Ini Qa Ngöne La Ceitun Göi Itre Talan
“Nge nyidëti a hamëne kowe la kete la ite talane ka tripi, nge kowe la kete luete, nge kowe la kete cas.”—MATAIO 25:15.
1, 2. Pine nemene matre Iesu a hamëne la ceitun ne la itre talan?
HNEI Iesu hna xome la ceitun ne la itre talan matre troa amamane kowe la itre hna iën la hnëqa i angatr. Ngo tha göi itre hna iën hmekuje kö la ceitune celë, ngo göne la nöjei Keresiano asë. Haawe, itre ka mejiune ju hë së kowe la mele e celë fen maine e hnengödrai pena, ngo loi e tro asë hi së a trootrohnine hnyawa la aliene la ceitune celë.
2 Eue la ijine Iesu a hamëne lai ceitune celë? Kolo ijin nyidrëti a qaja kowe la itretre drei nyidrë la hatrene la kola acili Joxu nyidrë, hatrene la hneijine kola troa nyipune la fene celë. (Mataio 24:3) Haawe, ame la ceitune la itre talan tre, ketre igötranene lai hatren, nge ej a eatr enehila.
3. Nemene la ini hne së hna xome qa ngöne la itre ceitun ngöne Mataio mekene 24 me 25?
3 Ame la Iesu a hamëne la ceitun göi itre talan, tre kolo fe lo ijine nyidrëti a hamëne lo köni xa ceitun, itre igötranene fe la hatren ne lo hneijine la pun. Kola qejepengöne hnene la itre ceitun asë cili, la itre thiina ka ijije nyine tro la itretre drei nyidrë a melën. Easa e la itre ceitune cili ngöne Mataio 24:45 koi 25:46. Hnene la pane ceitun hna qejepengöne la hlue ka nyipici, ene la neköi lapa ne la itre trejine hna iën ka eatrëne la hnëqa i angatr troa inine la nöje i Iehova. Nyipi ewekë tro angatr a nyipici me inamacan. * (Wange ju la ithuemacany.) Thupene lai kola qaja lo ceitun göi itre jajinyi ka ala treen. Ame e cili, Iesu a ahnithe kowe la nöjei trejine hna iën asë la enyipiewekëne koi angatre troa hnëkë me hmek pine laka, thatre kö angatre la drai me hawa ne tro nyidrëti a traqa. * (Wange ju la ithuemacany.) Ase jë hi, Iesu a qaja la ceitun göi itre talan nyine inine la nöjei trejine hna iën asë la enyipiewekëne koi angatre troa huliwa catr ngöne la angatr a xome la itre hnëqa ne Keresiano ka eje thei angatr. Thupene hë, Iesu a hamëne la ceitun göi itre mamoe me gootr, ka amamane hnyawa la itre Keresiano ka mejiune troa mel e celë fen. Nyidrëti a amamane hnyawa la enyipiewekëne koi angatr troa nyipici me kuca asë la hnei angatre hna atreine matre troa xatuane la itre trejine hna iën. * (Wange ju la ithuemacany.) Ngöne la tane mekune celë, troa qejepengöne hnyawa la aliene la ceitune göi itre talan.
MASETA A THAWA LA TRENGE MANIE KA TRU
4, 5. Drei la maseta ngöne la ceitun, nge nemene la aliene la talan?
4 E jë la Mataio 25:14-30. Ame ngöne la ceitun göi itre talan, hnei Iesu hna qaja la ketre maseta ka tro gaa nanyi eë. Nge ame hnine la ketre ceitune ka tune lai, hnei Iesu hna qaja pena ha la ketre atr ka tro kowe la ketre nöje ka nany matre troa joxu. * (Wange ju la ithuemacany.) (Luka 19:12) Hna qaja hnene la itre itusi së ekö ka hape, Iesu lai atr hna qaja ngöne la lue ceitune celë, kola elë hnengödrai eë lo macatre 33. Ngo tha hna canga acilë nyidrëti kö troa Joxu e hnengödrai. Hnei nyidrëti hna pane itreqe uti hë lo macatre 1914, lo kola amë la itre ithupëjia me nyidrë “nyine tane lue ca i nyidë.”—Heberu 10:12, 13.
