“Siponejë, Ame Hna Hamë Nyipunieti Pi”
EASENYI JË KOI AKÖTRESIE
Nyidrëti La “Akötesieti Ne . . . [La] Ite Ka Mel”
Hapeu, atreine kö Akötresieti troa ngane la mec? Pë kö sa i Nyidrë, ke, “Akötesie ka ’tein asë” Nyidrë? (1 Korinito 15:26; Esodo 6:3) Pëkö ejolene tro Akötresieti a ngane la mec, ke, Nyidrëti a troa amelene hmaca elanyi la itre ka mec ngöne la fene ka hnyipixe, tune lo aqane thingehnaeane Nyidrë. a Nyipici kö lai? Hnei Iesu, lo Hupuna i Akötresie, hna qaja la itre trengewekë ka acatrene ekuhu hni së la mejiune cili.—E jë la Mataio 22:31, 32.
Ame la Iesu a ithanata kowe la angetre Sadukaio, itre atr ka xele ma hane kapa ka hape, hetre mele hmaca, öni nyidrë: “Ngo ame ngöne la troa mele hmaca qa hna mec, te, tha hna e kö hnei nyipunie la hnei Akötesieti hna ulatine koi nyipunie, ka hape, ‘Ini la Akötesi Aberahama, me Akötesi Isaaka, me Akötesi Iakobo ?’ ke tha Akötesieti ne kö la ite ka mec, ngo loi pe ite ka mel.” Iesu hi la a amexeje hmaca lo ithanata i Akötresieti ekö koi Mose, ngöne lo angeic a cile hmekune lo isinöe ka palulu hnei eë, ngöne lo macatre 1514 M.P.K. b (Esodo 3:1-6) Ame hi lo lai itre hna qaja hnei Iehova koi Mose, kola hape, “Ini la . . . Akötesi Aberahama, me Akötesi Isaaka, me Akötesi Iakobo,” ke, kolo hi lai a amamane ka hape, tro kö a eatre hnyawa elanyi la hna thingehnaeane göi mele hmaca. Troa eatre tune kaa?
Pane mekune jë së lo lai ijine cili, lo Iehova a ithanata koi Mose. Itrapajune hë Aberahama ekö, me Isaaka, me Iakobo; 329 hë lao macatre i Aberahama e hnine la hua, nge 224 Isaaka, nge 197 Iakobo. Ngo hnei Iehova hna qaja ka hape, “Ini la” Akötesi angatr, ngo tha hna hape kö “Ini lo” Akötresi angatr. Kösë lo ka hape, ame koi Iehova, tre itre ka mele angatre lai köni tixe ne lapa cili. Pine nemen?
Hnei Iesu hna qaja ka hape: “Tha Akötesieti [Iehova] ne kö la ite ka mec, ngo loi pe ite ka mel.” Pane mekune jë së la aliene la trengewekë celë. Maine troa pë mele hmaca, tre ka meci palua ha Aberahama, me Isaaka, me Iakobo. Nge thatreine kö troa qaja ka hape, Iehova la Akötresi ne la itre ka mel, ngo Akötresi ne la itre ka meci pë hë Nyidrë. Nge ketre, kösë kolo hi lai a hape, ase hë nga Iehova hnene la mec, ke pëkö mene i Nyidrë troa thapa la itre hlue i Nyidrë qa ngöne la mec.
Ngo tune kaa la pengö i Aberahama me Isaaka me Iakobo, memine lo nöjei hlue i Iehova ka mele nyipici uti hë mec? Hnei Iesu hna qaja la ketre mekune ka tru, kola hape: “Mele asë hë koi nyidë.” (Luka 20:38) Eje hi, Iehova a goeëne la itre hlue i Nyidrëti ka nyipici uti hë mec ceitu me itre ka mel, ke tro Nyidrëti a amele angatre hmaca qa hna mec. (Roma 4:16, 17) Tha tro jë kö Nyidrëti a thëthëhmine la itre hlue i Nyidrëti asë, matre e traqa ha la ijine elany, tha jole ju kö koi Nyidrëti troa amele angatre hmaca.
Aja i nyipunieti kö troa iöhnyi hmaca memine la itre atr hnei nyipunieti hna hnim ka meci hë? Loi e tro pala hi nyipunieti a mekune hnyawa laka, tha ewekë ka jole kö koi Iehova la troa amelene hmaca la itre ka mec, ke trene mene Nyidrë. Pëkö ka troa sewe Nyidrë troa aeatrëne lo hnei Nyidrëti hna thingehnaean, ene la troa amelene hmaca la itre ka mec. Haawe, ijine tro hi la a thel troa atre hnyawa la pengöne la mele hmaca memine la aqane tro Akötresieti a aeatrëne lai. Maine tro sa ujë tune lai, tro hë sa easenyi catre koi Iehova, “Akötesieti ne . . . [la] ite ka mel.”
Itre Mekene Tusi Hmitrötr Nyine e
[Ithueamacany]
a Maine nyipunieti a pi atre la hna thingehnaeane hnei Akötresie göi mele hmaca elanyi ngöne la fene ka meköt nge ka hnyipixe, haawe, wange ju la mekene 7 ne la itus Nemene La Nyipi Ini Hna Hamën Hnei Tusi Hmitrötr?, hna kuca hnene la Itretre Anyipici Iehova.
b Macatre Patre Petre kö Keriso.
[Hna cinyihan ne la götran 13]
Tha jole kö koi Iehova troa ngane la mec
