TRE HNA HNYINGËN . . .

Hapeu, Hnei Iesu Kö Ekö Hna Qaja Kowe Lo Atr Ka Ngazo Ka Hape, Tro Fe Angeic a Hane Tro Hnengödrai Eë?

Hnei Iesu hna ahnithe kowe la atr ka ngazo ka thipi ezi nyidrë, ka hape tro angeic a mele ngöne la Paradraiso. Öni Iesu: “Ini a qaja koi ’ö ngöne la drai celë[,] tro eö a ce me ini ngöne la paradaiso.” (Luka 23:43) Ngo ame pe, tha hnei Iesu kö hna qaja ka hape, ekaa. Ngo hapeu, hnei Iesu kö hna ahnithe kowe lo atr ka ngazo ka hape, tro fe angeic a hane tro hnengödrai eë?

Qëmekene troa sa, tro sa pane wange ka hape, ijiji angeice jë kö troa hane mele e hnengödrai? Ame la itre ka troa mel e hnengödrai tre, troa pane bapataiso angatre ngöne la timi me uati hmitrötr, matre itretre drei Iesu hë angatr, nge matre tro Akötresieti a hane xomi angatre nyine nekö i Nyidrë. (Ioane 3:3, 5) Ketre, loi e tro angatr a mele thenge la itre trepene meköt i Akötresie me hetrenyi la itre thiina ka loi, tune la troa nyipici, me pë ethan, me utipin. (1 Korinito 6:9-11) Loi e tro mina fe angatr a mele nyipici koi Akötresie me Keriso uti hë mec. (Luka 22:28-30; 2 Timoteo 2:12) Itre ka trongëne hmekuje hi la itre hna amekötine celë, la itre ka ijije troa mele hmaca e hnengödrai, me xome la hnëqa ka tru e koho, ene la troa huuje me joxu, ce me Keriso koi ca thauzane macatre.—Hna Amamane 20:6.

Ame lo atr ka thipi hune isinöe ezi Iesu, tre angeic a meci pine la ewekë ka ngazo hnei angeice hna kuca. (Luka 23:32, 39-41) Nyipici laka, hnei angeice hna metrötrë Iesu, ke öni angeice koi nyidrë: “Mekuneju koi ni e traqa ha cilieti kowe la baselaia i cilie.” (Luka 23:42) Ngo ame pe, tha ketre atre drei Iesu kö angeic hna bapataisone hnei uati hmitrötr; ketre, tha hnei angeice kö hna mele nyipici me kuca la meköti ngöne la ijine angeic a mel. Qa ngöne lai, maine qaja ju Iesu koi angeic ka hape, tro fe angeic a hane musi e hnengödrai, ce memine lo itretre drei Iesu ka mele nyipici uti hë mec, tre hapeu, meköti kö lai?—Roma 2:6, 7.

Pane mekune ju së ka hape, hnene la ketre atr hna atrekënö la manie i nyipunie, ngo angeice pë hë a qeje menu jë koi nyipunie. Maine jë tha tro kö nyipunieti a uti sai angeic. Ngo hapeu, tro kö nyipunieti a nue angeice troa cilëne la hnë saleme i nyipunie, maine thupëne la itre atrene la hnepe lapa i nyipunie? Ohea, itre hnëqa lai hnei nyipunieti hna troa ahnithe kowe la atr hnei nyipunieti hna atre hnyawa ka hape, ijije troa mejiune kow. Ketre, ame la itre ka troa mele epine palua e koho hnengödrai, tre loi e tro fe angatr a amamane ka hape, tro angatr a trongëne hnyawa elany la itre hna amekötine hnei Akötresie, ngöne la angatr a troa musi kowe la itre atr. (Hna Amamane 2:10) Ame lo atr ka ngazo, tre triane pë hë angeice lai hna amekötine celë, ngacama lolo hi la aliene hni angeic ngöne la angeic a sipone koi Iesu troa meku angeic.

Ngo hapeu, tha hnei Iesu kö lo hna qaja kowe lai atr ka ngazo ka hape, tro pala kö angeic a ce tro hnengödrai eë me nyidrë ngöne lai ijine cili? Ohea, pine laka, tha hnei Iesu kö hna elë e hnengödrai ngöne lai ijine cili. Köni drai ne nyidrëti a pane “lapa hnine la hnadro.” (Mataio 12:40; Mareko 10:34) Nge ame hë la kola amele nyidrëti hmaca, tre 40 pala kö lao drai ne nyidrëti a pane lapa e celë fen, qëmekene tro nyidrëti a elë hnengödrai eë. (Ite Huliwa 1:3, 9) Haawe, thatreine kö tro sa qaja ka hape, hnene lai atr ka ngazo hna ce elë hnengödrai eë me Iesu ngöne lai ijine cili.

Ngo ekaa ngön lai Paradraiso hna troa tro kow hnene la atr ka ngazo? Kola troa amele angeice hmaca e celë fene hnengödrai hna troa musinëne hnei Iesu. (Ite Huliwa 24:15; Hna Amamane 21:3, 4) Maine nyipunieti a ajane troa atrepengöne lai Paradraiso cili, memine la itre hna amekötine hnei Akötresie, tre pane hnyingëne ju kowe la ketre Atre Anyipici Iehova.