Hna hnaho ni ngöne la ketre traone ezine la hneopegejë Ohio, Moundsville la ëjen; ketre traone lai ngöne la götrane ahuë e Virginie, e Amerika. Ala foa eahuni ha nekönatr, köni nekö trahmany, nge ca nekö jajiny; eni la cipa. Celë hi matre, ka hetre mejene pala hi la hnalapa. Lue ka catre huliwa kakati me nenë, nge ka huliwa nyipici, nge lue ka hnimi atr nyidro. Tha tru kö la manie hne huni hna kapa, ngo ame pe, pëkö hne huni hna hane pë ewekë, ene lo itre ka sisitria thatraqane la mel. Lue Atre Anyipici Iehova la keme me thine hun; celë hi matre hnei nyidro hna kuca asë la hnei nyidroti hna atreine matre troa ini huni la itre trepene meköti qa hnine la Tusi Hmitrötr, qaane lo eahuni a co.

Ngazo pe, ame hë la eni a thöth, ase hë nango hule ananyine la hning qa ngöne lo itre ini hnenge hna kapa. Eni ha luelu me hnyinge ka hape, ka loi jë kö la troa mele thenge la itre trepene meköti ne la Tusi Hmitrötr? Öninge jë hi ka hape, maine tro ni a trongëne asë la itre ajang, tre ma tro hë ni lai a melëne la nyipi madrin. Haawe, tha qea ju kö, nge tha sine hë ni la itre icasikeu. Hane jë fe hi xötrethenge ni hnene la mamang, memine lo jininge jajiny. Tha mano kö la keme me thine huni thele troa xatua hun, ngo tha idrei kö hun.

Tha wange atrehmekune kö ni ka hape, ame lo lai inuamacany hnenge hna piin, tre celë pe hi lai ka troa huli ni kowe la itre hna majemine ka ngazo. Ame ju hi ngöne la ketre ijine eni a bëeke qa hna ini, tre hnene la ketre sine ce elonge hna ithue sixang, ame hnenge hna kapa ju. Qaane ju hi lai, eni pë hë a hane kei ju kowe la itre xa hna majemine ka ngazo. Eni ha xomi dorog, me iji menu la kahaitr, me nyinyape menu. Kola tro la itre macatre, nge eni a hane xome la itre doroge ka catrehnin, nge thatreine hë ni inue memin. Qa ngöne lai, eni pë hë a hane salemë doroge jë, matre tro pala hi ni a hetre nyine nyi thupene la itre doroge cili.

Thele ju hë ni troa drei simine la mekuthetheweng, ngo tha mano kö eje jelengazone la itre thiinang. Ngo öninge ka hape, ase hë ni kuca la ngazo, nge pë hmaca kö ihmaene troa bëek. Xötrë feete ju hë ni me tro kowe la itre xa hna ithikeu troa drei miuzik, ngo kösë lo pëkö ka semesine ni nge hleuhleu catre la meleng. Haawe, meku kakati jë hi ni me nenë, laka lolo catre ju kö la thiina i nyidro, nge tru catre la hnenge hna tro menu.

Ngacama hnenge hna mekune ka hape, thatreine hmaca kö ni troa bëek, ngo tha hna hane kö mekune tune lai hnei itre xan. Ame lo macatre 2000, hnene la keme me thinenge hna hë ni troa hane sine la asabele ne  distrik ne la Itretre Anyipici Iehova. Hnenge hna acatrei hni tro, ngo thatre kö ni ka hape, tro fe a hane traqa hnene lo lue trejine me eni.

Ame hë la eni e koilo ngöne lai hna asabele, eni petre hi a wange atrehmekune ka hape, e cili hi lo hna elo miuzik hnenge hna hane sine lo macatre hnapan. Ketre ketri ni pi hë hnene la eisapengönene la lue ithikeu cili. Ame ngöne lo kola elo miuzik tre, tha öhne ju pë hë cahu hnei nöjei pengöne salite, nge tru la itre cane sixa. Ketre, tha lolo kö la thiina ne la itre xa ka traqa troa hane drei miuzik, nge pë pena kö ekeukawane la itre trenge ewekë ne la itre nyima hne huni hna dreng. Ngo ame ngöne lai hna asabele, tre tru catre la itre atr ka madrin, nge ame lo itre hnenge hna tha iöhnyi memin, a traqa koi itre macatre, tre hnei angatre hna kepe ni hnyawa. Porope la itre hnë tro sa lapa, nge ame la itre mekune hna hamën, tre ka ithue mejiun. Ame la eni a öhne la eloine la troa trongëne la itre trepene meköti qa hnine la Tusi Hmitrötr, tre eni pë hë a thele jë la kepine matre tha nyipine kö ni itre ej!​—Isaia 48:17, 18.

