Saze hë la Mel, Hnei Tusi Hmitrötr

“Aja i Nyidro Laka Tro Kö Ni a Sipu Öhne La Nyipici”

Kola qeje pengöne hnei Luis Alifonso

IJINE HNAHON: 1982

ATRE: RÉPUBLIQUE DOMINICAINE

PENGÖN: KA TRU E HNINE LA HMI MORMO

MELENG EKÖ: Hna hnaho ni e Saint-Domingue, e République Dominicaine; ala foa eahun, nge eni pe hi la wene puhnen. Hetrenyi thei kakati me nenë la atrehmekune me inamacan, celë hi matre aja i nyidroti tro fe huni a hane tru e nyipine la itre atr ka loi thiina. Ame ju hi ngöne la ketre ijin, foa lao macatre qëmekene troa hnaho ni, hna traqa koi nyidroti hnene la itre mesinare ne la hmi Mormo. Kola haine hnei kakati me nenë la aqane heetre hnyawa ne la itre nekö trahmany, nge lolo pi hë la thiina i angatr. Haawe, öni kakati jë hi me nenë ka hape, tro asë hë la hnepe lapa huni a hmi Mormo, celë hi matre ame ngöne la hnapeti hun, eahuni fe hi la itre xa ka xötrei sine la hmi Mormo, lo hna hëne fe ka hape Église de Jésus-Christ des saints des derniers jours.

Ame la eni a tru trootro, madrine catre ni troa tro kowe la uma ne hmi hun, me sine la itre huliwa i hmi, nge ka wange atrune fe eni la itre trepene meköti hna hamëne thatraqane la mele ne la hnepe lapa, memine la itre trepene mel. Madrine catre ni troa hane sine la hmi Mormo; celë hi matre ame la ajang ekö, tre, ene la tro ni a hane mesinare ne la hmi Mormo.

Ame hë la kola 18 lao macatreng, eahuni ha mejë a tro États-Unis, göne la tro ni a hane ini ngöne iniversite. Matre, ca macatre i eahuni hë e cili, nge kola traqa koi huni e Floride hnene la jini nenë me fö i eahlo, lue Atre Anyipici Iehova. Hnei nyidroti hna hane hë huni troa ce sine me nyidro la ketre asabele ka tru. Ketre ewekë ka hnyipixe koi ni la eni a goeëne xötreithi ni la itre atr a isa fe Tusi Hmitrötr me isa fejane la itre mekun. Haawe, eni pë hë a hane sipo peene ju me pepa, matre tro ni a hane kuca tui angatr.

Thupene la asabele, kola qaja koi ni hnene la jini nenë me fö i eahlo ka hape, pine laka, eni a ajane troa mesinare, haawe, tro nyidroti a pane xatua ni troa atre la hna qaja hnei Tusi Hmitrötr. Ketre ka lolo ju hi koi ni, pine laka, tru catre la itre hnenge hna inine qa hnine la Tus i Mormo, ngo co pe hi qa hnine la Tusi Hmitrötr.

AQANE SAZE LA MELENG HNENE LA TUSI HMITRÖTR: Ame la eahuni a ce ithanatane la Tusi Hmitrötr jëne telefon, hnene pala hi la jini nenë me fö i eahlo hna ithuecatre koi ni troa fe la Tusi Hmitrötr, me wange ka hape, ka ihmeku jë kö la itre ini hnenge hna kapa,  memine la hna qaja hnene la Tusi Hmitrötr? Aja i nyidro laka tro kö ni a sipu öhne la nyipici.

Nyimutre catre la itre ini ne la hmi Mormo hnenge hna hane kapa, ngo tha nyipi mama hnyawa kö koi ni la aqane sajuëne hnei Tusi Hmitrötr la itre ini cili. Hnene la jini nenë hna iupi fë koi ni lo zonal Réveillez-vous ! ne 8 Nofeba 1995, hna fejane hnene la Itretre Anyipici Iehova, nge kolo hi a qaja la itre ini hna lapaune kow hnene la itre Mormo. Eni a sesëkötre laka, nyimutre la itre ini ne la itre Mormo hnenge hna thatre. Celë hi lai ka upi ni troa thele mekune ngöne la sit web ne la itre Mormo, matre troa wange ka hape, nyipici jë kö lo lai hna qaja hnene lai zonal? Ngo eje hi, nge hetre itre xa ewekë ju kö ka jelenyipicine lai, ngöne la eni a pane ihamë ngöne la musée ne la itre Mormo e Utah.

