HULIWA ne cainöj la huliwa ka nyipi ewekë catr nyine troa kuca e cailo fen. Ketre ahnahna ka tru catr troa nyi trenge ewekë i Iehova ngöne la kola cainöje trootro. Ngo eje hi laka, ame itre xa ijin, jole pi hë kowe la itre pionie me itre xa trejin tro pala hi a cainöje catr. Pine nemen?

Ala nyimu la itre trejin ka qaja ka hape, tha tru kö la hnei angatr hna ithanata ngöne la hna cainöj trootro, ke xalaithe hi la itre atr ngöne la itre hnalapa. Nge ame pena la itre ka lapa hnalapa, tre, xele angatr ma kapa la maca ka loi. Nge ame itre xa trejin, tru catre pala ha la itre huliwa i angatr ngöne la itre götrane hnei angatre hna cainöje ngön ke ala nyimu la itre ka kapa la maca ka loi, matre tru pala kö hnei atr hna troa cainöje kow. Nge itre xane pena a kucakuca pine laka, ekö hë angatr cainöj nge tha traqa pala kö la pune la fene celë.

Tha sesëkotre kö së la kola ajolë së troa kuca la huliwa ne cainöje, ke easa mele ngöne la fene hna musinën hnene la “ate ka ngazo,” ene Satana Diabolo.—1 Ioane 5:19.

Ngacama traqa ju hë koi epuni la itre jol ngöne la hna cainöj, ngo troa xecie hnyawa koi epuni laka tro kö Iehova a xatua epuni troa elë hune itre ej. Ngo nemene la nyine tro epuni a kuca matre akökötrene la aja i epuni troa catre cainöj? Tro sa ce wange la itre xa aqan.

E nöjei macatre ala nyimu la itre ka xomi bapataiso. Maine epuni la ketre, tro epuni lai a macangöne la hna cainöj, e hnei epuni hna easenyine la itre trejin ka hekö hë ngöne la huliwa. Nge maine epuni la ketre trejin ka hekö hë cainöj, haawe ijiji epuni kö troa xatuane la ketre ka xötrei bapataiso? Aqane ujë lai ka troa thue madrine i epun.

Atre hnyawa hi Iesu laka, loi e troa pane inine la itretre dreng matre tro angatr a maca ngöne la huliwa ne cainöj, nge celë hi hnei nyidrëti hna kuca. (Luka 8:1) Ketre tune enehila, nyipi ewekë fe troa inine la itre ka xötrei bapataiso matre tro angatr a hane maca.

 Tha tro pi kö sa mekune ka hape, ame la kola tro troa cainöj hnene la trejin hna hnyipi bapataison, tre angeice hi lai a inine troa cainöj. Nyipi ewekë pe troa ini angeic hnene la ketre trejin ka menyik. Loi e tro la trejine ka maca a ini angeic la aqane (1) troa hnëkëne la nyine troa qaja me amacan, (2) troa ithanata kowe la atr, (3) troa tro fë zonal, (4) troa iwai hmaca, me (5) aqane troa nyiqane ini Tusi Hmitrötr memine lai atr. Tro hë la ka hnyipi bapataiso a maca e hnei angeic hna catre goeëne me xötrethenge la aqane cainöj ne la itre ka maca hë. (Luka 6:40) Nge tha tro hë angeic a hnehengazo menu ke atre hi angeic laka, hetre ka tro pala hi a xatua angeic. Ketre tro fe la itre xa mekun, memine la itre aqane qaja aloine la huliwa i angeic a xatua angeic.—Ate Cainöj 4:9, 10.

Ngacama xele ju hë la itre atr ma drei së, ngo ijije pala hi tro sa ce thawa memine la sina tronge së, la itre hne së hna melën ngöne la hna cainöj. Kola amekunëne koi së lo Iesu a upe lo itre drei nyidrë troa cainöj, isa “ala lue.” (Luka 10:1) Pine laka isa ala lue angatr, ijije hi tro angatre a itö ithuecatrekeu. Ketre tune enehila, easë pala hi a “ce akeukawanyi” ketre me ketre, la easa ce huliwa memine la itre trejin ngöne la hna cainöje trootro.—Roma 1:12.

Nemene la nyine tro epon a porotrikën? Hetre ewekë kö hnei epun hna melëne ka troa thuecatre i ketre? Hetre ini ka lolo kö hnei epuni hna öhne ngöne la epuni a ini Tusi cas, maine ngöne la ijine hmi hnepe lapa? Hetre ketre ini kö ka ketri epuni ngöne la ketre cainöj hna cile fë? Ame itre xa ijin, hna ami epun memine la ketre trejin hnei epuni hna tha nyipi atre. Loi e tro epuni a pane hnyingë angeic la ka upi angeic troa bapataiso, memine la kepine matre mekune jë angeic ka hape celë hi organizasio i Iehova lai. Nemene la itre ewekë ka lolo hnei angeic hna melëne ngöne la hna cainöj? Nge hane jë fe ce thawa me angeic la hnei epuni hna melën. Haawe, ngacama kapa ju hë maine xele pena ma drei së hnene la itre atr hne së hna cainöje kow, ngo ame la easa ce huliwa memine la sina tronge së, tre, ijine tro hi së lai “akeukawane ipitön.”—1 Thesalonika 5:11.

Maine epuni a pi acatrene la aja i epuni troa cainöj, nyipi ewekë tro epuni a isa catre inine hnyawane la Tusi Hmitrötr. Hnene la “hlue ka nyipici me ka inamacan” hna fejane la nyimu tane mekune ka isa pengön nyine troa inin. (Mataio 24:45) Tro sa ce wange la ketre tane mekune ka loi nyine troa isa inine hnyawa: Pine nemene matre ka nyipi ewekë la huliwa ne cainöj? Tro la itre mekune hna eköhagen, “ Kepin Matre Tro Sa Catre Cainöj” a troa amamane la itre xa kepin.

