1, 2. Nemene la aqane amamane Iesu la ejuine la ihnimi nyidrë kowe la itre atr?

HUPUNA i Akötresieti la tulu ka sisitria ne la inamacan, me “ka atreine huliwa.” Drei jë la madrine i Iesu me Tretretro i nyidrë la nyidroti a “acatene la hnengödrai” me “ami tepene la fene hnengödrai.” Ngo ame qa ngöne la nöjei ewekë hnei Akötresieti hna xup, öni Iesu: “Hanyinge la ite nekö i at.” (Ite Edomë 8:22-31, MN) Qa ngöne la qaan, hnei Iesu pala hi hna hnime catrëne la atr.

² Ame hë e thupen, hnei Iesu hna amamane la ihnim me nyipici nyidrë kowe la Tretretro i nyidrë, memine fe la ejuine la ihnimi nyidrë kowe la nöjei atr asë. Kola mama lai ngöne la nyidrëti a kapa troa nue la hnengödrai, me uti kowe la fen matre atr hë. Hnei nyidrëti hna kapa troa nue la mele i nyidrë, “nyine thupene mele ne la nöjei ate ka kösau.” (Mataio 20:28; Filipi 2:5-8) Ame lo Iesu e celë fen, hnei Akötresieti hna nue koi nyidrëti la mene troa kuca la itre iamamanyikeu. Kola mama jëne la itre iamamanyikeu cili, la etrune la ihnimi Iesu kowe la itre atr, memine fe la itre ewekë ka mingöminge hna troa kuca hnei nyidrë kowe la nöjei atr ngöne la itre drai ka calemi.

3. Nemene la hne së hna troa ce wange ngöne la tane mekune celë?

 ³ Ame lo Iesu e celë fen, hnei nyidrëti hna cainöjëne la “maca ka loi ne la baselaia i Akötesie.” (Luka 4:43) Atre hnyawa hi nyidrëti ka hape, tro la Baselaia cili a ahmitrötrëne la ëje ne la Tretretro i nyidrë. Nge tro fe ej a nyinyine paluane la nöjei jole ka ej ngöne la fen. Ame ngöne lo Iesu a cainöj, nyidrëti fe a kuca la itre iamamanyikeu ka nyimutre. Kola mama jëne la itre iamamanyikeu cili ka hape, tru la hnei nyidrëti hna mekune la itre atr. Pine nemene matre ka nyipi ewekë koi së troa atre la mekune cili? Pine laka, ame la hnei nyidrëti hna kuca ekö, tre kola thue mejiune së thatraqane la itre drai elany. Haawe, tro sa ce wange la foa lao iamamanyikeu i Iesu.

4. Nemene la ewekë ka traqa lo Iesu a öhne la lepera?

⁴ Ame ngöne la Iesu a cainöje trootro, hnei nyidrëti hna tro kowe la ketre götrane nöj, hna hëne ka hape, Galilaia. Ame ngöne la ketre traon e cili, öhne ju hi nyidrë la lepera. (Mareko 1:39, 40) Tru catre la aqane tithe la atr hnene la mec, matre öni Luka jë hi ka droketre, ka hape, “sihngödipi hë hnei lepera.” (Luka 5:12, MN) Öni Tusi Hmitrötr, ame la kola öhnyi Iesu hnene lai atr, angeic a “kei qeipië, me sipon, ka hape, Joxue, maine aja i enëtilai, atreine hi enëtilai troa aloinyi ni.” Atre hnyawa hi lai atr ka hape, eje thei Iesu la mene troa aloine la meci angeic, ngo nyipi ewekë tro angeic a atre ka hape, aja i Iesu hi troa aloinyi angeic. Pine nemene lai? Pine laka, atre hi lai atr ka hape, hnene pala hi la itre Faresaio hna sisine la itre atr hna tithi hnei lepera. Ngo nemene la mekuna i Iesu? Tro jë nyidrëti a ujë tune kaa kowe lai atr hna ane la ngönetrei hnei mec? Maine epuni ju fe hi lai, nemene la hnei epuni hna troa hane kuca?

