1, 2. Nemene la aqane akeukawanyi së hnei Iehova ngöne la easa akötr, nge nemene la hnei Nyidrëti hna thingehnaeane thatraqai së e hnine la Wesi Ula i Nyidrë?

KOLA mekune lo xötre ne 1 Korinito 7:​28 hnene la ketre thupëtresij ka tha faipoipo kö, lo kola hape, “tro ha hete aköte i ngönetei” la itre ka faipoipo.” Angeic a ithanata kowe la ketre qatre thup ka qatre hë, nge ka faipoipo, me hnying koi nyidrë ka hape: “Nemene la ‘akötre’ cili, nge nemene la aqane tro ni a cile kow, e traqa jë ni faipoipo?” Qëmekene tro la qatre thup a sa la hnying, nyidrëti a upe la thupëtresij troa pane mekune la ketre ewekë hna amexeje hnei Paulo, kola hape, Iehova la “Akötesieti ate akeukawan’ asë ; lo ate akeukawa huni ngöne la aköte huni asë.”​—2 Korinito 1:​3, 4.

² Tha sihngödri kö koi së laka, tru la hna hnimi së hnei Iehova, nge Nyidrëti a akeukawanyi së ngöne la ijin easa akötr. Pane mekune jë la itre ijine hnei Iehova hna xatua epun, me eatrongë epun jëne la Wesi Ula i Nyidrë. Matre, xecie hnyawa koi së laka, Nyidrëti a thele la nyine loi koi së tune la hnei Nyidrëti hna kuca ha ekö kowe la itre hlue i Nyidrë.​—E jë la Ieremia 29:​11, 12.

3. Nemene la lue hnying hne së hna troa ce ithanatane ngöne la tane mekune celë?

³ Eje hi laka, tha jole kö troa xomihnine la itre akötr e atre hi së la qaane itre ej. Matre, nemene la qaane la itre akötr e hnine la faipoipo, maine e hnine la hnepe lapa së? Nge, nemene la itre hna melëne hna qaja e hnine la Tusi Hmitrötr me ngöne la hneijine së ka troa akeukawanyi së? Tro sa sa la lue hnying celë, nge tro fe sa ce wang la aqane troa cile hut ngöne la itre itupath.

4, 5. Nemene la itre akötr ka ej thene la trahmany me föe?

⁴ Ame la Iehova a xup la pane föe, Nyidrëti a tro sai nyiidro jë koi trahmany, nge nyidroti hi lai a faipoipo. Öni Iehova e cili: “Tro la trahmanyi a nue la keme i angeice me thine i angeic, me fede kowe la fö’ i angeic ; nge tro nyidoti a ca ngönetei.” (Genese 2:​24) Eje hi laka, itre atr asë hi së ka tha pexeje kö. (Roma 3:​23) Matre, ame la kola faipoipo la trahmanyi me föe, atre hi nyidro laka, tro nyidroti a cil kowe la itre jol. Qëmekene tro la föe a faipoipo, hnei nyiidro hna majemine drengethenge la keme me thine i nyiidro. Ngo, thupene hë la faipoipo, öni Tusi Hmitrötr, trahmanyi hë la he ne la föi angeic. (1 Korinito 11:3) Ame ngöne la xötrei, tro lai a jol kowe la trahmanyi troa xome la hnëqa i angeic, ene la troa he ne la föi angeic. Nge, tro fe a jol kowe la föe troa drengethenge me kapa la hna axeciën hnei trahmany ke, ame ekö keme me thin la hnei angeic hna majemine drengethenge. Ketre, ame la kola faipoipo hnei nyidro, tro lai a hetre isazikeu memine la itre treme tresin memine la itre treme ien. Celë hi lai itre ejolene la mele i nyidro.

⁵ Pane mekune ju la itre mekune ka traqa kowe la trahmany me föe, la nyidroti a atre laka, ka hace la föe. Maine nyipici laka, tru la madrine i nyidro, ngo ame pe, tha lapa hnyawa kö la hni nyidro. Nyidroti a isa seseu ke, wanga hetre ewekë jë ka traqa kowe la nekönatr e kuhu hni. Ketre, atre hi nyidro laka, troa tru la itre nyine nyithupen. Ame hë la kola traqa la nekönatr, tro hë nyidroti lai a sazene la aqane mele i nyidro. Ame göi föe, tro ha tru la traeme i nyiidro kowe la medreng. Matre, co hë lo aqane imeku i nyidro enehila tune ekö. Nge ame trahmany, tru catre hë la hnëqa i angeic. Tro angeice lai a thupën matre pëkö ka pë thene la föe, me medreng.

