1, 2. (a) Nemene la hne së hna trengeneun ngöne la Paradraiso? (Wange ju la pane iatr.) (b) Nemene la ka troa amadrinë së catr ngöne la fene ka hnyipixe?

EASË enehila a trengeneune la “mele ka tha ase palua kö.” Hnei Paulo aposetolo hna qaja ka hape, celë hi “nyipi mel.” (E jë la 1 Timoteo 6:12, 19.) Kola hape, troa mele palua ngöne la Paradraiso e celë fen. Jole pi hë koi së troa mekune la pengöne la mele elany, ene la troa hlë e nöjei hmakany, nge ka egöcatre catre së, nge ka madrine pala hi. (Isaia 35:5, 6) Pane mekune jë elanyi la elolone la mele ngöne la easa ce mele memine la hnepe lapa së me itre sinee së, memine fe la itre hna troa amelene hmaca. (Ioane 5:28, 29; Ite Huliwa 24:15) Hetre ijine së hë elanyi troa inine la itre xa ewekë hne së hna ajan, me thele troa maca hnyawa ngöne la itre huliwa hne së hë hna atrein. Ka tune la ini sias, tro pala hi së lai a öhne hmaca la itre xa ewekë ka hnyipixe. Maine pena tro epuni a inine troa elo miuzik, maine troa sipu siji tulune la uma i epun.

² Maine nyipici laka, ame la nöjei ewekë celë, tre itre hne së hna trengeneun, ngo ame la ka amadrinë së catr, tre ene la troa  nyihlue i Iehova. Pane mekune jë së la mele elany la kola metrötrëne la ëje i Iehova hnene la nöjei atr asë, me kapa la musi Nyidrë. (Mataio 6:9, 10) Atraqatre fe la madrine së troa goeëne la fen, a tiqa ha hnei atr ka pexej, tune lo aja i Akötresie ekö. Ketre tha jole hë elanyi troa acatrene catrëne la imelekeu së me Iehova la easa pexeje trootro!—Salamo 73:28; Iakobo 4:8.

3. Nemene la nyine tro sa hnëkë kow?

³ Ka xecie koi së ka hape, tro Iehova elanyi a eatrëne la nöjei ewekë ka mingöming celë, pine laka, “ateine Akötesie la nöjei ewekë asë.” (Mataio 19:25, 26) Maine aja së fe troa mele palua ngöne la fene ka hnyipixe, enehila hi la ijine troa “xölehuje” la mele ka tha ase palua kö. Ame koi së, easenyi catre hë matre traqa pi la pun. Celë hi matre loi e tro sa mele me amamane ka hape, itre ka lapa itreqe së, ke tro la pun a traqa, nge thatre kö së la ijin. Nyipi ewekë tro sa kuca la hne së hna atrein enehila matre hnëkë thatraqane la mele ngöne la fene ka hnyipixe. Tro sa ce wange la aqane tro sa hnëkë.

4. Tro sa hnëkë tune kaa enehila troa mele ngöne la fene ka hnyipixe? Qaja jë la ketre ceitun.

⁴ Nemene la aqane tro sa hnëkë enehila thatraqane la mele ngöne la fene ka hnyipixe? Maine tro sa hnëkëne la mele së ngöne la ketre nöj, tro së lai a pane kuca la itre xa ewekë nyine troa hnëkë së troa mele e cili. Tro së lai a nyiqaane inine la qene hlapa me qenenöje ne la itre atr e cili. Tro fe sa tupathe la itre a i angatr. Ketre tune mina fe, loi e tro sa hnëkë enehila thatraqane la mele ngöne la fene ka hnyipixe. Loi e tro sa thele troa mele kösë easë hë a melëne la mel e cili. Tro sa ce wange la itre nyine tro sa kuca.

5, 6. Pine nemene matre ka nyipiewekë troa drengethenge la organizasio i Iehova enehila?

⁵ Ame ngöne la fene celë, hnei Satana hna aciane thene la itre atr la aja troa isa kuci mekunan. Xele angatr e troa hetre ka musinë angatr. Ketre, tha pi tro kö angatr a drei Akötresie. Nemene hë la thangane lai? Tru la akötr, me hleuhleu. (Ieremia 10:23) Ngo Iehova la Atre Mus ka ihnim. Matre tro hë lai a mingöminge la mele elanyi ngöne la fene ka hnyipixe, e tro la nöjei atr a drengethenge Nyidrë.

