1, 2. (a) Nemene la hnei Iesu hna amamane göne la itre drai ne la pun? (b) Nemene la itre hnyinge nyine tro sa ce ithanatan?

PANE mekune jë lo kola lapa hnei Iesu hune la Wetr Elaio, wetr ka cile qëmekene la ēnē e Ierusalema. Ce nyidrëti me foa lao aposetolo, Peteru, Anederea, Iakobo, me Ioane. Angatr a drenge hnyawa Iesu la nyidrëti a perofetane la ewekë ka tru, nge ka troa eatre ngöne la itre drai elany. Kola amamane hnene la hna perofetan la ewekë ka troa traqa ngöne la itre drai ne la pune la fene ka ngazo celë, ijine tro Iesu a mus ngöne la Baselaia i Akötresie. Öni Iesu koi angatr, ame ngöne la ijine cili, tro “la hlue ka nyipici me ka inamacan” a nyi trenge ewekë i nyidrë e celë fen, me thawa la xeni ne la u ngöne la nyipi ijin kowe la itretre drei nyidrë.—Mataio 24:45-47.

² Ngöne pala hi lai hna perofetane göne la itre drai ne la pun, Iesu pena ha a qaja, la ceitune ne la itre jajinyi ka ala treen maine itre nyipi jajiny. (E jë la Mataio 25:1-13.) Ame ngöne la tane celë, tro sa ce ithanatane la itre hnyinge celë:  (1) Nemene la ithuemacanyi hna hamëne hnene la ceitune celë? (2) Nemene la aqane trongëne hnene la itre hna iën la ithuemacany ne lai ceitun, nge nemene la thangane lai? (3) Nemene la ini nyine tro së isa ala cas a kapa qa ngöne la ceitun ne la itre jajinyi ka ala treen?

3. Nemene la aqane qejepengöne ekö la ceitune ne la itre jajinyi ka ala treen hnine la itre itusi së, nge nemene jë la thangane lai?

³ Easë hi lo a ase ce wange ka hape, ame ngöne la itre macatre ka ase hë, hnene la hlue ka nyipici hna saze la aqane qejepengöne la itre edromë ne la Tusi Hmitrötr. Hlue ka nyipici enehila a amamane hnyawa la itre nyipi ini, nge co pë hë la hna qejepengöne la itre hna nyihatren. Ka tune la ceitune i Iesu göi itre jajinyi ka ala treen. Hna majemine qaja ekö hnine la itre itusi së ka hape, hetre hna nyihatrene hnene la jina i angatr, me wakacu [karesin], me itre inege. Hapeu, tro jë kö lai a patre la itre nyipi ini hna hamën hnene la ceitun e troa qejepengöne asë la nöjei pengöne ewekë ka eje ngön? Ka nyipi ewekë catre la mekune ka sa la hnyinge celë.

4. Ame ngöne la ceitun, hne së hna atre tune kaa ka hape (a) drei lai atre xötrei faipoipo? (b) drei la itre jajiny?

⁴ Tro sa ce wange la ithuemacanyi hna hamëne hnene la ceitune i Iesu. Ame la hnapan, tro sa pane mekune la itre atrene la ceitun. Drei lai atre xötrei faipoipo? Iesu. Easa atre, ke, qëmekene lai, nyidrëti a qeje nyidrë ka hape, atre xötrei faipoipo. (Luka 5:34, 35) Drei la itre jajiny? Angatre hi lo hna hape, “hnënge mamoe ka xalaithe”, ene lo itre Keresiano hna iën. Hne së hna atre tune kaa? Ame ngöne la ceitun, tro la itre jajinyi a lapa itreqe memine la itre jina i angatr la kola traqa hnene la atre xötrei faipoipo. Hanawange enehila la hna qaja hnei Iesu kowe la itretre drei nyidrë hna iën: “Sileju la ite otene hni nyipunie, nge loi e hudume la ite lamepa i nyipunie ; nge loi e cei tui nyipunie me angete teqene la joxu i angate ka troa traqa qa hna faipoipo.” (Luka 12:32, 35, 36) Ketre, hnei Paulo me Ioane hna aceitunëne la itre hna iën me itre jajiny xeti mek maine itre nyipi jajiny. (2 Korinito 11:2; Hna Amamane 14:4) Haawe, trotrohnine hi së ka hape, ame la eamo cili me ithuemacanyi cili ngöne Mataio 25:1-13, tre thatraqane la itretre drei Iesu hna iën.