6-8. Nemene la ka eje e kuhu hni ne la lue trefën ka tha hnaho kö?

⁶ Hetre itre xa akötr hna cile kow hnene la itre xa trefën. Tru catre la aja i angatr troa hetre nekönatr, ngo itre ka tha hnaho kö. Ketre hace ka tru kowe la föe ka melëne lai. (Ite Edomë 13:12) Ame ngöne la itre ijine hnapan, ka nyipiewekë catr kowe la föe troa faipoipo, me hetre nekönatr. Celë hi matre, tru la akötre i Rakela, föi Iakobo, ke tha hnaho kö angeic, ngo hnaho pe kö la trejin me angeic. (Genese 30:​1, 2) Ame ngöne la itre xa nöj, ka tru catre kowe la itre atr troa hnaho atruny. Matre, itre atr e cili a hnyinge kowe la itre mesinare la kepine matre pëkö nekö i angatr. Itre mesinare a thele troa qejepengöne hnyawane la kepine lai, ngo itre xane kö a qaja ka hape, “Ekölöhini epun, tro huni a thith thatraqai epun!”

⁷ Hanawange la ketre hna melën. Hna ajane pala hi hnene la ketre trejine föe e Agele troa hetre nekönatr. Ame la angeic a atre ka hape, tha ijiji angeice kö troa hetre nekönatr, tru catre la akötre i angeic. Matre hnei angeic me föi angeic hna xomi nekönatr. Ngo, eje pala hi la hace thei angeic, öni angeic, “Atre hi ni laka, ame la troa xomi nekönatr, tha ceitune kö memine la troa ketre sipu hnahon.”

⁸ Öni Tusi Hmitrötr, “tro ha mele hnei nyiidro hnene la hna hnaho.” (1 Timoteo 2:​15, MN ) Ngo tha kolo kö lai a hape, tro angeic a hetrenyi la mele ka tha ase palua kö ke, hna hnaho. Nga nemene hö la aliene la xötre celë? Tru catre la huliwa ne la föe troa thupëne la nekönatr, memine la hnalapa i angeic. Matre, kola sewe angeic troa kuca la itre huliwa ka pë alien, tune la troa porotrike trootro, maine lö hnine menune la itre huliwa i itre xan. (1 Timoteo 5:​13) Ngo, ame pe, tro pala hi lai a hetre jole ka traqa e hnine la faipoipo me hnepe lapa i angeic.

9. Nemene la ketre hace ka traqa kowe la itre trefën?

⁹ Ame la ketre hace ka traqa kowe la itre trefën, tre, ene la troa mec la ketre e nyidro. Ngacama patre fe kö la mekune cili thei nyidro, ngo ame pe, ala nyimu catre la itre ka akötre pine lai. Ka catre la lapaunene la itre keresiano kowe la hna thingehnaean, ene la melehmaca. Celë hi ka akeukawanyi angatre catr. (Ioane 5:​28, 29) Ame e hnine la Tusi Hmitrötr, nyimutre pi hë la itre ewekë hnei Iehova hna thingehnaean, nge itre ej a akeukawanyi së ngöne la itre ijine akötre celë. Tro sa ce wange enehila la aqane akeukawane la itre hlue i Iehova, nge hna xatua angatre tune kaa.

