1, 2. (a) Nemene la hna thele troa atre hnene la itre hene ne hmi, nge nemene la aqane sa i Peteru? (Wange ju la pane iatr.) (b) Pine nemene matre tha xou i Peteru hë troa qaja la mekuna i angeic?

 ITRE wiike thupene la hna meci hnei Iesu, hnei aposetolo Peteru hna cile kowe la itre hene ne hmi ne Iudra ka iaxoueny. Kolo itre ka ce eköthe la ngazo troa humuthi Iesu. Ame la ijine cili, tru la elëhni angatr koi Peteru pine la hna aloine la atr ka thatreine tro. Angatr a hnyinge koi Peteru me hape: “Hnene la mene ka ue, nge hnene la ëje i dei hnei [epon] hna kuca la ewekë cili ?” Canga öni Peteru jë hi: “Hnene la atesiwa i Iesu Keriso ate Nazareta, lo hnei nyipunie hna asatauron, nge hnei Akötesie hna amelene hmaca qa hna mec, ame la cile la ate celë qëmeke i nyipunie hna aloine, te, hnei nyidëti hi.”—Ite Huliwa 4:5-10.

² Qëmekene troa traqa la ewekë celë, hnei Peteru lo hna pane xou, me akönia kelikelë Iesu. (Mareko 14:66-72) Ngo ame enehila, tha xou i Peteru hë, angeic a qëmeke kowe la itre hene ne hmi. Pine nemen? Pine laka, tha hnene hmekuje kö laka eje thei angeic la uati hmitrötr, ngo hnene fe laka xecie hnyawa koi angeic, ka hape, ka mele Iesu. Pine nemene matre xecie hnyawa jë koi angeic? Nge pine nemene  matre ka loi e tro fe sa hane hetrenyi la mejiune cili?

3, 4. (a) Drei la hna amelene hmaca qëmekene lo hneijine ne la itre aposetolo? (b) Drei la itre hnei Iesu hna amelene hmaca?

³ Atre hnyawa hi la itre aposetolo ka hape, tro ha mele hmaca hnene la itre ka mec. Tha ase petre kö hnahone la itre aposetolo, nge hnei Akötresieti hë ekö hna hamëne la atreine kowe la lue perofeta, Elia me Elisaia troa amelene la lue ka meci hë. (1 Ite Joxu 17:17-24; 2 Ite Joxu 4:32-37) Goi amelene fe la ketre ka meci hë hnene la hna ketr la trepe june i Elisaia. (2 Ite Joxu 13:20, 21) Ka mejiune la itre pane Keresiano kowe la itre ewekë celë ka traqa ekö, tu së fe enehila, easa mejiune laka, ka nyipici la Wesi Ula i Akötresie.

⁴ Nyipici laka, kola ketre hnyawa la hni së la easa e la Iesu a amelene hmaca la itre ka meci hë. Pane mekune jë la etrune la madrine ka eje thene la sine föe, la Iesu a amelene hmaca la nekö i eahlo ka cas. (Luka 7:11-15) Nge tune kaa fe lo Iesu a amelene ekö lo nekönatre jajiny? Eje hi laka, atraqatre la madrine ne la keme me thin la kola goeën la nekö i nyidro a mele hë, matre patre ju hi lo hleuhleu i nyidro! (Luka 8:49-56) Nge drei fe la etrune la madrine ne la itre atr ekö lo angatr a öhnyi Lazaro a lö pi qa ngöne la hua!—Ioane 11:38-44.

