Nemene fe la hnei epuni hna mekun göi 21 Diseba, 2012 lo hna qaja ngöne lo idrai i itre Maya ka hape, hetre ewekë ka traqa troa saze la fen? Qanyine kö la aqane lapa treqene i epuni la drai cili, maine tro jë tune la ehnefe hna una, maine tro pena a ngazo la hni epun, maine pena ceitu hi troa traqa me patr. Nge hapeu, tha ka thoi mina jë kö lai kola perofetane la pune la fen?

Nge tune kaa la pengöne lo “puatine la fewatin [pune la fen]” hna qaja hnene la Tusi Hmitrötr? (Mataio 24:3) Itre xan a xou, ke, kola mekune ka hape, tro ha manithe la fen. Itre xan a pi goeëne la aqane trongene la itre ewekë e traqa pi la pun. Ame pena itre xan, sixele hë angatre ma drenge la kola qaja ka hape, easenyi hë la pun, ngo tha traqa pena. Ngo ame la itre aqane mekune cili, tre, kösë kola pu, maine ka nyipici hi?

Tro epuni lai a sesëkötre la aqane qeje pengöne la pune la fene hnene la Tusi Hmitrötr. Ngacama Tusi Hmitrötr a amamane koi së la itre kepine matre tro sa treqene hnyawa la pun, ngo eje fe a qaja laka ame koi itre xan, qea pala ha la hnei angatre hna itreqe, matre hmanono hë angatr. Eahuni a sipo epuni troa wange la aqane tro la Tusi Hmitrötre a sa la itre mekune hna majemine hnyingëne hnei nöjei atr göi aqane troa nyipune la fen.

AQANE SA NE LA TUSI HMITRÖTR: “Hnei [Akötresie] hna ami tepene la fene hnengödrai, tha tro kö ej’ a enij’ epine palua.”​—SALAMO 104:5.

Tha tro jë pi kö a apatrene trije la fene maine la ihnadro hnei eë, maine hnei ketre ewekë pena. Tusi Hmitrötre pe a ini së ka hape, ame la fene celë, tre hnë tro la atr a mele ngön uti hë epine palua. Öni Salamo 37:29: “Tro ha la ange ka meköti a hetenyi la nöj, me lapa palua kö ngön’ ej.”​—Salamo 115:16; Isaia 45:18.

Ase jë hi Akötresieti xupe la fen, öni Nyidrëti jë hi ka hape ka “nyipi loi,” nge tha saze kö la mekuna i Nyidrë. (Genese 1:31) Thaa mekuna i Nyidrëti fe kö la troa apatrene trije la fen, ngo Nyidrëti a thingehnaeane ka hape, “troa ajifelö [apatrenyi] angahaetra angete ajifelönëti [apatrene] la fewatin [fen],” me apatrene paluane qa ngöne la fen, la itre ethanyine qa ngöne la hna huliwane angazone la fen.​—Hna Amamane 11:18.

Maine öni epuni jë ka hape, 2 Peteru 3:7 a qaja ka hape, troa manithe trije la fene hnei eë. Kola qaja hnene la xötre celë ka hape: “Ame la hnengödrai memine la fene enehila, hna amë hnene la wesi ulati cili, thatraqane la eë.” Tha kolo kö lai a qaja e celë ka hape, tro ha manithe trije la fen? Hnene la Tusi Hmitrötre hna majemine xome la itre hnaeawekë tune la “hnengödai,” “fen,” me “eë” nyine troa amamane la itre xa alien itre ej. Hanawange la ketre ceitun, ngöne Ieremia 22:29 kola qaja ka hape: “Fene hnengödrai, fene hnengödrai, fene hnengödrai fe, dengeju la wesi ula i Iehova,” ame la “fene hnengödrai” hna qaja e celë, tre kola qaja la itre atr.

Hnene la itre mekune qëmekene me thupene la 2 Peteru 3:7 hna amamane laka, ame la hnengödrai, me fene me eë hna qaja e celë, tre, hetre itre xa aliene kö. Itre xötre 5 me 6 a amekunëne lo Iwë Atraqatr ngöne lo ijine i Noa. Ame la ijine cili hna apatrene la fene hnengödrai ka hekö, ngo tha patre kö la ihnadro. Ngo ame pe la “fen” hna qaja hnei Tusi Hmitrötr, lo hna apatrene hnei Iwë Ka Tru, tre, kola qaja la nöjei atr ka ngazo, me itre qaane ngazo, nge ka mele ngöne la ijine cili.” Nge ame fe lo “hnengödrai” hna apatren, tre, kola qaja la angetre musi kowe la itre atr cili. (Genese 6:11) Ka ceitu hi lai memine la 2 Peteru 3:7 a qaja amë hë laka troa apatrene paluane kösë hnei eë la itre atr ka ngazo, me itre musi ka ngazo.

