HNA hnaho ni lo 1955 e Queensland, Australie. Thupene jë hi lai, hnei Estelle, thineng hna ini Tusi Hmitrötr memine la Itretre Anyipici Iehova. Ca macatre thupen, nge kola bapataiso eahlo, nge ame pë hë Ron, kemeng, hnei nyidrëti hna hane lö kowe la hmi thupene 13 lao macatre. Hna bapataiso ni lo 1968 ngöne la ketre götrane ka nanyi qa ngöne la traon.

Qaane lo eni a co, ka tru koi ni la itre itus, me itre qene hlapa. Ame la nöjei ijine eni me kaka me nenë a nyinyapë loto, eni pe hi lai a e tus hutröi nyidro. Tha madrine kö nyidro koi ni, ke, tha hane kö ni goeëne la itre götrane hne huni hna nyinyapën. Ngo hnene la etrune la ajange troa e tus hna xatua ni hnyawa ngöne la hna ini. Goi kapa fe ni la itre hatre ka tru ngöne la hna ini ka tru ne Glenorchy, hnapeti ne Tasmanie.

Ame ngöne la ijine cili, hetre mekune ka tru nyine tro ni a axeciën. Tro kö ni a kapa la bourse ne lö kowe la université? Maine nyipici laka, ka tru koi ni la ini me e tus, ngo tru catre la olenge koi nenë hnene la hna ini ni tro Iehova a sisitria hune la nöjei ewekë asë. (1 Korinito 3:18, 19) Ase hë ni mekune me kaka me nenë laka, e ase hë ni ini, eni ha pionie. Celë hi hnenge hna kuca qaane lo Januare 1971, lo eni a 15 lao macatre.

Ame ngöne la eitre lao macatre thupene lai, hnenge hna pionie e Tasmanie. Ame ngöne la ijine cili,  hnenge hna faipoipo me Jenny Alcock, nekö jajinyi ne cili ka mingöming. Foa lao macatre ne ce pionie hut nyiho ngöne la traon e Smithton me Queenstown, lue götrane ka lapa cas.

Ame lo 1978, hnenge me föeng hna hane sine la ketre asabele koi itre nöje ka nyimutre e Port Moresby, Papouasie-Nouvelle-Guinée. Thatreine kö ni thëthëhmine la cainöje hna cile fë hnene la mesinare qene Hiri Motu. Pëkö ca hnenge hna trotrohnin, ngo ijine cili hi la kola cia la mekunang troa mesinare. Nge eni fe a ajane troa inine la ketre qene hlapa, me hane cile fë cainöj ngöne la qene hlapa ne la itre trejin matre xatua angatr. Ame hë e cili, eni ha trotrohnine laka, jëne la ajange kowe la itre qene hlapa, tro hë ni a huliwa catre koi Iehova.

Ame hë la nyiho a bëek, atraqatre la madrine i nyiho la kola upi nyiho troa mesinare. Traqa nyiho e Funafuti, Tuvalu lo Januare 1979. Köni ka cainöje hi ka bapataiso ngöne la hnapeti asë.

Tha ka hmaloi kö la troa inine la qene Tuvalu. Casi hi la itus ngöne la qene hlapa cili, kolo “Isisinyikeu Ka Hnyipixe.” Pëkö diksioner, nge pëkö ka inine la itre atr ngöne la qene hlapa cili. Celë hi matre, ce mekune jë hi nyiho troa inine la 10 koi 20 lao hnëewekë o drai. Ngo, canga öhne ju hi nyiho ka hape, tha trotrohnine kö nyiho la nöjei aliene la itre hnëewekë hnei nyiho hna inin. Ame la ketre ijin, nyiho a pi qaja ka hape, ka ngazo la kuci haze, ngo kolo pena ha qaja ka hape, the tulu ewekë kö maine huja tö! Eje hi laka, nyipiewekë tro nyiho a inine hnyawane la qene hlapa, ke, tru catre hë la itre atr hnei nyiho hna nyiqaane ini Tusi kow. Nyimu macatre hë e thupen, kola qaja hnene la ketre atr hnei nyiho ekö hna xötrei ini Tus memin ka hape: “Tru la madrine hun laka, atreine hë epon qaja la qene zi hun enehila. Ame ekö lo xötrei, tha trotrohnine fe kö huni la epon a ithanata!”