10. Nemene la aqane akeukawanyi Hana? (Wange ju la pane iatr.)

¹⁰ Tro sa pane ce wang la ewekë ka traqa koi Hana, föi Elekana. Ka tru Hana kowe la föi angeic. Ngo, hleuhleu pi hë angeic ke, tha ka hnaho kö angeic, ngo hnaho pe kö Penina, lo ketre föi Elekana. (E jë la 1 Samuela 1:​4-7.) Nge “kete macate me kete macate,” Penina a thaipië Hana pine lai. Matre kola akötre catre la mele i Hana. Nemene la hnei angeic hna kuca matre troa hetre ixatua? Hnei angeic hna thithi koi Iehova. Hnei angeic hna tro kowe la hnë hmi koi Iehova, me lapa aqeanyi troa thith. Hnei angeic hna sipo Iehova troa hamë nekö i angeic trahmany, nge xecie hnyawa koi angeic ka hape, tro Nyidrëti a xatua angeic. Ame hë la angeic a ase thith, tingetinge pi hi la hni angeic, nge “ame la qëmeke i angeice, te, tha iëzi hmaca kö.” (1 Samuela 1:​12, 17, 18) Tha luelue kö angeic ka hape, tro Iehova a akeukawanyi angeic, ene la troa kapa la aja i angeic maine pena hetre ketre aqane tro Nyidrëti a xatua angeic.

11. Nemene la ixatua hne së hna kapa?

¹¹ Pine laka itre atr ka tha pexeje kö së, nge easa mel ngöne la fene i Satana, tro pala hi së lai a cil kowe la itupath. (1 Ioane 5:​19) Matre, ame la ketre ixatua koi së tre, ene la troa thith koi Iehova, “Akötesieti ate akeukawan’ asë.” Celë hi hna kuca hnei Hana. Hnei angeic hna fe la hni angeic koi Iehova, me sipone ielen la ixatua i Nyidrë. Ketre tune mina fe, loi e tro fe sa qaja koi Iehova la itre jol ka traqa koi së. Ngo, nyipiewekë fe tro sa sipone catrëne la ixatua i Nyidrë, me fe la aliene hni së koi Nyidrë.​—Filipi 4:​6, 7.

12. Nemene la ka xatua Ana troa hetre madrin ngöne la itre akötr?

¹² Tro fe së lai a hleuhleu ke, tha hnaho kö së, maine kola mec la ketre sinee së. Ngo, tro pala hi lai a hetre ixatua koi së. Hanawange la tulu i Ana, ka mel ekö lo hneijine i Iesu. Hna meci la föi eahlo, nge sevene hi lao macatre ne ce mele nyidro. Nge, pëkö nekö i eahlo, ngo nemene la ka xatua eahlo? “Tha qa kö hna pate ngöne la ēnē.” Ngacama 84 lao macatre i eahlo, ngo tha mano kö eahlo tro kowe la ēnē matre troa thith, me atrunyi Iehova. (Luka 2:​37) Celë hi ka akeukawanyi eahlo, me aijijë eahlo troa hetre madrin ngöne la itre akötr.

13. Nemene la aqane ixatua hnene la itre nyipi sinee la kola ajolë së hnene la itre atrene la hnalapa së?

¹³ Hetre ixatua fe hne së hna kapa qaathene la itre nyipi sinee së e hnine la ekalesia. (Ite Edomë 18:24) Faif lao macatre i Paula la kola nuetriji Iehova hnene la thine i angeic. Hleuhleue catre Paula ke, tha ka hmaloi kö la mele i angeic. Ngo hnei Ann, ketre trejin föe ka pionie hna xatua angeic, me nyipiewekë angeic. Öni Paula, “Ngacama tha sine kö la madrang lae Ann, ngo ixatua ka tru koi ni la angeic a nyipiewekë ni. Celë hi ka xatua ni troa catre nyihlue i Iehova.” Ame hë e thupen, bëeke hmaca jë hi la thine i Paula kowe la ekalesia, matre tru catre la madrine i angeic. Ketre, tru fe la madrine i Ann qa ngöne la hna xatua Paula tro pala hi a nyihlue i Iehova.

14. Nemene la itre eloine koi së la easa akeukawane la itre atr?

¹⁴ E tro sa catr kuca la loi kowe la itre atr, tha mekune hë së la itre jol ka traqa koi së. Ala nyimu la itre trejine föe ka faipoipo maine ka tha faipoipo, nge ka ce thawa la maca ka loi ne la Baselaia kowe la itre atr. Angatre hi lai a ce huliwa me Iehova, me kuca la aja i Nyidrë, nge celë hi ka amadrinëne la mele i angatr. Loi e tro fe së asë a wangatrune la itre atr tune lai, ene la troa ce thawa la maca ka loi koi angatr. Ketre, e tro sa kuca la loi kowe la itre trejin, tro easë lai a easenyi catr koi angatr. (Filipi 2:4) Celë hi hna kuca hnei Paulo aposetolo. Hnei angeic hna akötrehnine la mele ne la itre trejin “tune la ate ijithine kola hiane la ite nekö i nyido.” Hnei Paulo mina fe hna akeukawane me thuecatrene la itre trejin “tune la keme kowe la ite nekö i angeic.”​—E jë la 1 Thesalonika 2:​7, 11, 12.