AQANE SA NE LA TUSI HMITRÖTR: “Kola pate la fene hnengödrai, memine la hna aja kow; ngo troa cile huti epine palua la ate kuca la aja i Akötesie.”​—1 IOANE 2:17.

Ame la “fene hnengödrai” ka troa patr, tre, tha ene kö la ihnadro, ngo ene la nöjei atr e celë fen ka tha mele thenge kö la aja i Akötresie.  Tune la droketre ka xötr atr a thupa trije la sine ijö hna tithe hnei kaser matre troa amelene la ka wezipo, haawe, tro Akötresieti a “thupa tiji” la itre atr ka ngazo matre tro pe hi itre ka loi a mele madrine e celë fen. (Salamo 37:9) Kola amamane e celë laka, ame la ‘pune la fen,’ tre, ketre ewekë ka lolo.

Ka loi fe la aqane waipengöne la ‘pune la fen’ hnene la itre xa Tusi Hmitrötre, celë hi matre ujëne jë angatre hnene la hnaewekë celë “kola nyipune la ketre hneijine hna melëne hnei atr,” maine “pune la ketre hneijin.” (Mataio 24:3; Traduction du monde nouveau (MN); Chouraqui) Maine tro pe kö a hetre atr ka mel, nge tha tro kö a apatrene la ihnadro, tre, tha kolo jë kö lai a qaja ka hape, troa hetre ketre hneijine ka hnyipixe, me troa eköthe hmaca la ketre aqane mele ka hnyipixe thatraqane la atr? Eje hi, pine laka hnei Tusi Hmitrötre hna qaja la ketre “ijine ka tro ha traqa.”​—Luka 18:30.

Hnei Iesu hna hëne la hneijine ka troa xulu ka hape, “ngöne la hna troa amelene hmaca,” kolo hna qaja fe ngöne la Traduction Œcuménique de la Bible ka hape, ngöne la ijine “kola kuca ahnyipixene hmaca la nöjei ewekë.” (Mataio 19:28) Tro hë së lai a mele madrin, ke,

• Paradraiso hë la fen, nge kola mele xetietë me manathith.​—Isaia 35:1; Mika 4:4.

• Isa hetre huliwa së ka loi.​—Isaia 65:21-23.

• Pë hë trene mec.​—Isaia 33:24.

• Thupëtresije hmaca ha la qatr.​—Iobu 33:25.

• Mele hmaca ha itre ka mec.​—Ioane 5:28, 29.

Maine tro sa “kuca la aja i Akötesie,” tune la aqane amekötine Nyidrëti koi së, tha tro kö sa xouene la pune la fen. Ngo easë pe a ajane tro eje a canga traqa.

AQANE SA NE LA TUSI HMITRÖTR: “E öhnë hë nyipunie la nöjei ewekë celë a traqa, wangate hmekune ju nyipunie, laka eashenyi hë la baselaia i Akötesie.”​—LUKA 21:31.

Ame hnine la itus ka qeje pengöne la itre drai ne la pun (The Last Days Are Here Again), hnene la ketre Porofesör Richard Kyle hna cinyihane ka hape, “hnene laka a ca tro traqa ju hi la kola saze la aqane trongene la fen, me kola menumenu la pengöne la mele ne la atr,” nge pë pena kö ka atreine qeje pengön, “ene pe ukune jë hi la itre atr troa hane isa qeje mekune göi pune la fen.”

Ngo tha hnene kö la itre perofeta ekö hna thele troa ithanatane atrune la itre ewekë ka ngazo ka mama ngöne la hneijine i angatr. Ngo jëne pe la uati hmitrötre i Akötresie, angatre pe a qeje pengöne la itre  ewekë ka troa traqa me amamane laka, tha hmitre pe kö matre traqa pi la pune la fen. Wange ju la itre xa hna perofetane e celë, nge isa wange ju maine eatre hë itre eje ngöne la hneijine së.