5 Hnei Iesu hna qaja ka hape, ame la maseta ngöne lai ceitun, tre hetre eitre lao talane i nyidrë. Kola hape, trenge manie ka tru. * (Wange ju la ithuemacany.) Qëmekene tro la maseta a tro, hnei nyidrëti hna thawa la manie cili kowe la itre hlue i nyidrë. Hnei nyidrëti hna upi angatre troa huliwane eje matre nyi neköne la manie i nyidrë. Tune la aqane sisitria la mani kowe la maseta, ketre tune mina fe, hetre ketre ewekë ka sisitria koi Iesu. Nemene la ewekë cili? Kolo huliwa ekö hnei nyidrëti hna kuca lo nyidrë e celë fen.
“Goeënejë nyipunie, mate öhnejë la hna eënyi, elehmedë hë e troa menu.”
6, 7. Nemene la aqane tro sa trotrohnine la talan?
6 Ka nyipi ewekë catre la huliwa ne cainöje koi Iesu. Ame lo thangane la hna cainöje hnei nyidrë, tru la ka nyihlue i Iehova e thupen. (E jë la Luka 4:43.) Ngo atre hnyawa hi nyidrë ka hape, tro pala kö a tru catre hmaca hnei huliwa nyine kuca, ke tru catre la itre atr ka troa kapa la maca ka loi. Öni nyidrë kowe la itretre drei nyidrë: “Goeënejë nyipunie, mate öhnejë la hna eënyi, elehmedë hë e troa menu.” (Ioane 4:35-38) Ame la atre eëny, tre tha tro kö angeice lai a nuetriji la hlapa i angeic, e ijine menue hë. Ka tui Iesu hi lai, laka qëmekene tro nyidrëti a elë hnengödrai eë, nyidrëti a ahnithe pe kowe la itretre drei nyidrë ka hape: “Trojë nyipunie a inine la nöjei nöj’ asëjëihë.” (Mataio 28:18-20) Iesu hi lai a ahnithe koi angatr la ketre trenga mo ka tru, ene la hnëqa ne troa cainöj me hamë ini.—2 Korinito 4:7.
7 Tune lo maseta ka thewe mani kowe la itre hlue, hnei Iesu fe hna ahni huliwa ne cainöje kowe la itretre drei nyidrë hna iën. (Mataio 25:14) Haawe, ame lo itre talan, tre kola qaja la hnëqa ne troa cainöj me hamë ini.
8. Ngacama isa etrune kö la mani hna kapa hnene la itre hlue, ngo nemene la aja ne la maseta?
8 Öni Iesu, hnene la maseta hna hamëne la faifi lao talan kowe la pane hlue, nge luetre kowe la hnaaluen, nge cas kowe la hnaakönine hlue. (Mataio 25:15) Isa etrune la mani hna hamëne hnene la maseta kowe la itre hlue, ngo casi hi la aja i nyidrë, ene la tro angatr a isa catre huliwa matre troa nyi neköne lo isa etrune mani hna hamëne koi angatr. Ketre tune mina fe, Iesu a ajane tro la itre hna iën a kuca asë la hnei angatre hna atrein ngöne la huliwa ne cainöj. (Mataio 22:37; Kolose 3:23) Ame lo Penetekos macatre 33, kola nyiqaane la huliwa ne cainöje hnene la itretre drei Iesu kowe la nöjei atr ne la nöjei nöj. Ketre, ame la easa e la tusi Ite Huliwa, kola mama hnyawa la aqane catre i angatr. * (Wange ju la ithuemacany.)—Ite Huliwa 6:7; 12:24; 19:20.