5. Nemene la eisapengönene la melehmaca i Iesu memine la itre xa melehmaca ekö?

⁵ Atre hnyawa hi la itre aposetolo ka hape, tha ceitu kö la melehmaca i Iesu memine la itre xa melehmaca ekö. Ame lo itre atr hna amelene hmaca ekö, tre, hna amele angatr memine la ngönetrei i angatr, ame hna meci hmaca pi e thupen. Ngo ame Iesu, u la kola amele nyidrë, matre thatreine hmaca kö troa hnyeqetr. (E jë la Ite Huliwa 13:34.) Öni Peteru, “hna humuthi [Iesu] ene la ngönetei, ngo hna amelene ene la u.” Ketre, “nyidëti hë ngöne la götrane maca i Akötesie ; nge kola denge thenge nyidë hnei nöjei angela, me itete mus, me nöjei men.” (1 Peteru 3:18-22) Ngacama hna haine la itre xa melehmaca, ngo ka sisitria catre kö la melehmaca i Iesu.

6. Hnene la melehmaca i Iesu hna acatrene tune kaa la mejiunen ne la itretre dreng?

⁶ Hnene la melehmaca i Iesu hna acatrene hnyawa la mejiune ne la itretre dreng. Tha meci palua ju kö Iesu tune la hna mekune hnene la itre ithupëjia me  nyidrë. Ngo u ka mel me ka men hë nyidrë, nge pë hmaca kö atr ka atreine troa ketri nyidrë. Hna amamane jëne la melehmaca i Iesu ka hape, nyidrë la Hupuna i Akötresie. Atre jë hi la itretre drenge laka mele hë Iesu, patre pi hi la hleuhleu i angatr, nge tha xou hë angatre. Kolo pe a kökötre catr la mejiune i angatr. Maine tha hna amele Iesu ju, thatreine jë kö troa ie la aja i Akötresie, nge tro ha gufa la maca ka loi hnei angatre hna cainöjën.

7. Nemene la hna kuca hnei Iesu enehila, nge nemene la lue hnying nyine tro sa sa?

⁷ Atre hnyawa hi së ka hape, atr ka tru Iesu ekö. Nge ame enehila, nyidrëti la ka elemekene la huliwa ne cainöj e cailo fen. Nyidrëti fe la Joxu ne la Baselaia i Akötresie e hnengödrai, nge easenyi hë matre apatrene pi nyidrëti la ngazo me aparadraison la fen; hnë tro la atr a mele epine palua. (Luka 23:43) Maine tha amele Iesu ju ekö, ka gufa asë la nöjei ewekë celë. Haawe, pine nemene matre loi e troa xecie hnyawa koi së laka hna amele Iesu hmaca qa hna mec? Nge nemene la aliene la melehmaca i nyidrë koi së?

8, 9. (a) Pine nemene matre upe jë la itretre thup hnene la itre hene ne hmi troa thupëne la hua i Iesu? (b) Nemene la ewekë ka traqa kowe la lue föe ngöne la hua?

⁸ Thupene la hna humuthi Iesu, hna traqa hnene la itre hene ne hmi koi Pilato me hape: “Joxu, eëhuni a hnine la hna qaja hnene la ate amenune cili, nge mele pete kö, ka hape, Thupene la köni drai tro ni a mele hmaca jë. Qa ngöne lai, ahnitheju mate troa acatene la hua uti hë la drai hnaakönin, wanga traqapi la angete dei nyën’ e jidi troa ënö nyën, me hape kowe la nöj, Mele hmaca ha nyëne qa hna mec ; ame hna tru la menu hnapine hune la hnapan. Öni Pilato koi angat, ka hape, Hetenyi kö nyipunie la itete thup ; trojë, qâ i nyipunieti kö troa acatene hnyawa.” Celë hi hna kuca hnei angatr.—Mataio 27:62-66.

⁹ Ame la ijine cili, hna ami Iesu ngöne la ngönemenyi, nge hetre etë ka isaisa ka thinge la hnë lö. Nge ame la ajane la itre hene ne hmi, tha tro kö a patre qaa lai la ngönetrei Iesu. Ngo tha mekuna i Iehova kö lai. Köni drai thupen, kola traqa kowe la hua hnei Maria Magadalena me ketre Maria, lue atre drei Iesu. Ame e cili, traqa nyidroti a öhne la etë a hna kötrënë hë, nge angela a lapa të hun. Hnene la angela hna upe la lue föe troa lö kowe la hua, me wang a pë hë alien. Öni angela koi nyidro: “Patë hë nyidëti la ; ke mele hmaca ha nyidë.” (Mataio 28:1-6) Mele hë Iesu!

