1. Pine nemene matre loi e tro pala hi a acatrene la aqane imelekeu së me Iehova?

MAINE hna bapataiso epun, ketre Atre Anyipici Iehova, eje thei epuni la ketre ewekë ka tru alamekene catr. Lolo catre la aqane imelekeu i epun me Iehova. Ngo canga tro hi a ajojezine la aqane imelekeu cili hnene la fene i Satana, me ananazijëne hnene la itre sipu aja së ka ngazo. Celë hi kepine matre, loi e tro asë hi së a thupëne hnyawa la aqane imelekeu së me Iehova.

2. Nemene la aqane tro sa acatrene la imelekeu së me Iehova?

² Hapeue Iehova koi epun, ka mele Nyidrë? Ketre nyipi sinee kö Nyidrëti koi epun? Aja i epuni kö troa hane acatrene hnyawa la aqane imelekeu i epuni me Nyidrë? Kola qaja hnei Iakobo 4:8 la nyine tro epuni a kuca: “Eashenyijë koi Akötesie, nge tro nyidëti a eashenyi koi nyipunie.” Maine tro epuni a kuca la itre ewekë matre troa easenyi koi Iehova, tro hë Nyidrëti lai a hane ujë tune fe matre troa easenyi koi epun. E tro epuni a kuca tune lai, tha tro hë Nyidrëti a sihngödri koi  epun, nge tro hë epuni a easenyi catre koi Nyidrë, nge tro ha eje lo hna qaja ka hape: “Nyipici nyidëti ate upi ni,” nge “Ate nyidëti kö ni.” (Ioane 7:28, 29) Ngo nemene la itre xa ewekë ka troa aeasenyi epuni catre koi Iehova?

3. Tro sa ithanata tune kaa koi Iehova?

³ Maine easa ajane troa easenyi catre koi Iehova, nyipi ewekë tro sa catre ithanata pala hi koi Nyidrë. Ngo tro sa ithanata tune kaa koi Nyidrë? Pane mekune ju së la aqane tro sa ithanata memine la ketre sinee së ka lapa ananyi së. Ijije hi tro sa icinyanyikeu me itelefonekeu. Ketre tune mina fe, easa ithanata koi Iehova ngöne la easa catre thith. (E jë la Salamo 142:2.) Ngo, nemene la aqane tro sa nue Iehova troa ithanata koi së? Tro sa e lapane la wesi ula i Nyidrë, ene la Tusi Hmitrötr, me thele ewekë ngön. (E jë la Isaia 30:20, 21.) Tro sa ce wange la aqane tro la hna kuca cili a acatrene la aqane imelekeu së me Nyidrë, matre tro Nyidrëti a ketre sipu sinee së.

4, 5. Nemene la aqane ithanata Iehova koi epun ngöne la epuni a inine la Tusi Hmitrötr? Qaja jë la ketre ceitun.

⁴ Atre hnyawa hi së ka hape, ame la Tusi Hmitrötr, tre maca i Akötresie kowe la nöjei atr. Ngo atreine kö la Tusi Hmitrötr xatua së troa easenyi koi Iehova? Eje hi! Ame la easa e me inine lapane la Tusi Hmitrötr, pane mekune hnyawa ju la itre hne së hna e. Nge, mekune hnyawa ju fe la aqane tro sa trongëne la hne së hna inin. E tro sa ujë tune lai, easë hi lai a nue Iehova troa ithanata koi së. Tro hë Nyidrëti lai a nyipi treme sineen me easë nge atre xatua së, nge ketre tro fe hë së e cili a easenyi catre koi Nyidrë.—Heberu 4:12; Iakobo 1:23-25.

⁵ Hane hi la ketre ceitun: Tune kaa la mekuna së la easa e la trenge ewekë i Iesu lo kola hape: “The amë kö thatraqai nyipunie la tenga mo e celë fen.” Maine easa kuca la hne së hna atrein troa amë panë Iehova ngöne la mele së, tro hë së lai a drenge laka ka madrine Nyidrë koi së. Ngo, maine easa öhne e cili laka, nyipi ewekë tro sa ahmaloeëne la mele së, memine la eloine la tro sa catre huliwa i Akötresie, haawe, jëne la itre trenge ewekë i Iesu, Iehova hi lai a xatua së troa trotrohnine  la nyine tro sa kuca matre troa easenyi koi Nyidrë.—Mataio 6:19, 20.

