JËNE MADRINE KOWE LA HNEPE LAPA

Koi Itre Trene Kuku Ka Sinatr

CARLO: a “Angelo la ëje ne la nekö i nyiho trahmany, nge ka sinatre nyën. Nge kösë hna xom asë la trenge catre me mekune i nyiho hnene lai mec i nyën. Ame lo itre nekönatre ka egöcatre hnyawa, tre ka tru jolene hë, ngo the qaja pala ha la nekönatre hna tithe hnene la meci celë. Ame itre xa ijin, mama mina pi la thangane lai ngöne la mele i nyiho lue trefën.”

MIA: “Ketre huliwa ka tru la troa ini Angelo la itre ewekë ka hmaloi hi, ke tro pala hi a qaja lapane me kuca lapan. Celë hi kepine matre, ame hë la kola traqa koi ni la kucakuca ka tru, tre canga elëhni mina jë hi ni koi Carlo. Ame itre xa ijin, tre nyiho mina a iwesitrë, ke isazikeu kö la mekune i nyiho.”

Mekune pala hi nyipunieti lo ijine mala lo nekö i nyipunie? Lo trenge madrine i nyipunie lo nyipunieti a xötrei xepe la nekö i nyipunie? Ngo ame pë hë Carlo me Mia, tre hna hnöthe pe hi la madrine i nyidro ngöne la kola qaja koi nyidro ka hape, wezipo la nekönatr.

Hapeu, hna hane kö tithe la nekö i nyipunieti hnene lai meci cili? Maine jë nyipunieti a hnyinge ka hape, atreine jë kö nyipunieti melëne la ewekë celë? The tro kö nyipunieti a seseu. Hetre itre keme me thine ka trene kuku hna tithe hnene lai meci cili, nge hnei angatre hna atreine melëne la ewekë cili. Maine jë ka hane fe nyipunieti melëne cahu köni jol; hane ju wange la aqane xatua nyipunie hnene la Tusi Hmitrötr troa elë hune la itre jole cili.

PANE JOL: JOLE TROA KAPA.

Ame ju hi la kola atre hnene la itre xa keme me thine ka hape, ka wezipo la nekö i angatr, tre ngazo pi hi angatr. Öni Juliana, qa Mexique, ka hape: “Ame ju hi la kola qaja koi ni hnei itre droketre ka hape, ka wezipo Santiago, nekö i nyiho, tre lapa menu pi hi ni, nge thatreine kö ni troa kapa la ithanata cili.” Ame pena Villana, ketre föe ne Itali, tre hnei angeice hna qaja ka hape: “Ngacama ase hë qaja koi ni ka hape, troa hetre ethan kowe la nekönatr elany, pine laka nango tru hë la macatreng, ngo ame pe, ketre ase hë ni mekune troa hetre nekönatr. Ame hë la kola traqa la jol qa ngöne laka ka wezipo la neköng, tre eni a mekune ka hape, eni hi la atrekë zön.”

Ame la nyipunieti a hnehengazo maine mekune pena ka hape, zö i nyipunie la kola tithe la nekö i nyipunie hnei mec, tre pengöne kö lai. Tha hnei Akötresieti kö hna xupe la atr matre troa tithi angeic hnei mec. (Genese 1:27, 28) Ketre, tha hnei Nyidrëti kö hna xupe la keme me thine matre tro nyidroti a hnahone la nekönatr ka wezipo. Celë hi kepine matre, kösë tro nyipunieti lai a pane hace fë laka, tha egöcatre pë hë la nekö i nyipunie. Itre drai lai ne tro nyipunieti a pane ngazo qëmekene la tro nyipunie a kapa la ewekë celë ka traqa koi nyipunie.