5. Pine nemene matre hetre aja i Iesu troa aloine la lepera?

⁵ Kola mama laka, tha hnene kö la lepera hna suene ka hape, “Pui ngazo hë ni, pui ngazo hë ni,” tune lo hna amekötine hnene la Trenge Wathebo i Mose. (Levitiko 13:43-46) Ngo, tha hnei Iesu kö hna wesitre pine lai. Hnei nyidrëti pe hna hnime lai atr, nge hetre aja i nyidrëti troa xatua angeic. Thatre hnyawa kö së la mekuna i Iesu, ngo mama hnyawa hi la aliene hni nyidrë. Hnene laka, tru la utipine i nyidrë kowe lai atr, ame hnei nyidrëti hna kuca la ketre iamamanyikeu. Hnei nyidrëti hna ketr lai atr, ketre ewekë hna sisine troa kuca hnene la ketre atr. Tru la utipine i Iesu, matre ka xecie qa kuhu hni nyidrëti troa qaja ka hape: “lni a ajan, loi hë eö. Ame hna canga patepi la lepera thei nyën.” (Luka 5:13) Mama hnyawa pi hi ka hape, hnei Iehova hna hamëne koi Iesu la mene troa kuca la iamamanyikeu ka tru celë, me amamane la etrune la ihnimi Iesu kowe la itre atr.—Luka 5:17.

6. Nemene la ewekë nyine haine qa ngöne la itre iamamanyikeu i Iesu, nge nemene la hna amamane hnene itre ej?

⁶ Jëne la mene qaathei Iehova, hnei Iesu hna atreine kuca la itre iamamanyikeu ka nyimutre. Tha hnei Iesu hmekuje kö hna aloine la ka lepera, ngo hnei nyidrëti fe hna aloine la itre xa pengöne meci ju kö. Tusi Hmitrötr a qaja koi së ka hape, “hna haine hnene la ka ala nyimu ngöne laka öhnë hë angate la ite humu a ewekë, me ite hna sathepën’a loi hë, me ite genyi a tro hë, me ite timek’ a goeë hë.” (Mataio 15:31) Ame lo Iesu a aloine la itre ka trene mec, tha hnei nyidrëti kö hna nyihnane la ketre hnepe götrane ngönetrei ka kucakuca ne la ketre atr hnene la hnepe ngönetrei i ketre. Ame Iesu, atreine kö nyidrëti troa aloine la itre götrane  ngönetrei ka genyi maine ka eatr. Ketre, atreine hi nyidrëti troa aloine la itre atr ngacama nanyi angatr qaathei nyidrë. (Ioane 4:46-54) Nemene la hna amamane hnene la itre iamamanyikeu celë? Kola amamane la trenge aja memine la mene ka eje thene la Joxu së troa apatrene paluane la itre sine mec. Ketre, ame la easa goeëne la aqane ujë i Iesu kowe la itre atr, keukawa ju hi la hni së, ke xecie koi së laka, ame e hnine la fene ka hnyipixe, “tro nyidëti a hnime la ate ka aköte me ate pë ewekë.” (Salamo 72:13) Tro hë Iesu elanyi a aloine la nöjei hna akötrën, ke, atraqatre la aja i nyidrë troa eatrëne lai.

7, 8. Qaja jë la ewekë ka traqa qëmekene tro Iesu a aloine la ketre atr e Betheseda.

⁷ Itre treu thupene la kola aloine la lepera, hnei Iesu hna feke qaa Galilaia Iudra eë troa sisedrëne la huliwa ne cainöjëne la Baselaia i Akötresie. Eje hi laka, itre thauzane lao atr, angetre drenge la maca i Iesu, nge hna ketri angatr hnene la ihnimi nyidrë koi angatr. Tru la aja i Iesu troa axapone la hni ne la itre ka puafala, me thue mejiunene fe la itre atr cili.—Isaia 61:1, 2; Luka 4:18-21.

⁸ Ame lo treu Nisan, Iesu a tro Ierusalema göi troa atrune la Paseka. Ame e cili, pëkö hneimeke ne la itre atr, ke kola traqa troa isa kuci jolen göi troa atrune la pui ne xen. Ame ngöne la götrane kolopi ne la ēnē, hetrenyi la ketre an, hnepe tim, hna hëne ka hape, Betheseda. E cili, hnei Iesu hna öhne la ketre atr ka thatreine tro.

9, 10. (a) Pine nemene matre itre atr ekö a tro kowe la tim, Betheseda? (b) Nemene la hna kuca hnei Iesu ngöne la an, nge nemene la ini koi së? (Wange ju la pane iatr.)

⁹ Ala nyimu catre la itre trene meci ka tro kowe la an, Betheseda. Pine nemen? Pine laka, angatr a mekune ka hape tro ha loi la meci angatr, e tro angatr a uti hmekune la kola emuemu la tim. Pane mekune jë së la kola traqa itrai la itre atr, kola isa pi mel, matre angatr a isa akötrehni melen. Ka pë ethan, nge ka pexeje Iesu, matre tha nyidrëti kö a thele troa aloinyi nyidrë. Hnei nemene kö matre nyidrëti pi e cili? Hnene la ihnimi nyidrëti kowe la itre atr. E cili hi la Iesu a öhne la atr ka wezipo hë qaane ekö lo tha traqa petre kö nyidrë e celë fen.—E jë la Ioane 5:5-9.

