1. Hna tune kaa matre hëne jë la ketre angela ka hape, Satana?

AME petre kö ekö, ka lolo la aqane imelekeu ne la ketre angela me Iehova. Ngo ame hë e thupen, hnei angeic hna ajane tro la itre atr a hane thili koi angeic. Tha hnei angeice kö hna canga lepetrije la aja ka ngazo cili, matre kökötre jë hi uti hë la kei thenge angeice la aja cili. (Iakobo 1:14, 15) Thatre kö së la nyipi ëjene lai angela cili, ngo hna hë angeic e thupene ka hape, Satana. Tha hnei angeice kö hna ‘cile huti ngöne la nyipici.’ Hnei angeice pe hna icilekeu me Iehova matre angeice hi la “keme ne” la thoi.—Ioane 8:44.

2, 3. Nemene la hna amamane hnene la itre hnëewekë hna hape, “Satana,” “Diabolo,” “un,” me “drakona” ngöne la kola qaja la ithupëjia me Akötresie?

² Pine laka hnei Satana hna icilekeu me Iehova, haawe, ithupëjia ha angeic me Nyidrë memine fe la itre atr asë. Kola mama hnyawa la engazone la thiina i angeic ngöne la easa e la pengö i angeic hnine la Tusi Hmitrötr. Hna hë angeic ka hape Satana, kola hape, “Ka Icilekeu.” Nyine tro hi lai a amamane ka hape, ame la angela cili, tre ej a methinëne me kuca asë la hnei angeic hna atreine troa  isi memine la itre hna amekötine hnei Akötresie. Ame la pane aja i Satana, tre, troa patre la musi cile i Iehova.

³ Hna Amamane 12:9 a qeje Satana ka hape, Diabolo, kola hape, “Ka Ixöjetrij.” Hnei Satana hna thaipië Akötresie me qeje Nyidrëti ka hape, atre thoi. Nge ame la kola hë Satana ka hape, “une ekö,” tre, kola amekunë së lo aqane iaö Eva hnei angeic jëne la ketre un. Nge ame la hnëewekë hna hape, “drakona atraqat,” tre, ka ihmeku hnyawa hi memine la pengö i angeic. Ka tru trenge elëhnin angeic, nge ka imethinë me catre iaö. Angeic a thele matre tha tro kö a eatre la aja i Akötresie, nge troa lepe apatrene la itre hlue i Nyidrë.

4. Nemene la nyine tro sa ce wange ngöne la tane mekune celë?

⁴ Satana hi la ka tupathe la lapaune së. Celë hi matre Tusi Hmitrötr a hmekë së me hape: “Inamacanepi, me hmekënejë ; ke ithupëjia me nyipunie, ene diabolo, a tro agö, kösë liona a ho, kola thele tha i nyën.” (1 Peteru 5:8) Ame ngöne la tane mekune celë, tro sa ce wange la köni thiina i Satana, nyine tro sa thupën wanga ajojezi së jë hnene lai ithupëjia me Iehova.

5, 6. (a) Hamëne jë la itre ceitun ka amamane laka, “ite ka mene ngöne la cat” la itre angela. (b) Nemene la aliene la kola hape, Satana la “ate tene mene hna mecin”?

⁵ Ame la itre angela, tre, “ite ka mene ngöne la cat.” (Salamo 103:20) Tru catre kö la inamacane me mene i angatr hune la itre atr. Eje hi laka, ame la itre angela ka mele nyipici, tre, angatr a huliwane hnyawane la mene i angatr. Ka tune lo kola humuthe la ala 185000 lao sooce i angetre Asuria hnene la ca angela i Iehova. Ewekë lai hna thatreine kuca hnene la ca atr, maine ketre trongene isi pena. (2 Ite Joxu 19:35) Ame ngöne la ketre ijin, hnene la ketre angela hna huliwane la atreine me mene i angeic, matre troa nuamacane la itre aposetolo qa hnine la kalabus. Kola hmulizië la itretre thup, matre tha drenge ju kö angatr la angela a fe lai qëhnelö, me alöne trön eë la itre aposetolo, me thinge la qëhnelö.—Ite Huliwa 5:18-23.

