Saze hë la Mel, Hnei Tusi Hmitrötr

“Eni Ekö a Hane Pi Peen”

Kola qeje pengöne hnei Roberto Pacheco

IJINE HNAHON: 1957

ATRE: MEXIQUE

PENGÖN: KA INI NGÖNE SEMINAIRE; NGE KA PI ISI

MELENG EKÖ: Hna hnaho ni e Texcoco. Tha ase petre kö ekö kuca hnyawane la gojeny e cili, matre tru catre la so. Nge hnene la itre atr hna lapaa xome la gojenyi cili, me itre trengetreng hna atë hune boliko. Pëkö maniene la hnepe lapa hun, nge ala naene eahuni ha nekönatr; eni la hnaasevenen. Ame la huliwa ne la keme huni ekö, tre ene la troa kuca hnyawane hmaca la itre buutr ka zezeny, matre hetre thupene xeni kowe la hnalapa. Ngo ame hë la kola sevene lao macatreng, tre meci ju hi kaka. Celë hi kepin, matre nenë hmaca pena ha la ka isiine troa thele xeni kowe la hnalapa.

Ame qaqaa ekö, tre ka elo violon nyidrë, nge nyidrëti la ka jumi traeme ne la itre nyima ne hmi. Ka elo miuzik asë hi la itre atrene la hnepe lapa i eahun. Ka taperasi nenë, nge ame hmihmi, tre ka elo piano nyidrë, me nyima. Ka hmi asë hi eahun, nge qâng ekö troa xome trongëne la kuluse qëmeke i peenë; celë hi matre eni ekö a hane pi peen. Ngo ame la ketre ewekë hnenge hna ajane fe, tre ene la troa goeëne la itre film ne karate. Qa ngöne lai, kola kökötre trootro theng la troa pi isi, pine laka, ka lapaa goeëne ni la itre film ka tune lai.

Hnenge hna lö kowe la ketre uma ne ini hmi e Puebla. Ame la ajang ekö, tre ene la troa peen. Ngo ame hë la macatre ne eni a troa umuthe la ini, tre hetre itre ewekë hnenge hna tha kapa kö ngöne la hmi Katolik. Hnene la ketre sörëdi hna sipo ihanyi me ni, ngo xele kö ni. Ngo ame la ejolen, tre traqa ha koi ni la pi faipoipo. Ketre, öhne hë ni ka hape, ka hmi thoi la itre xa peen. Patre ju hi ngöne la ijine cili la ajange troa peen.

 Eni pë hë a tro jë kowe la conservatoire ne miuzik e Mexique, matre troa inine elo miuzik e cili. Ame hë la eni a kapa la hatreng, tre eni fe hë a faipoipo, nge hnaho fe hë eni me föeng. Eni pë hë a hane jë taperasi ngöne la hnë hmi, matre hetre thupene xen kowe la hnalapang.

Ngo nyiho petre hi a xötrei faipoipo, nge nyiho fe hë a isi. Tha mano kö ni me föenge isi, ke lue ka zalu asë hi nyiho. Ame lo xötrei, tre nyiho petre kö a isi ithanata, ngo ame hë e thupen, tre nyiho a isi iwanakoim. Thupene jë hi la 13 lao macatre, nyiho ha isa lapa me sei hna cil.

AQANE SAZE LA MELENG HNENE LA TUSI HMITRÖTR: Hna traqa ha koi ni ekö hnene la Itretre Anyipici Iehova, qëmekene tro ni me föeng a isa lapa. Lue föe la ka fenifeni qëhnelö me hnyinge ka hape, ajane kö nyiho troa ini Tus? Hnenge hna mekune laka, atre hnyawa kö ni la pengöne la hmi, matre öninge jë hi, tro ni a tupathi nyidro hnene la itre hnyinge ka jol. Ngo sesëkötre pi kö ni la nyidroti a fe la Tusi Hmitrötr, matre troa sa la itre hnyingeng. Nge ame e cili, trotrohnine ju hi ni ka hape, pëkö ca hnenge hna atre. Ngo ngazo la thiina ne la föenge kowe la Itretre Anyipici Iehova, nge tru pena la joleng matre tha traqa hmaca kö nyidroti lue föe troa iwai.

Thupene la faifi lao macatre, ame hë la eni iöhnyi hmaca memine la Itretre Anyipici Iehova, tre eni hmaca pena ha a ce lapa memine la ketre föe; Elvira la ëje i angeic. Tha ka xele ma wai Itretre Anyipici Iehova kö angeic, ene pe hmaloi ju hi koi ni troa ini Tusi Hmitrötre hnyawa. Ame pe la ewekë ka jole koi ni, tre ene la troa trije la itre hna majemine ekö ka ngazo.

Ngo trotrohnine hë ni ka hape, maine eni a ajane troa nyi hlue i Iehova hnene la hninge ka pexej, tre loi e tro ni isiine troa saze. Ame la pane nyine tro ni a kuca, tre ene la troa nue la taperas, me thele ketre jëne troa nyi thupene xeni kowe la hnalapa. (Hna Amamane 18:4) Ketre, loi e tro ni a faipoipo me Elvira.

Ame la ka jole catre koi ni ekö, tre ene la troa inine troa xomihnine la elëhning. Hna xatua ni hnene la lue mekene Tus; ame la ketre, tre Salamo 11:5, lo ka qaja ka hape, xele Iehova ma wange la atr ka pi isi. Ame la ketre, tre 1 Peteru 3:7, lo ka ini ni ka hape, maine eni a ajane tro Akötresieti a drenge la itre thithing, tre loi e tro ni a wang atrune la föeng. Ame la eni a sine thele la aliene lai lue mekene Tusi celë, me sipone koi Iehova troa xatua ni, tre drenge ju hi ni ka hape, atreine hë ni troa xomehnöthe la elëhning.

ITRE MANATHITHI HNENGE HNA KAPA: Ame enehila, eni a mele madrin, cememine la itre atrene la hnepe lapang. Eni fe a thele troa iloi hmaca memine lo pane ha neköng, me isiine matre tro la ifënekönge me ha neköng a lapa catre ngöne la nyipi hmi.

Ame lo eni a nekönatr, eni ekö a ajane troa peen, me xatuane la itre atr. Ame enehila, hetre nyipi aliene hë la meleng. Eni ha inine la itre atr troa elo miuzik, matre hetre nyine thupene xeni kowe la hnalapa. Eni a olene koi Iehova la hnei Nyidrëti hna nue ijine koi ni matre tro ni a saze, matre troa nyipi atr trootro!

[Iatr ne la götran 8]

[Iatr ne la götran 8]

[Hna cinyhan ne la götran 8]

Eni ekö a hane pi mesinare ne la hmi Katolik, ke ka xome trongë kuluse ni qëmeke i peenë; ngo hnenge hna lapaa goeëne fe lo itre film ne karate, matre ketre atr ka pi isi catre fe eni ekö

[Hna cinyhan ne la götran 9]

Hna ini ni hnene la Tusi Hmitrötr ka hape, maine eni a ajane tro Iehova a drenge la itre thithing, tre loi e tro ni a wang atrune la föeng

[Iatr ne la götran 9]