Ngo hetre ketre ewekë kö ka xatua nyiho troa canga inine la qene hlapa. Pine laka, pëkö uma nyine loué, matre hnei nyiho pe hi hna lapa thene la ketre hnepe lapa ka anyipici Iehova ngöne la neköi traon e cili. Matre, nyiho hi a qene Tuvalu ngöne la nöjei jëne tronge i nyiho, me ngöne la hnalapa. Thupene la itre macatre ne tha ithanatane hmaca kö nyiho la qene papale, kösë qene hlapa i nyiho pe hi la qene Tuvalu.

Tha qea ju kö thupene la nyiho a traqa, nge tru catre hë hnei atr ka ajane la nyipici. Ngo nemene jë la itus nyine troa xom göi troa ini angatr? Pëkö ca itus ngöne la qene hlapa i angatr. Tro jë angatr a isa ini Tus tune kaa? Nge e traqa pi angatre kowe la itre icasikeu, nemene nyima la nyine troa nyiman, nge ekaa la itus göi troa cile fë xötreqa, me hnëkë icasikeu? Troa tro xomi angatre tune kaa kowe la bapataiso?  Nyipiewekë tro la itre atr cili a hetre itus ngöne la sipu qene hlapa i angatre kö matre tro angatr a atrepengöi Iehova hnyawa! (1 Korinito 14:9) Hne huni hna isa hnying ka hape, ‘Tro fe kö elanyi a hetre itus qene Tuvalu, qene hlapa hna ithanatane hnene la 15 000 hi lao atr?’ Hnei Iehova hna sa la nöjei hnyinge celë, me amamane koi hun la lue ewekë, ene la (1) Aja i Nyidrë tro la itre atr ne “la ite götrane ngönegejë ga nany” a atrepengöi Nyidrë, nge (2) aja i Nyidrë tro la itre “hna akötëne me ka pë ewekë,” ene la itre hna wangacon hnene la fen a lapa qale kowe la atresiwa i Nyidrë.—Ieremia 31:10; Zefania 3:12.

Ame lo 1980, hnene la filial hna amekötine ka hape, troa ujën la itre itus qene Tuvalu. Ngacama, thatre hnyawa kö nyiho la qene hlapa, ngo hnei nyiho hna nyiqaane kuca la huliwa cili. (1 Korinito 1:28, 29) Ame la pane ewekë hnei nyiho hna kuca, tre hna itöne thei mus la ketre masin ne feja itus thatraqane la itre icasikeu. Ame hë e thupen, hnei nyiho fe hna ujëne qene Tuvalu la itus La vérité qui conduit à la vie éternelle, me fejane ej jëne lo lai neköi masin. Mekune pala kö ni la punepune ne lo encre, me ecatrehnine la hedredrei, matre jole catre troa feja itus. Nge ame itre xa ijin, kola thupa la tirisite!

Tha ka hmaloi kö troa ujë itus qene Tuvalu, ke, pëkö diksioner matre troa thele la itre hnaewekë, nge pë hmaca ju kö ketre itus qene Tuvalu. Ngo ame pe, hetre itre xa jëne ixatua koi nyiho. Ame la ketre hmakany, hnenge hna ithanata memine la ketre qatr ka monitör ekö, nge ka xele ma wange la hmi së. Hnei nyidrëti hna amexeje koi ni ka hape, tha tro kö sa hane traqa kowe la hnalapa i nyidrë. Öni nyidrëti fe: “Ca hnenge hna pi qaja koi epun. Ame ngöne la itre itus hnei epuni hna ujën, tre, tha aqane ithanata i angetre Tuvalu fe kö lai.” Hnyingëne jë hi ni koi itre xan, nge nyipici nyidrëti hi. Haawe, nyiho hi a thele jëne ju troa ujëne hnyawa la itre itus. Eni a haine la aqane xatua nyiho hnei Iehova jëne la qatr, ngacama ka xele ma wai së, ngo ka e hi la itre itusi së!