⁶ Itre angela ka mele nyipici a huliwane la mene i angatr matre troa kuca la loi, ngo ame Satana, hnei angeice hna huliwane menune la mene i angeic. Nge eje hi laka, tru catre kö la mene i Satana nge catrehnine la aqane nyinyithiina i angeic. Celë hi matre Tusi Hmitrötr a qeje angeice ka hape, “tane celë fen” maine “haze ne la fen.” (Ioane 12:31; 2 Korinito 4:4) Hna qeje Satana fe ka hape, “ate tene mene hna mecin.” (Heberu 2:14) Tha kolo kö a hape, angeic a humuthe mekötine la itre atr. Ame pe la aliene la hnaithanata cili, tre kola hape, ase hë haöthe la fen hnene la imethinë me iakötrë qaathei Satana. Ketre, ngazo asë hë la itre atr me mec hnene la hnei Eva hna drenge la itre trengathoi i Satana, nge hnei Adamu hna tha drei Akötresie. (Roma 5:12) Hnei Iesu fe lo hna hë angeice ka hape, “ate ihumuth.” (Ioane 8:44) Ketre ithupëjia ka catr angeic!

7. Hna amamane tune kaa hnene la itre dremoni ka hape, tru catre kö la mene i angatr hune la itre atr?

⁷ Ame la easa cile koi Satana, easë mina fe a cile kowe la itre ka ce xöle me angeic, me cile kowe la itre ka icilekeu memine la itre hna amekötine hnei Akötresie. Kolo fe a qaja la itre angela ka ala nyimu, ka icilekeu  me Iehova hna hëne ka hape, itre dremoni. (Hna Amamane 12:3, 4) Anyimua amamane angatre laka, tru catre kö la mene i angatr hune la itre atr, ene pe kola akötrëne la mele ne la itre atr. (Mataio 8:28-32; Mareko 5:1-5) Tha tro pi kö sa thëthëhmine la etrune la mene ne la itre dremoni, memine la pengöne la tane i angatr. (Mataio 9:34) Maine patre ju la ixatua i Iehova, thatreine jë kö tro sa hane cile kowe la itre nyinyithiina i Satana.

8. (a) Nemene la aja i Satana? (Wange ju la pane iatr.) (b) Ame koi epun, nemene la ka amamane ka hape, casi hi la aqane imethinë i Satana me fen?

⁸ Peteru a aceitunë Satana me ketre “liona a ho.” Önine la ketre tusi ka qejepengöne la hnëewekë qene Heleni, hna hape “ho,” tre kola qaja la “aqane ho ne la ketre öni ka meci hnei mecijin.” Ka ihmeku hnyawa hi lai memine la pengö i Satana, laka, ka imethinë me iakötrë! Ka musi pala hi angeice kowe la fen, ngo tha meji pala hi. Ceitu i Satana memine la liona ka mecijiin, nge ka thele tha. (1 Ioane 5:19) Pi tro catre angeic a nyi tha i angeic la itre hna iën e celë fen, memine la “ite xa mamoe.” (Ioane 10:16; Hna Amamane 12:17) Atraqatre la aja i Satana troa lepe apatrene la itre hlue i Akötresieti asë. Nge celë hi ka mama ngöne la aqane axösisine la itre hlue i Iehova, qaane ekö ngöne lo hneijinene la itre pane keresiano uti hë enehila.

9, 10. (a) Nemene la aqane thele hnei Satana troa lepe la nöje Isaraela? (Hamëne jë la itre ceitun.) (b) Nemene la nyipi kepine matre Satana a thele troa lepe apatrene la nöje Isaraela? (c) Tune kaa la mekuna i Satana ngöne la kola kuca la itre ngazo ka tru enehila hnene la itre hlue i Iehova?

