Jëne Mel La Mele Hmaca i Iesu!

THA tro kö sa wange acone la mele hmaca i Iesu qa ngöne laka, ekö catre hë amele nyidrë, nge tha tro kö sa mekune ka hape pëkö enyipiewekëne eje koi së enehila. Hnei Paulo aposetolo hna amamane la enyipiewekëne lai, ngöne la angeic a cinyihane me hape: “Hna amele Keriso hmaca qa hna mec, nge nyidëti la ka pane mele e angete meköl. Ngöne laka traqa ha la meci hnei ate, kete traqa ha la troa mele hmaca qa hna meci hnei ate. Ke meci asë göi Adamu, tune lai troa amelen’ asë hmaca göi Keriso.”—1 Korinito 15:20-22.

Hna amele Iesu hmaca lo 16 Nisan 33 M.K., a ene lo drai ne tro la angetre Iudra a tro fë koi Iehova ngöne la ēnē e Ierusalema, lo itre pane wene ne la zi angatr. Ame la Paulo a qaja göi Iesu ka hape, nyidrëti la ka pane mel, tre kolo lai a qaja ka hape, hetre itre xan hna troa amelene fe qa hna mec.

Hnei Paulo mina fe hna qaja la thangane la mele hmaca i Iesu. Öni angeic: “Traqa ha la meci hnei ate, kete traqa ha la troa mele hmaca qa hna meci hnei at.” Eje hi laka tro asë hi së a mec, pine laka edrö së qaathei Adamu la ngazo me mec. Ngo hnei Iesu hna thepe së qa ngöne la ngazo me mec, jëne la mele ka pexeje hnei nyidrëti hna nue thatraqai së, matre ijiji së fe troa hane mele hmaca qa hna mec. Celë hi mekune hna amexeje hnei Paulo, ngöne la angeic a cinyihane ngöne Roma 6:23 ka hape: “Ame la thupene la ngazo, te, mec ; ngo ame la ahnahna i Akötesie, te, mele ka tha ase palua kö göi Iesu Keriso Joxu shë.”

Hnei Iesu fe hna hane qeje pengöne la thangane koi së e tro nyidrëti a mec, me mele hmaca. Öni nyidrë göi nyidrëti kö: “Troa adraiëne la Nekö i ate ; mate tha tro kö a meci la kete e angete lapaune koi angeic, ngo tro ha hetenyi la mele ka tha ase palua kö. Ke hnei Akötesieti hna hnime la fene hnengödrai, mate nyidëti a hamëne la Nekö i nyidëti ka cas, mate tha tro kö a meci la kete e angete lapaune koi nyidë, ngo tro ha hetenyi la mele ka tha ase palua kö.”—Ioane 3:14-16.

Ase hë nyipunieti hane mekune laka, tha tro hmaca kö sa hane meci elany, nge pë hmaca kö awe, me akötr, me hleuhleu? (Hna Amamane 21:3, 4) Thatreine fe kö së qaja la ketre madrine ka tune lai! Kola qaja hnene la ketre atr ka inamacane ka hape: “Ame la easa goeëne la itre hna kele wezipo, tre kola amekunë së la ehohopatrene la mel, ngo ame la easa atre ka hape, hetre mele hmaca, tre kola xatua së troa mekune laka, tha meci kö la pun.” Eje hi, jëne mel la mele hmaca i Iesu!

[Ithueamacany]