6, 7. (a) Nemene la ewekë ka traqa kowe la aqane ihnimikeu së me Iehova ngöne la easa inine la Tusi Hmitrötr? (b) Nemene la sipu aja së ngöne la easa inine la Tusi Hmitrötr?

⁶ Nyipici laka, ame la easa inine la Tusi Hmitrötr, easa öhne laka hetre itre ewekë nyine troa saze ngöne la mele së matre tro sa nyihlue i Iehova hnyawa. Ngo easë fe a öhne la itre ewekë ka lolo hnei Nyidrëti hna kuca me itre thiina ka lolo i Nyidrë, itre ewekë lai ka acatrene la ihnimi së koi Nyidrë. Nge maine kola kökötre la ihnimi së koi Nyidrë, kolo fe lai a kökötre la ihnimi Nyidrë koi së, nge tro lai a acatrene la aqane imelekeu së me Nyidrë.—E jë la 1 Korinito 8:3.

⁷ Maine easa ajane troa easenyi koi Iehova, nyipi ewekë catr tro sa inine la Tusi Hmitrötr cememine la mekune ka loi. Öni Iesu: “Dei lola mele ka tha ase palua kö, laka tro angat’ a ate hmekua cilie la nyipi Akötesieti ka cas, me Iesu Keriso la hnei cilieti hna upengëtin.” (Ioane 17:3) Nyimutre la itre ewekë ka hnyipixe hne së hna inin ngöne la easa e la Tusi Hmitrötr, ngo ame la sipu aja së, tre ene la troa atrepengöi Iehova hnyawa.—E jë la Esodo 33:13; Salamo 25:4.

8. (a) Nemene la hna mekune hnei itre xan göne la aqane ujë i Iehova koi Azaria? (b) Maine atre Iehova hnyawa hi hnei epun, nemene la hnei epuni hna troa mekun göne la aqane ujë i Nyidrë?

⁸ Ame hë la easa atrepengöi Iehova kösë sipu sinee së hi, tha hnehengazone fe kö së la kepine matre ujë jë Nyidrë tune lai. Ka tune lo ijine Azaria a Joxu e Iuda, itre atr ne la nöj a thithi kowe la itre haze ka thoi. Tha hnei Azaria kö hna xötrethenge angatr. “Hnei nyidëti hna kuca la meköti xajawa i Iehova.” (2 Ite Joxu 15:1-5) Ngo hnei Iehova hna lepi Azaria hnei lepera. Pine nemen? Tha hnei Tusi Hmitrötre kö hna qaja la kepin. Matre, nemene la hnei epuni hna mekun göne la aqane ujë i Iehova? Hapeu, tha ka meköti kö Iehova, ke, pëkö nyipi kepine la Nyidrëti a lepi Azaria hnei lepera? Ohea. Maine atre Iehova hnyawa hi hnei epun, tha tro kö epuni a lueluëne la emekötine la aqane ihaji Nyidrë. Hnei Nyidrëti pala hi hna ihaji “thenge la meköt.” (Ieremia 30:11) Haawe, maine thatre ju hë epuni la kepine matre Iehova a lepi Azaria hnei lepera, ngo tha tro jë kö epuni a luelue, ke ka meköti pala hi la hna kuca hnei Iehova.