Maine nyipunieti a mekune ka hape, zö i nyipunieti la kola wezipo la nekönatr, tre mekune hnyawa kö ka hape, thatrepengöne hnyawa kö së la itre kepine matre tithe jë la nekönatre hnei mec. Ame itre xa nekönatr, tre kola tithe hnei mec ke meci ne kö la lapa i nyudren, ame itre xan, tre hnene la götrane hnei nyudreni hna mele ngön, maine hnei itre xa ewekë ju kö. Maine nyipunieti pena a mekune ka hape, fö i nyipunieti la atrekë zöne la kola wezipo la nekönatr, tre loi e troa trije la aqane waiewekë cili. Loi e tro pe nyipunieti a xatuane la fö i nyipunie, me mekune la nekö i epon.—Ate Cainöj 4:9, 10.

 IXATUA: Thele jë troa atrepengöne hnyawa la nekö i nyipunie. Kola qaja hnei Tusi Hmitrötr ka hape: “Kola xupi uma ngöne la inamacan, nge kola acaten’ eje ngöne la trotrohnin.”—Ite Edomë 24:3.

Nyimutre la itre ithuemacany hnei nyipunieti hna troa öhne ngöne la itre itus hna kuca hnei itre droketre, me ngöne la itre xa itusi ju kö ka loi. Ame la troa thele troa atrepengöne la kuku, tre ka tune la troa inine la ketre qene hlapa. Nyipici laka, ame ngöne la xötrei, tre jol, ngo ijije hi tro nyipunieti a ithanatane hnyawa.

Ame Carlo me Mia hna qaja e caha hun, tre hnei nyidroti hna thele ithuemacany thei droketre, me thene la ketre organizasio ka thele troa xatuane la itre atr ka wezipo tune la nekö i nyidro. Öni nyidroti ka hape: “Celë hi lai ka xatua nyiho troa atrepengöne la itre jole hnei nyiho hna troa ixelë memin, me atrehmekune fe la itre xa götrane gaa loi ne la mec i nyën. Hnei nyiho hna öhne laka, ngacama ka wezipo nyën, ngo hetre itre xa hnepe ewekë hna kuca hnene la itre nekönatr ka egöcatr, hna atreine fe hi kuca hnei nyën. Nge celë hi lai ka thue madrine koi nyiho.”

PANE TUPATHE JU LA: Loi e troa wange atrune catrëne la itre hna atreine kuca hnene la nekö i nyipunie. Ame la nyipunieti a mekune troa kuca la ketre huliwa, loi e troa ce kuca hnene la itre atrene la hnepe lapa asë. Nge maine nyipunieti a öhne ka hape, hetre hnepe ewekë ka co hë hnene la nekö i nyipunieti ka wezipo hna atreine kuca, tre qaja aloinyi nyëne jë, nge madrine jë me nyën.

HNAALUENE JOL: KUCAKUCA ME LAPA FË AKÖTR.

Isa drenge kö nyipunieti la ehacene la troa hiane la nekönatre ka sinatr. Öni Jenney, ketre föe ne Nouvelle-Zélande ka hape: “Ame lo eni a xötrei atre ka hape, ka genyi pë hë la götrane ipië ne la neköng trahmany, nge eni a thele troa kuca la itre xa hnepe jole ngöne la hnalapa, tre kucakuca ni troa kuca; celë hi matre treije mina jë hi ni.”

Ame pena la nekö i Ben trahmany, tre ka sinatre nyën, nge hetre sine meci nyëne fe ngöne la he. Kola qaja hnei Ben ka hape: “Ala nyimu la itre atr ka thatrepengöne kö la hne huni hna melën.” Ame itre xa ijin, pane porotrike jë hi nyipunieti memine la itre sinee i nyipunie; ngo ma ka loi la itre nekö i angatr, ke itre ka egöcatr asë hi. Celë hi matre, cile hnö pë hë nyipunieti troa fe la hni nyipunieti koi angatr.