⁶ Nyipiewekë elanyi tro sa trongëne la itre hna amekötine hnene la organizasio i Iehova matre troa apadraisone la ihnadro, me inine la itre hna amelene hmaca. Matre, tru catre la huliwa së elanyi qaathei Iehova. Ngo, tune kaa ju hë e traqa ju upi së hnene la itre ka elemeken troa kuca la ketre huliwa nge tha aja së kö? Tro kö së lai a idrengethenge? Tro kö sa thele troa eatrëne hnyawa la hnëqa së? E aja së troa hnëkë kowe la mele ka tha ase palua kö ngöne la fene ka hnyipixe, nyipiewekë enehila tro sa drengethenge la organizasio i Iehova.

7, 8. (a) Pine nemene matre loi e tro sa ce huliwa memine la itre ka elemeken? (b) Nemene la itre ewekë ka hnyipixe hna melën hnene la itre xa Keresiano? (c) Nemene la ka xecie koi së göi fene ka hnyipixe?

⁷ Hetre itre xa ewekë nyine tro sa kuca göi troa hnëkë së kowe la mel elany. Loi e tro fe sa kapa madrine la huliwa hna athipe koi së, me atreine ce huliwa. Maine tro sa ce huliwa memine la itre ka elemeken enehila, tro së lai a öhnyi madrin, nge tro fe sa hane ujë tune elanyi ngöne la fene ka hnyipixe. (E jë la Heberu 13:17.) Ame la kola lö hnei angetre Isaraela ngöne la Nöje Hna Thingehnaean, hna isa amekötine koi angatr la hnë tro angatr a mele ngön. (Numera 26:52-56; Iosua 14:1, 2) Thatre kö së  elanyi la götrane hna upi së troa mele ngön, ngöne la fene ka hnyipixe. Ngo, e tro sa inine ce huliwa, tro hë sa madrine troa kuca la aja i Iehova ngöne la nöjei götrane hna upi së kow.

⁸ Nyimutre la itre manathith hne së hna troa kapa elanyi fene la musi ne la Baselaia! Celë hi matre, tru la madrine së troa ce huliwa memine la organizasio i Iehova enehila, me kuca la nöjei huliwa hna athipe koi së. Ngo eje hi laka, ame itre xa ijin, troa saze la itre huliwa hna athipe koi së. Hna traqa tune lai kowe lo itre ka huliwa Bethela e Etazini. Hna upi angatre kowe la huliwa ne cainöj. Ketre, ame pena ha la itre ka iwai trootro, nge ka qatre hë, tre hna upi angatre pena troa pionie hut. Ka madrine angatr ngöne la itre huliwa i angatre ka hnyipixe, nge Iehova a amanathithi angatr. E tro sa sipone la ixatua i Iehova, me catre huliwa i Nyidrë, me kapa madrine la itre hnëqa së ka hnyipixe, tro hë së lai a madrin, nge tro fe Iehova a amanathithi së. (E jë la Ite Edomë 10:22. *) Tune kaa ju hë elanyi e hetre götrane hne së hna pi mele ngön, ngo kolo pena a upi së kowe la ketre götrane kö? Ame e cili, tha götrane hnë tro kö sa mele ngön, maine huliwa hne së hna troa kuca la ka nyipiewekë. Ngo tro pe sa olene laka, traqa ha së kowe la fene ka hnyipixe.—Nehemia 8:10.

9, 10. (a) Pine nemene matre nyipiewekë tro sa atreine itreqe elanyi ngöne la fene ka hnyipixe? (b) Tro sa amamane tune kaa ka hape, ka atreine itreqe së enehila?

⁹ Ame elanyi ngöne la fene ka hnyipixe, hetre itre ijine tro sa pane itreqe. Maine jë, easa öhne la kola madrine hnene la itre atr, ke, mele hmaca ha la itre hnei angatre hna hnim, me itre sinee i angatr. Ngo ame easë, e tha hna amelene pala kö la itre hne së hna hnim, loi e tro sa treqene hnyawa la ijine tro Iehova a amele angatr. Ngacama tro pala kö sa pane itreqe elany, ngo hapeu, tro kö sa ce madrine me angatr, me atreine itreqe? (Roma 12:15) Maine tro sa inine troa treqene hnyawane enehila la ijine tro Iehova a eatrëne la itre hnei Nyidrëti hna thingehnaean, haawe, celë hi lai ka troa xatua së elanyi troa hane atreine itreqe.—Ate Cainöj 7:8.

