa feke me lapa i angeic kowe la nöje Kanana, hnei Aberahama hna canga dreng me tro. Ame hnei Iehova hna amanathithine la lapaune i Aberahama, me kuca la ketre isisinyikeu me angeic. Öni Iehova koi angeic: “Tro ni a celohmë eö mate nöje atraqat, nge tro ni a amanathithi ’ö me atrune la ëje i ’ö ; nge tro eö a manathith.” (Genese 12:2) Tru la itre macatre ka tro, nge pë pala hi neköi Aberahama me Sara. Hapeu, hnei Aberahama kö hna mekune ka hape, ase hë Iehova thëthëhmine lo hnei Nyidrëti hna sisinyi koi angeic? Ame ngöne la ijine cili, tha ka hmaloi kö la mele i Aberahama. Hnei angeic hna trotrije la mele ka loi e Ure, traone i angeic, me trongëne la 1 600 km kowe la nöje Kanana. Hnei angeice me lapa i angeic hna mele ngöne la itre uma mano, nge ame itre xa ijin, tha xeni hnyawa kö angatr, nge gaa hetre atrekënö ngöne la itre gojenyi angatr. (Genese 12:5, 10; 13:18; 14:10-16) Ngo, tha cia pi kö la aja thei angatre troa bëeke hmaca Ure eë.—E jë la Heberu 11:8-12, 15.

⁸ Hnei Aberahama hna “lapaune koi Iehova” nge tha goeëne hutine kö angeic la “ite ewekë e celë fen.” (Genese 15:6) Hnei angeic hna mekune pala hi la itre hna thingehnaean hnei Iehova koi angeic. Tha sihngödri kö koi Iehova la aqane lapaune Aberahama, matre öni Nyidrëti ka hape: “Galajë hnengödrai ’ë, nge ejë la nöjei wëtesij, maine ateine eö troa e it’ ej ; nge olongai anganyidë koi angeic, ka hape, Tro hi a tune la ite matra i ’ö” (Genese 15:5) Ame ju hi la Aberahama a drenge la trenge ithananta celë, xeci hnyawa pi koi angeic laka, tha thëthëhmi angeice kö hnei Iehova. E goeëne mina ha angeice la itre wëtresij, mekune mina jë hi angeice lo hna thingehnaean hnei Iehova ka hape, tro ha mana la itre matra i angeic. Matre ame hë ngöne la ijine hna sa hnei Iehova, eatre hnyiwa ju hi la hna thingehnaean laka, troa hnahone la nekönatre trahmany.—Genese 21:1, 2.

9. Tro sa nyitipu Aberahama tune kaa?

⁹ Tui Aberahama, easa fe a lapa treqene tro Iehova a eatrëne la itre hnei Nyidrëti hna thingehnaean. (2 Peteru 3:13) Maine tha easë kö a goeëne hutine la itre ewekë e koho, tro hë së lai a mekune ka hape, tha ijine tro pala kö Nyidrëti a eatrën itre ej, matre tha catre hmaca kö së nyihlue i Iehova tune ekö lo. Maine jë hnei epuni ekö hna hane ahmaloeëne la mele i epuni matre troa hane pionie maine xome la ketre aqane huliwa i Akötresie  o drai. Ngo nemene hë la hnei epuni hna kuca enehila? Epuni kö a nyitipu Aberahama, atre kuca asë la hnei angeic hna atreine koi Iehova, me lapa treqene la itre manathith? (Heberu 11:10) Pine la hnei Aberahama hna “lapaune koi Iehova,” hna qeje angeic ka hape, ehnemu i Akötresie.—Roma 4:3.