Ame la pane hna cinyiany qene Tuvalu hne huni hna tro fë koi itre atr, tre, kolo pepa ne ihë koi Drai Ne Amekunën. Thupene lai, kolo tarak Itre Ithuemacanyi Ne La Baselaia Na. 30, ka ce mama memine la  qene Papale. Ketre madrine ka tru koi hun troa hamëne kowe la itre atr la ketre itus ngöne la sipu qene hlapa i angatr! Ame fe la ijine cili, hna kuca fe la itre xa boroshür, me itus qene Tuvalu. Ame hë lo 1983, filial ne Australie ha fejan la Ita Ne Thup qene Tuvalu. Ka 24 lao götrane la Ita Ne Thup, nge ka mama e nöjei köni treu. Tru catre la ajane la angetre Tuvalu troa e la itre itus me zonal. E mama mina ha la ketre itus ka hnyipixe, kolo fe lai a ithuemacanyin ngöne radio i mus, nge ame itre xa ijin, celë hi ithuemacanyi ka tru ne la drai! *—Wange ju la ithuemacany.

Hnei nyiho hna kuca tune kaa la huliwa ne ujë itus? Ame la xötrei, hnei nyiho hi hna cinyianyi ngöne pepa. Thupene lai, kola anyimua lepe ngöne sine masine ne lepe tus qëmekene troa upe a tro kowe la filial ne Australie. Lue trejine föe ngöne la filial ne Australie la ka lepe la hna cinyihane qene Tuvalu ngöne ordinatör. Ngacama tha trotrohnine kö nyidro la qene Tuvalu, ngo ame la kolo hmaca lepe la hna cinyihan, me ce ixomekeune la hnapan me ka hnyipixe, mama pi hi la itre hna ithanata ka tria nge amekötine jë hi. Thupene lai, kolo ha amë hnyawa la itre hna cinyihan me itre iatr. Ase jë hi, iupifë pi hë ngöne avio koi nyiho la itre götrane tus hna eköth hnyawa ha. Nyiho pë hë a wange hnyawa hmaca ju me iupi fë hmaca kowe la filial hnë troa fejane la itus.

Lolo catre hë enehila la aqane ujëne la itre itus! Ekipi ne ujë qene hlapa ha la ka lepe la itre hna cinyihan, me ce amekötine hë ngöne ordinatör. Hetre ketre trejine fe ka ce huliwa memine la ekip. Ame la huliwa i angeic, tre troa ce xawane la itre iatr me itre hna cinyihan matre troa eköth hnyawa la itus. Thupene lai, kola iupifë hnei ekip jëne ëternet la itre hna cinyihane kowe la filial ka troa fejane la itus. Haawe, pë hmaca kö nyinyape hmo koi pos.

Kola tro la itre macatre, nge ketre eni fe me Jenny a kapa la itre xa hnëqa ngöne la Pacifique. Hnei nyiho hna feke qaa Tuvalu kowe la filial ne Samoa lo 1985. Ame e cili, hnei nyiho hna ixatua ngöne la huliwa ne ujë itus qene Samoa, me Tonga, me Tokelau, me xatuane fe la ujë itus qene Tuvalu. * (Wange ju la ithuemacany.) Ame hë lo 1996, hna upi nyiho kowe la filial ne Fidji, matre troa ixatua ngöne la huliwa ne ujë itus qene Fidji, me Kiribati, me Nauru, me Rotuma, me Tuvalu.

Eni pala hi a haine la aqane hnine la huliwa ne ujë itus hnene la itre ka ujë qene hlapa, ngacama jole pi hë, nge ka tru jolen. Tui Iehova, tru la aja i angatr tro la itre atr a drenge la maca ka loi ngöne la sipu qene hlapa i angatr. (Hna Amamane 14:6) Ame la kola hnëkëne la huliwa ne troa ujëne la pane Ita Ne Thup qene Tonga, hnenge hna pane ithanata memine la itre qatre thup asë ne Tonga, me hnyingë angatr ka hape, drei la itre ka ijije troa ujën. Ame ju kö la drai thupen, hnene la ketre qatre thup ka kuci loto hna nue la huliwa i nyidrë, me nyiqaane kuca la huliwa ne ujë itus. Hna thuecatreng hnene la ecatrene la lapaune i nyidrë, ke, ngacama tha mama kö koi nyidrë la nyine tro nyidrëti a kuca kowe la hnepe lapa i nyidrë, ngo hetre mejiune i nyidrë. Haawe, hnei Iehova hna hamëne pala hi la ka ijije koi nyidrë me hnepe lapa i nyidrë,  matre hnei nyidrëti hna huliwa e cili ngöne la itre macatre ka nyimutre.