¹⁰ Loi e tro sa atreine itreqe ngöne la easa kapa la itre ithuemacanyi ka hnyipixe ngöne la aqane troa trotrohnine la ketre ini qa hnine la Tusi Hmitrötr. Loi e tro sa waipengöne hnyawa la ini cili hna qejepengöne hnyipixen. Ketre, e tha trotrohnine hnyawa petre kö së, loi e tro sa atreine itreqe. Maine celë hi hne së hna kuca, ame elanyi ngöne la fene ka hnyipixe, tha jole kö tro sa atreine itreqe e hamëne trongëne jë Iehova la nöjei ithuemacanyi ka hnyipixe göi nyine kuca.—Ite Edomë 4:18; Ioane 16:12.

11. Pine nemene matre loi e tro sa inine troa nue la ngazo i itre xan enehila? Tro lai a xatua së tune kaa elanyi ngöne la fene ka hnyipixe?

¹¹ Ame la ketre aqane tro sa hnëkë kowe la mele elany, tre ene la troa inine nue la ngazo i ketre. Ame ngöne la Itre Macatre Ka Ca Thauzan Ne Musi Keriso, tro pala kö lai a pane qea la itre macatre matre patre  hnyawa pi la itre ethanyine la ngazo thene la atr. (Ite Huliwa 24:15) Celë hi matre, loi e hetrenyi the së elany la ihnim, me atreine nue la ngazo i ketre me ketre. Maine tro sa inine troa nue la ngazo i ketre, me imelekeu hnyawa me itre atr enehila, tha tro kö a jole elanyi koi së troa ujë tune lai ngöne la fene ka hnyipixe.—E jë la Efeso 4:2, 32.

12. Nemene la aqane tro fe sa amamane ka hape, ka hnëkë së kowe la mele ngöne la fene ka hnyipixe?

¹² Ame ngöne la fene ka hnyipixe elany, tha tro kö së lai a kapa la nöjei ewekë hne së hna ajan, nge tro së lai a pane itreqe matre hetrenyi jë. Matre nyipiewekë elanyi tro sa hetre hni ne ole, me kapa madrine la hne së hna hetreny. Nyipiewekë koi së elanyi la itre thiina hnei Iehova hna ini së enehila troa melën. Haawe, e tro sa inine troa melëne itre ej enehila, easë hi lai a amamane ka hape, ame la fene ka hnyipixe, tre ka mel e kuhu hni së, nge ka hnëkë fe së kowe la mele ka tha ase palua kö. (Heberu 2:5; 11:1) Ketre, aqane tro fe hi së lai a amamane la aja së troa mele ngöne la fene laka, nöjei atr asë a drengethenge Iehova.

13. Nemene la ka troa tro pa ngöne la mele së elanyi ngöne la fene ka hnyipixe?

¹³ Ame ngöne la fene ka hnyipixe elany, hetrenyi asë hi së la ka nyipiewekë matre tro sa mele madrin. Ngo, ame la ka amadrinë së catr, tre ene la troa kapa la itre ewekë i Akötresie. (Mataio 5:3) Tro ha tru hnei jole së elanyi ngöne la huliwa i Iehova, nge tro fe a tru la madrine së troa nyihlue i Nyidrë. (Salamo 37:4) Celë hi matre, e tro sa amë panë Iehova ngöne la mele së enehila, easë hi lai a hnëkë kowe la mele ka tha ase palua kö.—E jë la Mataio 6:19-21.

14. Nemene la itre mekune nyine tro la itre thöth a eatrëne ngöne la huliwa i Iehova?

¹⁴ Nemene la nyine tro sa kuca matre tro pala kö a sisitria la madrine së ngöne la huliwa i Iehova? Ame la ketre nyine kuca, tre ene la troa eköthe la itre mekune nyine troa eatrën. Maine thöth epun, pane mekune  hnyawa jë la aqane tro epuni a huliwane la mele i epuni göi troa huliwa i Iehova. Thele mekune jë ngöne la itre xa itusi së göi itre xa pengöne aqane huliwa i Akötresie o drai, nge iëne jë la ketre nyine tro epuni a eatrën. * (Wange ju la ithuemacany.) Ce ithanatane jë memine la itre xa trejine ka hekö hë huliwa i Akötresieti o drai. Maine tro epuni a huliwane la mele i epuni troa huliwa i Iehova, tro hë lai a ini epun me hnëkë epun troa huliwa i Iehova elanyi ngöne la fene ka hnyipixe.

