Pi tro fe kö epuni a pi atre la nyipici göi Akötresie tune la kola hape, drei Nyidrë, nemene la ka amadrinë Nyidrë, nge nemene la hnei Nyidrëti hna sisin, nge nemene la aja i Nyidrë? Ame ngöne la Wesi Ula i Nyidrë hnine la Tusi Hmitrötr, Hnei Iehova Akötresieti hna amamane la nyipi sipu pengöi Nyidrë. Ngo tha nöjei atr asë kö la ka atreine troa e me trotrohnine la sipu pengöi Nyidrë. Pine nemen? Pine laka ame la atreine cili, tre, ketre manathithi, tha ahnahna thatraqai nöjei atr asë kö. Pane wange jë së la aqane qeje pengöne Iesu la ewekë cili.​—E jë la Mataio 11:25.

Hna nyiqaane la xötre celë hnene la trenge ewekë hna hape: “Ngöne la ijine cili Iesu a wetë.” Haawe, ma nyidrëti jë la a sa thenge la hnei nyidrëti hna goeëne thene la itre atr hnei nyidrëti hna qaja e celë. Hnei Nyidrëti hna ëjine la itre atrene la köni traone ne Galilaia, angetre xele ma hane itretre drei nyidrë, ngacama e cili hi lo hnei nyidrëti hna kuca la itre iamamanyikeu. (Mataio 11:20-24) Ma öni epuni jë, ‘Hnei nemene jë matre kolo hi a goeëne la itre iamamanyikeu, ngo tha mejiune kö kowe la itre nyipici hna tro fë hnei Iesu nge tha xötre thenge nyidrëti kö?’ Ame lai aqane iwange sixa cili, tre kola qajaqaja la aqane xeti ne la hni angatr.​—Mataio 13:10-15.

Atre hnyawa hi Iesu ka hape, maine easa ajane troa trotrohnine hnyawa la nyipici göi Akötresie hnine la Tusi Hmitrötr, lue ewekë ka loi nyine tro sa hetreny: ixatua qaathei Akötresie, me hni ka loi. Öni Iesu e qeje pengön: “Ini a ole koi enëtilai, Angakaka, Joxu ne hnengödrai memine la fen, qa ngöne la hnei cilieti hna juetëne la nöjei ewekë celë ene la nöjei ka inamacane me nöjei macamek, ngo ase hë amamane kowe la nöjei medeng.” Öhne kö epuni la kepine matre manathithi ka tru la troa trotrohnine la itre nyipici hnine la Tusi Hmitrötr? Pine laka, Iehova la “Joxu ne hnengödrai memine la fen,” Nyidrëti hmekuje hi la ka ijije troa amekötine ka hape, drei la nyine tro Nyidrëti a amamane kow la nyipici. Ngo ame la aqane amamane Akötresie la itre ewekë, tre, tha kolo kö lai a hape, ka ië hna hnime Nyidrë. Ngo hnauëne hö laka amamane jë hi Nyidrëti koi itre xan, nge juetrëne pë hë koi itre xan?

Iehova a hamëne la ihnimi gufa i Nyidrëti kowe la itre ka ipië, me thipe triji ange ka pi tru. (Iakobo 4:6) Nyidrëti a juetrëne la nyipici kowe “la nöjei ka inamacane me nöjei macamek,” ene la itre atr ka inamacan, me itre ka qa hna inine la itre inamacane ne la fen, lo ange ka pi mama me angetre sipu meku angatre kö, angetre xelene la ixatua qaathei Nyidrë. (1 Korinito 1:19-21) Ngo hnei Nyidrëti pe hna amamane la nyipici kowe la itre “medeng,” ene lo itre ka tro koi Nyidrë cememine la hni ka nyipici, me ka ipië tune la nekönatr. (Mataio 18:1-4; 1 Korinito 1:26-28) Atrepengöne hë la itre atr cili hnei Iesu, Nekö i Akötresie. Tru catre hnei hene ne hmi ka qa hna ini la itre ini ka tru me ka mama, itre ka tha trotrohnine kö la maca i Iesu, ngo trotrohnine pe hnene la angetre nyi i, nge ka hetrenyi la hni ka ipië. (Mataio 4:18-22; 23:1-5; Ite Huliwa 4:13) Nge ame mina fe ngöne la ijine cili, hnene la itre atr ka qa hna inine la itre ini ka tru me itre trenamo hna hane amamane la hni ka ipië, ke, itretre drei Iesu fe hë angatr.​—Luka 19:1, 2, 8; Ite Huliwa 22:1-3.

Bëeke hmaca jë së kowe la mekune hna amejëne ngöne la qaan: Pi tro fe kö epuni a pi atre la nyipici göi Akötresie? Maine eje hi, tro lai a ithuecatre koi epuni e tro epuni a atre ka hape, tha Akötresieti fe kö a hamëne la ihnimi gufa i Nyidrë kowe la itre atr ka mekune ka hape, ka hetrenyi angatre la itre inamacane ne la fen. Ngo Nyidrëti pe a hnime gufane la itre hna wajahuje hnene la itre ka inamacane ne la fen. Maine tro epuni a inine la Wesi Ula i Akötresie cememine la mekune me hni ka loi, tro hë epuni lai a cas memine la itre atr hnei Akötresieti hna troa hamëne kow la ahnahna i nyidrë ka tru alameken, ene la troa trotrohnine hnyawa la nyipici göi Nyidrë. Celë hi trotrohnine lai ka troa atiqane la mele i epuni hnei loi enehila, me xome trongë epuni kowe “la nyipi mel,” ene la mele ka pë pun ngöne la fene ka hnyipixe, nge ka meköt hna thingehnaeane hnei Akötresie, laka calemi catre hë. a​—1 Timoteo 6:12, 19; 2 Peteru 3:13.