ITRE HLUE A HULIWANE LA ITRE TALAN NGÖNE LA HNEIJINE LA PUN
9. (a) Nemene la hna kuca hnene la lue hlue memine la manie hna hamë nyidro, nge nemene la ini koi së? (b) Nemene la nyine troa kuca hnene la itre ka mejiune troa mel e celë fen?
9 Ame lo lue pane hlue ka huliwane hnyawane la manie i maseta, tre kola qaja la itre trejine trahmanyi me föe hna iën ngöne la hneijine la pun. Qaane lo 1919, hnei angatre hna kuca asë la hnei angatre hna atreine ngöne la huliwa ne cainöj. Ame ngöne lo ceitun, isa etrune kö la mani hnei nyidro hna kapa, ngo tha kolo kö lai a hape, ka lue neköi lapa ne la itre trejine hna iën. Hnei nyidroti asë hi hna isa catre huliwa matre troa nyi neköne la manie i nyidro. Ngo hapeu, tro hmekuje hi la itre hna iën a catre huliwa ngöne la huliwa ne cainöj me hamë ini? Ohea. Kola ini së hnene la ceitune i Iesu göi itre mamoe me gootr ka hape, tro la itre ka mejiune troa mele e celë fen a xatuane la itre hna iën ngöne la huliwa ne cainöj, me ce huliwa nyipici memine la itre hna iën. Manathithi ka tru fe lai koi angatr. Ka “casi hi la hna axö mamoe” ne la nöje i Iehova, nge angatr a catre huliwa troa cainöj me hamë ini kowe la itre atr.—Ioane 10:16.
10. Nemene la ketre igötranene la hatren ka amamane ka hape, easa melëne la hneijine la pun?
10 Aja i Iesu tro la itretre drei nyidrë asë a huliwa catre matre tro pala hi a tru catre hnei atr ka nyihlue i Iehova. Celë hi hna kuca ekö hnene lo pane itretre dreng. Ame enehila ngöne la hneijine la pun, ijine kola eatre la ceitune göi itre talan, hapeu, kolo kö a kuca la huliwa cili hnene la itretre drei nyidrë enehila? Eje hi, ala nyimu catre hë hnei atr ka kapa la maca ka loi, me ka nyihlue i Iehova, a tha hna tune kö ekö! Qa ngöne la hna catre huliwa hnene la itretre drei Iesu asë, haawe, itre hadredre thauzane lao atr a xome la bapataiso e nöjei macatre. Nge angatre fe a hane ixatua ngöne la huliwa ne cainöj. Kola mama hnyawa jëne la nöjei ewekë celë me itre thangane lai, laka huliwa ne cainöj la ketre igötranene ka tru ne la hatren hnei Iesu hna qaja göne la hneijine la pun. Tha nyine luelueëne kö la etrune la madrine i Iesu kowe la itre sine huliwa i nyidrë!
Iesu a ahnithe la ketre trengamo ka tru kowe la itre sine huliwa i nyidrë, ene la troa cainöj (Wange ju la paragarafe 10)
EUE LA IJINE TRAQA NE LA MASETA?
11. Hne së hna atre tune kaa ka hape, tro Iesu a traqa ngöne la ijine akötre atraqatr?
11 Öni Iesu: “Thupene la nöjei drai ka nyimute ame hna traqapi la joxu ne la nöjei hlue cili, me ate hmekune ngöne tusi thei angat.” (Mataio 25:19) Tro Iesu la Maseta a eatrëne lai ngöne la pune la akötre atraqatr. Hne së hna atre tune kaa? Ame ngöne la hna perofetane hnei Iesu ngöne Mataio mekene 24 me 25, hnei nyidrëti hna anyimua qaja la traqa i nyidrë. Öni nyidrë, tro la itre atr asë a “goeëne la Nekö i ate kola traqa hune la ite iawe ne hnengödrai.” Kolo lai a qaja lo hnepe ijine ngöne la ijine akötre atraqatr, lo hnepe ijine tro Iesu a amekötine la itre atr. Nyidrëti fe a ahnithe kowe la itretre drei nyidrë ka melëne la hneijine la pun troa catre hmek. Öni nyidrë: “Tha’te kö nyipunie la ijine traqa la Joxu i nyipunie” nge, “ngöne la ijine hnei nyipunieti hna tha mekune kö, te, tro ha traqa la Nekö i at.” (Mataio 24:30, 42, 44) Haawe, ame ngöne la ceitun göi itre talan, tre Iesu fe a qaja la ijin tro nyidrë a traqa ne troa amekötine la itre atr, me apatrene la fene i Satana. *—Wange ju la ithuemacany.