5. Nemene la aqane amamane Iesu la hneijine kola troa eatre la ceitune i nyidrë?

⁵ Thupene la hna ce wange la pane igötranene lai ceitun, hneijine ka ue la hna qaja hnei Iesu göi troa trongëne la eamo i nyidrë? Ame la hna qaja hnei Iesu ngöne la pune la ceitun, tre celë hi ka troa xatua së troa atre lai hneijin. Öni nyidrë: “Ame hna traqa pe la ate xötei faipoipo.” (Mataio 25:10) Ame ngöne la Ita Ne Thup ne 15 Julai 2013, hne së lo hna wange ka hape, a eitre lao amexeje la “traqa” i Iesu ngöne la  hna perofetane hnei Iesu ngöne Mataio mekene 24 me 25. Ame la Iesu a qaja la “traqa” i nyidrë, tre nyidrëti a qaja la hnepe ijine ngöne la ijine akötre atraqatr, hnepe ijine nyidrë a traqa troa amekötine la fene celë ka ngazo me apatrene ej. Haawe, ijije hi tro sa qaja ka hape, ame la ceitune i Iesu, tre kola eatre ngöne la itre drai ne la pun, ngo tro nyidrëti a “traqa” ngöne la ijine akötre atraqatr.

6. Nemene la ithuemacanyi hna hamëne hnene la ceitune celë?

⁶ Nemene la ithuemacanyi hna hamëne hnene la ceitune celë? Pane mekune jë la itre aqane qejepengöne la hna edromën hnene la Tusi Hmitrötr. Ame ngöne Mataio mekene 24, Iesu a ithanatane la hlue ka nyipici me ka inamacan. Nge ame la hlue cili, tre kola qaja la neköi lapa ka co ne la itre trejine trahmany hna iën, nge ka elemekene la huliwa ne la itretre drei Keriso, ngöne la hneijine la pun. Iesu a ahnithe kowe la itre trejine cili ka hape, loi e tro angatr a catre mele nyipici. Ame ngöne la mekene thupen, Iesu a xome la ceitun göi itre nyipi jajinyi ka ala treen matre troa hamë ini kowe la nöjei hna iëne asë, ngöne la itre drai tixenuë. Ame la ithuemacanyi cili, tre ene la troa ‘hmek’ matre tha tro kö a luz la edrö i angatr, kolo mel e hnengödrai. (Mataio 25:13) Tro sa ce wange enehila la ceitun, me wange la aqane tro la itre hna iën a trongëne la eamo cili.

7, 8. (a) Pine nemene matre ka lapa itreqe la itre jajinyi ka inamacan? (b) Nemene la aqane hnëkëne la traqa i Iesu hnene la itre hna iën?

⁷ Ame ngöne la ceitun, Iesu a amamane hnyawa ka hape, tha ceitune kö la itre jajinyi ka inamacane memine la itre jajinyi hmo. Ame la itre ka inamacan, tre itre ka lapa itreqe angatr la kola traqa la atre xötrei faipoipo. Pine nemen? Pine laka itre ka hnëkë hë angatr, me hmek. Loi e tro asë hi la itre jajinyi ka ala treen a hmekën matre tro pala hi a mel la jina i angatr ngöne la jidr. Tha hnei angatre kö hna tune la itre jajinyi hmo. Mama hnyawa ka hape, itre ka hnëkë hnyawa angatr, ke, hetre karesin ne treme i angatr. Nemene la aqane hnëkëne la traqa i Iesu hnene la itre hna iën?

