AME ngöne la icasikeu ka ketre pengöne hna kuca e Nagoya, Zapo, lo 28 Eiperem 2013, hnei Anthony Morris, atrene la Lapa Ne Xomi Meköt hna hamëne la ketre ithuemacany ka ithue madrin, ene la ketre itusi ka hnyipixe hna fejan: la Evangelia i Mataio qene Zapo. Hna sasaithe la 210 000 lao atr ka sine la icasikeu me ka goeëne ngöne video. Thupene la hna drenge la ithuemacany, qeadridri catre la hna xeexe hnene la itre atr, kola amamane la trenge madrine i angatr.

Hna fejane hmaca la Evangelia i Mataio qa ngöne la Traduction du monde nouveau. Ngo, ka ketre pengöne kö la itusi celë ka 128 lao götran. Hnei A. Morris hna qejepengöne ka hape, hna fejane eje göi troa xatuane la itre Zapone. Nemene la esisitriane la itusi cili? Pine nemene matre ka nyipi ewekë? Nge nemene la aqane kapa ej hnene la itre atr?

Tru hnei atr ka haine la aqane kuca la sine tusi Mataio. Ame la aqane cinyany qene Zapo, ngöne la itre xa itus, hna cinyanyin acile la itre mataitus, nge ngöne itre xa itus, hna agön. Nge ame la itre zonal me itre itusi së, tre, hna lapa cinyanyin agön. Ngo, ame la aqane cinyanyin la itus ka hnyipixe, tre hna cinyanyin acil la itre mataitus, ceitu me aqane cinyanyin la itre zonale i angetre Zapo me itre xa itusi angatre ju kö. Matre tha jole kö kowe la itre Zapone ka nyimutre troa e ej. Ketre, ame la itre tane mekun hna majemine cinyanyin panën, tre hna saze göhnene hë, itre ej hmaca pena ha e hnine la itre hna cinyanyin nyine nyi tane mekune ka co. Haawe, canga mama hi kowe la itre ka e la itre mekune ka nyipi ewekë.

Canga saqe hi la itre trejine trahmanyi me föe ne Zapo e lai itus. Önine la ketre trejine föe ka 80 lao macatre: “Anyimua e ni la tusi Mataio ekö, ngo ame la aqane cinyanyin acil me itre hna nyi tane mekune ka co, tre kola xatua ni troa trotrohnine hnyawa lo Cainöj Hune La Wetr.” Önine fe la ketre trejine föe ka thöth: “Aca tro e hi ni la tusi Mataio. Ka majemine ni e lo itre hna cinyanyin agön, ngo ame thene la itre Zapone ka nyimutre, aja i angatre kö troa e lo itre hna cinyanyin acil.”

Pine nemen matre ka lolo catre la itusi celë kowe la itre Zapone? Ngacama nyimu Zapone ka thatre kö la Tusi Hmitrötr, ngo aja i angatre troa hane e. Tru hnei Zapone ka tha öhne kö la Tusi Hmitrötr, ngo ame hë enehila, ijije fe hë tro angatr a hane kapa me e la ketre hnepe götrane ej.

Pine nemene matre iëne jë la tusi Mataio? Ame la itre Zapone ka hane drenge la kola qaja ka hape, “Tusi Hmitrötr,” tre, Iesu Keriso la ka canga mama koi angatr. Celë hi matre, iëne jë la tusi Mataio, ke, ej e hnine la kola qaja xötrëne la itre xötrapane i Iesu memine la ijine hnaho nyidrë, memine la Cainöje i nyidrë Hune La Wetr, memine fe lo itre hna perofetane göi itre drai ne la pun. Celë hi itre mekune lai hna ajane troa drenge hnene la itre Zapone.

 Hnene la itretre cainöje e Zapo hna catre tro fë la itus ka hnyipixe celë, ngöne la itre hnalapa trootro me ngöne la hna iwai hmaca. Önine la ketre trejine föe: “Ame hë enehila, tru catre hnei atr hnenge hna hamëne kow la Wesi Ula i Akötresie ngöne la hnenge hna cainöje ngön. Ame ju fe kö lo hnaipajö ne icasikeu ka ketre pengön, hamëne ju fe kö ni la ca itus!”

Hnene la itre trejin hna tro fë tune kaa la itusi celë? Ala nyimu la itre Zapone ka atre la itre hnaewekë tune la “qanahage ka ilit,” maine “the kuiëne kö la ite penina i nyipunie qëmeke ne la ite puaka,” maine pena “the kuke hnine kö göi elany.” (Mataio 6:34; 7:6, 13) Angatr a sesëkotre la kola atre laka itre trenge ewekë i Iesu hi lai. Ame la angatr a öhn lai hnine la tusi Mataio, ala nyimu la itre ka qaja ka hape: “Hnenge pala hi hna ajane troa pane aca e la Tusi Hmitrötr.”

Ame la kola wange hmaca hnene la itre trejin la itre atr ka kapa lai itusi, öni angatr ka hape, hnei angatr hna canga e asë lai itus nge hnei itre xan pena hna e sinën. Önine la ketre qatr ka 60 lao macatre kowe la ketre trejin ka hape: “Anyimua e hë ni lai itus nge hna akeukawane la hning, matre eni a sipon troa ini ni la Tusi Hmitrötr.”

Hna hamëne fe la itusi Mataio ngöne kola cainöje ngöne la gaa tru atr. Hnene la ketre trejine föe hna hamëne la adresse mail i angeic kowe la ketre föe ka kapa lai itus. Ca hawa thupen, hnene lai trejine föe hna kapa la ketre maca jëne mail qaathene lo lai föe, kola hape, ase hë angeic e la ketre igötranen ne lai itus, nge aja i angeic troa atre la itre xa ithuemacany. Ca wiike thupen, angeice hë a nyiqaane ini Tus nge tha qea ju kö nge kolo fe ha sine la itre icasikeu.

Ase hë sasaithe la 1600000 milio lao itusi Mataio hna iupi fë kowe la itre ekalesia e Zapo. E nöjei treu kola hamëne hnene la itre trejin la itre thauzan lao itus kowe la itre atr. Ame ngöne la qaane lai itusi cili tre, kola qaja amamane la aja ne la itre ka cinyihane ej, kola hape: “Eahuni a mejiune laka tro ha kökötre la aja i epuni kowe la Tusi Hmitrötr, jëne la hna e la itusi celë.”