• Isi, Jiin, sa, me nöjei pengöne mec.​—Mataio 24:7; Luka 21:11.

• Kola elë la etrune la humu atr.​—Mataio 24:12.

• Itre atr a sipu angazone kö la fen.​—Hna Amamane 11:18, MN.

• Tro nöjei ate a hnimi angate kö, me meciu mani, me ajane la itre nyine amadrin, ngo xele Akötresieti pe.​—2 Timoteo 3:2, 4.

• Kola thë la itre hnepe lapa.​—2 Timoteo 3:2, 3.

• Ngacama mama hnyawa hi la itre hatrene la pun, ngo tha nyipi ewekëne kö la itre ithuemacany.​—Mataio 24:37-39.

• Kola cainöjëne la maca ka loi ne la Baselaia i Akötresie e cailo fen.​—Mataio 24:14.

Tune lo aqane qaja i Iesu, e öhne jë “la nöjei ewekë asëjëihë cili,” loi e hape jë, calemi catre hë la pune la fen. (Mataio 24:33) Mejiune hnyawa hi la Itretre Anyipici Iehova ka hape, tha nyine lueluëne kö la itre hatrene ka mama, nge angatre a ce thawa la lapaune i angatre memine la itre xa atr jëne la hna cainöje ngöne la 236 lao nöj.

AQANE SA NE LA TUSI HMITRÖTR: “E qaja hnei angat, ka hape, Tingetingë hë ; me lapa xetietë, ene pe canga traqapi koi angate la hnëjin, tune la aköte sile kowe le föe ka upune; nge tha tro kö angat’ a utet.”​—1 THESALONIKA 5:3.

Hnene la Tusi Hmitrötre hna aceitunëne la pune la fene memine la föe qëmekene troa mala upune, ene lo kola akötre sil, nge thupene jë hi kolo fe hi a hnaho. Hna aceitunëne la hnepe ijine matre traqa pi la pun, memine la hnepe ijine lapa drenge atrehmekune hnene la föe ka upune la itre hatrene ka troa mama trootro matre hnaho pi. Maine hnei droketre ju hë hna sa la drai ne troa hnaho, ngo e tha traqa kö ngöne la drai cili, tha tro jë kö la thin a luelu, ke xecie hnyawa ha koi eahlo laka, easenyi catre hë troa traqa la nekönatr. Haawe, ka ceitu hi lai memine la pun, laka e tha traqa ju hë thenge la aqane itreqe së, ngo tha luelue kö së laka, easë hnyawa ha e hnine lo hna hape, “la ite drai hnapin.”​—2 Timoteo 3:1.

Maine öni epuni jë ka hape, ‘Mama hnyawa hi koi së la hatren ka hape, calemi catre hë la pun, ngo pine nemene kö matre tha kapa kö hnene la ka ala nyim?’ Tusi Hmitrötre a amamane ka hape, ame la easa troa traqa kowe la pun, tru hnei ka troa jele tha nyipi ewekëne la itre enyipicin. Xele kö angatre ma kapa ka hape, kola saze la pengöne la fen ngöne la itre drai ne la pun, ngo kolo pe a hnyimasai me hape: “Qane la ijine meköle la ite xötapan, cile huti pala kö la nöjei ewekë asëjëihë qane ngöne la qane la hna xup’ it ej.” (2 Peteru 3:3, 4) Eje hi  laka, ngacama ka mama cile hnyawa la hatrene la itre drai ne la pun, ngo ala nyimu pala hi la itre ka lapa thinge trön.​—Mataio 24:38, 39.

Itre hnepe enyipicine ka co hi qa hnine la Tusi Hmitrötre la hna ithanatane ngöne la tane mekune celë ka amamane laka, calemi catre hë la pun. a Pi tro hmaca kö epuni a atre la itre xa mekun? Maine eje hi, thele jë troa ithanata memine la ketre Atre Anyipici Iehova matre ce inine me epuni la Tusi Hmitrötr. Ijije hi tro epuni a ini ngöne la hnalapa i epun, maine ngöne la ketre götrane ka loi koi epun, maine jëne telephone pena. Ame hi la nyine tro epunli a hamën, tre, ene la traeme i epun, ngo ame pe tha nyine qaja kö la etrune la itre manathithi nyine tro epuni a kapa elanyi qa ngön.