⁸ Hna hnëkëne la itre hna iëne matre troa eatrëne hnyawa la hnëqa i angatr uti hë la pun. Atre hnyawa hi angatr la enyipiewekëne koi angatr troa nuetrije la itre mo hna thele hnene la fene i Satana, matre troa kuca la huliwa i Akötresie. Celë hi hnei angatre hna kuca, nge eje fe e kuhu hni angatre troa nyihlue nyipici koi Iehova. Ame la angatr a kuca tune lai, tre, tha hnene kö laka easenyi catre hë la pun, ngo hnene la etrune la ihnimi angatre koi Iehova me kowe la Hupuna i Nyidrë. Itre ka mele nyipici pala hi angatr, nge itre ka ananyine la thele mo ne la fene i Satana, me itre huliwa ka sis, me itre aqane ujë ne atr ka tha imeku. Tune la itre jajinyi ka inamacan, itretre lapa itreqe memine la itre jina i angatr, hnene fe la itre hna iëne hna ahudrumene la lai angatr, me treqene hnyawa la traqa ne la Atre Xötrei  Faipoipo, ngacama kösë hmitre pala kö.—Filipi 2:15.

9. (a) Nemene la aliene la ithuemacanyi nyine hmekëne hna hamëne hnei Iesu göi “fefenedemu me meköl”? (b) Nemene la aqane drenge me kapa hnene la itre hna iëne la kola qaja ka hape: “Hana ha la ate xötei faipoipo”? (Wange ju fe la ithuemacany.)

⁹ Itre ka lapa itreqe fe itre jajinyi ka inamacan, ke, itre ka hmek angatr. Ngo ame ngöne la ceitun, hna “fefenedemu me meköl” hnene la itre jajinyi ka ala treen ngöne la angatre a treqene la atre xötrei faipoipo kösë kola hmitre traqa. Matre, ijije kö enehila tro la itre Keresiano hna iën a “fefenedemu me meköl,” kola hape troa ajolëne la mekuna i angatre göi traqa i Keriso? Eje hi. Atre hnyawa hi Iesu ka hape, ngacama ka ajane la atr, ngo ijije hi troa ajolëne la mekuna i angeic ngöne la angeic a itreqe. Haawe, hnene la itre Keresiano hna iën hna catre hmek. Hna tune kaa? Ame ngöne la ceitun, hnene asë hi la ala treen hna dreng me kapa la kola qaja ka hape: “Hana ha la ate xötei faipoipo!” Ngo itre jajinyi ka inamacane hmekuje hi la ka hmeke hnyawa. (Mataio 25:5, 6; 26:41) Ketre tune mina fe, ame ngöne la itre drai tixenuë, hnene la itre Keresiano hna iën hna drenge me kapa la kola qaja ka hape, “Hana ha la ate xötei faipoipo.” Mama hnyawa ha koi angatr laka, easenyi catre hë tro Iesu a traqa, haawe, ka lapa itreqe angatr. * (Wange ju la ithuemacany.) Tro hmaca fe së a ce wange la pune la ceitune i Iesu ka amamane hnyawa la ketre hneijine ka ketrepengöne kö.

10. Nemene hnyinge lai hna amejëne hnene la kola ithanata hnene la itre jajinyi ka inamacan memine la itre hmo?

¹⁰ Ame ju hi la kola troa traqa kowe la pune la ceitun, kola sipo karesin hnene la itre jajinyi ka hmo kowe la itre ka inamacan. Ngo xele ju kö angatre ma hamë ixatua. (E jë la Mataio 25:8, 9.) Ngo ame la itre Keresiano hna iën, eue la ijine angatr a xele ma hamë ixatua kowe la atr ka ajan? Pane mekune jë la ijine la kola eatre la ceitune celë. Tro Iesu, lo Atre Xötrei Faipoipo a traqa easenyine la pune la akötre atraqatr göi troa iameköti. Haawe, ame la kola sipo tune lai, tre kola qaja la ewekë ka traqa qëmekene ju hi la pune la akötre atraqatr. Pine nemene matre qaja jë së tune lai? Pine laka, ame ngöne la ijine cili, itre hna iën a ase kapa la hna pelehatrene tixenuë.