12, 13. (a) Nemene la hna qaja hnei maseta kowe la lue hlue, nge pine nemen? (b) Eue la ijine kola pelehatrene tixenuëne la itre hna iën? (Wange ju fe la itre mekune hna eköhagen, “ Hna Jelemekötin La Kola Mec.”) (c) Nemene la aqane nyithupen la itre ka sajuëne la itre hna iën?
12 Ame hë la maseta a bëeke qa gaa nanyi, nyidrëti a öhne laka, ame lo ka faifi me lue talan, tre hnei nyidro hna isa huliwa matre isa hetrenyi hmaca la faifi me lue talan. Isa öni maseta jë hi koi nyidro: “Ole, eö la hlue ka loi me nyipici ; hnei ’ö hna nyipici kowe la ite ewekë ka xalaith, tro ni a acilë eö hune la ite ewekë ka nyimute.” (Mataio 25:21, 23) Nemene la hna troa kuca elanyi hnene la Maseta, ene Iesu, la nyidrëti a troa traqa?
13 Qëmekene ju hi la akötre atraqatr, tro Akötresieti a amamane ka hape, ase hë Nyidrëti kapa paluane la itre hna iën ka huliwa catr e celë fen, ene la troa pelehatrene tixenuë angatr. (Hna Amamane 7:1-3) Thupene lai, qëmekene Amagedo, tro Iesu a nyithupene koi angatr, ene la troa aelë angatr hnengödrai eë. Ngo, tune kaa pë hë la itre ka mejiune troa mele e celë fen, itre ka xatuane la itre hna iën ngöne la huliwa ne cainöj? Hna jele meköti angatr ceitu me itre mamoe. Haawe, troa nyithupene koi angatr, ene la troa hamë angatre la mele ka tha ase palua kö e celë fen, hna musi kow hnene la Baselaia i Akötresie.—Mataio 25:34.
HLUE KA THA IDREI ME GENY
14, 15. Iesu kö a hape, tro la itre hna iën ka ala nyimu a ujë tune la hlue ka tha idrei me geny? Qejepengöne jë.
14 Hnene fe la ceitune hna qaja la ketre hlue hna hamëne kow la ca talan. Tha hnei angeice kö hna huliwane troa nyi nekön, maine tro pena a amë ej ngöne baak matre tro ej a hnaho. Hnei angeice pe hna keleme la manie i angeic. Önine la maseta ka hape, hlue ka tha idrei angeic nge ka geny. Hnei nyidrëti hna thapa la talan qaathene la hlue ka tha idrei, me hamëne kowe la pane hlue. Thupene lai, nyidrëti a kuiëne pi la hlue ka tha idrei “e kuhu ga jidi,” nge e cili angeic a treije hleuhleu.—Mataio 25:24-30; Luka 19:22, 23.