⁹ Hetre ketre aqane amamane Satana la  imethinë i angeic. Tha ka utipine fe kö la liona la ej a lepe la tha ne ej. Pëkö ihnimi ne la liona qëmekene tro ej a öni la tha ne ej, nge e ase hë öni, ketre tha kolo hmaca fe kö a mekune lo lai tha. Ceitune hnyawa hi lai me Satana. Tha angeice fe kö a hnime la atr hnei angeice hna lep. Pane mekune jë la madrine i Satana lo angetre Isaraela ekö a kei kowe la kuci ngazo me meciun! Drei jë la etrune la madrine i Satana lo Zimeri a xenipune la hnei angeice hna kuci ngazo! Nge drei jë fe la madrine i angeic ngöne lo Gehazi a xenipune la hna meciu ewekë!—Numera 25:6-8, 14, 15; 2 Ite Joxu 5:20-27.

¹⁰ Hetre nyipi kepine matre Satana a thele troa apatrene la nöje Isaraela. Pane mekune jë së ka hape, troa fetra lo Mesia qathene la nöje cili, nge angeice hi lo ka troa ngaa Satana me isigöline la musi cile i Iehova. (Genese 3:15) Xele catre Satana tro la nöje Isaraela a amadrinë Iehova, celë hi matre, hnei angeice hna kuca asë la hnei angeice hna atreine matre troa apuingazone la nöj. Tha tro pi kö sa hane mekune ka hape, hnei Satana hna hane utipi Davita lo nyidrëti a nyixetë me Batheseba. Nge tha hnei angeice fe kö hna hane utipi Mose lo kola sewe Mose hnei Iehova troa hane tro kowe la nöje hna thingehnaean. Atraqatre pe la madrine i Satana ngöne la kola kuca la itre ngazo ka tru hnene la itre hlue i Iehova. Itre ijine Satana hi lai a qaja angazo Iehova.—Ite Edomë 27:11.

11. Pine nemene matre tro Satana lai a thele troa iaö Sara?

¹¹ Hnei Satana hna catre methinëne la itre xötrapane i Iesu. Pane mekune jë la itre ewekë ka traqa thupene la hnei Iehova hna sisinyi koi Aberahama, ka hape, tro angeic a ketre “nöje atraqat.” (Genese 12:1-3) Ame lo Aberahama me Sara e Aigupito, hnei Farao hna xomi Sara kowe la hnalapa i nyidrë matre tro eahlo a nyi föi nyidrë. Eloine pe, hnei Iehova hna thupë Sara, me thepe eahlo qa ngöne la jole cili. (E jë Genese 12:14-20.) Hna traqa hmaca koi nyidro la jole cili e Gerara qëmekene troa hnaho Isaaka. (Genese 20:1-7) Hapeu, Satana kö la qaane la itre jole cili? Pane mekune jë ka hape, hnei Sara hna trotrije la ketre nöje ka trena mo, matre troa mel e hnine la itre uma mano. Matre hapeu, hnei Satana kö hna iaö Sara troa piine la itre iuma atraqatre i Farao me Abimeleke? Maine jë hnei Satana hna hane mekune ka hape, tro Sara a nyixetëtriji Aberahama me nuetriji Iehova, matre tro pena ha a faipoipo memine la ketre joxu. Ngo pë fe kö hna qaja hnei Tusi Hmitrötr göne lai. Tro pe hi lo a tru catre la madrine i Satana e traqa ju Sara aluzine la manathithi ka eje thei eahlo, ene la troa ketre xötrapane i Iesu. Ketre, tha tro kö Satana a utipi Sara e traqa ju qeje gele eahlo, me angazone la aqane imelekeu i eahlo me Aberahama, me aqane imelekeu i eahlo me Iehova. Kola mama hnyawa la aqane imethinë me aqane iakötrë i Satana!

12, 13. (a) Hna amamane tune kaa hnei Satana la ihmethinë i angeic thupene la kola hnaho Iesu? (b) Ame koi epun, tune kaa la aqane goeëne Satana la itre nekönatr ka hnimi Iehova me ka isine troa nyihlue i Nyidrë?