Thupene jë hi lo lai asabele, eni pë hë a mekune jë troa bëeke hmaca kowe la ekalesia i Keresiano. Ketre, ame fe lo lue trejine me eni, tre hna hane ketri nyidroti fe hnene lo lai asabele; ene pe, mekune jë fe hi nyidroti troa hane bëek. Qaane ju hi lai, eahuni asë hë a inine la Tusi Hmitrötr.

Ame la ketre mekene Tusi ka ketri ni hnyawa, tre ene Iakobo 4:8, kola hape: “Eashenyijë koi Akötesie, nge tro nyidëti a eashenyi koi nyipunie.” Eni pë hë a trotrohnine ju ka hape, maine eni a ajane troa easenyi koi Akötresie, tre loi e tro ni a saze la aqane meleng. Ame la itre xa hna majemine ekö nyine tro ni a trij, tre ene la sixa, me dorog, memine la troa iji menu la kahaitr.​—2 Korinito 7:1.

Eni pë hë a tro trije pi la itre sine ce elong ekö, me thele itre xane pena thene la itre hlue i Iehova. Eloine pe, ke hna xatua ni hnyawa hnene lo qatre thup ka ini Tusi me eni. Hnei nyidrëti pala hi hna hë ni ngöne telefon, me traqa troa hane wai ni. Qaane ju hi lai, lue treme sineene hë nyiho uti pala hi enehila.

Thupene hë la hna xejë lo macatre 2001, eni ha xomi bapataiso, hatrene la hnenge hna nue la melenge koi Iehova, nge ce xomi bapataiso hi ni memine lo lue trejine me eni. Ame ngöne la ijine cili, tre thatreine kö tro sa qeje pengöne la madrine ne la keme me thineng, cememine lo ketre jininge ka mele nyipici pe, qa ngöne laka, ce eahuni asë hmaca ha ngöne la hmi Iehova.

Öninge pena kö ekö ka hape, ame la itre trepene meköti ne la Tusi Hmitrötr, tre itre ka xom acone la mele ne la atr; ngo eni a öhne enehila, ka hape, itre eje pe a thupë së. Tusi Hmitrötre hi la ka hamëne koi ni la trenge catre ka ijij, matre atreine ni troa trije la itre hna majemin, ka tune la troa xom me salemë dorog. Nge Tusi Hmitrötre fe la ka xatua ni troa hane nyipi atr.

Eni a madrine enehila laka, eni a hane sine la lapa ne la itre ka nyi hlue i Iehova e cailo. Celë hi lapa ne la itre atr ka nyipi ihnimikeu, nge ka casi la lapa cili troa nyi hlue i Akötresie. (Ioane 13:34, 35) Nge ame la ketre manathithi ka tru hnenge hna kapa qa ngöne la hna sine la nöje i Nyidrë, tre faipoipo hë ni memine la föenge hniminang, Adrianne. Thatreine kö tro a qeje pengöne la madrine hnei nyiho hna kapa qa ngöne la hnei nyiho hna ce nyihluene la Atre Xup.

Tha eni hmaca kö a thele troa eatrëne la itre sipu ajange kö, ngo eni pë hë a tro fë Tusi Hmitrötr ngöne la drai ka pexej, matre troa xatuane la itre atr troa öhnyi eloine la hna inine la Wesi Ula i Akötresie. Pëkö ketre huliwa ka hane ithue madrine tune la huliwa celë. Atreine hi tro ni a qaja xeciëne ka hape, Tusi Hmitrötre hnyawa hi la ka saze la meleng. Öhne hë ni la nyipi inuamacany.