Ka tru fe kowe la itre trejin ne la Lapa Ne Xomi Meköt tro la itre atr asë a hetrenyi la itre itus ngöne la sipu qene hlapa i angatr, ene mina fe ngöne la itre qene hlapa hna ithanatane hi hnene la ka ala xalaith. Ame la ketre ijin, hna amejëne la ketre hnying hna hape, ‘Hapeu, nyipiewekë kö troa ujëne la itre itus qene Tuvalu?’ Hna ithuecatrenge la eni a öhne la mekuna ne la Lapa Ne Xomi Meköt, kola hape: “Ame koi hun, pëkö nyipi kepine troa apën la huliwa ne ujë itus qene Tuvalu. Ngacama tha tru kö hnei atr ka ithanatane la qene Tuvalu hune la itre xa qene hlapa hna ithanatan, ngo nyipiewekë troa ketr la itre atr hnene la maca ka loi ngöne la sipu qene hlapa i angatr.”

Ame lo 2003, hnenge me Jenny hna fek qa ngöne la hnë ujë itus e Fidji kowe la Biero Thatraqane La Huliwa Ne Ujë Itus e Patterson, New York. Thatreine kö ni qejepengöne la etrune la madrineng! Hnei nyiho hna sine la ketre ekip ka huliwa matre tro pala hi a tru hnei itus hna ujën, nge tro fe a ujën ngöne la itre xa qene hlapa ka hnyipixe. Ame ngöne la lue macatre ne huliwa nyiho e cili, hna upi nyiho troa xatuane trongëne la itre ka ujë itus ngöne la itre nöje ka nyimutre.

Tro hmaca sa pane bëeke kowe la icasikeu ka tru memine lo Komite Ne Cinyihan. Ame hë lo macatre 2000, hnene la Lapa Ne Xomi Meköt hna mekune ka hape, nyipiewekë troa xatuane la itre ka ujë itus e cailo fen ngöne la huliwa i angatr. Nyimutre la itre ka ujë itus ka tha hane kö kapa la itre ini thatraqane la ujë qene hlapa. Thupene la icasikeu cili, hna axeciëne hnene la Lapa Ne Xomi Meköt laka, troa hamë ini kowe la itre ka ujë itus asë e cailo fen. Troa ini angatr troa trotrohnine hnyawa la hna cinyihane qene Papale, me aqane troa nyinyin la itre jol ka traqa ngöne la angatr a ujën, me aqane troa ce huliwa hnei ekip.

Nemene hë la thangane la hna ini cili? Lolo catre hë la aqane ujë itus. Ketre, tru catre hmaca kö hnei qene hlapa hna ujën ngön la itre itusi së. Ame lo kola upi nyiho troa mesinare lo 1979, hna kuca la zonal Ita Ne Thup ngöne hi la 82 qene hlapa. Nge, ame pena ngöne la itre qene hlapa ka nyimutre, kola mama la Ita Ne Thup, itre treu thupene la qene Papale. Ngo ame hë enehila, hna ujëne la Ita Ne Thup ngöne la 240 lao qene hlapa nge hetre munën, nge itre ej a ce mama memine la qene Papale. Kola mama enehila laka, ijije hi tro la itre atr a atre la nyipici jëne la ketre itus hna ujën ngöne la sipu qene hlapa i angatr, ke, traqa ha enehila koi 700 lao qene hlapa hna ujën ngön la itre itusi së. Ame ekö, tre tha mekune kö së laka troa traqa kowe lai.