¹² Hna hnaho Iesu, nyimu macatre thupe i Aberahama. Tha hnei Satana kö hna hnime lai medreng. Atre hnyawa hi Satana ka hape, e tru hë nyën, nyëne hi lo Mesia. Iesu  la igötranene ka tru ne la matra i Aberahama, nge nyidrëti hi la ka troa “apatene la ite huliwa i diabolo” elany. (1 Ioane 3:8) Hapeu, hnei Satana kö hna hane mekune ka hape, ka ngazo catre troa humuthe la nekönatr? Ohea. Ame koi angeic, humuthe ju hë maine tha humuth, ngo ceitune hi. Ame hnei angeice hna canga thele troa humuthe la nekönatr. Hna tune kaa?

¹³ Ame lo kola drei mejene hnei Heroda Joxu la hna qaja hnene la itre Magoi ka hape, ase hë hnahone la “Joxu i angete Iuda,” kola palulu la trenge elëhni angeic, ene pe angeic a thele troa humuthe la nekönatr. (Mataio 2:1-3, 13) Amekötine jë hi Heroda troa humuthe la nöjei medreng me nekönatr trahmany, ka lue macatre e Betheleema me ngöne la itre xa götran. (E jë la Mataio 2:13-18.) Ngo mele ju kö Iesu! Matre nemene hë la hne së hna atre göi Satana? Kola mama hnyawa ka hape, tha angeice fe kö a nyipiewekëne la mele ne la itre atr. Ketre, tha angeice kö a nyipine la itre nekönatr. Satana hnyawa hi la ‘liona ka ho.’ Tha tro pi kö sa thëthëhmine ka hape, ka imethinë catre angeic!

14, 15. Nemene la aqane “atimekëne la ite hni angete tha lapaune kö” hnei Satana?

¹⁴ Ame la aqane kuca i Satana matre troa ananyi së qaathei Iehova, tre, ene la troa iaö së. (1 Ioane 4:8) Pine laka Satana a catre amenune la itre atr, thatre hë angatr ka hape, “ite ka pë ewekë [angatr] ngöne la u,” kola hape tha öhne hë angatr la enyipiewekëne la troa hane imelekeu me Akötresie. (Mataio 5:3) Hnei Diabolo hna “atimekëne la ite hni angete tha lapaune kö,” matre tha öhne fe kö angatr la nyipici göi Iehova.—2 Korinito 4:4.

¹⁵ Hnei Satana hna amenune la itre atr jëne la hmi ka thoi. Atre hnyawa hi angeice ka hape, “ka isaxolo” lehova. (Esodo 20:5) Pane mekune jë la etrune la madrine i Satana, ngöne lo angeic a öhne la itre atr ka hane hmi kowe la itre xötrapan, maine kowe la itre hna xup, maine koi itre öni pena, nge triji Iehova ju pë hë. Kola mama laka, ala nyimu la itre ka mekune ka hape, hna kapa hnei Akötresieti la hmi angatr, ngo thatre pe angatr ka hape, hna amenu angatr hnene la itre ini me itre hna majemine kuca ka thoi. Hna traqa tune lai koi angetre Isaraela ngöne lo hneijine i Isaia. Öni Iehova koi angatr: “Ue lae nyipunie a hamë mani thupene la tha areto ? memine la huliwa i nyipunie thupene la tha hna amejin ? denge hnyawa ju koi ni, nge xeniju la ka loi, nge tro la ite hni nyipunie a madine la ka pipixenyë.”—Isaia 55:2.

16, 17. (a) Hnauëne laka Iesu a qaja koi Peteru ka hape: “Satana fe, trojë kowe la hutröng”? (b) Nemene la aqane kuca i Satana matre, tha tro hmaca kö sa hane hmek?

