Atre fe hi Nyipunie?

Aqane kele wezipo i angetre Iudra ekö

Hnene la angetre Iudra hna pune majemine troa keleme la wezipo ngöne la drai ne angeic a mec. Luetre lao kepine matre angatr a ujë tune lai. Ame la hnapan, tre hnene laka, canga hnyeqetre hi la ngönetrei ne la itre ka mec, ke itre nöje gaa hedredrei la nöje hnei angatre hna mele ngön. Ame la hnaaluen, tre hnene laka, nyine hmahmane ekö kowe lai wezipo me kowe la hnepe lapa i angeic, la troa nue aqeane lai wezipo nge tha hna canga keleme kö.

Kola mama ngöne la itre Evangelia, me ngöne la tus i Ite Huliwa la foa lao wezipo hna kelem ngöne la drai ne angatr a mec. (Mataio 27:57-60; Ite Huliwa 5:5-10; 7:60–8:2) Ame ngöne lo itre drai ka he ekö catr, hna meci hnei Rakela, föe hnimina i Iakobo, ngöne la ketre ijine angatr a tro. Tha hnei Iakobo ju kö hna xomi Rakela matre troa kelem ngöne la ngönemenyi ne la hnepe lapa i angatr, ngo hnei Iakobo hna canga kelemi nyiidro “ngöne la sane . . . Betheleema.”—Genese 35:19, 20, 27-29.

Kola mama e hnine la Tusi Hmitrötr laka, ka wange atrune angetre Iudra la troa iheetrë. Tro la itre atrene la hnepe lapa me itre sinee a pane siën la wezipo, me sië wakacun, nge thupene jë hi lai, angatre pë hë a atuthe jë. (Ioane 19:39, 40; Ite Huliwa 9:36-41) Ijine tro hi la itre ka lapa ezi angatre me itre xan a traqa matre troa fetra, me pane ce lapa memine la itre sinee ne la wezipo.—Mareko 5:38, 39.

Hapeu, hna hane kö kelemi Iesu tune lo hna majemine hnei angetre Iudra?

Ala nyimu la angetre Iudra ka amë la itre wezipo i angatr ngöne la itre ngönemenyi, maine ngöne la itre hua pena hna sine ngöne la itre götrane gaa hmelek e Isaraela. Angatre kö lai a xome lo aqane kele wezipo ne lo itre keme i angatr. Ame Aberahama ekö, me Sara, me Isaaka, me Iakobo me itre xane kö, tre hna kelemi angatr ngöne la ngönemenyi e Makepela, hmekune e Heberona.—Genese 23:19; 25:8, 9; 49:29-31; 50:13.

Hna hane ami Iesu ngöne la ngönemenyi. (Mareko 15:46) Tha ka isaisa catre kö la ula ne la ngönemenyi. Ngo ame pe e koho hnin, tre hna si göhne i itre wezipo ngöne la ngönegiti trootro, matre troa isa ami angatr e cili. E fitre hnyawa ha la ijön nge ijune ju pe hi, kolo ha xome la itrapa june ne lai ka mec me amë hnine la ikes etë hna saasa. Celë hi hna majemine kuca ekö ngöne lo hneijine i Iesu, matre hetre göhne ne pala hi la itre xa sinee ka mec.

Ame ekö fene la Wathebo i Mose, hna wathebone koi angetre Iudra troa kele wezipo ngöne la Sabath. Ame ngöne lo ijine Iesu a mec, tre köni hawa pe hi matre xejë jë hë la Sabath. Qa ngöne lai, tha sië wakacu Iesu ju kö hnei Iosefa, lo atre Arimathea, me itre xan, ngo hnei angatre pe hna canga kelemi nyidrë. (Luka 23:50-56) Celë hi kepine matre, ame hë thupene la Sabath, hnene la itre sinee i Iesu hna tro kowe la hua i nyidrë matre troa afenesine la huliwa i angatr.—Mareko 16:1; Luka 24:1.