10. Nemene la ka anyipicine ka hape, mele hmaca ha Iesu?

¹⁰ Hna anyipicine lai hnene la itre ewekë ka traqa ngöne la 40 lao drai thupen. Öni Paulo kowe la angetre Korinito: “Hnenge hna pane amamane koi nyipunie lo hnenge hna kapa, laka hnei Keriso hna elelengë göi ite ngazo shë thenge la ite hna cinyihan ; nge hna kelemi anganyidë, nge hna amelene hmaca ngöne la drai hnaakönine thenge la ite hna cinyihan ; nge hna xajawa nyidë hnei Kefa, nge thupene lai hnene la ala luako ; thupene lai hna ce xajawa nyidë hnei ange tejine ka  tripi la o hadede me sin ; ala nyimu angat’ a mele uti hë la, ngo ite xan’ a meköl ; thupene lai hna xajawa nyidë hnei Iakobo ; thupene lai hnei ange aposetolo asë ; thupe i angat’ asë hnenge fe hna xajawa nyidëti kösë ka traqa ija.”—1 Korinito 15:3-8.

11. Nemene la hna eatrëne hnene la melehmaca i Iesu “thenge la ite hna cinyihan”?

¹¹ Mele hmaca ha Iesu “thenge la ite hna cinyihan.” Hnene la Wesi Ula i Akötresie hna qaja amë hë la melehmaca i nyidrë. Hanawange la ketre ceitun, hnei Davita hna cinyihane ka hape, tha tro kö la “Kahmitöte” i Akötresie a lapa hut ngöne la hua. (E jë la Salamo 16:10.) Ame la drai ne Penetekos 33, öni Peteru, Iesu hi la “Kahmitöte” lo angeic a qaja ka hape: “Hna pane wangate hmekune lai hnei [Davita] me qaja ngöne la mele hmaca Keriso, laka tha hna nue tiji nyidëti kö e hedis, kete tha öhne kö la hnyeqete hnene la ngönetei nyidë.”—Ite Huliwa 2:23-27, 31.

12. Drei la itre ka öhnyi Iesu a mele hmaca ha?

¹² Nyimu ka öhnyi Iesu a mele hmaca ha. Ame ngöne la 40 lao drai thupene la melehmaca i Iesu, hnei nyidrëti hna mama kowe la itretre drei nyidrë ngöne la hna gatran ezine la hua i nyidrë, me ngöne la gojenyi ne tro kowe la neköi traon e Emao, me ngöne la itre xa götrane ju kö. (Luka 24:13-15) Hnei nyidrëti hna ithanata kowe la itre atr, tui Peteru, me itre xa angetre dreng ka ca lapa. Ame la ketre ijin, hnei Iesu hna iamamanyi kowe la ka ala nyim, hna sasaithe la 500 la etrun. Ijije hi tro sa hane qaja ka hape, mele hmaca ha Iesu, ke nyimutre la itre atr ka öhne ka hape, mele hmaca ha nyidrë.

13. Kola mama tune kaa hnene la aqane cainöje ne la itretre drenge laka, xecie hnyawa koi angatr ka hape, mele hmaca ha Iesu?