¹⁶ Ijiji Satana fe troa amenune la itre ka catre nyihlue i Iehova. Pane mekune jë lo Iesu a qaja kowe la itre aposetolo i nyidrë ka hape, easenyi hë matre humuthi nyidrëti pi. Peteru a meku Iesu me qaja ju koi nyidrëti ka hape: “Ekölö hi ni enëtilai, Joxu ; tha tro kö a traqa tune lai koi cilie.” Öni Iesu jë hi e sa koi Peteru ka hape: “Satana fe, trojë kowe la hutröng!” (Mataio 16:22, 23, MN) Hnauëne laka, Iesu a jelë Peteru ka hape, “Satana”? Pine laka, atre hnyawa hi Iesu la  ewekë ka troa traqa koi nyidrë. Easenyi hë matre meci pi Iesu, nge troa mama hnyawa e cili ka hape, Diabolo la atre thoi. Ketre ijine lai ka jole catr, celë hi matre tha ijine tro kö Iesu lai a pane meku nyidrë. Eje hi laka, maine tha ka hmeke ju Iesu, tro ha atraqatre la madrine i Satana.

¹⁷ Easë hi lai a melëne la ketre ijine ka jole catr, ke easenyi hë matre traqa pi la pune la fene celë. Satana a ajane tro sa hane meku së, me thele tro sa melëne la fene celë. Aja i angeice fe tro sa thëthëhmine ka hape, easë lo la a melëne la hneijinene la pun, ene pe tha tro hë sa hane hmek. Wange kö, ke hane jë traqa tune lai koi epun! Haawe, ‘hmeke jë’! (Mataio 24:42) Tha tro pi kö epuni a jelenyipicine la itre trengathoi Satana hna hape, tha tro kö a canga traqa la pune la fene celë, maine pena tha tro kö a nyipune la fen.

18, 19. (a) Nemene la aqane amenu së hnei Satana matre tro sa mekune ka hape, thatreine kö Iehova hnimi së? (b) Iehova a xatua së tune kaa troa catre hmek?

¹⁸ Hetre ketre aqane amenu së hnei Satana. Angeic a thele tro sa mekune ka hape, thatreine kö tro Iehova a hane hnimi së, maine pena thatreine kö Nyidrëti sengetrije la itre ngazo së. Ngo itre trengathoi lai hna sil hnei Satana! Pane mekune jë la, drei la hna thatreine hnime hnei Iehova? Satana hi. Nge ngazo i drei la hnei Akötresieti hna thatreine nue? Satana pala hi. Tusi Hmitrötre pe a hane akeukawane la hni së me hape: “Tha thina ka tha meköti kö Akötesie mate troa thëthëhmine la huliwa i nyipunie, memine la ihnimi hnei nyipunie hna amamane kowe la atesiwa i nyidë.” (Heberu 6:10) Iehova a wangatrune la nöjei ewekë hne së hna kuca matre troa amadrinë Nyidrë, nge tha tro jë kö a gufa la itre huliwa hne së hna kuca koi Nyidrë. (E jë la 1 Korinito 15:58.) Haawe, the nue Satana pi kö troa amenu së hnene la itre trengathoi angeic.

¹⁹ Tune la hne së hna ce wange hë, ka trene men, ka iakötrë nge ka catre iaö lae Satana. Nemene ju hë la aqane tro sa cile catre kowe la ithupëjia cili? Iehova a xatua së. Wesi Ula i Nyidrëti a hane qajaqaja koi së la itre aqane nyinyithiina i Satana, matre “tha tha’te kö shë la ite nyinyithina i nyën.” (2 Korinito 2:11) Maine tro sa atre hnyawa la nöjei pengöne aqane tupathi së hnei Satana, haawe, tro ha tha jole koi së troa catre hmek. Ngo tha itre aqane nyinyithiina i Satana hmekuje kö la nyine tro sa atre. Öni Tusi Hmitrötr: “Thipe tiji diabolo pi, nge tro nyën’ a köte qa thei nyipunie.” (Iakobo 4:7) Tro la tane mekune ka troa xulu a hane qaja la köni aqane tro sa cile catr me ngaa Satana.