¹⁰ Hnei Iesu hna hnyinge kowe la atr maine aja i angeice kö tro hmaca angeic a tro. Pane mekune jë la hleuhleu ka eje thene lai atr la angeic a qaja koi Iesu ka hape, aja i angeic troa aloinyi angeic, ngo tha ijije kö, ke pëkö ka xatua angeice troa uti kowe la an. Ame hnei Iesu hna upe lai atr troa kuca la ketre ewekë hnei angeice hna thatrein. Hnei Iesu hna upi angeic troa mejë fë la igöhne i angeic me tro. Ame hna mejë fë hnene la atr la igöhne i angeic me tro hë! Ketre iamamanyikeu la ka mingöming nyine anyipicine la nyine tro Iesu elanyi a kuca ngöne la fene ka hnyipixe. Ketre, eje fe a amamane la ejuine la ihnimi Iesu kowe la itre atr. Nyidrëti a thele la itre atr ka aja ixatua. Tro la tulu i Iesu a xatua së troa thele pala hi la itre atrene la teritoare së hna akötrëne hnene la itre ewekë ka ngazo ka traqa enehila.

11. Kola mama tune kaa la ejuine la ihnimi Iesu kowe la itre atr ngöne Mareko 5:25-34?

¹¹ E jë la Mareko 5:25-34. Traqa koi 12 lao macatre ne kola akötrëne me ahleuhleune la ketre föe hnene la mec i angeic. Hna xom acone la mele i angeic hnei mec, nge kola  ajolë angeic ngöne la götrane la hmi. Tha mano kö angeice tro koi droketre, nge tro asë hi la manie i angeic ngöne la itre drösinöe, ngo kolo jë petre hi ka hape, ngazo catre jë. Ame ju hi la ketre drai, öhne ju hi föe la ketre jëne troa aloine la meci angeic. Haawe, angeice pë hë a tro jë nyipine la ka ala nyim uti hë la traqa angeic hmeku i Iesu, me ketr la iheetre i nyidrë. (Levitiko 15:19, 25) Ame ju hi la Iesu a drenge la kola lö pi la mene qaathei nyidrë, nyidrëti hë lai a hnyingëne thele la atre ketri nyidrë. “Ame hna qou me hmengöhmengönepi la föe, . . . ame hna taqapi nyidoti a thiliju koi nyidëti, me qeje nyipici asë koi nyidë.” Atre hë Iesu ka hape, hnei Iehova hna aloine la meci ne la föe. Iesu a nango qaja jë ka hape: “Nekönge fe, melë hë nyipo hnene la lapaune i nyipo ; trojë memine la manathith, melë hë nyipo qa ngöne la meci nyipo.”

12. (a) Qa ngöne la hne së hna inin, nemene la aqane tro sa qejepengöi Iesu? (b) Nemene la tulu hnei Iesu hna hamë së?

¹² Ketre ju hi la hni së la easa öhne la aqane hnime Iesu la itre atr ka trene mec. Isapengöi nyidrëti catre me Satana, atre uku së troa mekune ka hape, ka pë eloine së, nge pëkö ka troa hane hnimi së. Ngo ame la itre iamamanyikeu hna kuca hnei Iesu, sipu nyine anyipicine hi lai ka hape, nyidrëti a meku së me hnehengazo së la kola traqa koi së la itre jol. Madrine catre së laka, troa musi koi së hnene la Joxu nge Atre Huuje ka tru ihnimin! (Heberu 4:15) Maine tha hne së kö hna hane wezipo, tro lai a jole koi së troa trotrohnine la atr ka hekö hë tithi hnei mec. Ngo ame Iesu, tru la utipine i nyidrë kowe la itre atr ka wezipo, ngacama tha hane fe kö tithi nyidrë hnei mec. Drei la tulu ne ihnim nyine tro sa xötrethenge!—1 Peteru 3:8.

13. Nemene la ka mama thei Iesu lo kola amele Lazaro hmaca?

¹³ Hna ketri Iesu hnene la akötre ne la itre atr. Ame ngöne la kola meci hnei Lazaro, sinee i nyidrë, öhne ju hi nyidrëti la akötre ne la lapa i Lazaro me itre sinee i angeic, ame “hnei nyidëti hna simano e kuhu hnin, me manomano cat.” (E jë la Ioane 11:33-36.) Ngacama atre hi nyidrë ka hape, tro hmaca kö lai a amele Lazaro, ngo hnei nyidrëti hna treij. Tha hmahma kö nyidrë tro la itre atr a goeë nyidrë e treij. Tru catre la ihnimi nyidrëti  koi Lazaro, me lapa i angeic, ame hnei nyidrëti hna huliwane la mene qaathei Akötresie matre troa amele Lazaro hmaca!—Ioane 11:43, 44.