Hnenge pala hi hna mekune ka hape ceitune hi la itre mekune ka mama e hnine la itus i Mormo, me e hnine la Tusi Hmitrötr. Ngo ame ju hi la eni a hane e Tusi Hmitrötr, canga mama pi hi koi ni laka, isazikeu catre la itre ini hna hamën hnei itre Mormo memine la hna qaja hnei Tusi Hmitrötr. Hanawange la ketre ceitun: öni Tusi Hmitrötr ngöne la tus i Ezekiela 18:4, ka hape, ka meci la u. Ngo önine la Tus i Mormo ngöne Alma 42:9, ka hape: “Thatreine jë kö troa meci la u.”

Jole hë ekö la mekunang la eni a öhne la aqane isazikeu la itre ini memine la hna qaja hnei Tusi Hmitrötr, ngo the qaja pala ha la eni a öhne ka hape, hetre itre ini ne la hmi Mormo ka sajuëne la politik. Drei la lue ceitun: kola qaja hnene la itre Mormo ka hape, ame lo hlapa e Edena, tre, ej ekö ngöne la ketre götran e Amerika, hna hëne ka hape le comté de Jackson, e Missouri. Kolo fe a qaja hnene la ketre hna perofetane hnene la hmi Mormo ka hape, tro Akötresieti elanyi a musinëne la fene hnengödrai asë jëne la mus i Amerika.

Celë hi matre hnenge hna pane hnehengazo me mekune ka hape, maine nyipici hi, tre nemene fe la ka troa traqa elanyi kowe la nöjeng, me kowe la itre xa nöj? Ame ju hi ngöne la ketre heji lapa, eni a ithanatane la mekune celë ngöne telefone memine la ketre thöth ka hmi Mormo, nge ka ini matre troa hane mesinare. Eni pë hë a hnyinge jë koi angeice ka hape, e traqa ju elanyi isi la noje i angeic me ketre nöj, nge upi angeice jë hi troa tro troa hane isi me lepe la itre xa ka hmi Mormo ne lai nöje cili, tre hapeu, tro fe kö angeic a hane tro? Ketre sesëkötre pi kö ni la angeic a qaja ka hape, eje hi! Eni pë hë a pane mekune hmaca jë lo itre ini ka eköthe la lapauneng, me tro troa wange la itre hene ne la hmi Mormo. Ngo öni angatre koi ni ka hape, thatreine kö troa sa la itre hnyingeng, tro kö a traqa elanyi la ijine troa atreine sa la itre hnyinge cili.

Tha madrine kö ni la aqane sa hnei angatr koi ni; haawe, eni pë hë a pane cile ju, me mekune hmaca lo itre kepine matre eni a ajane troa mesinare ne la hmi Mormo. Eni lo a pi mesinare göi troa xatuane la itre atr e cailo. Nge ame lo eni a mekune la aqane metrötrëne itre atr la itre mesinare, pine la huliwa hnei angatre hna kuca, tre, kökötre jë hi e kuhu hninge la aja ne troa mesinare. Ngo atre hi ni laka, thatre Akötresieti hnyawa kö ni. Ngacama hnenge hë hna hane fe me e la Tusi Hmitrötr ekö, ngo thatre pengöne hnyawa kö ni la enyipiewekëne ej. Thatre kö ni la aja i Akötresie kowe la ihnadro me kowe la itre atr.

ITRE MANATHITHI HNENGE HNA KAPA: Ame hë la eni a inine la Tusi Hmitrötr memine la Itretre Anyipici Iehova, nyimutre la itre ewekë hnenge hna inin; ka tune la ëje i Iehova, me pengöne la atr ka mec, memine la hnei Iesu hna troa kuca matre troa eatrëne la aja i Akötresie. Ame hë e thupen, eni ha atre la itre ini hna qatrenge hnene la itusi cili ka lolo, nge hetre madrinenge troa hane ce thawa me itre xan la itre hnenge hna inin. Ekö hë ni atre ka hape hetre Akötresie, ngo ame hë enehila, eni ha ithanata koi Nyidrë jëne la thith, tune lo aqane ithanata hnene la lue treme sineen. Ame ju hi lo 12 Julai 2004, eni ha xomi bapataiso matre ketre Atre Anyipici Iehova ha ni, nge thupene la sikisi lao treu, eni fe hë a hane nyiqaane xome la huliwa ne cainöj ngöne la drai ka pexej.

Faifi hë enehila lao macatre ne eni a huliwa ngöne la Bethela ne la Itretre Anyipici Iehova e Brooklyn, New York. Atraqatre la madrineng qa ngöne la eni a hane ixatua kuca la itre Tusi Hmitrötr, me itre xa itusi kö ka sajuëne la hna qaja hnene ej, ke atre hi ni laka, ala nyimu la itre atr e cailo fen ka troa öhnyi loi qa ngön. Nge eni pala hi enehila a xatuane la itre xa atr troa atre Akötresie.