11. (a) Nemene la ewekë ka troa traqa qëmekene ju hi la kola nyiqaane la akötre atraqatr? (b) Nemene la kepine matre upe jë la itre jajinyi ka hmo hnene la itre ka inamacan troa tro me itö karesin?

¹¹ Haawe, qëmekene ju hi la troa nyiqaane la akötre atraqatr, troa pane pelehatrene tixenuëne la itre hna iën e celë fen. (Hna Amamane 7:1-4) Qaane ju hi lai, pëhë ka troa ajolë angatre troa elë hnengödrai eë. Ngo, pane mekune jë së la ijine qëmekene la akötre atraqatr. Nemene la ewekë ka troa traqa e tha hmeke kö, nge tha mele nyipici kö hnene la itre hna iën? Tha tro hë angatre lai a kapa la hna pelehatrene tixenuë. Nge tro pena ha nyihna i angatr hnene la itre xa Keresiano ka mele nyipici. Ame hë la kola nyiqaane la akötre atraqatr, tro la itre hmo a sesëkötre  la kola apatrenyi Babulona Atraqatr. E cili hi la tro angatr a atrehmekune ka hape, tha ka lapa itreqe kö angatr göne lo traqa i Iesu. Ame la ijine cili, nemene la ewekë ka troa traqa e sipo ixatua jë hnei angatr? Tro kö lai ceitun a sa la hnyinge cili. Xele kö lo itre jajinyi ka inamacan ma thue karesine i angatr, ngo kola upi angatre pe troa tro matre itö karesin. Pine laka, “hne nyipa jidi hë,” haawe pëhë ka troa salemë karesin koi angatr. Pë hmaca kö setroa hna fe!

12. (a) Ame ngöne la ijine akötre atraqatr, nemene la ewekë ka troa traqa kowe la Keresiano hna iën ngo tha ka mele nyipici pe uti hë la ijine troa pelehatrene tixenuë? (b) Nemene la ewekë ka troa traqa kowe la itre ka ujë tune la itre jajinyi ka hmo?

¹² Ame ngöne la ijine akötre atraqatr, thatreine kö la itre Keresiano hna iën troa xatuane la ketre atr ka tha mele nyipici, ke tha ijine hmaca kö. Haawe, nemene ju hë la ka troa traqa kowe la ka tha mele nyipici? Tro sa pane wange la ka traqa kowe la itre jajinyi hmo, ka tronge ne itö karesin: “Ame hna traqa pe la ate xötei faipoipo ; nge angete hnëkën’ a ce löjë me nyidë kowe la nyikeine ne faipoipo ; ame hna thingiju la qëhnelö.” Ame ngöne la Iesu a traqa elanyi ngöne la lolo i nyidrë, lo easenyine lo pune la akötre atraqatr, nyidrëti hi lai a icasinekeune jë la itre hna iëne e hnengödrai. (Mataio 24:31; 25:10; Ioane 14:1-3; 1 Thesalonika 4:17) Nge, ame koi itre ka tha mele nyipici, tre tro Iesu a nuetriji angatr. Tune lo itre jajinyi ka hmo, tro angatr a qaja ka hape: “Joxue, joxue, thawapi koi hun.” Ngo, tro Iesu a sa tune kaa koi angatr? Tro nyidrëti a qaja lo ithanata i nyidrëti kowe la itre atr hna aceitunëne me gootr, kola hape: “Nyipici ini a qaja koi nyipunie, tha ‘te nyipunieti kö ni.”—Mataio 7:21-23; 25:11, 12.

13. (a) Pine nemene matre tha tro kö sa mekune ka hape, troa nyimu Keresiano hna iën ka tha troa mele nyipici? (b) Pine nemene matre qaja jë së ka hape, kola mama ngöne la ceitune i Iesu la mejiune i nyidrë kowe la itre hna iën? (Wange ju la pane iatr.)

