KA QA NGÖNE ICETRÖN: HNA AMELE IESU HMACA—NEMENE LA ENYIPIEWEKËNE KOI NYIPUNIE?

Ka Qa Ngöne Icetrön—Hna Amele Iesu Hmaca Nyipici Kö?

HNEI Hérodote ekö, ketre atre Heleni ka inamacan, hna thele troa atrepengöne la aqane mele ne la angetre Aigupito ne la hneijine i nyidrë. Hnei nyidrëti hna cinyihane ka hape: “Ame ngöne lo itre ijine pui ne xeni ne la itre ka trenamo, maine ase hë angatr xeni hej, hetre hnei angatre hna majemine kuca. Tro la ketre a cil, me tro fë kowe la iatr la ketre kesi ne ami wezipo, hna cane me hna amingömingöne tune lo itre nyipi kesi ne ami wezipo. Ame e kuhu hnin, tre hna amë pe la ketre hnasaatr sinöe ka nyihatrene la atr ka mec. Ketre elo lai hnei angatre ekö hna kuca, nyine qaja kowe la iatr, ka hape ‘Madrine jë nge iji jë, ngo goeëne ju la pengö i ’ö, e meci hë eö.’ ”

Tha angetre Aigupito hmekuje kö la ka hetrenyi la aqane waiewekë cili, göne la mele me mec. Ketre ame enehila, pi tro fe la itre atr a qaja, ka hape “Xeni jë, iji jë, nge madrine jë pe.” Öni itre xan ka hape, maine eje hi lai laka, tro sa meci e ketre drai, haawe the cile kö së troa kuca asë la itre mekuna së, ke ijine hi la! Nyine ue la troa kuca la itre ewekë ka loi? Haawe, pine laka meci la pune koi së, öni itre xan ka hape, mele jë hi koi enehila. Ithanata lai hna amexeje hnei Paulo aposetolo, ngöne lo angeic a qaja la aqane mele ne la itre atr ka tha lapaune kö kowe la mele hmaca. Öni angatr: “E tha hna amelene hmaca kö la nöjei ka mec, tro sha xeni me iji, ke elanyi la tro sha mec.’ ”—1 Korinito 15:32.

Tha ka hane kö Paulo mekune ka hape, e meci hë la atr, tre eje hë lai. Ka xeci hnyawa pe e kuhu hni angeic ka hape, ijije tro la atr ka meci a mele hmaca, me mele uti hë epine palua. Hna nyitrepene la lapaune i Paulo hnene la ewekë ka tru ka traqa ekö, nge hna thatreine jelethoine hnene la itre atr; kola qaja la mele hmaca a i Iesu Keriso. Eje hi lai sipu trepene ka catr ne la lapaune ne la itre pane Keresiano ekö.

Ngo hapeu, nyipi ewekë kö koi së la mele hmaca i  Iesu? Nge nyipici kö ka hape, hna amele nyidrëti hmaca? Tro sa pane wange la hnei Paulo hna qaja, ngöne lo angeice a cinyany ekö kowe lo itre Keresiano ne Korinito.

HAPEU E THA AMELE KERISO JU?

Ame la itre xa Keresiano ne Korinito ekö, tre thatre hnyawa kö angatre la pengön, nge ame pena itre xan, tre tha ka lapaune kö angatre kowe la mele hmaca. Celë hi matre Paulo aposetolo pë hë a cinyihane ju kowe la itre Keresiano ne la nöje cili, matre qeje pengöne la thangan, e tha hna amele Keriso ju. Öni angeic: “Maine pëkö mele hmaca qa hna mec, hawe, tha hna amele Keriso hmaca kö ; nge maine tha hna amele Keriso hmaca kö, gufa kö la cainöje hun, nge kete gufa kö la lapaune i nyipunie. Nge mama ha laka eëhuni la itete anyipicine thoi Akötesie . . . gufa kö la lapaune i nyipunie ; nge nyipunieti pala kö ngöne la nöjei ngazo i nyipunie. . . . Nge patë hë angate fe angete meköle thei Keriso.”—1 Korinito 15:13-18.