9. Nemene la itre ithuemacanyi ka aijijë së troa trotrohnine la kepine matre Iehova a lepi Azaria hnei lepera?

⁹ Tusi Hmitrötr a hamë së la itre xa ithuemacanyi göne la mele i Azaria Joxu, lo hna hëne fe ka hape, Uzia Joxu. (2 Ite Joxu 15:7, 32) Kola qaja hnene la hna edromëne ngöne la 2 Aqane lapa ite Joxu 26:3-5, 16-21 ka hape, hnei nyidrëti “hna kuca la meköti xajawa i Iehova.” Ngo, kolo fe a qaja ka hape, ame hë e thupen, “nyidëti a pi tru mate hnëjinepi.” Hnene la joxu hna thele troa kuca la ketre ewekë hna nue hmekuje hi kowe la itretre huuje troa kuca. Eitre wane lao itretre huuje la ka sewe nyidrëti troa huliwa menu, me troa ahmacanyi nyidrë. Nemene la aqane ujë i nyidrë? Tru la elëhni nyidrë koi angatr, ke pi tru catre hë nyidrë! Haawe, kola aijijë së hnene la itre ithuemacanyi celë troa trotrohnine la kepine matre Iehova a lepi Azaria hnei lepera.

10. Pine nemene matre tha nyipi ewekë kö troa atre la itre kepine asë ne la aqane ujë i Iehova? Nemene la aqane tro sa acatrene la mejiune së ka hape, ka kuca pala hi Iehova la meköt?

¹⁰ Nemene la ini ka tru koi së? Ame  ngöne la hna edromëne la mele i Azaria Joxu, hetrenyi së la itre ithuemacanyi ka aijijë së troa trotrohnine la kepine matre Iehova a lepi Azaria hnei lepera. Ngo, e tha mama asë kö la itre ithuemacany hnine la Tusi Hmitrötr, nemene hë la aqane tro epuni a ujë? Tro kö epuni a qeje gelene la aqane ujë Iehova ka hape, ka meköti kö la hnei Nyidrëti hna kuca? Maine pena, ame koi epun, jëne hë la itre ithuemacanyi hna hamëne hnei Tusi Hmitrötr, xecie hnyawa ha koi epun laka ka kuca pala hi Akötresie la meköt. (Deuteronomi 32:4) Maine tro sa thele troa atre Iehova hnyawa, tro ha kökötre la ihnimi së koi Nyidrë, nge tro fe sa catre mejiune koi Nyidrë. Nge ame hë e cili, tha nyipi ewekë kö troa atre la itre kepine la aqane ujë i Nyidrëti ngöne la nöjei ewekë ka traqa. Ame la easa inine la Tusi Hmitrötr, Iehova fe a ketre nyipi sinee së, nge tro fe hë së lai a easenyi catre koi Nyidrë.—Salamo 77:12, 13.

11-13. Hne së hna atre tune kaa ka hape Iehova a drenge la itre thithi së? (Wange ju la pane iatr.)

¹¹ Ame la easa thith, easa easenyi koi Iehova. Easa atrunyi Nyidrë, me olene koi Nyidrë, me sipo ixatua thei Nyidrë. (Salamo 32:8) Ngo, maine easa ajane troa imelekeu hnyawa me Iehova, nyipi ewekë troa xecie e kuhu hni së ka hape, Nyidrëti a drenge la itre thithi së.

¹² Itre atr a qaja ka hape, tha drenge kö Akötresieti la itre thith, nge ame la troa thith, tre ketre ewekë hi nyine troa akeukawanyi së. Angatr a mekune ka hape, tro la thith a xatua së troa atreine waipengöne  la itre jole ka traqa koi së, me troa ketre sipu seijolen. Nyipici laka, ixatua catre la thith ngöne la itre götrane cili. Ngo, e tro sa ithanata koi Iehova jëne la thith, Nyidrëti hi a nyipi drei së. Hne së hna atre tune kaa lai?