14, 15. (a) Nemene la ka amamane ka hape, aja i Iehova troa apatrene la nöjei akötre ne la itre atr? (b) Nemene la hne së hna inine qa ngöne la hnaewekë “itre hua nyine amekunën”?

¹⁴ Tusi Hmitrötr a qeje Iesu ka hape, nyidrëti la hnaiji ne la Tretretro i nyidrë, Iehova. (Heberu 1:3) Matre, kola anyipicine hnene la itre iamamanyikeu ka hape, aja i Iehova fe troa apatrene la itre sine mec, me akötr, me mec. Easenyi hë matre tro Iehova me Iesu a amelene hmaca la itre atr ka ala nyimu catre hmaca kö. Öni Iesu, “Calemi hë la ijine tro la nöjei ate ngöne la ite hua [“nyine amekunën,” MN] a mele hmaca.”—Ioane 5:28, 29.

¹⁵ Hnei Iesu hna qaja la hnaewekë hna hape, “itre hua nyine amekunën.” Kolo lai a amamane ka hape, atreine hi la Akötresieti Kapucatinasë, lo Atre Xupe la hnengödrai me fen troa mekune hmaca la pengöne la mele ne la atr, me itre thiina i angeic. (Isaia 40:26) Tha kolo hmekuje kö a mama la atreine i Iehova troa amelene hmaca la atr, ngo ene fe la aja i Nyidrë. Hnene la itre hna amelene hmaca hna qaja e hnine la Tusi Hmitrötr hna amamane la hna troa kuca elanyi ngöne la fene ka hnyipixe.

16. Nemene la huliwa ne la itre hlue i Iehova elany?

¹⁶ Maine tro sa mele nyipici koi Iehova, tro hë sa hane melëne la ketre iamamanyikeu ka tru catre hmaca kö, ene la troa mele pe qa ngöne la akötre atraqatr! Thupene ju hi la isi Amagedo, tro sa öhne la itre iamamanyikeu ka nyimutre catre hmaca kö. Ame ngöne la ijine cili, pexeje asë hë la nöjei atr. (Isaia 33:24; 35:5, 6; Hna Amamane 21:4) Pane mekune jë la itre atr, angatr a trije la itre thulue i angatr, me itre tö, me itre icea nyine ukun, me itre aparei koi itre ka sim. Atre hnyawa hi Iehova ka hape, nyipi ewekë troa egöcatre me pë mecine la itre ka troa mel elanyi thupene e Amagedo, ke, tru catre la huliwa nyine tro angatr a kuca. Angatre hi la itre ka troa nyidrawane la ihnadro matre paradraiso asë hmaca pi.—Salamo 115:16.

17, 18. (a) Pine nemen matre kuca jë Iesu la itre iamamanyikeu? (b) Pine nemene matre loi e tro sa kuca la hne së hna atreine göi troa hane mele ngöne la fene ka hnyipixe?

¹⁷ Kola ithuecatrene la “ka ala nyimu atraqat” enehila la angatr a e la aqane aloine Iesu la itre trene mec. (Hna Amamane 7:9) Jëne la itre iamamanyikeu celë, kola acatrene la mejiune së, ka hape tro ha aloine la itre meci së elany. Itre eje fe a amamane la etrune la ihnimi ne la Hupuna i Akötresie kowe la itre atr. (Ioane 10:11; 15:12, 13) Ame la etrune la utipine i Iesu, tre, celë hi hatrene la ejuine la ihnimi Iehova kowe la itre hlue i Nyidrë asë, easë isa ala cas.—Ioane 5:19.

¹⁸ Ase asë hë jilapane la fen hnene la akötr, me hleuhleu, me mec. (Roma 8:22) Celë hi matre, ka nyipi ewekë catre koi së la fene ka hnyipixe. Ame e cili, tro la nöjei atr asë a hetrenyi la mele ka pexej tune la aqane thingehnaeane hnei Akötresie. Malaki 4:2 a thue mejiune së ka hape, tro hë sa madrine “me sheshësheshë tune la nekö i kau qa hnuma,” ke, ase hë amele së qa ngöne la ngazo. Epi tro la hni ne ole së koi Iehova me lapaune së kowe la itre hnei Nyidrëti hna thingehnaean, a upi së troa kuca la hne së hna atreine matre troa hane mele ngöne la fene ka hnyipixe. Ixatua ka tru koi së la troa atre ka hape, ame la itre iamamanyikeu i Iesu, tre itre nyine anyipicine la aqane troa thapa paluane la atr qa ngöne la itre akötr ngöne la ijine musi nyidrë!