Hnei Paulo hna nyiqaane qaja la ketre mekune ka jole koi itre atr troa jelethoin; öni angeice ka hape, maine pëkö mele hmaca, haawe, tha hna hane kö amele Keriso hmaca. Nge maine nyipici laka, tha hna amele Keriso kö, nemene hë la thangan? Gufa kö la hnei angatre hna cainöjëne la maca ka loi, ke trengathoi la hna tro fë. Ame la mele hmaca i Keriso, tre celë hi trepene la hmi Keresiano lai, nge ka xatuane la Keresiano troa trotrohnine la itre la hna qaja hnei Tusi Hmitrötr göne la musi cile i Akötresie, me atresiwa i Nyidrë, me Baselaia i Nyidrë, memine la aqane tro la atr a hetrenyi la mel. Maine tha hna amele Keriso ju, gufa catr nge ka pë aliene la maca hnei Paulo, me itre xa aposetolo hna tro fë.

Maine tha hna amele Keriso ju qa hna mec, gufa mina fe, nge ka pë aliene la hmi Keresiano, nge hna nyitrepene hnei trengathoi. Kolo lai a qaja ka hape, trengathoi lo mele hmaca i Iesu hna qaja hnei Paulo me itre xan, nge trengathoi fe lo hnei angatre hna qaja göne lo Atre amele Iesu, ene Iehova Akötresie. Nge qa ngöne lai, ketre thoi mina fe lo ini ka qaja ka hape, hnei Keriso “hna elelengë [mec] göi ite ngazo shë;” ke thatreine kö tro la atr hna tha thapa kö qa ngöne la mec a amelene la itre xa ka mec. (1 Korinito 15:3) Ketre, ame lo itre Keresiano ka meci pine catre fë la lapaune i angatr, tre, hnei angatr hna meci menu fë la mejiune laka, tro ha amele angatre hmaca elany.

Celë hi matre Paulo pë hë a qaja ju ka hape: “Maine eësha mejiu Keriso ngöne la mele celë hmekuje hi, hawe, ngazo shë hune la nöjei ate asë.” (1 Korinito 15:19) Hnei Paulo ekö me itre xa Keresiano hna melëne la itre ijine akötr, nge hna axösisi angatr, hnei angatre fe hna melëne la itre ijine jol, hna humuthi itre xan, pine angatre lapaune kowe la mele hmaca memine la itre eloine ej. Maine eje hi laka, trengathoi la mele hmaca, tre ekölö hi ni pe!

LOI E TRO SA LAPAUNE KOW

Tha hnei Paulo kö hna mekune ka hape, trengathoi la hna lapaune kow hnene la itre Keresiano. Atre hi angeice ka hape, hna amele Iesu hmaca qa hna mec, nge hnei angeice hna amexeje koi angetre Korinito la itre mekune ka anyipicine lai; öni angeic: “Hnei Keriso hna elelengë göi ite ngazo shë thenge la ite hna cinyihan ; nge hna kelemi anganyidë, nge hna amelene hmaca ngöne la drai hnaakönine thenge la ite hna cinyihan ; nge hna xajawa nyidë hnei Kefa, nge thupene lai hnene la ala luako.” b Nge angeic a qaja ju fe ka hape: “Thupene lai hna ce xajawa nyidë hnei ange tejine ka tripi la o hadede me sin ; ala nyimu angat’ a mele uti hë la, ngo ite xan’ a meköl ; thupene lai hna xajawa nyidë hnei Iakobo ; thupene lai hnei ange aposetolo asë ; thupe i angat’ asë hnenge fe hna xajawa nyidëti kösë ka traqa ija.”—1 Korinito 15:3-8.