IXATUA: Sipo ixatua jë. Nge maine ketre a ajane troa xatua nyipunie, the thipëne kö la ixatua. Nyipici laka, tha ka hmaloi kö; kolo kö a jelenyipicine hnei Juliana, me hape: “Ame itre xa ijin, tre hmahma fe eni me föeng troa sipo ixatua.” Ngo ame pe, öni angeice fe ka hape: “Hnei nyiho hna inine troa kapa ka hape, thatreine kö tro nyiho a cile casi kowe lai jole cili. Celë hi matre, ame hë la kola xatua nyiho hnei itre xan, tre madrine hi nyiho, ke tha nyiho hmaca kö a thue casine la akötre i nyiho.” Maine kola qaja hnene la ketre sinee i nyipunie ngöne la hna icasikeu i Keresiano, maine ngöne la itre xa hna ithikeu pena ka hape, tro pena angeic a pane ce lapa memine la nekö i nyipunie ka wezipo, tre kapa ju. Kola qaja hnene la ketre edromë qa hnine la Tusi Hmitrötr ka hape, “ate ihnimi la enehmu o ijin’ asë, ngo ngöne la aköte jini angeicë hë.”—Ite Edomë 17:17.

Hane ju fe akötrehnine la mele i nyipunie. Pane mekune ju la pengöne la abilas; tro ej a atreine nyenyape fë lapaane la itre wezipo a tro pital, e tro pala hi a nyi aliene hnei saas. Ketre ame fe nyipunie, loi e tro nyipunieti a xeni hnyawa, me enij, me mano hnyawa matre hetre trenge catre i nyipunieti pala hi troa thupëne la nekö i nyipunie. Celë hi lai hna kuca hnei Zavie, keme ne la ketre nekönatre trahmanyi ka sinatr; öni angeic: “Thatreine kö la nekönge tro, celë hi kepine matre eni a tupath troa xen la itre xeni ka loi, matre egöcatre pala hi ni troa nyenyape sai nyën, ke eni hi la iwaca i nyën.”

Ngo eue pe kö la tro nyipunieti a hane akötrehnine la mele i nyipunie? Ame la itre xa trefën, tre angatr a ithewene troa ce lapa memine la nekönatr, matre thue ijine koi ketre troa pane mano, maine eatrëne pena la itre xa aja i angeic. Ketre, nyipi ewekë troa atreine ië ewekë hnyawa, matre tha tro kö a aluzi traeme hnene la itre huliwa ka tha nyipi ewekë kö. Ngacama nango jole petre kö ngöne la xötrei, ngo öni Mayuri, atre Inde ka hape, “Ame hë e thupen, tre majemi hë nyipunie.”

Maine hetre ketre sinee hnei nyipunieti hna mejiune hnyawa kow, fe pi la hni nyipunie koi angeic. Ngacama tha ka wezipo kö la nekö i angeic, ngo the cile kö troa fe la hni nyipunie, ke tha tro jë pi kö angeice lai a drei simi nyipunie. Thithi jë fe koi Iehova Akötresie. Nemene la eloin? Önine la thine ne la lue nekönatre ka meci fë hmanono, ene Yazmin ka hape: “Ame mina la kola catrehnine catre la itre jol, tre kösë lo eni ha troa mec. Haawe, thithi mina jë hi ni koi Iehova troa akeukawanyi ni me hamë ni la trenge catr. Nge drenge hi ni laka, hetre thangane catr.”—Salamo 145:18.

 PANE TUPATHE JU LA: Xeni jë la itre xeni ka loi, enije jë nge hane ju fe mano hnyawa. Trije pi fe la itre huliwa ka tha nyipi ewekë kö, nge ka aluzine menune la traeme ne tro nyipunieti a pane akötrehnine la mele i nyipunie. Maine hetre nyine troa saze ngöne la mele i nyipunie, saze pi.

HNAAKÖNINE JOL: PË PENA HA IJINE KOWE LA ITRE XA ATRENE LA HNEPE LAPA.