15 Ame la Iesu a amexeje la hlue ka tha idrei, nge ka geny qaathene lo ala kön, tha nyidrëti kö lai a hape, maine köni trejine hna iën, troa ca ka ujë tune la hlue celë. Easa trotrohnine tune lai, ke hna ce wange la ceitune cili memine lo itre xa ceitun. Ame ngöne lo ceitun göi hlue ka nyipici me ka inamacan, hnei Iesu hna qaja la hlue ka ngazo, nge ka lepe la itre xa hlue. Tha Iesu kö lo a hape, tro la itre xa ka nyi atrene la hlue ka nyipici me ka inamacan a ujë tune la hlue ka ngazo. Nyidrëti pe lo a hmekëne la itre hna iën wanga ujë jë angatr ceitu me hlue ka ngazo. Nge, ame ngöne la ceitun göi itre jajinyi ka ala treen, hnei Iesu hna qaja la faifi lao jajinyi hmo. Tha nyidrëti kö lo a qaja ka hape, tro la sine la etrune la itre hna iën a hmo. Iesu pe a hmekë angatr la ewekë ka troa traqa e tha hnëkë kö angatr me hmek. * (Wange ju la ithuemacany.) Ketre tune mina fe ngöne la ceitun göi itre talan, tha Iesu kö a qaja ka hape, troa nyimu trejine hna iën ka troa tha idrei me geny. Ngo nyidrëti pe a hmekëne la itre hna iën wanga tro jë angatr a tune lo hlue ka tha idrei, ngo loi pe troa catre huliwa ngöne la hna cainöj.—Mataio 25:16.
E tro la itretre drei Iesu asë a catre cainöj, tro hë nyidrëti lai a nyijune koi angatr
16. (a) Nemene la lue ini nyine tro sa xome qa ngöne la ceitun göi itre talan? (b) Hna xatua së tune kaa hnene la tane mekune celë troa trotrohnine la ceitun göi itre talan? (Wange ju la itre mekune hna eköhagen, “ Nemene La Aqane Troa Trotrohnine La Ceitun Göi Itre Talan?”)
16 Nemene la lue ini nyine tro sa xome qa ngöne la ceitun göi itre talan? Ame la hnapan, hnei Iesu hna hamëne kowe la itretre drei nyidrë hna iën la ketre trengamo ka tru, ene la ketre hnëqa ka sisitria, troa cainöj me inine la itre atr troa nyihlue i Iehova. Ame la hnaaluen, Iesu a ajane tro së asë a huliwa catre ngöne la hna cainöj. Maine tro sa cile hut ngöne la huliwa cili, me catre idrengethenge me nyipici koi Iesu, tro hë nyidrëti lai a nyijune koi së.—Mataio 25:21, 23, 34.
^ par. 3 Kola qaja la pengöne la hlue ka nyipici me ka inamacan hnine la Ita Ne Thup ne 15 Julai 2013, götrane 21-22, paragarafe 8-10.
^ par. 3 Kola qejepengöne ngöne la tane mekune ka ase hë la pengöne lo itre jajinyi ka ala treen.
^ par. 3 Hna qejepengöne la ceitun göi itre mamoe me gootr ngöne la Ita Ne Thup qene Wiwi ne 15 Okotropa 1995, götrane 23-28, me ngöne la tane ka troa xulu ne la zonale celë.
^ par. 4 Wange ju la itre mekune hna eköhagen, “ Nemene La Ka Ceitu Thene La Ceitune Göi Talan Me Göi Mina?”
^ par. 5 Ame la ca talan ngöne la hneijine i Iesu, tre, etrune la manie hna kapa hnene la ka huliwa koi 20 lao macatre.
^ par. 8 Tha qea kö thupene la hna meci hnene la itre aposetolo, nge kökötre jë hi la iamenumenu ngöne la itre ekalesia asë. Nyimu hadredre lao macatre thupene lai, pëkö hna cainöj. Ngo ame hë lo ijine “menue,” ene la itre drai tixenuë, nyiqaane hmaca jë hi la huliwa ne cainöj. (Mataio 13:24-30, 36-43) Wange ju la Ita Ne Thup ne 15 Julai 2013, götrane 9-12.
^ par. 11 Wange ju la Ita Ne Thup ne 15 Julai 2013, götrane 7-8, paragarafe 14-18.
^ par. 15 Wange ju la paragarafe 13 ne la tane mekune hna hape, “Tro Kö Epuni a ‘Hmek’?” ngöne la zonal celë.
