Tro Kö Nyipunieti a Lapa Treqe Akötresie?
Tro Kö Nyipunieti a Lapa Treqe Akötresie?
PANE mekune jë nyipunie ka hape, hetre sinee i nyipunie ka tru ihnimin, nge hetre ewekë hnei angeice hna kuca, ngo tha nyipi trotrohnine kö nyipunie la kepine matre angeic a ujë tune lai. Canga xöjetriji angeice ju hi me mekuhni angeice hnene la itre xa atr, me qaja ka hape, angeice la ketre atr ka pë ihnimin. Hapeu, tro kö nyipunieti a canga kei thenge la mekuna i angatr? Nge maine patre kö angeice ngöne la kola qeje angeic, tro kö nyipunieti a pane treqe angeic, matre ketre tro kö angeic a sipu qeje pengö i angeic?
Maine jë, ame la ewekë ka meköti nyine tro nyipunieti a kuca, tre ene la troa pane atre la nyipi pengöne la sinee i nyipunie, memine la kepine matre pi sinee i nyipunieti jë angeic. Celë fe hi lai nyine tro sa hane kuca göi Akötresie.
Maine jë, hetre itre ewekë hnei Akötresieti hna kuca maine hna nue pena, ngo tha nyipi trotrohnine kö nyipunie la kepine matre Nyidrëti a ujë tune lai. Ngo ala nyimu la itre atr ka troa canga qaja ka hape, Akötresieti ka pë ihnimine Nyidrë, nge tro fe angatr a uku nyipunie troa hane qaja angazo Nyidrë. Hapeu, tro kö nyipunieti a thele troa pane trotrohnine la kepine matre Akötresieti a ujë tune lai? Ewekë hi lai hnei nyipunieti hna troa kuca, e atrepengöi Nyidrëti hnyawa hi hnei nyipunie. Isa hnyinge jë ka hape, ‘Drei lae Akötresieti koi nyipunie?’
Maine hna traqa itrai koi nyipunieti ekö la itre jol, maine jë öni nyipunieti jë hi ka hape, tha semesine nyipunieti kö hnei Akötresie. Ngo hapeu, Akötresieti jë kö la qaane la itre jole cili? Nga Nyidrëti pe la qaane la itre manathith! The thëthëhmine pi kö së laka, Satana la ka musinëne la fen, tha Iehova kö. (Ioane 12:31) Haawe, Satana hi la ketre qaane la nöjei pengöne akötre hne së hna melëne ngöne la fene celë. Nge hapeu la itre sipu ngazo së me itre xa jole kö ka traqa koi së, tha itre eje jë kö lo lai itre xa jëne akötr?
Nemene fe la hnei Akötresieti hna hane kuca? Kola sa hnei Tusi Hmitrötr ka hape, Nyidrëti la “ate xupe la hnengödrai memine la fen”; nge “nyine hain” la aqane xupe Nyidrëti la ngönetrei së, nge Nyidrëti fe la “Akötesie ate musinëne la hnamano [së].” (Salamo 124:8; 139:14; Daniela 5:23) Ngo kolo lai a hapeu?
Ame la hetrenyi jë la hnamano, me mel, tre hnei Nyidrë. (Ite Huliwa 17:28) Ame la mel, me emingömingöne la ihnadro, memine la atreine troa hnime me ce mele madrine memine la itre sinee së, memine la troa drenge la ehnyapane la itre xen, me ketr la itre ewekë, me punepun, tre itre ahnahna asë hi lai qaathei Akötresie. (Iakobo 1:17) Ame hë la nyipunieti a goeëne la itre manathithi celë qaathei Akötresie, tre hapeu, tro kö nyipunieti a metrötrëne me mejiune koi Nyidrë, me xomi Nyidrë nyine sinee i nyipunie?
Nyipici laka maine jë, jole koi nyipunieti troa mejiune koi Akötresie, pine laka thatrepengö i Nyidrëti hnyawa kö hnei nyipunie. Tha ijije kö tro sa qaja asë la nöjei kepine matre itre atr a jele pë ihnimi Akötresie. Ngo, maine tro sa catre thele troa atrepengö i Nyidrëti hnyawa, tre tro kö sa isa öhnyi thangan. * Nge maine celë hi hnei nyipunieti lai hna kuca, tre tro hë nyipunieti a atre la nyipi pengö i Nyidrë. Hapeu ka pë ihnimine Akötresie? Ohea, “Akötesieti la ihnim.”—1 Ioane 4:8.
[Ithueamacany]
^ Tro nyipunieti a kapa la itre xa ithuemacany ngöne la itus Nemene La Nyipi Ini Hna Hamën Hnei Tusi Hmitrötr?, hna kuca hnene la Itretre Anyipici Iehova.
[Iatr ne la götran 7]
Akötresieti jë kö la qaane la itre jol? Nga Nyidrëti pe la qaane la itre manathith!