10. Nemene la aqane hetru Mose?

¹⁰ Mose la ketre atr ka goeëne hutine pala hi la itre ewekë e koho. Hna hetru angeic ngöne la hnalapa ne la joxu ne Aigupito lo Aigupito a musi ka tru ne la fen. Öni Tusi Hmitrötr, “hna ini Mose la nöjei inamacane asë i angete Aigupito.” Hnene la ini ka tru cili hna kapa hnei Mose, matre “mene angeice ngöne la ite hna ewekë me ite huliwa i angeic.” (Ite Huliwa 7:22) Qa ngöne la aqane hetru Mose, tro angeice lai a atr ka hlemu e Aigupito. Ngo hetre ketre ini kö hna kapa hnei Mose ka sisitria catre hmaca kö koi angeic.

11, 12. Nemene la ini ka sisitria koi Mose? Hne së hna atre tune kaa?

¹¹ Ame lo Mose a nekönatr, hnei Iokebeda thine i angeic, hna ini angeice la Akötresi angetre Heberu. Ka sisitria catre kö koi Mose la ini celë. Qa ngöne lai, hnei Mose hna trotrije la itre mo me musi e Aigupito, matre troa kuca la aja i Akötresie. (E jë la Heberu 11:24-27.) Haawe, hnene la ini hna pane kapa hnei Mose me mejiune i angeic koi Iehova, hna xatua angeic troa goeëne hutine la itre ewekë e koho.

¹² Ngacama hnei Mose hna kapa la ini ka sisistria ekö, ngo tha hnei angeice kö hna thele troa pi mama fë me hlemu, maine troa trena mo e Aigupito. Hnei Tusi Hmitrötr pe hna qaja göi Mose ka hape, “Mose a xele e qeje angeice hmaca nekö ne la nekö i Farao jajiny nge nyipi atë hë nyidë ; nge kola ajane troa ce xome la ngazo memine la nöje i Akötesie, hune la troa madine fë la ngazo ka canga pat.” Hnei Mose e thupene hna huliwane la inamacane i angeic troa elemekene la nöje i Akötresie.

13, 14. (a) Nemene la ka nyipi ewekë koi Mose göi troa thapa la nöje i Iehova? (b) Nemene fe la ka nyipi ewekë koi së?

¹³ Atraqatre la ihnimi Mose koi Iehova memine la nöje i Nyidrë hna thahluën e  Aigupito. Matre ame ju hi la kola 40 lao macatre i Mose, mekune jë hi angeic troa lö sai angetre Isaraela qaa Aigupito. (Ite Huliwa 7:23-25) Ngo atre kö Iehova laka, tha ijiji Mose pala kö. Nyipi ewekë pala kö tro angeic a inine troa ipië, me xomihni, me menyik, me atreine xomehnöth. (Ite edomë 15:33) Nyipi ewekë mina fe troa hnëkë Mose kowe la itre jole ka tru ka troa traqa elany. Haawe, ketre ixatua ka tru koi Mose la 40 lao macatre hnei angeic hna thupë mamoe matre hetrenyi pi la itre thiina cili.

¹⁴ Hapeu, ka hetre thangane kö lai hna melëne hnei Mose? Eje hi. Öni Tusi Hmitrötr göi angeic, “ate ka nyipi menyike Mose hune la nöjei ate asë e celë fen.” (Numera 12:3) Pine laka hnei Mose hna inine troa xomihni, atreine hë angeic xomihnine la nöjei pengöne atr memine la nöjei jole ka traqa. (Esodo 18:26) Nyipi ewekë mina fe koi së troa hetrenyi la itre thiina cili göi troa xatua së ngöne la ijine “aköte atraqate,” me ngöne la ijine troa lö kowe la Paradraiso. (Hna amamane 7:14) Hapeu, atreine kö së ce mele memine la itre xa atr tune lo itre atr ka canga wesitr me ka drengakötrëne la itre hna qaja, maine hna kuca koi angatr? Tro la itre ithanata i Peteru a xatua së, öni angeic:  “Atrunejë la nöjei ate asëjëihë. Hnimeju la ange tejin.”—1 Peteru 2:17.