15. Drei la atrekë hnëqane troa xatuane la itre nekönatr troa atre Iehova?

¹⁵ Tro sa akeukawane tune kaa la itre hnepe lapa e hnine la ekalesia? Ame itre xa ijin, tro la itre ka hnyipi lö kowe la hmi a sipo së troa xatua angatr troa qejepengöne la Tusi Hmitrötr kowe la itre nekö i angatr, maine troa ini Tusi me nyudreni pena. Öni Tusi Hmitrötr, qa i keme me thin qaathei Iehova troa inine me hiane la itre nekönatr. (Ite Edomë 23:22; Efeso 6:​1-4) Maine nyipici laka, angatr a aja ixatua, ngo nyipiewekë catre kö tro la keme me thin a inine la itre sipu nekö i nyidro. Loi e tro nyidroti a ithanata lapa memine la itre nekönatr.

16. Nemene la nyine tro sa lapa mekun la easa inine la itre nekönatr?

¹⁶ Maine sipo së jë hnene la kem troa ini Tus memine la nekö i angeic, tha tro kö sa thel troa xome la hnëqa i kem. Ame itre xa ijin, easa ini Tus memine la nekönatr, nge tha ka hmi kö la keme me thin. Matre, ame la easa ini Tus me nyën, loi e troa hnen ngöne la hnalapa i nyën, nge loi e troa cememine la keme me thin, maine ketre Atre Anyipici Iehova ka macaj. Maine pena, loi e troa ini Tus ngöne la ketre götrane gaa tru atr. E tro sa ujë tune lai, tha tro kö a mekune menune koilo hnene la itre atr. Nge, ame e ketre ijin, maine jë, tro hë la keme me thin a ketre sipu ini Tus memine la nekö i nyidro.

17. Nemene la aqane akeukawane la itre atrene la hnepe lapa hnene la itre nekönatr?

¹⁷ Hetrenyi la itre nekönatr ka thel troa hnimi Iehova, nge hnei angatr hna akeukawane me thuecatrene la itre atrene la hnepe lapa i angatr. Angatr a atreine ujë tune lai ke, hnei angatr hna metrötrëne me xatuane la keme me thine i angatr. Ketre, e hna mele nyipici hnene la itre nekönatr koi Iehova, kolo hi lai a thuecatrene asë la hnepe lapa. Lameka la ketre hlue i Iehova, öni angeic göi Noa: “Celë hi ate troa amano shë ngöne la huliwa shë memine la aköte ne lue ime shë, pine la hnadro hnei Iehova hna ëjin.” Hna eatr la hna perofetane celë thupene la Iwë ka tru, nge e cili la Iehova a apatrene triji lo hnëjin hna qaja ekö göne la ihnadro. (Genese 5:​29; 8:​21) Ame enehila, kola akeukawane fe la itre hnepe lapa hnene la itre nekönatr ka mele nyipici koi Iehova. Nyudreni a xatuane la itre atrene asë la hnepe lapa troa cile catr ngöne la itre itupath ka traqa enehila, me ngöne la itre drai ka calemi.

18. Nemene la ka troa xatua së troa cile catr ngöne la itre akötr?

¹⁸ Hetre ixatua hna kapa hnene la itre hlue i Iehova enehila. Kola qaja la troa thith, me mekune ajuine la itre tulu hnine la Tusi Hmitrötr, me imelekeu hnyawa memine la itre nyipi sinee e hnine la ekalesia. (E jë la Salamo 145:​18, 19.) Tha luelue kö së laka, ka itreqe pala hi Iehova troa akeukawanyi së, nge tro kö Nyidrëti lai a xatua së troa cile hut ngöne la itre jol ka traqa koi së!