Kola Sa Hnei Tusi Hmitrötr

Kepine matre kola hë Iesu ka hape, Hupuna i Akötresie

Tha nyipi ewekë kö koi Akötresie troa xomi föe matre hetre nekö i Nyidrëti jë, pine laka Nyidrëti hi la Atre Xup, nge qaathei Nyidrëti la mel. Hnei Nyidrëti hna xup la atr cememine la atreine troa xome la itre thiina i Nyidrë. Celë hi kepine matre hna hëne lo pane atr hna xupe hnei Akötresie, ene Adamu, ka hape “nekö i Akötesie.” Ka tui Iesu fe hi, kola hë nyidrëti ka hape “Hupuna i Akötesie,” pine laka hna xupi nyidrë cememine la atreine troa xome la itre thiina ne la Tretretro i nyidrë.—E jë la Luka 3:38; Ioane 1:14, 49.

Eue la kola xupi Iesu?

Ame la hna pane xupe hnei Akötresie, tre Iesu hi, nge patre petre kö Adamu. Kösë hna xupi Iesu nge jëne nyidrë, kola xupe asë pë hë la itre xa xupuana, tune lo lai itre angela. Celë hi kepine matre kola hë Iesu hnei Tusi Hmitrötr ka hape “haetra ne la nöjei hna xup’ asë” hnei Akötresie.—E jë la Kolose 1:15, 16.

Qëmekene troa hnaho Iesu e Betheleema, ketre ua nyidrëti ekö e koho hnengödrai. Ngo ame hë ngöne la ijine hna sa, hnei Akötresieti hna xome la mele ne la Hupuna i Nyidrë, me amë hnine la trengene hnaho i Maria, matre troa hnaho Iesu, atr.—E jë la Luka 1:30-32; Ioane 6:38; 8:23.

Pine nemene matre Akötresieti a aijijëne troa hnaho Iesu e celë fen ceitu me ketre atr? Nemene la hnëqa ka ketre pengöne hna eatrëne hnei Iesu? Tro nyipunieti a öhne la itre mekune ka sa la itre hnyinge celë e hnine la Tusi Hmitrötr, nge tro itre ej a akökötrene hnyawa la trotrohnine i nyipunie memine la hni ne ole i nyipunie kowe la hnei Akötresie me Iesu hna kuca thatraqai nyipunie.

Maine nyipunieti a ajane la itre xa ithuemacany, Nemene La Nyipi Ini Hna Hamën Hnei Tusi Hmitrötr? goeëne ju lo mekene 4 ne la itusi celë, hna kuca hnene la Itretre Anyipici Iehova

[Iatr ne la götran 16]

Ketre ua Iesu ekö e koho hnengödrai qëmekene troa hnaho nyidrëti e Betheleema