15. Nemene la itre xa mekune nyine tro sa eköthe amë ngöne la huliwa i Iehova?

¹⁵ Hetre itre xa mekune nyine tro sa eköth amë ngöne la easa huliwa i Iehova. Loi e tro sa thele troa maca ngöne la ketre aqane troa cainöj. Maine pena, tro sa thele troa trotrohnine hnyawa la itre trepene meköti ne la Tusi Hmitrötr, me thele la aqane troa trongëne itre ej ngöne la mele së. Loi e tro fe sa thele troa maca ngöne la aqane troa e tus koi itre atr, maine ngöne la easa cile fë cainöj me qeje mekune ngöne la itre hna icasikeu. Hanawange la ini koi së: E tro sa eköth amë la itre mekune nyine tro sa eatrëne ngöne la huliwa i Iehova, tro lai a xatua së troa huliwa catre hmaca kö, me hnëkë së kowe la mele ngöne la fene ka hnyipixe.

16. Pine nemene matre pëkö mele ka sisitria hune la troa huliwa i Iehova?

¹⁶ E tro sa huliwane la traeme së göi troa hnëkë së kowe la fene ka hnyipixe elany, hapeu, easë kö lai a triane la ketre aqane mele ka lolo enehila? Ohea! Pëkö mele ka sisitria hune la troa huliwa i Iehova. Tha easë kö a nyihlue i Nyidrë, ke hnene laka hna iele së hnene la ketre atr, maine pena hnene la aja së troa mele pe ngöne la akötr atraqatr. E ka loi la aqane imelekeu së me Iehova, tro pala hi a lolo me madrine la mele së. Celë hi aliene la mele së lai qaathei Nyidrë. Pëkö mele ka sisitria hune la troa amekötine la  mele së hnei Iehova, nge tro sa kepe thangane la ihnimi Nyidrë. (E jë la Salamo 63:1-3.) Hetrenyi the së asë la madrine ka xulu qa ngöne la hne së hna nyihlue i Iehova qa kuhu hni. Celë hi matre qaja jë hnene la itre xa trejine ka hekö hë nyihlue i Iehova ka hape, eje hi lai mele ka sisitria!—Salamo 1:1-3; Isaia 58:13, 14.

17. Nemene la aqane tro sa goeëne la itre sipu aja së me nyine iamadrinë ngöne la paradraiso elany?

¹⁷ Ame elany ngöne la Paradraiso, tro sa madrine troa hane kuca la itre sipu aja së, me itre nyine amadrinëne la mele së. Eje hi laka, Iehova la ka xupi së memine la ajane troa madrin. Ketre, Nyidrëti a thingehnaeane ka hape, tro Nyidrëti a “amejine la ite ewekë ka mele asëjëihë.” (Salamo 145:16; Ate Cainöj 8:15) Maine nyipici laka, ka nyipiewekë la troa kuci madrin, me mano, ngo tro lai a amadrinë së catre e tro sa amë panë Iehova ngöne la mele së. Tro pala hi lai a tune elanyi ngöne la fene ka hnyipixe. Celë hi matre, aqane ujë ka inamacane la troa ‘thele panëne la Baselaia,’ me wangatrune la itre manathith hne së hna kapa qa ngöne la hna nyihlue i Iehova.—Mataio 6:33.

18. Nemene la aqane tro sa amamane ka hape, ka hnëkë së kowe la Paradraiso?

¹⁸ Ame ngöne la fene ka hnyipixe elany, troa sisitria catre hmaca kö la mel. Hnëkë jë enehila kowe la “nyipi mel” elany, ke celë hi aqane tro sa amamane la trenge aja së troa mele e cili. Melëne jë la itre thiina hnei Iehova hna ini së, nge catre jë cainöjëne la maca ka loi. Epi tro sa hetrenyi la madrine qa ngöne la hne së hna amë panë Iehova ngöne la mele së. Xecie koi së ka hape, ame ngöne la fene ka hnyipixe, tro Iehova a eatrëne la nöjei ewekë hnei Nyidrë hna thingehnaean. Epi tro sa mele kösë easë hë a melëne la mel e cili!