¹³ Hapeu, Iesu jë kö lai a qaja ka hape, troa nyimu Keresiano hna iën ka troa tha mele nyipici, nge nyine troa nyihnan? Ohea. Ame ngöne Mataio mekene 24, hnei Iesu hna hmekëne la hlue ka nyipici me ka inamacan, matre tha tro kö a ujë tune la hlue ka ngazo. Ngo, tha kolo kö lai a hape, tro angeic a ujë tun. Ketre tune mina fe, hna kuca la ceitune ne la itre jajinyi ka ala treen göi troa hamëne la ketre ithuemacany. Tune la itre jajiny, laka ala faife lae ka hmo nge ala faifi lae ka inamacan, nyipi ewekë troa xecie e kuhu hni ne la nöjei Keresiano hna iën laka, loi e tro angatr a isa hnëkë me hmek. E tha ujë kö angatre tune lai, tro angatre lai a tune la itre hmo ka tha mele nyipici. Hnei Paulo fe hna hamëne la ketre ithuemacanyi ka tune lai kowe la itre trejine hna iën, trahmanyi me föe. (E jë la Heberu 6:4-9; wange ju fe la Deuteronomi 30:19.) Paulo a qaja mekötine koi angatre la ithuemacanyi celë, ngo tha luelue kö angeic laka tro la itre trejine trahmanyi me föe a kapa elanyi la edrö i angatr. Hnene fe la thuemacanyi hna hamëne qa ngöne lai ceitun ne  la itre jajinyi ka ala treen hna amamane ka hape, hetre mejiune i Iesu fe kowe la itre hna iën. Atre hnyawa hi nyidrë ka hape, tro la nöjei trejine hna iën a isa mele nyipici, me kapa la isa edrö ka lolo!

14. Pine nemene matre hetre ini fe kö nyine troa hane kapa hnene la “ite xa mamoe”?

¹⁴ Ame ngöne la ceitune i Iesu, tre, nyidrëti a ithanata meköti kowe la itre Keresiano hna iën. Ngo, hetre ini fe kö nyine troa hane kapa hnene la “ite xa mamoe”? (Ioane 10:16) Eje hi! Pëkö ejolene e troa trotrohnine la ithuemacany hna hape: “Hmekëneju.” Ketre öni Iesu ngöne la ketre ijin: “Ame la hnenge hna qaja koi nyipunie, ini fe a qaja kowe la nöjei ate asë, ka hape, Hmekënejë.” (Mareko 13:37) Aja i Iesu tro la itretre drei nyidrë asë a hnëkë me hmek. Celë hi matre, loi e tro la nöjei Keresiano a xome la tulu ka lolo ne la itre trejin hna iën, itre ka amë panëne la huliwa i Akötresie ngöne la mele i angatr. Pane mekune jë lo kola sipo karesin hnene la itre jajinyi hmo kowe la itre ka inamacan. Tha hna kapa kö la sipo i angatr. Kolo lai a amekunë së e cili ka hape, isa qanyi së isa ala cas, mele nyipici koi Akötresie, me hnëkë, me hmek. Epuni hmekuje hi la ka troa kuca lai, nge pëkö ketre. Tro sa isa qeje gele së kowe la Atre Amekötin Ka Tru, ene Iesu Keriso, ka troa traqa a tha hmitre kö. Haawe, loi e tro pala hi sa catre hmek me treqen!

15. Pine nemene matre kola lapa treqene la faipoipo i Keriso me föi nyidrë hnene la itre Keresiano asë?

¹⁵ Itre Keresiano asë hi a lapa treqene la faipoipo hna qaja ngöne la ceitune i Iesu. Ame hë elanyi e thupene la isi Amagedo, tro la itre Keresiano hna iën a nyi föi Keriso. (Hna Amamane 19:7-9) Ame hë e cili, tro la nöjei atr e celë fen a kepe thangane la faipoipo cili ka ej e hnengödrai. Pine nemen? Pine laka, celë hi ka troa nyitrepene la ketre mus ka pexeje thatraqane la nöjei atr asë. Maine itre ka tro sa mele e hnengödrai maine e celë fen, ngo nyipi ewekë troa xecie koi së troa hnëkë me hmek. Maine celë hi la hne së hna kuca, manathithi hë së elanyi qa ngöne la hnei Iehova hna hnëkën koi së!