Hnene la Ita Ne Thup ne 15 Semitrepa 1950 hna qaja ka hape, ame itre xa ijin, hetre hna nyihatrene hnene la ketre atr, maine ketre ewekë pena ka traqa, maine ketre ewekë ju kö hna qaja hnei Tusi Hmitrötr.

Ame ekö, kola qaja hnene la itre itusi së ka hape, Debora, Eliu, Iefetha, Iobu, me Rahaba, me Rebeka me itre xane ju kö a isa nyihatrene la itre hna iën memine lo “ka ala nyimu atraqat.” (Hna Amamane 7:9) Ka tui Iefetha, me Iobu, me Rebeka, angatr a nyihatrene la itre hna iën, nge ame Debora me Rahaba, tre nyidro a nyihatrene la “ka ala nyimu atraqat.” Ngo ame hë ngöne la itre macatre ka ase hë, patre hë la itre hna aceitunëne ka tune lai. Pine nemene jë?

Tusi Hmitrötr a qaja ka hape, ame la itre xa atr hnene eje hna qaja, tre kola nyihatrene la ketre atr maine ketre ewekë qëmekene tro ej a mama. Ame ngöne Galatia 4:21-31, Paulo aposetolo a qaja la ketre “cei tun,” ene la lue föe. Ame la pane föe, tre Hagara, ketre hlue i Aberahama. Öni Paulo, angeic a nyihatrene la nöje i Isaraela, lo hna isilekeune me Iehova jëne la Wathebo i Mose. Ame la hnaaluen, tre kolo “nyipi föe,” kola qeje Sara, föi Aberahama. Nyiidro a nyihatrene la föi Akötresie, ene la götrane ka tha mama kö ne la organizasio i Nyidrë. Hnei Paulo mina fe hna qaja ka hape, nyimu ewekë thei Melekisedeke ka nyihatre i Iesu. (Heberu 6:20; 7:1-3) Ketre, ame Isaia perofeta me lue neköi nyidrë, tre, hnei Paulo hna aceitunë angate me Iesu me itre Keresiano hna iën. (Heberu 2:13, 14) Iehova la ka aijijë Paulo jëne la uati hmitrötr troa kuca la itre ceitune cili. Celë hi matre, xecie koi së ka hape, ka meköti la itre hna nyihatrene göne la itre atr celë hnine la Tusi Hmitrötr.

Ngo, maine eje hi laka Tusi Hmitrötr a amamane la hna nyihatrene hnene la ketre atr, ngo tha tro kö sa mekune ka hape, hna nyihatrene asë hi la nöjei ewekë ka traqa ngöne la mele ne la atr hna qaja  hnei Tusi Hmitrötr. Ka tune la aqane qejepengöi Melekisedeke me Iesu. Tha qaja atrune kö Paulo la ijine traqa fë Melekisedeke la areto me waina koi Aberahama, thupene lo kola ngaane la foa lao joxu. Haawe, pëkö kepine e hnine la Tusi Hmitrötr ka upi së troa thele la ka nyihatrene la ewekë cili.—Genese 14:1, 18.

Thupene la hna meci hnei Iesu, tria kö la itre hna hane qaja hnene la itre ka cinyany. Ame koi angatr, hna nyihatrene asë hi la itre edromë ne la Tusi Hmitrötr. Hnene la ketre itus (The International Standard Bible Encyclopaedia) hna qejepengöne la itre ini hna hamëne hnei Origen, Ambrose, me Jerome (itre tane la hmi Katolik), me hape: “Hnei angatre hna thele la ka nyihatrene la nöjei ewekë, ngacama tha ka nyipi ewekë kö, hna qaja hnine la Tusi Hmitrötr, nge öhne asë hi angatr. Goi nyihatrene fe la itre ewekë ka tha nyipi ewekë kö matre sihngödri hë lo itre ini [ka tru] . . . , hnei itre xane fe hna hane thele la ka nyihatrene la 153 lao i hna ea, hnene la itretre dreng lo jidr ne iamamanyi ne lo Atre Iamele koi angatr!”