¹³ Hnene la itretre drenge hna catre cainöjëne la melehmaca i Iesu. Hna qanangazo angatr, me axösisin, me humuthi angatr pine la huliwa ne cainöj. Pane mekune jë la ewekë celë: Maine tha hna amele Iesu ju, tro kö Peteru a nue mel troa cainöjëne la melehmaca i Keriso kowe lo itre atr ka methinë nyidrë, me ka ce eköthe la ngazo troa humuthi nyidrë? Xecie hnyawa koi Peteru me itre xa angetre dreng laka, ka mele Iesu, nge nyidrëti a elemekene la huliwa ne cainöj. Ketre, hnene la melehmaca i Iesu hna thue mejiunene la itretre dreng, laka, tro fe a hane amele angatre hmaca elany, tune lo pengöi Setefano; hna meci atre hnei angeic ka hape, tro ha amele angeice hmaca.—Ite Huliwa 7:55-60.

14. Pine nemene matre easa mejiune laka ka mele Iesu?

¹⁴ Hetre nyine anyipicine ka hape, joxu hë Iesu enehila, nge nyidrëti la tane la ekalesia i Kerisiano. Ka kökötre loi pala hi enehila la hmi Keresiano. Hapeu, tro kö lai a traqa tun, e tha hna amele Iesu ju ekö? Eje hi laka, maine tha hna amele Iesu ju ekö, tha tro pi kö sa hane drenge la kola qeje Iesu. Nyimu kepine matre easa mejiune laka, ka mele Iesu nge nyidrëti a elemekene la huliwa ne cainöj e cailo fen.

15. Pine nemene matre melehmaca i Iesu la ka hamë trenge catre së troa cainöj?

¹⁵ Melehmaca i Iesu la ka hamë trenge catre së troa cainöj. Qaane lo hneijine i Iesu, hna kuca la nöjei ewekë hnene la itre ithupëjia me Akötresie göi troa aene la huliwa ne cainöj. Kola qaja la iamenumenu, me ihnyimasai, me iakötrë, me  iwathebo, me iaxösisi, me ihumuth. Ngo, ase hë Tusi Hmitrötr qaja amë ka hape: “Pëkö ewekë hna kuca nyine ishi me [eö] hna troa ien.” (Isaia 54:17) Tha xou së kö la itre atr hna huliwane hnei Satana, ke, tro Iesu a xatua së tune la hnei nyidrëti hna thingehnaeane koi së. (Mataio 28:20) Tha luelue kö së, ke ngacama kuca ju hë hnene la itre ithupëjia me easë la nöjei ewekë, ngo pëkö ka atreine troa sewe së troa cainöj!

16, 17. (a) Nemene la aqane anyipicine hnene la melehmaca i Iesu la nöjei ini hnei nyidrëti hna tro fë? (b) Tune la hna qaja hnei Ioane 11:25, nemene la nyine troa kuca hnei Iesu memine la men qaathei Iehova?

¹⁶ Melehmaca i Iesu la ka anyipicine la nöjei ini hnei nyidrëti hna tro fë. Hnene la ketre atre ithanatane la Tusi Hmitrötr hna cinyihane ka hape, maine tha amele Iesu ju ekö, haawe, ka hmo la itre Keresiano, nge angatr a mejiune kowe la trengathoi. Öni Paulo, maine tha amele Iesu ju, ka gufa la cainöje me lapaunene la itre Keresiano. Haawe, kösë ame la itre hna qaja ngöne la itre evangelia, tre, ketre ewekë hi hna sil göi troa qaja la hna melëne hnene la ketre atr loi thiina, nge hna humuthe hnei itre ithupëjia. Ngo ame pe hna amele Iesu hmaca, matre celë hi ka anyipicine la nöjei ini hnei nyidrëti hna tro fë.—E jë la 1 Korinito 15:14, 15, 20.

¹⁷ Öni Iesu: “Ini hi la mele hmaca, memine fe la mel ; ame la ate lapaune koi ni, ngaca ma meci hë, te, tro angeic’ a mel.” (Ioane 11:25) Haawe, tro ha mele la angetre lapaune koi nyidrë, jëne la hna thingehnaeane celë. Eje hë thei Iesu la mene i  Iehova göi troa amele ange ka troa ce musi me nyidrë e hnengödrai, me itre miliare fe lao atr ka troa mele pe e celë fen. Kola anyipicine hnene la mele hnei Iesu hna huujëne me melehmaca i nyidrë ka hape, pë hmaca kö mec. Celë hi matre ngöne la itre itupath, maine easë pena a troa mec, hetre trenge catre së troa cile hut.