 E tro epuni a wange la itre mekun hna amë ngöne la itre mekune hnaeköhagen, tro ha acatrene la aja i epuni troa cainöj. Ame la epuni a ini Tusi, thele jë fe la itre xa kepine qa hnine la Tusi Hmitrötr ka upi epuni troa catre cainöj. Thupene lai mekune ajuine jë la itre kepine cili. Haawe, ame hë e cili tro ha catrecatre la aja i epuni troa cainöj.

Hnene pala hi la organizasio i Iehova hna hamëne la itre ixatua göi troa akökötrene la huliwa ne cainöje së. Hna xatua së pala hi troa cainöje ngöne la itre hnalapa trootro me jëne tus maine telefon, maine e kuhu gojenyi maine ngöne la gaa tru atr, maine pena ngöne la itre hnë huliwa ne itre atr. Kolo fe a thuecatre së göi aqane hnëkë hnyawa matre troa cainöje ngöne la itre götrane ka aja ixatua.

Ajane fe kö epuni troa hane tupathe la itre aqane cainöje celë? Tru catre la itre thangane hna kapa hnene la itre trejine ka xome la itre aqane cainöje cili. Tro sa ce wange la köni tulu.

April la ketre trejine föe ka mekune troa trongëne la hna qaja hnene la Huliwa Ne Baselaia, göi aqane troa nyiqaane ini Tusi Hmitrötr. Hnei angeic hna qaja kowe la köni sine ihuliwa i angeic ka hape, aja i angatre kö troa hane ini Tus. Tru la madrine i angeic la angatr a nyiqaane ini Tusi me sine la itre icasikeu.

Kolo fe a upi së troa hane thele la itre atr ka ajane troa e la itre xa tane mekune ngöne la itre zonale së. Hnene la ketre atre thupëne la sirkoskripsio e Etazini hna mekune troa tro fë la Réveillez-vous ! ka qeje pengöne la itre wiil kowe la itre maseta ne la itre magazë asë ka salemë wiil ngöne la götrane cili. Hnei nyidrëti fe me föi nyidrë hna tro fë Réveillez-vous ! göi “Aqane Troa Trotrohnine Hnyawa La Droketre Së” (qene Wiwi) ngöne la 100 lao hnë wai  droketre. Öni nyidrë, hnene la itre aqane huliwa cili hna xatuane la itre atr troa majemi kowe la huliwa ne cainöj, me kowe la itre itusi së. Tru catre hë la itre atr hna atre hnene la atre thupëne la sikoskripsio me föi nyidrë, matre tru catre hë hnei atr hnei nyidroti hna wange hmaca.

Hnene la ketre trejine föe Judy la ëjen, hna cinyihane koi sasaiatri, ke tru la ole i angeic kowe la ithuecatre hna hamën göi troa cainöj jëne telefon. Öni angeic, ka wezipo la thine i angeic, ka 86 lao macatren, nge ka majemine eahlo cainöj jëne telefon. Ame la thangan, eahlo ha ini Tusi Hmitrötr memine la ketre qatre föe ka 92 lao macatre!

Eje hi laka, ka hetre thangane catre la itre ixatua hna hamëne hnene la organizasio. Ange hane jë tupath! Tro itre eje lai a acatrene la aja i epuni troa cainöj, me thue madrine i epuni pala hi.

Qa ngöne nemene matre troa tro loi la huliwa ne cainöje së? Tha qa ngöne kö la etrune la itre itus hne së hamën maine etrune la itre ini Tusi së, maine etrune la itre atr hne së hna xatuane troa nyihlue i Iehova. Pane mekune jë la tulu i Noa. Ngacama ka maca hnyawa Noa troa cainöj, ngo pëkö atr e tröne la hnepe lapa i angeic hnei angeic hna xatuane troa nyihlue i Iehova. Kola hape, ame la ka nyipi ewekë catr, tre ene la tro sa nyihlue nyipici koi Iehova.—1 Korinito 4:2.

Nyimutre la itretre cainöj ka trotrohnine ka hape, maine easa ajane tro sa hetre madrine qa ngöne la huliwa ne cainöj, nyipi ewekë tro sa hnëkëne amë la itre mekune ka ijije nyine tro sa eatrën. Nemene la itre mekune cili? Hane hi la itre xa mekune hna amexeje ngöne la itre mekune hna eköhagen “Mekune Ka Ijije Nyine Eatrën.”

Sipo ixatua jë koi Iehova matre hetre thangane la hna cainöje i epun. E tro epuni a eatrëne la itre aja i epun, tro hë epuni a madrin, ke hnei epuni hna kuca asë la hnei epuni hna atreine troa cainöjëne la maca ka loi.

Nyipici laka, tha ka hmaloi kö troa cainöjëne la maca ka loi. Ngo hetre itre ewekë nyine tro epuni a kuca matre tro pala hi epuni a catre cainöj. Ce thawa jë la itre mekune ka ixatua memine la sine cainöje i epun, nge catre jë isa inine lapane la Tusi Hmitrötr, nge tupathe jë la itre mekune ka ixatua qaathene la hlue ka nyipici me ka inamacan, nge hnëkëne amë jë la itre mekune ka ijije nyine troa eatrën. Nge ame la ka sisitria, tre, tha tro kö a thëthëhmine laka, Iehova Akötresieti la Atre hamë së la hnëqa ka tru celë, ene la troa Atre Anyipici Nyidrë jëne la hna cainöjëne la maca ka loi. (Isaia 43:10) Haawe, tro pala hi a tru la madrine i epun e hnei epuni hna acatrene pala hi la aja i epuni troa cainöj!