Hnei Augustin d’Hippone, ketre ka cinyany hna qaja ka hape, hetre hna nyihatren hnene lo ijine Iesu a thuane lo ala 5 000 lao atr hnene la faifi lao falawa bali me lue i. Öni angeic, ame lo lai faifi lao falawa bali, tre kola nyihatrene lo pane faifi tusi ne la Tusi Hmitrötr. Qa ngöne laka, ka sisitria kö la qitr hune la bali, kolo lai a hape, ka sisitria kö la “Isisinyikeu Ka Hnyipixe” hune la “Isisinyikeu Hnapan.” Ketre, ame lo lue i, tre kola nyihatrene la ketre joxu me ketre atre huuj. Hnene fe la ketre ka inamacan hna qaja ka hape, ame la kola itöne hnei Iakobo la edrö ne haetra i Esau hnene la kapë adase ka madra, tre kolo lai a nyihatrene la Iesu a itöne la melene la nöjei atr hnene la madra i nyidrë!

Nyipici laka jole pi hë troa jelenyipicine la itre aqane qejepengöne celë. Hetre kepine lai. Thatre kö la itre atr la ka nyihatrene la itre edromë ne la Tusi Hmitirötr. Matre, nemene la aqane ujë ka inamacan? E qaja jë hnei Tusi Hmitrötr ka hape, hetre hna nyihatren hnene la ketre atr, maine ketre ewekë pena, kapa ju hë la hna qejepengöne cili. Ngo the tro kö sa thele hatrene menune la itre edromë ne la Tusi Hmitrötr, ngo pë pe nyipi kepin.

Nga nemene hö la aqane tro sa kepe ini qa ngöne la nöjei ewekë me hna melën hna qaja e hnine la Tusi Hmitrötr? Öni Paulo aposetolo: “Ame la nöjei ewekë hna cinyihan’ ekö, hna cinyihane nyine ini shë, mate hete mejiune shë hnene la xomi hni me keukawa qa ngöne la ite hna cinyihan.” (Roma 15:4) Ame la Paulo a cinyihane ekö kowe la itre Keresiano hna iën, tre kola qaja la aqane tro angatr a kepe ini qa ngöne la itre edromë ne la Tusi Hmitrötr. Ngo, qaane la ijine cili, kola kepe ini qa hnine la Tusi Hmitrötr hnene la itre Keresiano asë, memine fe la “ite xa mamoe.”—Ioane 10:16; 2 Timoteo 3:1.

Tha loi kö troa thele menune la ka nyihatrene la itre edromë celë, me mekune ka hape, hetre ka nyihatrene kö la itre hna iën, nge hetre hna nyihatrene la “ite xa mamoe”, nge hetre ka nyihatrene kö la itre ka mele ngöne la ketre hneijin. Ngo loi pe tro sa trotrohnine ka hape, ame la itre edromë, tre, thatraqane asë hi la itre hlue i Iehova ngöne la nöjei hneijin. Haawe, ame la tusi Iobu, tre tha nyine tro kö a qeje hna iën hmekuj, lo angetre melëne la itre itupath ngöne lo Pane Isi Ka Tru. Ngo nyimu hlue i Akötresie, trahmanyi me föe, qa ngöne la itre hna iën me “ite xa mamoe,” ka hane akötr tui Iobu, itre ka hane fe kepe eloine la hna inine la edromë celë. Nge ‘ate hë [angatr] la hna nyi pune hnei Iehova, ka hape, Iehova la ate utipine me hnime atraqatr.’—Iakobo 5:11.

Ame ngöne la itre ekalesia së enehila, hetrenyi la itre qatre föe ka mele nyipici tui Debora me itre qatre thup thupëtresij tui Eliu. Hetrenyi fe la itre pionie ka catre huliwa i Akötresie tui Iefetha, memine fe la itre trejin, trahmanyi me föe ka mele nyipici, nge ka xomihni ahoeanyi tui Iobu. Easa olene koi Iehova laka, hnei Nyidrëti hna thupëne matre tro pala hi a hetrenyi enehila “la nöjei ewekë hna cinyihan’ ekö . . . mate hete mejiune shë hnene la xomi hni me keukawa qa ngöne la ite hna cinyihan!”

Haawe, qa ngöne la itre hne së hna ce wange hë, the tro kö sa thele hatrene menune la nöjei edromë ne la Tusi Hmitrötr. Itre itusi së pe enehila a amamane hnyawa, la itre ini ka tru hna xome qa hnine la Tusi Hmitrötr.