¹³ Pane mekune jë la: Qëmekene tro Iesu a uti kowe la fen, öhne hnyawa hi nyidrë la aqane sa Iehova la itre thith ne la itre hlue i Nyidrë. Ame lo Iesu e celë fen, hnei nyidrëti hna thith me fe la mekune me hni i nyidrë kowe la Keme i nyidrë e hnengödrai. Goi thithi fe nyidrëti ngöne la ketre jidri ka pexej. (Luka 6:12; 22:40-46) Tha tro jë kö Iesu lai a thithi tune lai nge atre hi nyidrë ka hape, tha ka drenge kö Iehova la itre thith hna qaja! Ketre, hnei Iesu hna inine la itretre drei nyidrë la aqane troa thithi koi Iehova. Tro kö Iesu lai a ini angatre troa thith, nge atre hi nyidrë ka hape, tha drenge kö Iehova la itre thith? Haawe, atre hnyawa hi Iesu ka hape, Iehova a drenge la itre thith hna qaja. Goi qaja fe nyidrë ka hape: “Kakati fe, ini a olene koi cilie, ke hnei cilieti hna shama nie.” Loi e tro fe a xecie koi së ka hape, Iehova a drenge la itre thithi së.—Ioane 11:41, 42; Salamo 65:2.

14, 15. (a) Nemene la eloine e hetre ketre ewekë hne së hna sipone mekötine ngöne la itre thithi së? (b) Nemene la aqane xatua Kathy hnene la itre thithi angeic troa easenyi catre koi Iehova?

¹⁴ Maine jë, tha mama hnyawa kö koi së la aqane sa Iehova la itre thithi së. Ngo, e hetre ketre ewekë hne së hna sipone mekötine koi Nyidrë, tro hi a mama hnyawa koi së la aqane sa Iehova la sipo së. Maine tro sa fe amamane koi Iehova la nöjei ewekë ka ajolë së, tro hë Nyidrëti a easenyi catre koi së.

¹⁵ Kathy la ketre trejine ka tro lapa troa cainöj, ngo tha öhnyi madrine pe. * Öni  angeic: “Tha hmala kö la hning kowe la huliwa ne cainöj. Ke tha ajange kö.” Ame la angeice ha reteret, hna xatua angeic hnene la ketre qatre thup troa xome la huliwa ne pionie lapa. Öni angeic: “Goi hamë ni fe la pepa ne sipo. Eni pë hë a mekune jë troa pionie, nge eni fe hë a nyiqaane thithi o drai, ka hape, tro Iehova a hamë ni la aja troa cainöj.” Hnei Iehova kö hna sa la itre thithi angeic? Thupene la köni macatre ne pionie, öni angeic: “Ame hë la thangane la hnenge hna cainöje atrunyi, me xomi ini qaathene la itre xa trejine föe, ke hnenge hna maca trootro ngöne la aqane troa cainöj. Ame hë enehila, hetre ajange troa cainöj; nge ketre huliwa lai ka tru koi ni. Ame la ka sisitria, catrecatre hë la aqane imelekeunge me Iehova hune ekö lo.” Eje hi laka, hnene la itre thithi Kathy hna xatua angeic troa easenyi catre koi Iehova.

16, 17. (a) Nemene la nyine tro sa kuca matre tro pala hi a acatrene la aqane imelekeu së me Iehova? (b) Nemene la hne së hna troa ce ithanatane ngöne la tane mekune ka troa xulu?

¹⁶ Loi e tro sa catre easenyi pala hi koi Iehova nge uti hë epine palua. Celë hi matre, loi e tro sa drei Nyidrë hnene la hna inine lapane la Tusi Hmitrötr, me ithanata koi Nyidrë ngöne la thith. E tro sa ujë tune lai, tro ha acatrene catrëne la aqane imelekeu së me Iehova, nge tro hë së lai a atreine cile hut kowe la itre itupath jëne la ixatua i Nyidrë.

¹⁷ Ngo ame itre xa ijin, easa qëmeke kowe la itre jol ka traqa koi së, ngacama thithi lapa ju hë së koi Iehova. Ame ngöne la itre ijine cili, ijije hi troa nyiqaane nanazije la mejiune së koi Iehova. Tro së lai a mekune ka hape, tha drenge kö Iehova la itre thithi së, me mekune ka hape, tha ketre nyipi sinee i Nyidrëti kö së. Maine easa nyiqaane mekune tune lai, nemene la nyine tro sa kuca? Tro la tane mekune ka troa xulu a sa la hnyinge celë.