18. Nemene la hna anyipicine hnene la melehmaca i Iesu?

¹⁸ Melehmaca i Iesu la ka anyipicine laka, troa amekötine elanyi la itre atr thenge la itre trepene meköti Iehova. Öni Paulo kowe la itre trahmanyi me föe ne Athena ngöne la ijine angatr a ithikeu ka hape, tro Akötresieti elanyi a “hnyingën’ amekötine la fene hnene la ate hnei nyidëti hna acil ; nge hna anyipicine hnei nyidë kowe la nöjei ate asë, ngöne la hna amele nyidëti hmaca jë qa hna mec.” (Ite Huliwa 17:31) Hnei Akötresieti hna acili Iesu troa iameköti, nge tha luelue kö së laka, meköti me ihnim elanyi la pengöne la aqane iameköti nyidrë.—E jë la Isaia 11:2-4.

19. Nemene la ka amamane ka hape, hna ketr la hni së hnene la melehmaca i Iesu?

¹⁹ Pi tro sa kuca la aja i Akötresie hnene la mejiune ka eje the së kowe la melehmaca i Iesu. Maine patre ju la mec me melehmaca i Iesu, itre ka tro pë hë së lai a lapa palua fene la ngazo me mec. (Roma 5:12; 6:23) Ketre, hnene laka pëkö nyine tro sa mejiune kow, tro pe hi së lai a hape: “Tro sha xeni me iji, ke elanyi la tro sha mec.” (1 Korinito 15:32) The nyenyape thele menune kö la itre elolone la fen. Mejiune catrëne jë pe kowe la melehmaca, me catre drengethenge Iehova.

20. Nemene la aqane anyipicine la edraië i Akötresie hnene la melehmaca i Iesu?

²⁰ Melehmaca i Iesu la ka anyipicine la edraië i Iehova, lo Atre “nyi june koi angete thele catë nyidë.” (Heberu 11:6) Jëne la mene ka pë san me inamacane i Iehova, hnei Nyidrëti hna amele Iesu hmaca hnengödrai eë, nge gufa ha la mec. Hnei Akötresieti fe hna amamane la atreine i Nyidrë troa eatrëne la itre hnei Nyidrëti hna thingehnaean. Kolo fe a qaja lo ‘matran’ atre troa nyinyine lo jol göne la ka troa cilëne la mus ngöne la hnengödrai me fen. Troa eatre la hna thingehnaean, e tro la ‘matran’ ene Iesu, a pane mec me mele hmaca.—Genese 3:15.

21. Nemene la aliene koi epun la mejiune kowe la melehmaca?

²¹ Tro sa olene catrëne koi Iehova pine la mejiune kowe la melehmaca. Tusi Hmitrötr a thingehnaean ka hape: “Hana wang, thei nöjei ate la uma ne heta i Akötesie, nge tro nyidëti a lapa thei angat, nge tro angat’a nöjei nyidë ; nge tro nyidëti Akötesieti a ce me angat, ene Akötesi angat. Nge tro nyidëti a köle tije la nöjei tenge timida asëjëihë qa ngöne la ite lue meke i angat ; nge pa hmaca kö mec ; me hace hni me teij, me aköt ; ke patë hë la ite ewekë hnapan.” Hna hamëne la hna thingehnaeane celë koi Ioane aposetolo me hape koi angeic: “Cinyihaneju ; ke nyipici me meköti la nöjei tenge ewekë cili.” Drei lai ka amamane koi Ioane? Iesu Keriso hi lo hna amelene hmaca!—Hna Amamane 1:1; 21:3-5.