 Ame la itre pane mekune hna qaja hnei Paulo, tre ene laka hnei Keriso hna meci pine la itre ngazo së, nge hna kelemi nyidrë, me amele nyidrëti hmaca. Pine nemene matre xeci hnyawa e kuhu hni Paulo laka, nyipici la itre mekune cili? Pine laka, ala nyimu la itre ka sipu öhnyi Iesu thupene la hna amele nyidrëti hmaca. Hnei nyidrëti hna iamamany koi itre atr isa ala cas (ene Paulo mina fe), me kowe la ka ala nyim, nge goi mama fe nyidrë kowe lo ala 500 ka tha jelenyipicine kö ka hape, mele hmaca ha Iesu! (Luka 24:1-11) Pine laka ala nyimu petre kö ekö ngöne lo hneijine i Paulo lo itre ka öhnyi Iesu thupene la hna amele nyidrë, haawe, ijije hi tro angatre lai a jelenyipicine la hna qaja hnei Paulo. (1 Korinito 15:6) Maine ala casi ju hi, maine ala lue pena la ka öhnyi Iesu, tre ma tha tro kö a jelenyipicine la hna qaja; ngo ala 500 la itre ka ijije troa anyipicin.

Hnei Paulo hna alua qaja ka hape, hnei Iesu hna mec, nge hna kelemi nyidrë, me amele nyidrëti hmaca “thenge la ite hna cinyihan.” Itre ewekë lai ka traqa ekö nge ka anyipicine laka, ame lo itre hna perofetane göi Mesia ngöne la Isisinyikeu Ka Hekö, tre eatr asë hi thei Iesu, nge jëne tro hi së lai a jelenyipicine laka, nyidrëti hi lo Mesia hna thingehnaean.

Ngacama hna jelenyipicine hnei itre atr me hnei Tusi Hmitrötr laka hna amele Iesu hmaca qa hna mec, ngo ala nyimu pala kö la itre ka luelu. Öni itre xan, ka hape ame lo itre ka qaja ka hape, mele hmaca ha Iesu, tre hnei angatre hi lo lai hna atrekënö la ngönetrei nyidrë. Ngo drei e angatr ka atreine troa kuca la ketre ewekë kowe la itre soce i angetre Roma, ka thup hmekune lo hua? Ame koi itre xan, tre tha hnei Iesu kö hna nyipi iamamany, ngo hnei itretre drenge hi hna lapa mekune ngöne la itre he i angatr, la angatr a öhnyi Iesu. Ngo tha eje kö lai, pine laka, isa ijine kö la angatr a öhnyi Iesu. Ketre, maine hna lapa mekune hi hnei itretre dreng ngöne la itre he i angatr la angatr a öhnyi Iesu, tre drei pë hë la ka dreu ie me thu öni angatr e Galilaea? (Ioane 21:9-14) Nge hapeu,  atreine kö troa ketr la ewekë hna lapa mekun?—Luka 24:36-39.

Itre xane kö a catre fë ka hape, hnei itretre drei Iesu hna ce thë troa qaja ka hape, hna amele nyidrëti hmaca. Ngo maine thoi ju angatr, nemene la eloine lai koi angatr? Hna hnyima sai angatr, me akötrë angatr, goi meci fe itre xan, pine qaja trongëne ka hape, hna amele Iesu hmaca. Hnauëne pena laka, tro angatr a mec, pine la hna catre fë la ketre trengathoi? Angatre petre hi lo itre ka xötrei qeje mele hmaca e Ierusalema qëmekene la itre ka icilekeu me angatr, nge ka thele hë troa kootrë angatr.