Ame la kola wezipo hnene la ketre nekönatr, tre ma troa saze la itre hna majemine hnene la hnepe lapa; tune la aqane xen, me itre götrane hna majemine tro kow ekö, me aqane ujë i keme me thin kowe la itre xa nekönatr. Qa ngöne lai, maine jë tro hë nyudreni a mekune laka, tha hnimi nyudreni hë hnei nyidro. Ketre ame fe keme me thin, tre ma tro fe a nango jole la mele ne trefëne i nyidro hnene laka, pë fe hë ijine koi nyidro. Öni Lionel qa Liberia ka hape, “Kola eetr e itre xa ijine hnene la föenge me qaja ka hape, pëkö hnenge hna hane kuca kowe la nekö i nyiho, ngo angeice casi pala hi la ka akötrehni nyën. Itre ithanata hi lai ka ithaipië, celë hi kepine matre hnenge fe hna hane sa akötrëne koi angeic.”

IXATUA: Loi e tro keme me thin a hane mekune la itre ewekë hna ajane hnene la itre xa nekö i nyidro, matre tro nyudreni a hane atre ka hape, ka tru fe nyudreni koi nyidro. Ame lo föe hna qaja ngöne la qaane la tane celë, ene Jenney, tre öni angeice ka hape: “Ame itre xa ijin, tre nyiho a mekune la nekö i nyiho ka tru, celë hi matre hne huni hna lapaa nango ce tro koi restaurant, lo aja i angeic, troa ce xeni hnaipajö.”

Ketre, loi e tro la lue trefëne a ce porotrike me ce thith, matre tro kö a catrecatre la faipoipo i nyidro. Kola qaja hnene la ketre trahmanyi qa Inde, ka trene kuku hna tithe hnei mec, ka tune lo itre ka öhn, ka hape: “Maine eni me föenge mina a kucakuca me nyiqaane wesitre lapa, tre nyiho pë hë a pane lapa ju, me ce ithanata me thith. Nge qëmekene tro la itre nekö i nyiho a hlë e hmakany, tre nyiho a pane xome jë la ketre mekene Tus, me ce ithanatan.” Ame pena la itre xa trefën, tre angatr a pane ce porotrike qëmekene la troa meköl. Maine tro la lue trefën a pane ce porotrike me ce thith, nge nyidroti hmekuje hi, tro kö a cile huti la faipoipo i nyidro e traqa pi la itre drai ngazo. (Ite Edomë 15:22) Hna melëne hi lai hnene la lue xa trefën; celë hi matre öni nyidro: “Ame la itre ijine ka lolo ngöne la mele i nyiho, ke eje hi ngöne lo lai nyiho a ixelë memine la itre jol.”

PANE TUPATHE JU LA: Mekune kö qaja aloine la itre xa nekö i nyipunie, ngöne la nyudreni a xatuane la nekö i nyipunieti ka wezipo. Nge the cile kö troa amamane la ihnim i nyipunie me qaja aloine la itre hna kuca hnene la fö i nyipunie, me ha nekönatr.

CATRE PI

Kola qaja hnene la Tusi Hmitrötr ka hape, easenyi hë tro Akötresieti a apatrene la nöjei pengöne meci ka lepe la itre nekönatre me itre ka tru. (Hna Amamane 21:3, 4) Ame ngöne lai ijine cili, “tha tro kö a qaja hnene la ate lapan’ eje, ka hape, Ini a mec.” b—Isaia 33:24.

Ngacama ka wezipo la nekö i nyipunie, ngo ijije hi tro nyipunieti a mele madrin. Önine lo lue trefën, ene Carlo me Mia ka hape: “Ame la easa öhne la kola traqa itrai la itre jol, tre tha tro kö sa canga kucakuca. Lapa mekune ju pe së la itre ewekë ka lolo hne së hna öhne thene la nekö së nge ka thue madrine së.”

[Ithueamacany]

ISA HNYINGE JË KA HAPE . . .

▪ Nemene la hnenge hna kuca matre egöcatre pala hi ni me madrin, nge matre loi fe la aqane imelekeunge me Iehova?

▪ Hnenge fe kö hna qaja aloine la ha neköng, ngöne la nyudreni a hane ixatua?

[Iatr ne la götran 12]

Amamane jë kowe la ha nekö i nyipunieti laka, hnimi nyudreni asë hi hnei nyipunie