15, 16. (a) Pine nemene matre loi e tro sa goeëne hutine la itre ewekë ka loi? (b) Pine nemene matre nyipi ewekë tro la itre Keresiano a thupëne la aqane ujë i angatr?

¹⁵ Easa mele enehila ngöne “la nöjei ijine ka aköte.” (2 Timoteo 3:1) Celë hi kepine matre nyipi ewekë tro sa goeëne hutine la itre ewekë ka lolo, itre ewekë ka troa aeasenyi së catre koi Iehova. (1 Thesalonika 5:6-9) Tro sa ce wange la könitre.

¹⁶ Aqane ujë së: Hnei Peteru hna qaja la enyipiewekëne la aqane ujë, ngöne lo angeic a qaja ka hape: “Loi e thina ka loi nyipunie qëmeke ne la nöjei ethen.” Öni angeice fe ka hape, ame la itre atr ka thatre Iehova, tre, tro angatr a öhne la thiina së, nge “tro angat’ a atrunyi Akötesie.” (1 Peteru 2:12) Haawe, loi tro fe sa hane atrunyi Iehova jëne la aqane ujë së, easë ju hë ngöne hnalapa, maine ngöne hna huliwa, maine ngöne hna ini, maine ngöne la easa elo, maine ngöne la easa cainöje trootro. Eje hi laka, itre atr ka tha pexeje kö së, matre ka tria asë hi së. (Roma 3:23) Ngo catre pi së! Maine ce Iehova me easë, tro hë sa ‘isine la isi ka loi ne la lapaun.’—1 Timoteo 6:12.

17. Tro sa xötrethenge tune kaa la aqane mekuna i Iesu? (Wange ju la pane iatr.)

¹⁷ Aqane mekune së: Nyipi ewekë tro sa thupëne la aqane mekuna së, ke, hetre thangane lai ngöne la aqane ujë së. Öni Paulo aposetolo: “Loi e ej’ e kuhu ite hni nyipunie la mekune celë, lo ka eje thei Keriso Iesu.” (Filipi 2:5) Matre nemene la pengöi Iesu me aqane mekune i nyidrë? Ka hni ka ipië nyidrë, nge celë hi thiina lai ka aciane thei nyidrë la aja ne troa catre huliwa koi Iehova. Hna lapane pala hi la mekuna i nyidrë hnene la huliwa ne cainöj. (Mareko 1:38; 13:10) Haawe, maine tro sa mekune tui Keriso, tro hë së lai a hni ka ipië me catre cainöj.

18. Nemene la lue aqane tro sa sajuëne la huliwa i Iehova?

¹⁸ Aqane ixatua së: Aja i Akötresie tro “angete hnengödrai, me fene hnengödrai” a drengethenge Iesu. (Filipi 2:9-11) Maine nyipici laka, ka tru catre la götrane qa hnei nyidrëti hna xom, ngo hnei nyidrëti pala hi hna drengethenge la Tretretro i Nyidrë. Loi e tro mina fe sa hane tui nyidrë. (1 Korinito 15:28) Easa huliwa i Iehova ngöne la easa “inine la nöjei nöj’ asëjëihë.” (Mataio 28:19) Easë fe a “kuca la loi kowe la nöjei ate asëjëihë,” ngöne la easa thiina ka loi kowe la itre atr ka lapa ezi së, memine la itre trejine me easë.—Galatia 6:10.

19. Nemene la nyine tro sa catre kuca?

¹⁹ Easa olene atraqatre koi Iehova la hnei Nyidrëti hna upi së troa goeëne hutine la itre ewekë e koho! Ka nyipi ewekë catre koi së “tro sha nyenyape fë la xomi hnine,” me troa goeëne hutine la itre ewekë ka lolo. (Heberu 12:1) Catre pi së huliwa me ‘kuca hnine kösë koi Iehova,’ me isa atre hnyawa laka, tro kö la Tretretro së e koho hnengödrai a isa amanathithi së.—Kolose 3:23, 24.