Ngacama catrehnine catr ekö la icilekeu, ngo hnene la mejiune i itretre dreng hna aijijë angatr troa hetre trenge catr troa cainöjëne la mele hmaca ne la Joxu i angatr. Kösë ka hape, ini cili hi la hnei angatre hna qaja catrëne ngöne la hneijine i angatr. Tha hnene kö la itre Keresiano cili hna nue mele göi troa cainöjëne ka hape, hna humuthe la atre ini angatr. Angatre pe a cainöjëne la mele hmaca i Iesu, pine laka, eje hi lai ka anyipicine laka nyidrëti hi la Keriso, ene lo Hupuna i Akötresie ka trene men, atre ce mele me angatr, me xatua angatr, me köja gojenyi angatre mina fe. Maine hna amele nyidrëti hmaca, haawe, tro fe a hane amele angatre hmaca qa hna mec. Ngo maine tha hna amele Iesu ju kö, thatreine kö troa cile la hmi Keresiano, nge ketre, thatre ju fe kö së ka hape, hnei Iesu hna mele e celë fen.

Ngo nemene jë la thangane la mele hmaca i Iesu koi së enehila?

[Ithueamacany]

[Iatr ne la götran 3]

[Hna cinyhan ne la götran 4]

“Hna ce xajawa nyidë hnei ange tejine ka tripi la o hadede me sin . . . thupene lai hna xajawa nyidë hnei Iakobo ; thupene lai hnei ange aposetolo asë ; thupe i angat’ asë hnenge fe hna xajawa nyidë.”—1 Korinito 15:6-8

[Hna eköhagen ne la götran 6]

ITRE HNA HNYINGËNE LAPAN

Drei la ka troa mele hmaca?

“Tro ha mele hmaca la nöjei ka meköt, me ka tha meköti kö.” (Ite Huliwa 24:15) Ame la itre ka meköt, tre kolo itre atr ka mele nyipici koi Akötresie, tui Noa me Aberahama, me Sara. Ame pena la itre ka tha meköti kö, tre kolo itre ka tha trongëne kö la itre trepene meköt i Akötresie, ke pë ju kö ijine tro angatr a inine me trongëne la itre trepene meköti cil.

Ekaa la hna troa amelene hmaca la itre atr?

Ame itre xan tre tro ha amelene hmaca, matre xom la pengö i ua, me xome la hnëqa ne itretre huuj, nge tro fe angatr a ce musi me Keriso e koho hnengödrai. (Hna Amamane 5:9, 10) Ame pë hë itre xan, tre angatr a troa mele hmaca e celë hune ihnadro, nge tro angatr a mele madrine ngöne la paradraiso e celë fen.—Luka 23:39-43.

Eu la troa amelene hmaca la itre atr ka troa mel e celë fen?

Epine jë e ase hë apatrene la iangazo qa la fen. Kola qaja e hnine la Tusi Hmitrötr ka hape, tro ha amelene hmaca la itre atr ngöne la ijine Iesu a troa musi koi ca thauzane lao macatre, ijine kola troa kuca matre paradraiso asë jë hë la fene hnengödrai.—Hna Amamane 20:6.

Hetre itretrengekeune kö la Paak memine la mele hmaca?

Ame e cailo fen, hetre itre ewekë hnei itre atr hna kuca göi troa atrune la ijine mele hmaca i Iesu. Ngo ame göi itre hatrene hnei angatre hna xome nyine atrune la ijine cili, me itre hna majemin, tre itre ewekë lai ka fetra qa ngöne la itre hmi wanaithihlë. Ngo hapeu, ka pëkö pengöne la itre hna majemine cili? Ohea. Kola upi së hnene la Wesi Ula i Akötresie troa iananyi memine la hmi ka thoi, ngo tro pe a “hmi kowe la Tetetro ngöne la [“ua,” MN] me nyipici.”—Ioane 4:23; 2 Korinito 6:17.

Maine nyipici la hnei itre xa hmi hna qaja ka hape, Iesu lae Akötresie, nga drei kö la ka amele Iesu?

Tha Iesu kö la Akötresie, ngo Iehova pe. Hupuna i Akötresieti pe Iesu, nge Iehova la ka amele Iesu hmaca qa hna mec. (Roma 10:9) Önine la ketre atr ka inamacane nge ka thele troa atrepengöne la Tusi Hmitrötr ka hape, “Pëkö ketre atr ka atreine troa amele angeice kö, goi thatre fe Keriso.” c

[Ithueamacany]