Ame lo 2004, hnene la Lapa Ne Xomi Meköt hna amekötine troa ujëne la Tusi Hmitrötr La Traduction du monde nouveau ngöne la itre qene hlapa ka nyimutre. Qa ngöne lai, nyimutre catre hë enehila la itre atr ka e Traduction du monde nouveau ngöne la sipu qene hlapa i angatr. Ame lo 2014, hna kuca la Tusi Hmitrötr cili ka pexej maine sine hi ngöne la 128 lao qene hlapa, kolo fe a qaja lo itre qene hlapa ngöne la Pacifique Sud.

Ame la hnenge hna mekune catrën, tre kolo asabele e Tuvalu lo 2011. Nyimu treu ne catrehnine la hedredrei matre qaqacile hë la hnapeti asë ngöne la ijine cili. Matre hna mekune hnene la itre trejin troa pane uthe la ijine asabele. Ngo eloine pe, ame la jidr  ne traqa ni me ketre trejin, tre, kolo fe hi lai a trotro la imani. Haawe, ijije hë troa kuca la asabele! Ketre manathith ka tru koi ni troa amamane la Tusi Hmitrötr Les Écritures grecques chrétiennes. Traduction du monde nouveau qene Tuvalu! Ngacama ala xalaithe hi la itre trejine ka ithanatane la qene hlapa cili, ngo angatre fe a hane kapa qaathei Iehova la ahnahna ka tru cili. Ame hë la kola nyipune la asabele, trotro hmaca pi hi lai imani ka tru. Haawe, nyimutre la itre nyipici hna kapa hnene la iatrene la asabele ceitu me mani a trootro!

Ngazo pe, eni casi pë hë, meci hë Jenny lo 2009 thupene 10 lao macatre ne tithi nyiidro hnei cancer. Thötre faifi lao macatre ne ce mele nyiho. E mele hmaca ha nyiidro elany, tro nyiidro lai a madr la kola drenge ka hape, hetre Tusi Hmitrötr fe hë qene Tuvalu.

Hnei Iehova hna amanathithi ni, ke Nyidrëti hna hamë hnaaluene föeng, Loraini Sikivou. Hnei Loraini me Jenny hna ce huliwa ngöne la Bethela ne Fidji, nge Loraini la ketre ka ujë qene hlapa. Haawe, hnei Iehova hmaca hna aijijë ni troa hetre föe ka nyihlue nyipici koi Nyidrë, nge ka ajane fe tung troa huliwane la itre qene hlapa!

Kola tro la itre macatre, nge eni fe a öhne la aqane eatrëne hnyawane Iehova la aja ne la itre atr ne la nöjei qene hlapa asë, ngacama hna ithanatane la qene hlapa i angatr hnene la ka ala xalaithe hi. (Salamo 49:1-3) Hnenge hna öhne la madrine ne la itre atr la angatr a xötrei kapa la itusi së ngöne la sipu qene hlapa i angatr, maine pena la angatr a nyima koi Iehova ngöne la qene hlapa i angatr. Ame ngöne la itre ijine cili, eni a mekune la etrune la ihnimi Iehova koi së. (Ite Huliwa 2:8, 11) Eni hmaca mekune la itre trenge ewekëne la ketre trejine ka qatre hë, Saulo Teasi. Thupene la hnei nyidrëti hna xötrei nyimane la ketre nyima koi Iehova ngöne la sipu qene hlapa i nyidrë, öni nyidrë: “Tro eö a qaja kowe la Lapa Ne Xomi Meköt ka hape, ka mingöminge kö la itre nyima qene Tuvalu hune la qene Papale.”

Ame lo Semitrepa 2005, eni a sesëkötre la eni a kapa la hnëqa ka hnyipixe, ene la troa ketre atrene la Lapa Ne Xomi Meköt. Ngacama tha eni hmaca kö a ujë qene hlapa, ngo eni a olene koi Iehova laka, Nyidrëti a aijijë ni pala hi troa sajuëne la huliwa ne ujë itus e cailo fen. Tru la madrinenge troa öhne ka hape, Iehova a kapa la aja ne la nöjei hlue i Nyidrë, ngacama itre ka mele angatr ngöne la itre hnapet ka lapa cas ne la Pacifique! Celë hi hna qaja hnene la atre cinyihane la salamo, kola hape: “Iehova a mus ; loi e aci la fene hnengödrai ; loi e madi la nöjei hnapeti ka nyimute.”—Salamo 97:1.